1 Mamelang, oho lona baholo ba kereke ea ka, ’me le thehele tsebe ho lentsoe la ka, ’me le ithute ka ’na ka seo ke se batlang malebana le lona, ’me hape le malebana le lefats’e lena leo ke le rometseng ho lona.

2 Hobane kannete ke re ho lona, ho lehlohonolo eo ea bolokang litaelo tsa ka, ho sa natsoe hore na ke bophelong kapa lefung; ’me eo ea ts’epahalang mats’oenyehong, moputso oa ea joalo o moholo ’musong oa leholimo.

3 Lona ha le na ho bona ka mahlo a lona a tlhaho, bakeng sa nako ea hajoale, moralo oa Molimo oa lona malebana le lintho tse tlang ho tla kamorao ho mona, ’me khanya e tla latela kamorao ho mats’oenyeho.

4 Hobane ka morao ho mats’oenyeho a mangata ho tla litlhohonolofatso. Ka baka leo letsatsi lea tla leo le tla roesoa moqhaka ka khanya e ngata; hora ha e so fihle, empa e haufi.

5 Hopolang sena, seo ke le bolellang sona esale pele, hore le ke le se behe pelong, ’me le amohele seo se tlang ho latela.

6 Bonang, kannete ke re ho lona, ke ka baka lena ke le rometseng—hore le ke le mamele, le hore lipelo tsa lona li ke li lokisetsoe ho fana ka bopaki ba lintho tse tlang ho tla;

7 ’Me hape hore le ke le hlompheloe ho etsa motheo, le ho paka ka lefats’e leo ho lona Sione ea Molimo e tlang ho ema;

8 ’Me hape hore mokete oa lintho tse nonneng o ke o lokisoe bakeng sa mafutsana; ee, mokete oa lintho tse nonneng, oa veine e holim’a lits’ifa tse hloekisitsoeng hantle, hore lefats’e le ke le tsebe hore melomo ea baporofeta e ke ke ea hloleha;

9 Ee, lijo tsa mantsiboea tsa ntlo ea Morena, tse lokisitsoeng hantle, tseo ho tsona lichaba tsohle li tlang ho mengoa.

10 Ea pele, barui le barutehi, ba bohlale le ba khabane;

11 ’Me kamorao ho moo ho tla tla letsatsi la matla a ka; ebe mafutsana, liritsa, le lifofu, le litholo, ba tla kena lenyalong la Konyana, ’me ba je lijo tsa mantsiboea tsa Morena, tse lokisitsoeng bakeng sa letsatsi le leholo le tlang.

12 Bonang, ’na Morena, ke se ke buile.

13 ’Me hore bopaki bo ke bo ee ho tsoa Sione, ee, ho tsoa molomong oa motse oa lefa la Molimo—

14 Ee, ka baka lena ke le rometse mona, ’me ke khethile mohlanka oa ka Edward Partridge, ’me ke mo khethetse thomo ea hae lefats’eng lena.

15 Empa haeba a sa bake libeng tsa hae, tseo e leng ho se lumele le bofofu ba pelo, mo lese a mamele esere a oela.

16 Bonang thomo ea hae e fanoe ho eena, ’me e ke ke ea fanoa hape.

17 ’Me mang kapa mang ea nkang thomo ena o khethetsoe ho ba moahloli Iseraele, joaloka ha ho ne ho le joalo matsatsing a khale-khale, ho arola mafats’e a lefa la Molimo ho bana ba hae;

18 ’Me ho ahlola batho ba hae ka bopaki ba ba lokileng, le ka thuso ea baeletsi ba hae, ho ea ka melao ea ’muso eo e fanoeng ka baporofeta ba Molimo.

19 Hobane kannete ke re ho lona, molao oa ka o tla bolokoa lefats’eng lena.

20 Le se ke la lumella motho ofe kapa ofe ho nahana hore ke mobusi; empa lesang Molimo ho busa eo ea ahlolang, ho ea ka keletso ea thato ea hae, kapa ka mantsoe a mang, eo ea eletsang kapa ea lulang setulong sa kahlolo.

21 Le se ke la lumella motho ofe kapa ofe ho roba melao ea naha, hobane eo ea bolokang melao ea Molimo ha a hloke ho roba melao ea naha.

22 Ka baka leo, le ipehe tlas’a matla a teng, ho fihlela a busa eo e leng tokelo ea hae ho busa, ’me a hatakela lira tsohle tlas’a maoto a hae.

