ယေရှုခရစ်တော်၏နောက်ပိုင်းကာလသန့်ရှင်းသူများအသင်းတော်၏
ယုံကြည်ခံယူချက်များ

အခန်းကြီး ၁

၁ ကျွန်ုပ်တို့သည် ဘုရားသခင်၊ ထာဝရအဘကို၊ ထို့အတူ သူ၏သားတော် ယေရှုခရစ်တော်ကို၊ ထို့အတူ သန့်ရှင်းသောဝိညာဉ်တော်ကို ယုံကြည်ပါ၏။

၂ လူသားတို့သည် အာဒံ၏လွန်ကျူးခြင်းကြောင့်မဟုတ်ဘဲ သူတို့ကိုယ်တိုင်၏အပြစ်များကြောင့် အပြစ်ဒဏ်ပေးခံရကြမည့်အကြောင်း ကျွန်ုပ်တို့ယုံကြည်ပါ၏။

၃ ခရစ်တော်၏ အပြစ်ဖြေခြင်းမင်္ဂလာ အားဖြင့်၊ ဧဝံဂေလိတရားတော်၏ ပညတ်တရားနှင့် ဘိသိက်မင်္ဂလာများကို နာခံခြင်းအားဖြင့် ခပ်သိမ်းသောလူသားတို့ ကယ်တင်ခြင်းသို့ ရောက်နိုင်ကြောင်း ကျွန်ုပ်တို့ ယုံကြည်ပါ၏။

၄ ကျွန်ုပ်တို့သည် ဧဝံဂေလိတရားတော်၏ ပထမဦးဆုံး အခြေခံဩဝါဒများနှင့် ဘိသိက်မင်္ဂလာများသည်ကား၊ ပထမ၊ ကိုယ်တော်ရှင် ယေရှုခရစ်တော်ကို ယုံကြည်ခြင်း၊ ဒုတိယ၊ နောင်တရခြင်း၊ တတိယ၊ အပြစ်များမှ လွှတ်ခြင်းအတွက် ရေနှစ်မြှုပ်ခြင်းအားဖြင့် ဗတ္တိဇံ၊ စတုတ္ထ၊ သန့်ရှင်းသောဝိညာဉ်တော်၏ဆုကျေးဇူးအတွက် လက်တင်ခြင်းတို့ဖြစ်ကြောင်း ယုံကြည်ပါ၏။

၅ ကျွန်ုပ်တို့သည် လူတစ်ဦး ဧဝံဂေလိတရားတော်ကို ဟောပြောရန်နှင့် ထိုတရားတော်၏ ဘိသိက်မင်္ဂလာများကို စီမံဆောင်ရွက်ရန်မှာ ပရောဖက်ပြုဟောချက်အားဖြင့်လည်းကောင်း၊ အခွင့်အာဏာရှိသောသူတို့၏လက်တင်ခြင်းအားဖြင့် လည်းကောင်း ဘုရားသခင်အားဖြင့် ခေါ်သွင်းခံရမည်ဖြစ်ကြောင်း ယုံကြည်ပါ၏။

၆ ကျွန်ုပ်တို့သည် ရှေးယခင်အသင်းတော်၌ ပေါ်ထွန်းခဲ့သော၊ အမည်အားဖြင့် တမန်တော်များ၊ ပရောဖက်များ၊ သင်းအုပ်များ၊ ဆရာများ၊ ဧဝံဂေလိအမှုတော်ဆောင်များ အစရှိသည့် အလားတူဖွဲ့စည်းခြင်းကို ယုံကြည်ပါ၏။

၇ ကျွန်ုပ်တို့သည် အမျိုးမျိုးသောဘာသာစကားပြောခြင်း၊ ပရောဖက်ပြုဟောခြင်း၊ ဗျာဒိတ်တော်၊ ရူပါရုံများ၊ အနာကင်းစေခြင်း၊ အခြားသောဘာသာစကားများကို အနက်ဖွင့်ပြခြင်း၊ အစရှိသည်တို့၏ဆုကျေးဇူးတို့ကို ယုံကြည်ပါ၏။

၈ ကျွန်ုပ်တို့သည် သမ္မာကျမ်းအား မှန်ကန်စွာဘာသာပြန်ထားခြင်းရှိသမျှ ဘုရားသခင်၏နှုတ်ကပတ်တော်အဖြစ် ယုံကြည်ပါ၏။ မော်မုန်ကျမ်းကိုလည်း ဘုရားသခင်၏နှုတ်ကပတ်တော်အဖြစ်ယုံကြည်ပါ၏။

