E rawa vakacava meu dua na kaulotu ena gauna saraga oqo?

Vulica ena masumasu na ivolanikalou kei na ivurevure oqo. Na cava o vakila ni uqeti iko mo wasea vata kei ira na cauravou?

Qarava Vinaka Na Noqu iTavi Vua na Kalou (2010), 28–29, 52–53, 76–77

Alama 17:2–3 (Era a lolo, masumasu, ka vakasaqaqara vagumatua ena ivolanikalou na luvei Mosaia ena nodra vakavakarau ni laki kaulotu)

Cakacaka 2, 16; Mosaia 18 (Ratou sureti ira tale eso o Pita, Paula, kei Alama mera lako mai kivei Karisito)

Neil L. Andersen, “Dua na iVakadinadina Bula ni Kalou,” Ensign se Liaona, Nove. 2016, 35–38

M. Russell Ballard, “Laiva na Nomu Veivakabauti Vua na Turaga,” Ensign se Liaona, Nove. 2013, 43–45

DavidA. Bednar, “Yaco me Dua na Daukaulotu, ”Ensign se Liaona, Nove. 2005, 44–47

David A. Bednar, “Lako Mai ka Raica,” Ensign se Liaona, Nove. 2014, 107–10

Vidio: “Fulfilling Your Duty to God,” “Missionary Mindset,” “Priesthood Duty: Preaching the Gospel”

4:56

4:11

4:49

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

• Sureti ira na cauravou mera wasea, vakavulica ka vakadinadinataka na veika sa yaco vei ira ena nodra vakayacora na veika era sa vulica ena lesoni ni macawa sa oti.

• Kerei ira na cauravou mera vakasamataki ira na itokani, lewenilotu, se o ira na lewe ni kuoramu luluqa ena yalomasumasu, ka rawa mera sureti ira mera lako mai kivei Karisito. Sureti ira mera vola na veiyaca oqo ena nodra ivola ni iTavi Vua na Kalou (raica na tabana e 28–29, 52–53, 76–77). Vakauqeti ira na cauravou mera dau kidava na veivakauqeti era rawa ni ciqoma ena gauna ni lesoni ena ka era rawa ni cakava mera wasea kina na kosipeli kivei ira tale eso.

Na inaki ni lesoni oqo sai koya me vukea na cauravou yadua me vakarautaki koya ki na dua na veiqaravi vakadaukaulotu ena bula taucoko. Solia na gauna ena soqoni ni kuoramu vei ira na cauravou mera vola na ituvatuva eso ena nodra ivola ni iTavi Vua na Kalou. Vakauqeti ira me ra wasea vakaiira na nodra ituvatuva kei na veisoqoni ni kuoramu e se bera mai, sureti ira mera wasea na veika era a sotava ena nodra vakavakarau tiko ena veiqaravi ena kaulotu, ka sureti ira tale eso mera lako mai kivei Karisito.

• Dua tale na ivakarau me tekivu kina e dua na veivosaki baleta na wasei ni kosipeli oya me dusi na vakatautauvata nei Elder Neil L. Andersen me baleta e dua na ibulibuli ena nona vosa “Dua na iVakadinadina Bula ni Kalou.” E tautauvata vakacava kei na wasei ni kosipeli na vakasotari vata ni ibulibuli?  Sureti ira taucoko me ra cakacakataka vata e dua na ibulibuli ni o ni veivosakitaka na sala eso o ni rawa ni cakacaka vata kina vakuoramu ni qarava na cakacaka ni kaulotu. Me tiki ni veivosaki, e rawa ni o dusia vakatabakidua na iwasewase ni vosa nei Elder Andersen kena ulutaga “Dua na Veisureti Vei Ira na iTabagone.” E rawa ni vukei ira vakacava na cauravou ena nodra tuvaka me wasei na kosipeli na ivakasala kei na bolebole nei Elder Andersen?

• Vakaraitaka vei ira na cauravou e dua na katonisulu, ka qai sureti ira mera veivosakitaka na veika era na gadreva mera kauta ki na kaulotu (me vaka na sote vulavula, sutu, ivava, kei na so tale). Sureti ira mera tuva e so na ka era na gadreva mera kauta ki na kaulotu ka na sega ni rawa vei ira mera tawana ena nodra katonisulu. Sureti ira mera kuria ki na nodra ituvatuva na isau ni taro era kunea ena Alama 17:2–3 kei na Vunau kei na Veiyalayalati 4. Tarogi ira na cauravou se cava era rawa ni cakava mera vakavinakataka kina na veika oqo ena nodra vakavakarau ni laki kaulotu.

