1 Yog li ntawd txhob tso tej ntsiab cai ntawm Khetos txoj lus qhuab qhia tseg, cia peb mus ntxiv kom txog qhov zoo tag nrho; tsis txhob rov qab pib dua lub hauv paus ntawm kev hloov siab lees txim los ntawm tej hauj lwm uas tuag lawm, thiab ntawm kev ntseeg rau Vajtswv.

2 Ntawm cov lus qhuab qhia ntawm kev cai raus dej, ntawm kev tso tes rau saum taub hau, thiab ntawm cov tuag txoj kev sawv rov los, thiab ntawm kev txiav txim mus ib txhis.

3 Thiab peb yuav mus ntxiv kom txog qhov zoo tag nrho yog Vajtswv cia.

4 Vim Vajtswv tau ua rau cov uas twb to taub thaum yav tas los lawm, thiab tau txais lub txiaj ntsim saum ntuj, thiab tau txais tus Vaj Ntsuj Plig Dawb Huv,

5 Thiab tau txais Vajtswv txoj lus zoo, thiab tej hwj chim ntawm lub neej uas yuav los,

6 Yog tias lawv tso kev ntseeg tseg, kom tsis muaj hnub yuav ua tau los ua dua tshiab rau kev hloov siab lees txim; vim pom hais tias lawv tus kheej rov muab Vajtswv Leej Tub ntsia rau saum ntoo khaub lig dua ntxiv, thiab ua rau nws raug thuam tab meeg sawv daws.

7 Vim hnub ntawd yuav los thaum lub ntiaj teb uas haus cov dej nag uas los tsis tseg, thiab ua rau tej qoob loo txhawv tuaj rau cov uas nyob rau haud, cov uas tu lub ntiaj teb, uas tam sim no tau txais cov koob hmoov los ntawm Vajtswv, yuav raug xuas hluav taws ntxuav.

8 Vim Vajtswv yuav xyeej cov uas muaj nroj thiab tuaj pos, thiab tsis ntev yuav raug foom tsis zoo; yog li ntawd lawv cov uas tsis txi txiv zoo, yuav raug muab pov rau hauv hluav taws; vim lawv qhov kawg ces yog raug muab hlawv.

9 Tiam sis, cov phooj ywg uas kuv hlub, peb cia siab tias nej ua tej yam uas zoo dua, thiab tej yam uas muaj feem nrog kev cawm seej, txawm peb hais li ntawd los xij.

10 Vim Vajtswv yeej ncaj ncees, yog li ntawd nws yuav tsis hnov qab nej txoj hauj lwm thiab nej tej dej num ntawm kev hlub, uas nej tau ua rau nws lub npe, tej uas nej tau txhawb pab cov neeg ntseeg, thiab txhawb pab lawv tam sim no.