Tuʻuʻanga ʻo e Faʻitoka ʻo Hailame Peisí

ʻOku tuʻu ʻa e tuʻuʻanga ʻo e faʻitoka ʻo Hailame Peisí ʻi he ʻEkiselisia Sipulingí, Vahefonua Leí, ʻi Mīsuli. ʻOku ʻi he tofiʻa naʻe maʻu he taimi ʻe taha ʻe he uaifi ʻo Hailamé ko Katalina Uitemā Peisi, mo hona ngaahi fohá. ʻI he kamataʻangá, naʻe tuku pē ha ngaahi foʻi maka ne tuʻutuʻu tapafā ʻo fakaʻilongaʻi naʻe ʻi ai ha faʻitoka ʻi he konga ko iá. Naʻe tauhi ʻe he kau maʻu tofiʻa hili ʻa e fāmili Peisí ʻa e faʻitoká ʻo laui toʻu tangata, ʻo ʻikai ke nau ʻilo ko hai haʻana iá. Hili hono ʻilo ʻa e faʻitoká, naʻe fokotuʻu ha maka fakamanatu foʻou ai ʻi he 2001.

ʻI heʻene hoko ko e taha ʻo e kau fakamoʻoni makehe ʻe toko valu ʻo e Tohi ʻa Molomoná, naʻe kaungā fakamoʻoni ʻe Hailame Peisi hono hingoá ʻi he niʻihi kehe naʻa nau mamata mo ala ki he ʻū lauʻi peleti koulá. Kuó ne mali mo Katalina, ko e tuofefine ʻo Tēvita Uitemaá, ʻi he 1825 peá na nofo ʻo ofi ki he kau Uitemaá ʻi Feieti, Niu ʻIoke. Hili ha taʻu ʻe fā mei ai, naʻá ne ʻilo ki he uiuiʻi ʻo Siosefa Sāmita ke ne liliu e Tohi ʻa Molomoná peá ne hoko ko ha poupou mālohi ki he ngāue ʻa Siosefá.

Naʻe hiki ʻa Hailame mo Katalina fakataha mo e fāmili Uitemaá ki Mīsuli ʻi he 1832. Naʻá na kaungā faingataʻaʻia ai mo e niʻihi kehe ʻo e Kau Māʻoniʻoni ʻi he Ngaahi ʻAho Kimui Ní ʻi hono tuli fakamamahiʻi kinautolu mei he Vahefonua Siakisoní ʻi he 1833. Naʻe kamata e mavahe ʻa e fāmili Uitemaá ʻi loto ʻi ha taʻu pē ʻe nima, mei he Siasí. Neongo ʻenau mavahe ko ʻení, ka naʻe ʻikai teitei fakaʻikaiʻi ʻe Hailame ʻene fakamoʻoni ki he Tohi ʻa Molomoná.

Meʻa ke ʻAmanaki Ki Aí

ʻOku tuʻu ʻa e fakaʻilonga ʻo e faʻitoká ʻi he vahaʻa ʻo ha ʻotu ʻā fakataautaha mo e veʻe hala ʻo e Summit-Ridge Drive ʻi he Vahefonua Leí, ʻi Mīsuli. ʻOku ʻikai ha tauʻanga meʻalele pe toe naunau kehe maʻá e kau ʻaʻahí ʻi he feituʻu ko iá.

Tuʻuʻanga ʻi he mape GPS: 39°21’21.77″ N; 94°10’34.53″ W.