• Ni bera na soqoni ni kuoramu, sureta na cauravou yadua me kauta mai e dua na iyaya se iyaloyalo e matataka e dua na sala e sa vakalougatataka kina na nona bula na kosipeli. Donuya na soqoni ni kuoramu, wilika vata na italanoa me baleti rau na luvei Elder David A. Bednar tagane ena nona vosa “Lako Mai ka Raica.” Cava na vuna e sa rui guta kina o tacina gone me vadretitaka na ligai nona itokani? Sureti ira na cauravou mera wasea na iyaya se iyaloyalo era kauta mai ka mera vakamacalataka na veivakalougatataki era matataka na veiyaya oqo. Vakayaloqaqataki ira mera vakasamataki ira na tamata era kila ka se bera ni ciqoma na veivakalougatataki oqo, ka sureti ira mera tuvatuvaka ni wasea na kosipeli vata kei ira.

• Sureti ira na cauravou mera wilika vata vakuoramu na veisureti nei Elder M. Russell Ballard ena nona vosa “Laiva na Nomu Veivakabauti Vua na Turaga” (ena rua na parakaravu ka tekivu ena “Na kena idola me da vakauqeti mai vua na Kalou”). Wasea e dua na ka o sa sotava ena nomu ciqoma na veisureti oqo, ka sureti ira na cauravou mera wasea na veika eso era sa sotava. Solia vei ira na gauna mera vakasamataka kina e dua e rawa ni ra tara yani mera sureta me lako mai kivei Karisito.

• Vola ena vava ni volavola, “Na cava au rawa ni vakayacora meu vakavakarau vinaka sara kina meu veiqaravi vakadaukaulotu tudei?” Kerei ira na cauravou mera vakatura e so na isau ni taro. Sureti ira mera raica mai se a sauma vakacava o Elder David A. Bednar na taro ena nona vosa “Becoming a Missionary.” Sureti ira mera vaqara na vosa, ni vakaraici na sala eso e rawa kina ni ra daukaulotu ni bera ni ra laki kaulotu. Vakaraitaka e dua na vidio e vakaturi ena ituvatuva oqo, ka sureti ira na lewe ni kuoramu mera wasea na ivakarau ena rawa ni vukei ira kina na veika vakaoqo mera vakavakarau ki na veiqaravi vakadaukaulotu.

• Ni bera na soqoni ni kuoramu, sureti ira na cauravou mera vakarautaki ira mai ni wasea e dua na ivakaraitaki ni cakacaka ni kaulotu mai na ivolanikalou (me vakataki ira sa vakatututaki tu ena ituvatuva oqo). Ni ra wasea tiko na nodra italanoa, tarogi ira ena ka era sa vulica ena nodra wasea tiko na kosipeli. Na cava era vakayacora o ira ena italanoa oqo mera wasea kina na kosipeli? A tarai ira vakacava eso tale na nodra veivakavulici? Na cava e vakauqeti ira na cauravou mera vakayacora mera vakamurimuria kina na nodra ivakaraitaki na daukaulotu oqo?

Kerei ira na cauravou mera wasea na veika era sa vulica nikua. Era sa kila tiko beka na veika e rawa mera vakarautaki ira kina me baleta na nodra veiqaravi vakadaukaulotu ena gauna mai muri? Na cava era sa bau vakila se vakanananu kina? Ena yaga beka me tauri vakalevu na gauna ena ivunau oqo?

Me na tinia na soqoni na cauravou ka veiliutaki tiko. Sa rawa vua me:

• Sureti ira yadudua na cauravou mera vola ena nodra ivola ni iTavi Vua na Kalou e dua na ka ena vakayacora me sureta kina e dua me lako mai kivei Karisito (raica na tabana 28–29, 52–53, 76–77), ka mera qai wasea e vica na lewe ni kuoramu na ka era sa vola.

• Wasea na ka e sa navuca tiko ena nona vakavakarau me dua na daukaulotu mai muri.