Na cava e bibi kina na vakamau ena valetabu?

Vakaraica na veika ena vukei ira na cauravou ena nomu vulica tiko na ivolanikalou oqo kei na ivurevure tale eso ni vakamau ena valetabu mera vakila kina na bibi ni vakamau ena valetabu ni Turaga.

V&V 49:16–17 (Na vakamau e vukea na vakataudeitaki ni inaki ni Veibuli)

V&V 131:1–4; 132:15–21 (Esa gadrevi ena bula vakalou na vakamau vakasilesitieli)

“Na Matavuvale: Ai Vakaro ki Vuravura Raraba,” Ensign se Liaona, Nove. 2010, 129

L. Tom Perry, “Na Vuna e Bibi Kina na Vakamau kei na Matavuvale—Ena Veivanua Kecega e Vuravura,” Ensign se Liaona, Me 2015, 39–42

David A. Bednar, “Na vakamau e Yaga ki na Nona Ituvatuva Tawamudu” Ensign se Liaona, June 2006, 82–87

Richard G. Scott, “Na Veivakalougatataki Tawamudu ni Vakamau,” Ensign se Liaona, Me 2011, 94–97

“Vakamau,” Tudei ena Vakabauta (2004), 144–148

Veivakavulici ena ivakarau ni iVakabula

Ena Nona veiqaravi voli e vuravura, a vakatarogi ira na Nona tisaipeli na iVakabula ena veitaro ka vakavuna mera vakasamataka ka vakananuma vakabibi. A taleitaka sara na isau ni nodra taro ka marautaka na ivakaraitaki ni nodra vakabauta. Tovolea mo vakasamataka eso na taro ka na vakavuna vei ira na cauravou mera vakasamataka ka vakananuma vakabibi me baleta na cakacaka tabu vakalotu ena vale tabu ka vakabibi na vakamau ena valetabu. Vakarogoca vagumatua na nodra isaunitaro ka sauma ena yalovinaka ena veivakauqeti ni Yalotabu.

Vidio: “Ask Us Questions”

3:24

Sarava eso tale

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira me ra wasea na veika era sota kaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Digidigi mai na veivakanananu oqo se vakasamataka ga vakaiiko mo raicalesu kina na lesoni ni macawa sa oti ka vakatakila na lesoni ni macawa oqo:

• Kerei ira yadua na gonetagane me ra vakasamataka e dua na taro ka a sauma na lesoni ni macawa sa oti, ka qai sureta yadua na gonetagane me taroga na nona taro kivei ira tale eso na lewe ni kuoramu. Taura e vica na miniti mo sauma na taro eso.

• Me ra qai cakava na gonetagane e dua na ituvatuva ni lalawaka bibi ni bula. Me ra qai vakatakila na lalawaka era nanuma ena rawa ni vakayacoka vakalevu sara ena nodra ivotavota tawamudu ka vakamacalataka na cava era cakava kina na nodra digidigi. Ke rawa, vakaraitakae dua na kemudrau itaba vakaveiwatini ena siga drau a vauci kina ena valetabu. Wasea na veika o nanuma me baleta na watimu kei na bibi ni nomudrau vauci tawamudu ena valetabu.

Na veitaviqaravi e ra e rawa ni vukei ira na lewe ni kuoramu mera kila deivaki na bibi ni vakamau ena valetabu. Mai na veivakauqeti ni Yalotabu, digitaka e dua se sivia ka na ganita na nomu kuoramu:

• Kauta mai e rua se tolu na iyaya (se iyaloyalo ni iyaya) ka vakaraitaka na duidui ni kedra ituvaki (me vakaoqo, e dua na itaki valasitika kei na dua na itaki siliva). Kerei ira na cauravou mera veivosakitaka na vuna e vinaka cake kina na kena ka kaukauwa mai na kena ka malumalumu. E vakatautauvatataki vakacava oqo ki na vakamau? Kerei ira na cauravou me ra wilika, sarava, se rogoca na malanivosa eso nei Elder L. Tom Perry “Na Vuna e Bibi Kina na Vakamau kei na Matavuvale—Ena Veivanua Kecega e Vuravura.” Taroga vei ira na cauravou na cava na vuna era vinakata kina me ra vakamau ena valetabu.

• Sureta e dua na lewe ni kuoramu me vakavulica e dua na iwase ni lesoni oqo. E rawa ni cakava oqo okoya me tiki ni nona ituvatuva ni iTavi Vua na Kalou me vulica ka vakavulica me baleta na matavuvale tawamudu (raica na “Kila na iVunau,” tabana 18, 42, se 66).

• Na vosa nei Elder David A. Bednar “Na vakamau e Yaga ki na Nona Ituvatuva Tawamudu” e vakamacalataka e rua na vuna e yaga sara kina na vakawati kei na tolu na ivakavuvuli veituberi me baleta na ivunau ni vakamau tawamudu. Lesia yadua na lewe ni kuoramu me wilika e dua na vuna se ivakavuvuli ka qai vakatavulica tale edua ena kuoramu ena ka a vulica mai na ka a wilika me baleta na vakawati. Na cava e rawa ni ra wasea mai na veika era sotakaya ka vakamacalataka na bibi ni veika e vakatavulica o Elder Bednar?

• Ni wilika vakuoramu na V&V 131:1–4 kei “Na Veiyalayalati Vou ka Tawamudu ni Vakamau” ena Tudei ena Vakabauta (draunipepa 144), ka vaqara tiko na isau ni taro “Na cava e bibi kina na vakamau ena valetabu? Ke ganita, vukei ira na gonetagane mera vakamatatataka eso na vosa se malanivosa ka sega ni matau. Kerei ira na lewe ni kuoramu mera tuvana eso na ka ka na rawa ni tarovi ira na cauravou mai na vakamau ena valetabu. Na cava e rawa ni ra cakava ena gauna oqo me ra vakadeitaka kina me ra na vakamau ena valetabu?

• Solia yadua vei ira na gonetagane e dua na ilavelave ni vosa nei Elder Richard G. Scott “Na Veivakalougatataki Tawamudu ni Vakamau.” Na cava a vakila o Elder Scott me baleta na nona itokani tawamudu? Na cava e vakurabuitaki ira na gonetagane me baleta na nona veimaliwai kei na watina? Kerei ira mera vakasamataka vagumatua na cava ena taura mera na rawata kina e dua na veimaliwai vakataki Elder kei Sister Scott.

Kerei ira na cauravou mera wasea na veika era sa vulica nikua. Era sa kila beka na bibi ni vakamau ena valetabu? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?

Me na tinia na soqoni na cauravou ka veiliutaki tiko. Sa rawa vua me:

• Wasea na nona ivakadinadina me baleta na bibi ni vakamau ena valetabu kei na nona gagadre me na vakamau ena valetabu.

• Bolei ira na lewe ni kuoramu mera yalayala ni ra na vakamau ena valetabu ena dua na siga.