Fahiʻanga Papa Hauní

ʻI he kamataʻanga ʻo e 1836, naʻe kamata hiki ʻa e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mei hona ʻapi fakataimi ofi ki he Vāhenga Keleí ki he Vāhenga Kolotiuela foʻou ne toki fokotuʻú. Naʻe maʻu ngāue ha niʻihi pea naʻe ʻatā mo ha kelekele ofi ki he kelekele ʻo Sēkope Hauní, ʻa ia naʻá ne haʻu ki he ʻēliá ʻi ha ngaahi taʻu kimuʻa peá ne fokotuʻu ha fale fahiʻanga papa ʻi he piko ʻi he Vaitafe Soalá. Neongo naʻe ʻikai kau ʻa Sēkope Hauni ki honau siasí, ka naʻá ne kaungāmeʻa lelei mo hono ngaahi kaungāʻapi Kāingalotú mo e kau ngāue ʻi he fale fahiʻanga papá. ʻI he 1838, naʻe hoko ʻa e Fale Fahiʻanga Papa Hauní ko e uhouhonga ʻo ha kiʻi kolo siʻisiʻi kae tupulaki.

ʻI he ʻaho 30 ʻo ʻOkatopá, 1838, naʻe ʻohofi ʻe ha tangata toʻo meʻatau mei ha vāhenga kaungāʻapi, ʻa e Kāingalotú ʻi he Fahiʻanga Papa Hauní, ʻo fakapoongi ai ha kau tangata ʻe toko 14 mo ha fānau tangata kei talavou ʻe toko 3 pea lavea mo ha toko 14 kehe. Naʻe tanu fakavave e kau pekiá pe ʻave ki ha faʻitoka fakatokolahi ʻi he takele ʻo ha vaitupu mōmoa, koeʻuhi ko hono fakamālohiʻi e Kāingalotú ke nau mavahe mei he ʻēliá, pea iku ʻo mavahe mei he siteiti ʻo Mīsulí ʻi he faʻahitaʻu momoko ko iá. Naʻe mavahe foki ʻa Sēkope Hauni mei Mīsuli, ʻo iku hiki ai ki ʻOlikoni.

Laukonga lahi ange fekauʻaki mo e Fahiʻanga Papa Hauní ʻi he Kau Māʻoniʻoní Voliume 1, Vahe 30.

Ko e Meʻa ke ʻAmanaki Ki Aí

Kuo ʻikai toe maʻu ʻa e fale ʻo Sēkope Hauní mo e fahiʻanga papá ʻi he ʻēliá. ʻOku ʻikai ha hala pe lueʻanga mei he tauʻanga meʻalelé, ka ʻoku kei hoko e vaoʻakau mo e loto ʻataʻatā ofi ki he piko ʻi he vaitafé ko ha feituʻu longonoa mo nonga ki he fakalaulaulotó mo hono manatua ʻo kinautolu ne mole ʻenau moʻuí pea tanu aí. Lolotonga e ngaahi faʻahitaʻu ʻuha lahí, ʻoku hoko e tāfeá ke ʻikai toe lava ai ha kolosi ʻi he ngaahi halá.