၉ ကျွန်ုပ်တို့သည် ဘုရားသခင်ဖော်ပြတော်မူခဲ့သည့် ခပ်သိမ်းသောအရာများ၊ သူယခုဖော်ပြတော်မူသည့် ခပ်သိမ်းသောအရာများကို ယုံကြည်ပါ၏၊ ဘုရားသခင်၏နိုင်ငံတော်နှင့်စပ်ဆိုင်သည့် ကြီးမြတ်ပြီး အရေးကြီးသောအရာများစွာတို့ကို သူဖော်ပြတော်မူလိမ့်မည်ဖြစ်ကြောင်းကိုလည်း ကျွန်ုပ်တို့ယုံကြည်ပါ၏။

၁၀ ဣသရေလအမျိုးတို့ ဧကန်အမှန်စုဝေးခြင်းနှင့် မျိုးနွယ်စုဆယ်စုတို့ကို ပြန်လည်ဆောင်ယူခြင်းအကြောင်း၊ ဇိအုန် (ယေရုရှလင်မြို့သစ်) ကို အမေရိကတိုက်၌ တည်ဆောက်မည့်အကြောင်း၊ ခရစ်တော်သည် မြေကြီးပေါ်၌ ကိုယ်တိုင်အုပ်စိုးတော်မူမည့်အကြောင်း၊ ထို့အတူ၊ မြေကြီးသည်ပြန်၍တည်ဆောက်သည်ကိုခံရ၍ ၎င်း၏အတိသုခဘုံကဲ့သို့သောဘုန်းအသရေကို ရရှိလိမ့်မည်ဖြစ်ကြောင်းတို့ကို ကျွန်ုပ်တို့ယုံကြည်ပါ၏။

၁၁ ကျွန်ုပ်တို့သည် ကျွန်ုပ်တို့အသိစိတ်၏လမ်းညွှန်မှုအတိုင်း၊ အနန္တတန်ခိုးရှင်ဘုရားသခင်ကို ကိုးကွယ်နိုင်သည့် အထူးအခွင့်အရေးရှိသည်ဟု ခံယူပါ၏၊ လူသားအားလုံးတို့အား ထိုတူညီသော အထူးအခွင့်အရေးကို ပေး၍၊ မည်သည့်နည်း၊ မည်သည့်နေရာ သို့မဟုတ် မည့်သည့်အရာကိုဖြစ်စေ ကိုးကွယ်ရန် အခွင့်ပေးပါစေ။

၁၂ ကျွန်ုပ်တို့သည် ရှင်ဘုရင်များ၊ သမ္မတများ၊ အုပ်စိုးသူများနှင့် ရာဇဝတ်တရားသူကြီးများ၏ ဩဇာကို ခံယူ၍၊ တရားဥပဒေကို နာခံခြင်း၊ လေးစားခြင်းနှင့် ထောက်ခံခြင်းတို့ကို ယုံကြည်ပါ၏။

၁၃ ကျွန်ုပ်တို့သည် ရိုးသားခြင်း၊ မှန်ကန်ခြင်း၊ ကာမအပြစ်ကင်းခြင်း၊ သဘောထားကောင်းမွန်ခြင်း၊ ကောင်းမြတ်စွာကျင့်ကြံခြင်းနှင့်၊ ခပ်သိမ်းသောလူသားတို့အား ကောင်းကျိုးပြုခြင်းတို့ကို ယုံကြည်ပါ၏။ အမှန်စင်စစ်၊ ကျွန်ုပ်တို့သည် ပေါလု၏ဆုံးမစာကို လိုက်နာသည်ဟု ဆိုနိုင်ပါ၏—ကျွန်ုပ်တို့သည် ခပ်သိမ်းသောအရာတို့ကို ယုံကြည်ပါ၏၊ ကျွန်ုပ်တို့သည် ခပ်သိမ်းသောအရာတို့ကို မျှော်လင့်ပါ၏၊ ကျွန်ုပ်တို့သည် များစွာသောအရာတို့ကို ကြံ့ကြံ့ခံကြလေပြီး၊ ခပ်သိမ်းသောအရာတို့ကိုလည်း ကြံ့ကြံ့ခံနိုင်လိမ့်မည်ဟု မျှော်လင့်ပါ၏။ ကောင်းမြတ်သော၊ နှစ်သက်ဖွယ်သော သို့မဟုတ် အသရေရှိသော၊ သို့မဟုတ် ချီးမွမ်းဖွယ်ဖြစ်သောအရာတစ်စုံတစ်ခုရှိလျှင်၊ ကျွန်ုပ်တို့သည် ထိုအရာကို ရှာဖွေကြပါ၏။

ဂျိုးဇက်စမစ်။

ဘာသာပြန်နေဆဲဖြစ်ပါသည်