Alavaa o Erie

Sa faia e le Alavaa o Erie se matafaioi i le suiga o le lumanai o le tamaoaiga o Niu Ioka i Sisifo. O le alavaa e 363 maila na alu ai le valu tausaga e faamae’a ai ma fesootai ai Pafalo i le matafaga i sasae o le Vaituloto o Erie i Albany ma le Vaitafe o Hudson. Mulimuli ane, o lenei auala televave fou o le vai na maua ai se auala faigofie atu mo le aveina atu ma aumai ia oloa ma tagata i le uafu i le Aai o Niu Ioka ma nuu tauatiae o Niu Ioka, Penisilevania, ma Ohaio.

Na fesoasoani le Alavaa o Erie e suia ai le taulaga ua faatupulaia o Palamaira, Niu Ioka, i se taulaga e galulue malosi ma fesootai lelei i le alavaa. O le faatupulaia o le aai o pisinisi o Palamaira na aofia ai se pisinisi o meafale, fale e lua e fai ai ie pa’u, lotoa piliki, fale gaosi laupapa, fale penuili, ma se gaoioiga faamanuiaina o le vaimama o mea suavaia ma mea malō. Ina ua uma ona tatalaina le alavaa i le 1825, o le fesootaiga i le va o Palamaira ma isi vaega o le itulagi na taitai atu ai i le atiina ae o se pisinisi lomitusi faamanuiaina i le itulagi ma avea ai le faletusi fou a E.B. Grandin ma nofoaga lelei mo le lolomiina ma le tufatufaina atu o le Tusi a Mamona.

O le taimi nei, o loo i ai i le alavaa se ala savali ma tietie uila, lea e ui atu i le Pal-Mac Aqueduct County Park, lea e itiiti ifo ie maila mai le Falelomitusi a Grandin. O loo maua foi le pakaga taavale lautele, ma o le ala e maua ai se vaaiga manaia i tua o fale faasolopito o Palamaira.