Na cava e bibi kina na vakamau ena valetabu?

Vulica ena masumasu na ivolanikalou kei na ivurevure tale eso. Na ivurevure cava beka ena vukei ira na goneyalewa me ra kila vakamatata na bibi ni vakamau ena valetabu ka vakalevutaka cake na nodra gagadre me ra vakamau ena valetabu ena dua na siga?

V&V 49:16–17 (Na vakamau e vukea na vakataucokotaki ni inaki ni veibuli)

V&V 131:1–4; 132:15–21 (E gadrevi ena bula vakacerecerei na vakamau tawamudu)

“Na Matavuvale: Ai Vakaro ki Vuravura Raraba,” Ensign se Liaona, Nove. 2010, 129

L. Tom Perry, “Na Vuna e Bibi kina na Vakamau kei na Matavuvale—Ena Veivanua Kecega e Vuravura,” Ensign se Liaona, Me 2015, 39-42

Henry B. Eyring, “Na Matavuvale ena Ruku ni Veiyalayalati,” Ensign se Liaona, Me 2012, 62–65

Richard G. Scott, “Na Veivakalougatataki Tawamudu ni Vakamau,” Ensign se Liaona, Me 2011, 94–97

“Vakamau,” Tudei Ena Vakabauta (2004), 144–48

Veivakavulici ena ivakarau ni iVakabula

Na iVakabula a sureti ira eso tale me ra cakacaka ena vakabauta ka bulataka na dina a vakavulica o Koya. E rawa vakacava ni o sureti ira na goneyalewa me ra vakalevutaka na nodra gagadre ni vakamau ena valetabu ka bulataka na dina era na vulica vata?

Vidio: “Ask Us Questions”

3:24

Sarava eso tale

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Digidigi mai na veivakasama oqo se vakasamataka ga eso na nomu mo vakamacalataka kina na lesoni ni macawa oqo:

• Ni bera ni ra yaco mai ki na kalasi na goneyalewa, vola tu ena vava ni volavola, “Na cava e bibi kina na vakamau ena valetabu?” Sureti ira me ra vakasamataka na taro oqo ni ra wilika tiko “Our Temple Marriage Was Worth Any Price.” Na cava sa rui bibi kina vei rau na veiwatini ena italanoa na vakamau ena valetabu? Sureti ira na goneyalewa mera wasea na nodra nanuma.

• Kevaka e rawa, vakaraitaka e dua na iyaloyalo mai na siga o a vauci kina ena valetabu, ka vakamacalataka eso na vakasama kei na nanuma e tu vei iko (se vakaraitaka e dua na iyaloyalo ni dua na yalewa kei na tagane vakawati ena mata ni valetabu [raica na iVola ni Yaloyalo, 120]). Taroga vei ira na goneyalewa na vuna era nanuma kina ni bibi na valetabu.

Na itaviqaravi yadua e ra e rawa ni vukei ira na goneyalewa me ra vulica na vuna e bibi kina na vakamau ena valetabu. Ni muri na veituberi ni Yalotabu, digitaka e dua se sivia ka na ganita na nomu kalasi:

• Sureti ira na goneyalewa me ra raitayaloyalotaka ni dua na nodra itokani e dau vakataroga se cava na vuna e nona takete kina na vakamau ena valetabu ka sega ni vakamau ga vakamatanitu. Kerei ira me ra wilika na ivolanikalou e vakaturi ena ituvatuva oqo se “Na Veiyalayalati Vou ka Tawamudu ni Vakamau” ena Tudei ena Vakabauta (tabana 144-145) ka vaqara na vosa kei na malanivosa e rawa ni ra vakayagataka me ra vola e dua na ivola vua na nodra itokani. Vakayaloqaqataki ira me ra vakamacalataka ena ivola na bibi ni vakamau tawamudu. Sureti ira me ra wasea ki na kalasi na veika era vola ena nodra ivola.

• Kauta mai e rua se tolu na iyaya (se iyaloyalo ni iyaya) e vakaraitaka na duidui ni kedra ituvaki (me vakaoqo, e dua na itaki valasitika kei na dua na itaki siliva). Kerei ira na goneyalewa me ra veivosakitaka na vuna e vinaka cake kina na iyaya e tu i cake na kena ituvaki vinaka mai na kena e tu ga i ra. E semati vakacava oqo ki na vakamau? Kerei ira na goneyalewa me ra wilika, sarava, se vakarorogo ki na iwase eso ni vosa nei Elder L. Tom Perry “Na Vuna e Bibi kina na Vakamau kei na Matavuvale—Ena Veivanua Kecega e Vuravura.” Taroga vei ira na goneyalewa na cava na vuna era vinakata kina me ra vakamau ena valetabu.

• Solia vei ira yadua na goneyalewa e dua na ilavelave ni vosa nei Elder Richard G. Scott “Na Veivakalougatataki Tawamudu ni Vakamau.” Na cava na nona nanuma o Elder Scott me baleta na nona itokani tawamudu? Na cava e vakauqeti ira na goneyalewa me baleta na kena isema vei watina? Kerei ira me ra vakananuma vakatitobu na veika me caka me rawa kina na mataqali isema vakaveiwatini me vakataki rau o Elder kei Sisita Scott.

• Ni wilika vakalasi na V&V 131:1–4 kei na “Veiyalayalati Vou ka Tawamudu ni Vakamau” ena Tudei ena Vakabauta (tabana 144--145), ka vaqara voli na isau ni taro “Na cava e bibi kina na vakamau ena valetabu?” Kevaka e gadrevi, vukei ira na goneyalewa me ra vakamacalataka eso na vosa se malanivosa matalia. Kerei ira na lewe ni kalasi me ra lisitaka eso na ka e rawa ni vakavuna na nodra sega ni vakamau ena valetabu na goneyalewa. Na cava e rawa ni ra cakava ena gauna oqo me ra vakadeitaka kina me ra na vakamau ena valetabu?

Kerei ira na goneyalewa me ra wasea na veika era sa vulica nikua. Era sa kila vakamatata beka na bibi ni vakamau ena valetabu? Na cava era sa vakila se nanuma kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

• Vola e dua na ivola vei ira ga, me qai wiliki ni bera na nodra siga ni vakamau, ka cavuti kina na bibi ni vakamau ena valetabu kei na nodra gagadre ena gauna oqo me ra rawata na takete dodonu oqo.

• Vakabira e dua na itaba ni valetabu ena dua na vanua e rawa ni ra dau raica wasoma kina, qai biuta voleka toka ena iyaloyalo e dua na iyatuvosa ka vakaraitaki kina na nodra takete kei na nodra gagadre me ra na laki vakamau ena valetabu ena dua na siga.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.