Eb’ li patz’om chirix li Iglees
Ma tento tintz’aqonq?
Eb’ li ula’ naru neke’tz’aqon, a’b’an moko teneb’anb’il ta a’an. Naq li wa ut li ha’ re li loq’laj wa’ak (a’an chanchan li Comunion) najek’iman reheb’ li kristiaan, wi ink’a’ nakawaj tz’aqonk, yal numsi li k’uleb’aal re li kristiaan wan chak’atq. Chirix a’an, matk’oxlak ut chisaho’q aach’ool rik’in li loq’onink.
Ma naru nintz’aqon wi moko komonin ta sa’ li Iglees?
Hehe’! B’oqb’ilat chi tz’aqonk qik’in sa’eb’ li kok’ k’anjel, li tenq’ank, ut li loq’onink sa’ li Iglees rajlal xamaan. Naqaj xnawb’al aawu ut taqab’antioxi aawe laa tz’aqonik.
K’a’ru tintiqib’ wi’ wib’?
Chatchalq jo’ chanru wankat. Wi wan aak’a’uxl chirix li t’ikr, naqoksi li t’ikr chaab’il wi’chik chiru li naqoksi chiru li xamaan, re roxloq’inkil li Dios. Chi kok’ aj xsa’, taawileb’ li winq rik’in li saqi kamiis ut li korbaat, ut li ixq rik’in li falda.
Jo’ najtil nab’ay li ch’utam re loq’onink sa’ li Iglees?
Li loq’onink sa’ domingo nab’ay wiib’ hoor sa’ chixjunileb’ li qach’utam chiru li ruchich’och’. Wankeb’ wiib’ li ch’utam, ut jun hoor nab’ay li junjunq.
Sa’ li “ch’utam re li loq’laj wa’ak”, chixjunileb’ li komon neke’xch’utub’ rib’. Sa’ li ch’utam a’in nokob’ichan, nokotijok, naqab’i li jultikanb’il aatin rik’in jalan jalanqeb’ li komon rajlal xamaan. A’b’an li k’anjel q’axal aajel ru re li ch’utam a’an xk’ulb’al li loq’laj wa’ak (a’an chanchan li Comunion) re xjultikankil li Kolonel.
Rochb’een li ch’utam re li loq’laj wa’ak, b’oqb’ileb’ li kristiaan chi kanaak jun hoor chik re tzolok sa’ kok’ ch’uut choq’ reheb’ li winq, li ixq, li saaj, ut li kok’al.
K’a’ru li teep malaj li uq’ej?
Eb’ li teep ut uq’ej, a’aneb’ ch’uut chi komon re li Iglees li wankeb’ sa’ jun li na’ajej. Sa’ jun teep, naru nakataweb’ laa wamiiw, nakaweek’a naq k’ulb’ilat, ut nakataw laa komonil rik’ineb’ li wankeb’ sa’ laa na’aj. A’ yaal li na’ajej wankat wi’, wankeb’ jalan jalanq paay chi teep ut uq’ej.
Eb’ li teep choq’ reheb’ chixjunil
Chixjunileb’ b’oqb’ileb’ chi wulak sa’eb’ li ch’uut a’in. Sa’eb’ li ch’uut choq’ reheb’ chixjunil, chixjunileb’ neke’k’anjelak sa’ komonil sa’ li Iglees, maak’a’ naxye jarub’ chihab’ wan reheb’. Eb’ li junkab’al, li komon moko sumsuukeb’ ta, li kok’al, li xmalka’an, ut eb’ li saaj toje’ xe’sumla neke’loq’onin sa’ komonil sa’ jun ajwi’ li ch’utam.
Eb’ li teep reheb’ li jar aatinob’aal
Wankeb’ li na’ajej naru neke’tawman wi’ li teep malaj uq’ej b’ar wi’ neke’aatinak sa’ jalan chik li aatinob’aal. A’ineb’ li ch’uut li neke’xb’aanu li loq’onink sa’ jalan chik li aatinob’aal chiru raatinob’aal lix k’ihaleb’ li kristiaan sa’ li na’ajej wan wi’ li ch’uut.
Ch’uut choq’ reheb’ li saaj li maji’ neke’sumla
Yalaq ani maji’ sumsu ut wan 18-35 chihab’ re nawulak sa’ li ch’uut choq’ reheb’ li saaj li maji’ neke’sumla Chi kok’ aj xsa’, neke’tawman li ch’uut a’in nach’ rik’ineb’ li tzoleb’aal ut wankeb’ li kok’ k’anjel chiru li xamaan rochb’een li loq’onink sa’ domingo.
Ch’uut choq’ reheb’ li komon moko sumsuukeb’ ta
Yalaq ani moko sumsu ta ut wan 36–45 chihab’ re nawulak sa’ li ch’uut choq’ reheb’ li komon moko sumsuukeb’ ta. Li ch’uut a’in naxtenq’aheb’ li komon chi loq’onink ut chi k’anjelak sa’ komonil rik’ineb’ li ani jo’kaneb’ xyu’am ut rajomeb’.