23 Bonang, melao eo le e fumaneng ho tsoa letsohong la ka ke melao ea kereke, ’me ka hona le tla e ts’oara ho ea pele. Bonang, bohlale ke bona.

24 ’Me joale, joaloka ha ke buile malebana le mohlanka oa ka Edward Patridge, naha ena ke naha ea bolulo ba hae, le bao a ba khethileng bakeng sa ho ba baeletsi ba hae; ’me hape le naha ea bolulo ba eo ke mo khethetseng ho boloka ntlo ea ka ea polokelo;

25 Ka baka leo, ba lese ba tlise malapa a bona naheng ena, hobane ba tla buisana pakeng tsa bona le ’na.

26 Hobane bonang, ha hoa nepahala hore ke laele linthong tsohle; hobane eo ea qobelloang lithong tsohle, ea joalo ke ea botsoa ’me ha se mohlanka ea bohlale; ka baka leo ha a na ho fumana moputso.

27 Kannete ke re, batho ba lokela ho chesehela ho nka karolo litabeng tse molemo, ’me ba etse lintho tse ngata tsa boithatelo ba bona, ’me ba tlise ho loka ho hongata;

28 Hobane matla a ka ho bona, ao ka oona ba nang le bolokolohi ba ho ikhethela. ’Me ha feela batho ba etsa botle ha ho kamoo ba ka lahleheloang ke moputso oa bona.

29 Empa eo ea sa etseng letho ho fihlela a laeloa, ’me a amohela taelo ka pelo e belaelang, ’me a e mamela ka botsoa, ea joalo o rohakehile.

30 Ke ’na mang ea entseng motho, ho rialo Morena, ea tla mo nka a se na molato ea sa mameleng litaelo tsa ka?

31 Ke ’na mang, ho rialo Morena, ea ts’episitseng ’me a se ke a phethahatsa?

32 Kea laela ’me batho ha ba memele; kea hlakola ’me ha ba fumane tlhohonolofatso.

33 Ebe ba re ka lipelong tsa bona: Oona ha se mosebetsi oa Morena, hobane lits’episo tsa hae ha lia phethahala. Empa ho malimabe bao, hobane moputso oa bona o ba lalletse tlaase eseng ho hlaha holimo.

34 ’Me joale ke le neha tataiso malebana le naha ena.

35 Ke bohlale ho ’na hore mohlanka oa ka Martin Harris e be mohlala ho kereke, ho beha chelete ea hae ka pele ho mobishopo oa kereke.

36 ’Me hape, oona ke molao ho motho e mong le e mong ea tlang naheng eena ho fumana lefa; ’me o tla etsa ka lichelete tsa hae ho latela kamoo molao o tataisang.

37 ’Me ke bohlale hape hore ho be le mobu o rekoang Independence, bakeng sa ntlo ea polokelo, le hape bakeng sa ntlo ea khatiso.

38 ’Me taelo tse ling malebana le mohlanka oa ka Martin Harris li tla fanoa ho eena ka Moea, hore a tle a fumane lefa la hae joaloka ha ho bonahala ho lokile ho eena;

39 ’Me mo leseng a bake libeng tsa hae, hobane o batla setumo sa lefats’e.

40 ’Me le lese mohlanka oa ka William W. Phelps a be ka ofising eo ke tla mo khethela eona, ’me a fumane lefa la hae naheng eo;

41 ’Me hape o hloka ho baka, hobane ’na Morena, ha kea thaba ka eena, hobane o batla ho tuma, ’me ha a bonolo ho lekana ka pele ho ’na.

42 Bonang, eo ea bakileng libeng tsa hae, ea joalo oa ts’oareloa, ’me ’na Morena ha ke hlole ke li hopola.

43 Ka sena le ka tseba haeba motho a bakile libeng tsa hae—bonang, o tla li bolela ’me a li furalle.

44 ’Me joale, kannete, ke re malebana le masalla a baholo ba kereke ea ka, nako ha e-so fihle, ka lilemo tse ngata, hore bona ba fumana lefa la bona naheng ena, ntle le ha ba le kopa ka thapelo ea tumelo, feela joaloka ha ba tla le khetheloa ke Morena.

45 Hobane, bonang, ba tla bokella batho hammoho ho tsoa lipheletsong tsohle tsa lefats’e.

46 Ka kaba leo, ipokelleng hammoho; ’me bao ba sa khetheloang ho lula naheng ena, ba leseng ba rute evangeli libakeng tse haufi le teng, ’me kamorao ho moo ba leseng ba khutlele malapeng a bona.

