Cultural Hall

Dinisenyo para pagdausan ng mga kaganapan ng malakihang grupo, ang cultural hall ay nagsilbing lugar na mapagtitipunan ng mga Banal sa Nauvoo. Higit sa lahat, ang temporal at espirituwal na pagkakabuklod na naganap dito ay nakatulong sa pagbuo ng isang matatag na komunidad.

Ang cultural hall, na kilala rin bilang Masonic Hall, ay itinayo bilang lugar na pagpupulungan ng mga Freemason ng Nauvoo. Isang komite sa gusali ang hinirang noong Pebrero 1843, at nagsimula ang konstruksiyon sa tag-init na iyon. Si Architect William Weeks, na siya ring nagdisenyo ng Nauvoo Temple, ang nagbigay ng mga plano para sa gusali at si Lucius Scovil ang nangasiwa sa pagtatayo nito. Ang gusali ay inilaan noong Abril 5, 1844, sa isang magarbong seremonya na dinaluhan ng mga limandaang tao. Mula Abril 1844 hanggang Pebrero 1846, ang cultural hall ay nagsilbing mahalagang lugar ng pagtitipon ng mga residente ng Nauvoo.

Habang ginagamit ng mga Freemason ang ikatlong palapag ng bulwagan para sa kanilang mga pulong, ang natitirang bahagi ng cultural hall—ang basement at ang unang dalawang palapag—ay puno ng iba pang mga aktibidad. Nagdaos ng mga pulong ang mga lider ng simbahan, negosyo, at mamamayan, nagturo ang mga guro sa paaralan, nagpakita ng kanilang likha ang mga pintor, nagdaos ng mga konsiyerto ang mga musikero, at nagtanghal ng mga dula-dulaan ang mga entertainer. Bago lumisan sa Nauvoo ang mga Banal noong 1846, naglaan ang bulwagan ng espasyo para sa pag-iimbak ng butil, paghahanda ng tabla, at paggawa ng mga bagon.

Ano ang Aasahan

Ang paglilibot sa Pioneer Life ay nagsisimula sa cultural hall. Ang cultural hall ay may apat na silid na malilibot nang may gabay sa una, ikalawa, at ikatlong palapag. Ang ikalawa at ikatlong palapag ay walang kagamitan. Pagkatapos ng paglilibot sa cultural hall, lalakad ka o gagamit ng sasakyan papunta sa Lyon Drug Store upang ipagpatuloy ang paglilibot sa Pioneer Life.

Sa panahon ng tag-init at taglagas, ang mga live na pagtatanghal ay ginaganap sa loob sa unang palapag.

360° Walkthrough