Panimalay ni Joseph Knight

Sila si Joseph Sr. ug Polly Knight maunongon nga mga higala ni Propeta Joseph Smith ug kauban sa labing unang mga tumutuo gawas sa pamilya Smith. Niadtong 1826, gisuholan ni Joseph Knight Sr. si Joseph Smith isip usa ka adlaw nga trabahante samtang si Joseph Smith nanguyab kang Emma Hale. Misalig kaayo si Knight kang Smith nga siya mitugot kaniya nga manghulam sa iyang kabayo ug karomata sa pagbiyahe ngadto sa Harmony aron mobisita ni Emma. Niadtong Septiyembre 22, 1827, ang gabii nga gidawat ni Joseph Smith ang bulawan nga mga palid gikan ni anghel Moroni, si Joseph Knight Sr. usa sa mga tigpaluyo sa Propeta naghulat didto sa Panimalay sa Umahan sa Pamilya Smith alang sa iyang pagbalik.

Atol sa paghubad sa Basahon ni Mormon, ang mga Knight naghatag og kwarta, pagkaon, ug ubang mga kapanguhaan sa pagsuporta nila ni Joseph ug Emma Smith samtang gihubad niya ang sa Basahon ni Mormon. Si Joseph Knight Jr. nahinumdom sa pag-uban sa iyang amahan sa daghang higayon aron “makita [si Joseph] ug magdala kaniya og mga makaon.” Niadtong Mayo 1829, si Joseph Smith nakadawat og pagpadayag alang ni Joseph Knight Sr. nga karon narekord sa Doktrina ug mga Pakigsaad 12. Human naorganisar ang Simbahan sa sayong bahin sa Abril 1830, sila si Joseph Smith ug Oliver Cowdery mibiyahe ngadto sa Colesville, diin ilang giorganisar ang usa ka branch atol sa miting didto sa panimalay sa mga Knight.

Si Joseph Knight Sr. usa ka mag-uuma, tiggaling, ug tigbaligya og lugas sa Colesville, New York. Gikonsiderar ni Knight si Joseph Smith nga “ang labing maayo nga mag-uuma nga iyang gisuholan.” Dihang gisultihan ni Joseph si Knight mahitungod sa mga panan-awon nga iyang nadawat, mituo dayon si Knight kaniya. Ang pamilya Knight nagpabilin nga maunongong mga tigpaluyo ni Joseph Smith ug matinud-anong mga miyembro sa Simbahan bisan sa daghang mga pagbalhin, mga pagpanggukod, ug mga pagsulay nga misunod.

Basaha ang mahitungod sa mga panghitabo nga nahitabo sa Panimalay ni Joseph Knight Sr. sa Mga Santos Volume 1, Kapitulo 9.

Unsa ang Mapaabot

Ang boluntaryo nga mga tiggiya [docents] mohatag og giniyahan nga paglibot sa panimalay.