Tulaga o le Fale o Tavita Uitimera

I le tautotogo o le 1838, sa siitia ai le aiga o Tavita mai Sisifo Mamao i Richmond i le Itumalo o Ray, Misuri. O iina, na fau ai e Tavita se fale e tasi le magaala o fale i Sasae o le falefaamasino e lata i le taulaga faatau. Sa nonofo Tavita ma lona aiga i le fale i Richmond seia oo i le aso 1 o Iuni, 1878, ina ua faatamaia e se asiosio. I le uma ai o le asiosio, sa toefauina le fale.

O Tavita Uitimera ma lona aiga o nisi ia o uluai Au Paia o Aso e Gata Ai na faamautu i Misuri. I le 1832, sa latou faavaeina ai se pitonuu laitiiti i fafo atu o Initipene. Sa tutuliese e i latou sa nonofo i Misuri ia Tavita, ma le paranesi sa ia pulefaamalumalu ai, mai o latou fale ia Novema i le tausaga na sosoo ai. O le maua ai o le malutaga i le Itumalo o Clay i le 1834, sa talia ai e Tavita se valaauga e pulefaamalumalu i le siteki lona lua a le Ekalesia.

E oo ane i le 1837, ua me’i atu Tavita ma lona aiga i Sisifo Mamao, i Caldwell Co., Misuri. O iina, na alia’e ane ai ni feteenaiga i le va o tagata o le Aiga o Uitimera ma taitai o le Ekalesia. E lei umi ona me’i atu i Sisifo Mamao, ae aluese le talitonuina e Tavita o le taitaiga a Iosefa Samita ma auai faatasi loa ma isi tagata tetee o le Ekalesia. Sa iu ina toe o atu Tavita ma lona aiga i Richmond. E ui ina ua le o toe avea ma se tagata o Le Ekalesia a Iesu Keriso o le Au Paia o Aso e Gata Ai, ae sa faaauau pea ona molimau atu Tavita e uiga i le Tusi a Mamona. Sa nofo o ia i Richmond, ma faagaoioia ai se fale solofanua seia oo i lona maliu i le aso 25 o Ianuari, 1888. O loo i ai se maafaamanatu o Molimau e Toatolu, e aofia ai ma Tavita Uitimera, i le Fanuamaliu o Paionia i Richmond, e afa maila (.8 km) i sasae i matu o le Fanuamaliu i Richmond.

Faitau atili e uiga i le olaga o Tavita Uitimera i Misuri i le Voluma 1, Vaega 26–27 ma le Voluma 2, Vaega 30.

Mea e Faamoemoeina

O le taimi nei, ua le o toe i ai le uluai fale o Tavita Uitimera. Ua i ai nei se fale piliki fogafale tasi i le nofoaga. O se maa apamemea laitiiti i luga o se vaega o le fale e sosoo ma le Lotu Papatiso Lona Lua, o loo faailoga ai le tulaga o le fale o Tavita Uitimera. O loo umia tumaoti le fale.