Johnson Inn

Ang Johnson Inn ay mahalagang bahagi sa komunidad ng mga Banal sa mga Huling Araw sa Kirtland. Ito ay nagsilbing hotel, kung saan ang mga naglalakbay na bisita ay maaaring makakuha ng pagkain at tulugan pati na rin lugar para sa kanilang mga kabayo.

Ang bahay-panuluyan ay itinayo noong 1813 ni Peter French at ang unang gusali sa Kirtland na gawa sa ladrilyo. Binili ng Simbahan ang lupa at gusali nang magsimulang magtipon ang mga Banal sa Kirtland noong 1833. Pinamahalaan ni John Johnson ang gusali noong taglagas ng 1833 at itinayo ang Johnson Inn.  
 
Ang bahay-panuluyan ay nagsilbi ring opisina, silid ng pagpupulong, palimbagan, social hall, at pansamantalang museo. Pagkatapos wasakin ang imprenta sa Missouri, isa pang imprenta ang pansamantalang inilagay sa Johnson Inn.

Ang iba pang mahahalagang pangyayari na naganap dito ay ang paghahayag tungkol sa katungkulang patriyarka na itinuro ni Joseph Smith at ang pag-alis nang magkakasama ng Korum ng Labindalawang Apostol para sa kanilang unang misyon. At noong tag-init ng 1835, bumili si Joseph Smith ng mga mummy at rolyo ng papiro kung saan mula sa mga ito ay natanggap niya ang aklat ni Abraham. Ang mga artifact na ito ay nakadispley sa Johnson Inn bilang bahagi ng isang maikling eksibit.  
 
Ang Johnson Inn ay muling itinayo na kahalintulad ng orihinal na istruktura sa parehong lokasyon. Ang harapan ay dinisenyo upang maging katulad ng gusali noong ika-19 na siglo. Ang loob ng Johnson Inn ngayon ay ginawang lugar ng eksibit na nagtuturo tungkol sa kasaysayan ng Kirtland. 

Ano ang Aasahan

Ang loob ng Johnson Inn ay isang lugar ng eksibit at pagkatuto. Ang ilan sa mga eksibit ay nagtatampok ng mga touch screen at video. Ang mga misyonero ay handang tumulong sa iyo, ngunit ang buong paglilibot ay magagawa nang mag-isa.