Aotelega o le Tausiga 2024—Sāvali mai le Au Peresitene Sili
O Peresitene Russell M. Nelson ma ona fesoasoani e toalua, o Peresitene Dallin H. Oaks ma Peresitene Henry B. Eyring, ua feiloai i le Peresitene o le Atunuu o Navajo o Dr. Buu Nygren ma le Faletua, le Tamaitai o Jasmine Blackwater-Nygren.
Uo Pelē,
Matou te matua faafetai lava mo a outou foai agalelei o taimi ma punaoa i le 2024. I le tausaga ua tea, sa valaaulia ai tagata o le Ekalesia ma uo e saili ma aapa atu i “le tasi,” e pei ona aoao mai e Iesu Keriso i Ana faataoto ma faaalia e ala i Lana galuega i le tino.
O a outou tali mai le loto e matuai faalotomaualoina ai lava. I le lalolagi atoa, ua outou galulue i lenei valaaulia e aapa atu i le toatasi ma alofa i lou tuaoi. Matou te faafetai mo a outou saofaga ma ua matou fiafia e faasoa atu le lipoti o le tausaga lenei o a matou taumafaiga tuufaatasi. O lenei aotelega o loo faaalia ai le auala, faatasi, na tatou tausia ai fanau a le Atua e ala i taumafaiga e pei o le tali atu i faalavelave faafuasei, fafagaina o e fia aai, ma le manatu mo le manuia o fafine ma tamaiti. O nei taumafaiga ua mafai ona maua e ala i lou agalelei, e faatinoina i le galulue faatasi ai ma faalapotopotoga faatuatuaina, ma e faateleina e ala i le agalelei o tagata i soo se mea o e taumafai e tausia o latou tuaoi o loo manaomia le fesoasoani.
A o faaauau pea ona tatou tausia fanau a le Atua, e mafai ona tatou fesoasoani ia i latou ia lagonaina Lona alofa paia. E alofa le Tama Faalelagi i Ana fanau taitoatasi ma e silafia le galuega lelei latou te faia. Matou te valaaulia outou e faaauau pea ona auauna atu ma alolofa ia i latou o loo siomia outou. Ia faamanuia outou e le Atua i a outou taumafaiga musuia.
—O Le Au Peresitene Sili
Tagai i Lenei Lipoti Faaletausaga i le Tausiga o i Latou e Manaomia le Fesoasoani
Na faapefea ona tausia e le Ekalesia i latou e manaomia le fesoasoani i le 2024? Saili e ala i le faitauina o le Aotelega faaletausaga o le Tausiga o i Latou o loo Manaomia le Fesoasoani.