Tuugamau o Alevini Samita

Sa soifua mai i Veremona i le 1798, o Alevini Samita o le tamaitiiti aupito matua lea na ola a Iosefa le Matua ma Lusi Maki Samita ma le uso matua o Iosefa Samita le Itiiti. Sa faia e Alevini se matafaioi taua i le siitia atu o le aiga mai Veremona i Palamaira, Niu Ioka, ma sa avea ma se tagata talitonu mausali i faaaliga faalelagi a Iosefa Samita. Sa uunaia e Alevini ia Iosefa ina ia tumau faamaoni ina ia mafai ona ia maua le Tusi a Mamona. Ia Novema 1823, na maliu ai Alevini i le 25 o ona tausaga. Sa manatuaina o ia o se tagata alofa ma malualii.

O le maliu o Alevini sa i ai se aafiaga loloto ia Iosefa Samita le Itiiti, o lē sa alofa tele i lona uso matua. Ia Ianuari 1836, ao feiloai ai ma Toeaiina i le fogafale tolu o le Malumalu o Katelani, na vaai ai Iosefa Samita ia Alevini i le malo selesitila i se faaaliga vaaia. “Ma sa ou ofo pe na faapefea ona maua e ia se tofi i lena malo, talu ai ona sa tuua e ia lenei olaga ae le’i faatuina e le Alii lona aao e faapotopoto Isaraelu i le taimi lona lua, ma sa le’i papatisoina o ia mo le faamagaloina o agasala” na tusia ai e Iosefa Samita (Mataupu Faavae ma Feagaiga 136:6). I lenei faaaliga, na aoao mai ai le Alii e faapea “O i latou uma o e na maliliu e aunoa ma se malamalama e uiga i lenei talalelei, o e semanu latou te mauaina pe ana faatagaina i latou e ola, o le a avea ma suli o le malo selesitila o le Atua” (Mataupu Faavae ma Feagaiga 137:7). E ui o lenei faaaliga na aumaia ai le faamafanafanaga ia Iosefa o le a faaolaina Alevini, ae sa le‘i manino pe faapefea ona faataunuuina lenei mea. Sa faaauau pea ona mafaufau loloto Iosefa Samita ma tatalo mo se malamalamaaga faaopoopo lea na iu i le faaaliga e faapea, o sauniga uma o le perisitua e mafai ona maua e e o soifua ma sui ai i e ua maliliu i malumalu paia.

Faitau e uiga i le faaaliga na maua e Iosefa Samita e uiga ia Alevini i le Au Paia, Voluma 1, Mataupu 21.

O Mea e Faamoemoe i ai

O le Tuugamau o Alevini Samita e le o se nofoaga aloaia faasolopito o le Ekalesia, ae e talia tagata asiasi e vaai ma le faaaloalo i le tuugamau i lenei fanuatanu i le lotoifale.