11. Na Vanua Tabu ena Gauna ni Veiyalayalati Vou

Taia vata kei Saitoni A vakatautauvatataki Koresini kei Peciseita ko Jisu ki vei Taia kei Saitoni (Maci. 11:20–22). A vakabula na luvena yalewa e dua na marama kai Matanitu tani (Maci. 15:21–28).

Ulunivanua ni Veivakamataliataki A vakamataliataki ko Jisu e matadratou ko Pita, Jemesa, kei Joni, ka ratou ciqoma kina na idola ni matanitu (Maci. 17:1–13). (Eso era nanuma ni Ulunivanua ni Veivakamataliataki na Ulunivanua ko Erimoni; eso tale era nanuma ni Ulunivanua ko Tepori.)

Sisaria Filipai Sa vakadinadinataka ko Pita ni Karisito ko Jisu ka yalataki kina vua na idola ni matanitu (Maci. 16:13–20). Sa tukuna rawa ko Jisu na Nona mate kei na Tucake Tale (Maci. 16:21–28).

Yasayasa vaka-Kalili E levu na Nona gauna ni bula kei na cakacaka ko Jisu a yaco tiko e Kalili (Maci. 4:23–25). Eke a solia kina na Vunau ena Ulunivanua (Maci. 5–7); vakabula e dua na vukavuka (Maci. 8:1–4); ka digitaka, tabaka, ka talai ira yani na iApositolo Le Tinikarua, vei iratou oqo ko Jutasa Isikarioti ga e kilai ni sega ni kai Kalili (Marika 3:13–19). A rairai vei iratou na iApositolo na Karisito sa vakaturi cake mai Kalili (Maci. 28:16–20).

Wasawasa e Kalili, a qai vakatokai e muri me Waitui e Taiperia A veivakavulici kina ko Jisu mai na waqa nei Pita (Luke 5:1–3) ka kacivi Pita, Adriu, Jemesa, kei Joni me ratou gonedau ni tamata (Maci. 4:18–22; Luke 5:1–11). A vakarota talega na cagi kaukauwa (Luke 8:22–25), veivakavulici ena italanoa vakaibalebale mai na dua na waqa (Maci. 13), lako e dela ni waitui (Maci. 14:22–32), ka rairai vei iratou na Nona tisaipeli ni oti na Nona Tucake Tale (Joni 21).

Peciseita Eratou a sucu mai Peciseita ko Pita, Adriu, kei Filipe (Joni 1:44). A lako tani vakavuni yani ko Jisu kei iratou na iApositolo volekati Peciseita. Era a muri Koya yani na lewevuqa, ka qai vakani ira na lewe 5,000 (Luke 9:10–17; Joni 6:1–14). Eke a vakabula kina ko Jisu e dua na mataboko (Marika 8:22–26).

Kapenaumi Oqo na itikotiko nei Pita (Maci. 8:5, 14). E Kapenaumi na vanua ka vakatoka ko Maciu me “nona koro sara ga ko Jisu,” a vakabula kina ko Jisu e dua na tamata tauvi paralase (Maci. 9:1–7; Mari. 2:1–12), vakabula na nona tamata e dua na turaganivalu ni Roma, vakabula na tinai wati Pita (Maci. 8:5–15), kacivi Maciu me dua vei ira na Nona iApositolo (Maci. 9:9), dolava na mata sa boko, vakasava e dua na tevoro (Maci. 9:27–33), vakabula na ligana malai e dua na tamata ena Siga ni Vakacecegu (Maci. 12:9–13), soli na ivunau ni madrai ni bula (Joni 6:22–65), ka vakadonuya me sauma na ivakacavacava, ena nona tukuna vei Pita me taura mai na ilavo ena gusu ni dua na ika (Maci. 17:24–27).

Makitala Oqo na koro nei Meri na yalewa ni Makitala (Marika 16:9). A lako mai ki ke ko Jisu ni oti na nona vakani ira na lewe 4,000 (Maci. 15:32–39), ka ra qai kerea na Farisi kei ira na itokani nei Setoki me vakaraitaka vei ira e dua na ivakatakilakila mai lomalagi (Maci. 16:1–4).

Kena A vukica ko Jisu na wai me waini (Joni 2:1–11) ka vakabula na luvena tagane e dua na tamata turaga a tiko mai Kapenaumi (Joni 4:46–54). Ko Kena talega na koro nei Nacanieli (Joni 21:2).

Nasareci Na nona rairai mai na agilosi ka mai tukutuku vei Meri kei Josefa a yaco e Nasareci (Maci. 1:18–25; Luke 1:26–38; 2:4–5). Ni lesu mai Ijipita, a bula voli ena nona gauna ni gone kei na gauna ni itabagone eke ko Jisu (Maci. 2:19–23; Luke 2:51–52), a tukuna kina ni ko Koya na Mesaia, ka ra cati Koya na kainona (Luke 4:14–32).

Jeriko A solia lesu ko Jisu me rai e dua na tamata mataboko (Luke 18:35–43). A kana vata talega kei Sakiusa, “na turaga vei ira na kumuna na ivakacavacava” (Luke 19:1–10).

Pecipara A vakadinadinataka ko Joni na Dauveipapitaisotaki ni sai koya na “domo ni dua sa kacikaci e loma ni veico” (Joni 1:19–28). A papitaisotaki Jisu ko Joni ena Uciwai na Joritani ka vakadinadinataka ni sa Lami ni Kalou ko Jisu (Joni 1:28–34).

Lekutu e Jutia A vunau ena lekutu oqo ko Joni na Dauveipapitaisotaki (Maci. 3:1–4), na vanua a lolo kina ko Jisu me 40 na siga ka qai temaki kina (Maci. 4:1–11).

Emeo A taubale vata kei rau e rua na Nona tisaipeli ena gaunisala ki Emeo na Karisito sa vakaturi cake tale (Luke 24:13–32).

Pecifaki Erau sa kauta mai vei Jisu e dua na luve ni asa e rua na tisaipeli ka sa tekivu kina na Nona curu ena qaqa ki Jerusalemi (Maci. 21:1–11).

Pecani Oqo na nodratou koro ko Meri, Marica, kei Lasarusa (Joni 11:1). A vakarorogo tiko ko Meri ki na vosa nei Jisu, ka vosa kina ko Jisu vei Marica ena kena digitaki na “ivotavota vinaka” (Luke 10:38–42); a vakaturi Lasarusa cake mai na mate ko Jisu (Joni 11:1–44); ka qai lumuta ko Meri na yavai Jisu (Maci. 26:6–13; Joni 12:1–8).

Peceliema A sucu ko Jisu ka vakotori ena ikanakana ni manumanu (Luke 2:1–7); era sa laki tukuna vei ira na ivakatawa ni sipi na sucu i Jisu ko ira na agilosi (Luke 2:8–20); era a dusimaki na tamata vuku mai na dua na kalokalo ki vei Jisu (Maci. 2:1–12); ka sa vakamatei ira na gonelalai ko Eroti (Maci. 2:16–18).