1 Áádóó áko shooh, kʼad baa hoolzhiizh Laman dineʼé tʼóó yiwohdí baa dahoochįįd háálá bikʼéí ndeisteedígíí biniinaa; éí bąą Nephi dineʼé atídadiilnííł daaníigo yee dahoodeezʼą́; áádóó Anti-Nephi-Lehi bidineʼé tʼáadoo nináádeestseed da ákweʼé hoolzhiizhgo.

2 Ákondi biʼnidaabaahí yił níná dóó Zarahemla bikéyah yiih yikai, áádóó Ammonihah kéyahdi diné keedahatʼínééʼ yikʼiijééʼ dóó ndeistseed.

3 Áádóó éí bikʼihjįʼ, tʼóó ahayóídi Nephi dineʼé yił ałkʼiijééʼ, áko tʼóó ahayóí ndanichéégo ndabiʼdistseed.

4 Áádóó Laman dineʼé ndaʼbidistseed yę́ę kasdą́ą́ʼ tʼáá ałtso Amulon baʼáłchíní dóó bikʼéí adaatʼį́, éí Noah bipriest danilį́į́ ńtʼę́ę́ʼ, áádóó éí Nephi dineʼé ndabistseed;

5 Áádóó chʼéékaiʼígíí, haʼaʼahjigo diné doo kééhatʼíníjigo adaneezchą́ą́ʼ, dóó Laman dineʼé tʼáá naʼnileʼdii yigha dahodeestʼą́ dóó yikʼi adídahoosʼnííʼ, tʼóó ahayóí Laman dineʼé kǫʼ yee ndeistseed bidaʼoodląʼ biniinaa—

6 Háálá ląʼída éiyá, ląʼída éí ndabiʼdistseed dóó ląʼí tiʼdahoozniiʼ, bikéyahdi Aaron dóó bikʼiské yee ndabineeztʼą́ą́ʼ yę́ę dabidiisnááʼgo yéédaalniiʼ; éí bąą bizází bibee ádaʼoolʼįįłyę́ę doo deiyoosdląąd da, áádóó Diyin Bóhólníihii deiyoosdląąd, dóó Nephi dineʼé ayóó átʼáo adziilii yeinilą́; ákotʼáó diné doo kééhatʼinídi ląʼída daʼoosdląąd.

7 Áádóó baa hoolzhiizh akʼihbidahoolníihii Amulon baʼáłchíní chʼéédziʼígíí éí daʼoosdląądígíí ndeidoołtsxiłgo yándahazʼą́, aooʼ, tʼáá ałtso díí tʼáá aníínii deiyoosdląądígíí.

8 Áko díí tʼáá aníínii yiniinaa daneeznánée éí ląʼída bikʼéí bádahoołchįįd; dóó doo kééhojitinídi saad ałchʼįʼ adeiyiinííł daazlį́į́ʼ; áádóó Laman dineʼé éí Amulon dóó bikʼéí yikádadeezbaah ndeidoołtsxił biniyé; dóó haʼaʼaahjigo doo kééhojitʼinígóó dahdadínííchą́ą́ʼ.

9 Áádóó áko shooh éí dííjį́į́di Laman dineʼé biká ndaabaah. Ákohgo Abinadi bizaad yę́ę bohoolyaa, éí priest danilínígíí baʼáłchíní kǫʼ bee tiʼdahodoonih nínée.

10 Háálá áyidííniid: Atídahshidoołíłígiʼ átʼáo ádahodooníłígíí bohodoolnííł.

11 Áádóó áko Abinadi éí Diyin God yoodlánígíí biniinaa bí áłtsé kǫʼ yee tiʼhoozniiʼgo daaztsą; áko díí éí díígiʼ átʼáo ááh yíłníi ńtʼę́ę́ʼ, ląʼída kǫ yee tiʼdahodoonihgo ndadootsxił, bí tiʼhoozniiʼ yę́ęgiʼ átʼáo.

12 Áádóó Noah bipriest danilínígíí áyidííniid nihílástsiiʼ ląʼí diné nidabidoołtsxił, tʼáá bí tiʼhoozniiʼ yę́ęgiʼ átʼáo dóó adahwiisʼáágóó daʼníłtsʼą́ąjigo ałtsʼáhídínóolkał dóó ndabiʼdidooltsxił, dibé yaaʼáhályáanii tʼáágééd ayóó ííjééʼ dóó naaldlooshii daʼałchinígíí dabííghą́ą́ʼ; dóó áko shooh, díí saad bee haʼoodzííʼ yę́ę bohoolyaa, háálá Laman dineʼé binoolkał ńtʼę́ę́ʼ, dóó biká ndaʼazbaaʼ, dóó atídabiʼdiilyaa.

13 Áádóó baa hoolzhiizh Laman dineʼé éí Nephi dineʼé chʼééh yikʼehdadidleehgo tʼáá bí bikéyahgo anáákai; dóó ląʼí Ishmael bikéyah dóó Nephi bikéyahjigo yidahidiiná, dóó Diyin God bidineʼé yídiikai, éí Anti-Nephi-Lehi bidineʼé adaatʼį́.

14 Áádóó ałdóʼ yee ndaabaa łeeyiʼ góneʼ yikʼi dahoogeed, bikʼéí adaʼiilaa yę́ę yedaʼiilaa, áádóó diné diyinkʼehgo dahiinaʼ; dóó Diyin Bóhólníihii yikééʼ deiyíkaa daazlį́į́ʼ, dóó bibee hazʼáanii dóó bee ndahwiistʼáanée yikʼeh dahółʼį́į́ ńtʼę́ę́ʼ.

15 Aooʼ, Moses bibee hazʼáanii yikʼeh dahoołʼį́į́ ńtʼę́ę́ʼ; háálá kʼad ndi Moses bibee hazʼáanii yikʼeh dahoołʼį́į doolééł, hááłá doo tʼáá ałtso bohoolyaa da. Azhą́ ákótʼée ndi Moses bibee hazʼáanii yikʼeh dahółʼį́, Christ doogááłígíí yichʼįʼ dadeezʼį́į́ʼ, Moses bibee hazʼáanii éí Christ doogááł nahalingo deiniłʼį́, dóó ádeiłʼíinii tʼáá yikʼeh dahółʼį́įgo deiyoodlą́ éí Diyin nádzáajįʼ índa.

16 Áko éí Moses bibee hazʼáanii doo bee yisdáʼdoodááł da danízin; ákondi Moses bibee hazʼáanii éí Christ hózhǫ́ beʼoodlaʼ dabidziilgo ádabósin; dóó éí bąą biʼoodlą́ bee tʼah hadaʼólní, hoolʼáágóó yisdáʼiildééh bichʼįʼ, diyingo áhodooníłígíí yadaʼólíigo, éí náásgo ádahodooníłígíí yaa halneʼ.

17 Áádóó áko shooh, Ammon, dóó Aaron, dóó Omner, dóó Himni, dóó bikʼéí tʼáá íiyisíí bił dahóózhǫǫd, háálá Laman dineʼé bitahgóó nizhónígo łaʼ dahoolaaʼígíí biniinaa, Diyin Bóhólníihii bisodizin bikʼehgo beidiníʼánígíí deiyiłtsą́ą́góó, dóó ałdóʼ bizaad tʼáá ałtso yee haadzííʼ yę́ę yá yihoolaa.