Taylor Home, Print Shop, at Post Office

Tatlong malalaki at dalawang palapag na gusaling yari sa ladrilyo sa kahabaan ng Main Street ang tahanan ng pamilya nina John at Leonora Taylor, ang print shop, at ang Nauvoo Post Office noong 1845. Ipinakikita ng tatlong gusaling ito kung paano nagsilbing sentro ng komunikasyon ang Nauvoo sa pagbabahagi ng ipinanumbalik na ebanghelyo ni Jesucristo sa mga miyembro ng Simbahan at sa kanilang mga kaibigan at pamilya sa iba’t ibang panig ng mundo.

Sina John at Leonora Taylor at ang kanilang pamilya ay nanirahan nang wala pang isang taon sa dalawang palapag na bahay na gawa sa ladrilyo. Si James Ivins ang nagtayo ng bahay at ng tindahan ng dry goods sa katabi. Noong Mayo 1845, lumipat ang pamilya Ivins mula sa Nauvoo at ipinagbili ang dalawang gusali. Binili ito ng Simbahan at inilipat ang pahayagang Times and Seasons sa gusali. Dahil si John Taylor ang patnugot ng pahayagan, lumipat ang kanyang pamilya sa bahay upang maging katabi ng print shop. Si Elias Smith, ang foreman ng print shop at postmaster ng Nauvoo, ay lumipat din sa malaking bahay. Inilipat ni Elias ang post office sa print shop habang nagtatrabaho si John sa buong tag-init sa ikatlong gusaling ladrilyo sa kabilang panig ng kanyang tahanan na magsisilbing opisina ng patnugot ng pahayagan at post office.

Ang tahanan, print shop, at post office ay sentro ng aktibidad noong tag-init at taglagas ng 1845. Kabilang sa mga pahayagan ang mga talata ng banal na kasulatan at payo ng propeta pati na ang muling inilimbag na mga liham na ipinadala mula sa mga missionary na naglilingkod sa Estados Unidos, Canada, Europa, at maging sa French Polynesia. Ang mga pahayagan ay ipinadala sa pamamagitan ng koreo sa mga mambabasa sa bayan at sa iba’t ibang panig ng bansa at sa ibayong dagat. Dumaan din sa Post Office ang mga liham na nag-aanyaya sa mga kapamilya na ibahagi ang pangalan ng mga yumaong kamag-anak na mga residente sa Nauvoo. Maaaring magsagawa ng mga sagradong ordenansa ang mga miyembro ng Simbahan para sa kanilang mga yumaong kapamilya sa Nauvoo Temple. Ang print shop at post office ay isang paraan para mas maisulong ang gawain ng pagtatayo at pagpapatatag ng Sion.

Ano ang Aasahan

Ang Taylor Home Print Shop at Post Office ay tatlong magkakahiwalay na lugar na malilibot. Ang print shop ay isang silid na malilibot nang may gabay at kabilang dito ang demonstrasyon kung paano maglimbag ng pahayagan. Ang tahanan ay may dalawang silid na may sala at silid-kainan na malilibot nang may gabay. Maaaring makita ang mga kuwarto sa itaas kung hihilingin. Ang post offiice ay isang silid na malilibot nang may gabay kung hihilingin. Pagkatapos ng Taylor Home Print Shop at Post Office, maaari mo nang libutin ang natitirang bahagi ng Nauvoo. Maaaring interesado ka ring makita ang Calvin and Sally Pendleton Home at Schoolhouse, isa pang lugar na malilibot sa Main Street Trade.

360° Walkthrough