Summary sa Pag-atiman sa tuig 2024—Mensahe gikan sa Unang Kapangulohan

Minahal nga mga Higala,

Mapasalamaton kaayo kami sa inyong gihatag nga daghang mga donasyon sa panahon ug mga kapanguhaan niadtong 2024. Sa miaging tuig, ang mga miyembro ug ang mga higala sa Simbahan gidapit sa pagpangita ug sa pagtabang “sa usa ka tawo,” sama sa gitudlo ni Jesukristo sa Iyang mga sambingay ug gipakita sa Iyang tibuok mortal nga pangalagad.

Ang inyong kinasingkasing nga pagsanong makapatandog gayod. Sa tibuok kalibotan, misunod kamo niini nga imbitasyon sa pagtabang sa usa ka tawo ug sa paghigugma sa inyong silingan. Mapasalamaton kami sa inyong mga kontribusyon ug malipayong mopahibalo sa report niini nga tuig sa atong hiniusa nga mga paningkamot. Kini nga summary nagpakita kon giunsa, natong tanan, pag-atiman sa mga anak sa Dios pinaagi sa mga inisyatibo sama sa pagresponde sa mga emerhensiya, pagpakaon sa gigutom, ug pag-atiman sa kaayohan sa kababayen-an ug kabataan. Kini nga mga paningkamot nahimo pinaagi sa inyong pagkamanggihatagon, gituman pinaagi sa pagpakigtambayayong sa kasaligan nga mga organisasyon, ug gipauswag pinaagi sa maayong kabubut-on sa mga tawo sa bisan asa nga nagtinguha sa pag-atiman sa ilang mga silingan nga nanginahanglan.

Samtang ipadayon nato ang pag-atiman sa mga anak sa Dios, makatabang kita kanila nga mobati sa Iyang balaanong gugma. Nahigugma ang Langitnong Amahan sa matag usa sa Iyang mga anak ug nakakita sa maayong buhat nga ilang gihimo. Dapiton namo kamo nga ipadayon ang pagserbisyo ug paghigugma niadtong anaa sa inyong palibot. Hinaot pa unta nga ang Dios mopanalangin kaninyo sa inyong makadasig nga mga paningkamot.

—Ang Unang Kapangulohan