47 Ba leseng ba rute tseleng, ’me ba pake ka ’nete libakeng tsohle, ’me ba bitse barui, ba phahameng le ba tlase, le mafutsana ho baka.

48 ’Me ba leseng ba ahe likereke, ha feela baahi ba lefats’e ba tla baka.

49 ’Me etsang hore moemeli a khethoe ka lentsoe la kereke, kerekeng e Ohio, ho amohela lichelete tsa ho reka mobu Sione.

50 ’Me ke fana ho mohlanka oa ka Sidney Ridgon taelo, hore o tla ngola tlhaloso ea naha ea Sione, le tlaleho ka thato ea Molimo, joaloka ha e tla tsebahatsoa ka Moea ho eena;

51 ’Me epistole le litefiso, tse tlanh ho hlahisoa ho likereke tsohle ho fumana lichelete, li tla behoa matsohong a mobishopo, ka eena kapa ka moemeli, joaloka ha ho bonahala ho le molemo ho eena kapa joaloka ha a tla tataisa, ho reka naha bakeng sa lefa la bana ba Molimo.

52 Hobane bonang, kannete ke re ho lona, Morena o rata hore barutuoa le bana ba batho ba lokela ho bula lipelo tsa bona, esita le ho reka tikoloho ena eohle ea naha, hang ha nako e lumela.

53 Bonang, bohlale ke bona. Ba lese ba etse sena ho seng joalo ha ba na ho fumana lefa, ntle le ka ts’ollo ea mali.

54 ’Me hape, ha feela ho e-na le naha e fumanoeng, etsang hore ho be le basebetsi ba mefuta eohle ba romelloang ho naha ena, ho sebeletsa bahalaleli ba Molimo.

55 Etsang hore lintho tsena tsohle li etsoe ka tatellano; etsang hore menyetla ea naha e tsebahatsoe nako le nako, ka mobishopo kapa moemeli oa kereke.

56 ’Me etsang hore mosebetsi oa pokello o se ke oa potlaka, kapa o be ka ho baleha; empa etsang hore o etsoe joaloka ha ho tla eletsoa ke baholo ba kereke sebokeng se akaretsang, ho latela tsebo eo ba e fumanang nako le nako.

57 ’Me etsang hore mohlanka oa ka Sidney Ridgon a halaletse le ho hlohonolofatsa naha ena, le sebaka bakeng sa tempele ho Morena.

58 ’Me etsang hore kopano ea seboka e bitsoe; ’me kamorao ho moo etsang hore bahlanka ba ka Sidney Ridgon le Joseph Smith, ba khutle, hape le Oliver Cowdery, ho finyeletsa masalla a mosebetsi oo ke ba khethetseng oona linaheng tsa bona, le masalla joaloka ha ho tla etsoa qeto libokeng.

59 ’Me etsang hore ho se ke ha e-ba le motho ea khutlelang naheng ena ntle le ea pakang tseleng, ka seo a se tsebang le seo a se lumelang e le ka nnete.

60 Etsang hore seo se abetsoeng Ziba Peterson se nkoe ho eena; ’me le etse hore a eme joaloka setho sa kereke, ’me a sebetse ka matsoho a hae, le baena, ho fihlela a khalemetsoe bakeng sa libe tsa hae tsohle; hobane ha a so li bolele, ’me o nahana ho li pata.

61 Etsang hore masalla a baholo ba kereke, ba tlang naheng ena, bao babang ba hlohonolofalitsoeng ka ho fetisisa, esita le ho feta tekanyo, le bona ba ts’oare seboka naheng ena.

62 ’Me etsang hore mohlanka oa ka Edward Patridge a tsamaise seboka se tlang ho ts’oaroa ke bona.

63 ’Me etsang hore ba boele ba khutle, ba rute evangeli tseleng, ba pake ka lintho tse tlang ho senoloa ho bona.

64 Hobane, kannete, molumo o tlameha ho tloha libakeng tsena ho ea lefats’eng lohle, ’me le libakeng tse hole-hole tsa lefats’e—evangeli e tlameha ho rutoa ho sebopuoa se seng le se seng, ka mehlolo e tla latela ho ba lumelang.

65 ’Me bonang Mor’a Motho oa tla. Amen.