Na cava sa vakavulica o Peresitedi Monson vei ira na lewe ni Matabete i Eroni?

Sa tiki tiko ni noda bubului kei na veiyalayalati na lewe ni matabete o ya meda ciqomi ira na italai ni Turaga, oka kina o ira na parofita bula, ka bulataka na veivosa yadua sa lako mai na gusu ni Kalou (raica na V&V 84:36, 44). Sa vakavulica o Peresitedi Monson vei ira na lewe ni Matabete i Eroni me lomadra dina ka me kilikili kaya na nodra qarava na itavi eso. E vakayaloqaqataki keda meda tutaka na ivakavuvuli dodonu, ena gauna mada ga eda tutaka duadua tiko kina. E gadrevi keda o Koya meda kila vakavinaka na kena vakayagataki na matabete mera vakalougatataki ka qaravi kina o ira era tiko wavoliti keda.

Mo vakarautaki iko vakayalo

Na cava o sa vulica rawa mai vei Peresitedi Monson me baleta na veiqaravi ni matabete? O sa vakayacora vakacava na nona ivakavuvuli kei na ivakaraitaki?

Era sa kila tiko beka na cauravou ena nomu kuoramu na veika sa tukuna o Peresitedi Monson vei ira ni ra lewe ni matabete ena veikoniferedi sa oti? O na vukei ira vakacava na cauravou mera raica na sala mera vakayacora kina na itukutuku nei Peresitedi Monson ki na nodra bula?

Vulica ena masumasu na veitukutuku wale tikoga oqo nei Peresitedi Monson kivei ira na lewe ni matabete:

“Yalovinaka, Loloma Uasivi, kei na Loloma,” Ensign se Liaona, Me 2017, 66–67

“Vakavuvuli kei na Yalayala,” Ensign se Liaona, Nove. 2016, 78–79

“Dua na Veivakabauti Tabu,” Ensign se Liaona, Me 2016, 85

“Na Matabete—e dua na iSolisoli Tabu,” Ensign se Liaona, Me 2015, 88–90

“Karona na iVunau,” Ensign se Liaona, Nove. 2015, 83–85

Vidio: “Missionary Work: A Priesthood Duty,” “Dare to Stand Alone”

2:2

4:20

Veivakavulici ena ivakarau ni iVakabula

Ena veituvaki yadua, sa dau ivakaraitaki ka dauveituberi na iVakabula. A vakavulici ira na Nona tisaipeli ena masu ena Nona masu vata kei ira. A vakavulica vei ira mera dauloloma ka veiqaravi ena iwalewale a loloma ka veiqaravi kina. A vakavulica vei ira na sala me vakavulici kina na Nona kosipeli ena ivakarau a veivakavulici kina o Koya. Ena rawa vakacava, vei iko e dua na lewe ni matabete, mo ivakaraitaki ka dauveituberi kivei ira na cauravou ena nomu kuoramu?

Veisemati ni iTaviqaravi ni iTabagone

Tuva e dua na itaviqaravi ni Muavata ka na vukei ira na cauravou me ra vakayagataka na veika era vulica ena lesoni oqo.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Wasei ira na cauravou mera veisasa. Kerei ira mera wasea vei kedra isa e dua na ka era se nanuma tiko mai na lesoni ni macawa sa oti.
Me raicalesu na kuoramu na wase “iTavi ni Matabete” ena ivola iTavi Vua na Kalou ka vola na itavi oqo ena vava ni volavola (raica na draunipepa 23, 46–47, se 70–71). Na cava sa vakavulica o Peresitedi Monson me baleta na itavi oqo? Ena gauna ni lesoni, mera laki vakuria na cauravou ena vava ni volavola e dua na ka era sa kunea ni a vakavulica o Peresitedi Monson me baleta na nodra itavi ni matabete.

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Vulica vata

Na itaviqaravi yadua e ra ena vukei ira na lewe ni kuoramu mera vulica na itukutuku buta katakata nei Peresitedi Thomas S. Monson kivei ira na lewe ni matabete. Mai na veivakauqeti ni Yalotabu, digitaka e dua se sivia ka na ganita na nomu kalasi:

Solia kivei ira yadua na cauravou na ilavelave ni nona vosa o Peresitedi Monson se qai oti toka ga oqo kivei ira na matabete (raica na vosa e volai tiko ena ituvatuva oqo). Sureti ira na cauravou mera raica e dua na italanoa ena vosa oqo, tokaruataka ki na kuoramu ena nodra dui vosa ga, ka wasea na veika e vakavulica tiko me baleta na veiqaravi ni matabete.
Sureti ira na cauravou mera wilika e dua na nona vosa sa oti o Peresitedi Monson ka raica kina e dua na itukutuku era vinakata mera nanuma tikoga. Solia kivei ira yadua na cauravou e dua na kadi lailai, ka mera vola kina na itukutuku o ya. Kerei ira na lewe ni kuoramu mera wasea na nodra itukutuku o ya ka mera vakamacalataka na vuna era digitaka kina.
Vakaraitaka e dua se ruarua na vidio e vakaturi tiko ena ituvatuva oqo, ka solia e dua na gauna ki na cauravou yadua me vola vakalekaleka na nona nanuma se vakasama. Sureti ira na cauravou mera wasea ki na kuoramu na veika era sa vola. Ena vukei keda vakacava meda matabete dauveiqaravi vinaka cake na noda vakamuria na ivakasala nei Peresitedi Monson e tiko ena vidio oqo.
Kerei ira na cauravou mera vakasaqara na ivolanikalou a vakayagataka o Peresitedi Monson me vakavulica kina na veiqaravi ni matabete. Sureti ira mera wasea vakai ira na veika era sa vulica mai na ivolanikalou. Vakayaloqaqataki ira mera vakayagataka na ivakamacala e botona mera kunea kina na ivolanikalou tale eso e vakavulica na veika ni matabete. Era na vakayagataka beka vakacava na veika era sa kunea mera vakayacora kina na nodra itavi ni matabete?
Sureta e veimama ni kuoramu mera vakasaqara e dua na vosa nei Peresitedi Monson ka vakasaqara na veika a kerei ira kina na lewe ni matabete mera cakava. Kerea na ikarua ni veimama mera vakasaqara ena vosa vata ga o ya na veivakalougatataki a yalataka o koya. Kerei ira na lewe ni kuoramu mera wasea na veika era sa vulica. Era na vakayagataka beka vakacava na nona ivakasala oqo ki na nodra veiqaravi ni matabete?

Kerei ira na cauravou mera wasea na veika era sa vulica nikua. Era sa kila vakavinaka tiko beka na itukutuku nei Peresitedi Monson? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea na nona nanuma baleti Peresitedi Monson.
Sureti ira na lewe ni kuoramu mera wasea na nodra vakasama baleta na veika era sa vulica.
Sureti ira na lewe ni kuoramu mera cakava se vakatorocaketaka na nodra ituvatuva e tiko ena wase “iTavi ni Matabete” ena ivola iTavi Vua na Kalou e vakayavutaki tiko ena veika era sa vulica nikua.