Koht iei Semomw Nanleng. E ketin mwahngih ihs komwi oh poakohng komwi laudsang me komw kak lemehda. E ketin kupwurki komwi en peren nan mour wet oh nan mour soutuk.

Pwehn kapwaiada met, Sahm Nanleng ketikihda koasoandi ehu me kahdaniki rongamwahu* en Sises Krais. Sises Krais iei Iehros en Koht; Sapwellime mour oh padahk kan iei kaweid ong popohl nan mour wet oh peren nan mour soutuk.

Rongamwahu en Sises Krais kin ketin kapaiada koaruhsiehn me kin alehda oh momourki. Ehu wasa me keieu mwahu en padahk oh doadoahngki rongamwahuo iei nan peneinei kan. Koht ketin koasoanehdi peneinei kan pwehn wahdo peren ong Sapwellime serihkan, en mweidehng kitail en esehla tepin padahk pwung kan nan irair me limpoak, oh en kaunop kitail en pwuralahng Ih mwurin atail mehla. Mendahte irair en nanpwungen towe kan en peneinei ahr kin kak ekei pak kasongosong, Sahm Nanleng kin ketin kapaikitailda ni atail kin nantihieng en idawehn padahk kan en Sises Krais. Padahk pwukat kin seweseikitail kakehlailih atail peneinei kan.

Ni eh wia kisehn Sapwellime koasoandi, Koht ketin pilada soukohp akan, me rasehng Adam, Noha, Eipraam, oh Moses. Soukohp akan kin:

• Padahk duwen Koht oh wia sounkadehde tohrohr kan en Sapwellime Iehros, Sises Krais.

• Alehdi kaudiahl de kaweid sang Kauno.

• Padahk duwen rongamwahuo ong sampah oh kawehwe mahsen en Koht.

Soukohp akan kin alehdi priesthood, de mweimwei en mahsen oh mwekid ni mwaren Koht pwehn kahluwa Sapwellime serihkan. Aramas me kin idawehn soukohp akan kin alehdi kapai kan me Koht ketin inouki. Irail akan me kin soikala rongamwahuo oh sapwellimen Koht soukohp akan pahn katiasang kapai pwuko oh pein kadohwanirailsang Koht. Irail akan me kin soikala soukohp akan oh kesehla arail koasoandi en idawehn Koht kin mih nan irair ehu me kahdaniki pwupwulao.

Mendahte tohtohn Sapwellime serihkan ahr kin pwurupwurehng soikala Ih oh Sapwellime soukohp akan, Sahm Nanleng kin ketin doulahte poakohng Sapwellime serihkan. E ketin kupwurki kihieng kitail mehkoaros me kitail anahne pwehn peren met oh en pwurala Reh mwurin atail pahn mehla. Pwuhk sarawi kan kasalehda duwen Koht eh kin ketin pwurpwurehng tetehkodo Sapwellime serihkan, mendahte atail sohte kin wie rongorong ansou koaros:

• Koht kin ketin pilada soukohp men.

• Soukohpo kin padahk rongamwahuo oh kahluwa aramas akan.

• Koht kin ketin kapaiada aramas akan.

• Aramas kin ekisekis mwamwahlikihla de sapeikiong padahk kan en soukohpo. Irail kin kedekedeo soikala soukohpo oh sapwellime padahk kan oh lelohng nan irair en pwupwula.

• Pwehki pwupwulao, e kin salongasang aramas akan arail wehwepen rongamwahuo. Mweimwei en priesthood kin kopwurupwursang rehrail.

• Ni ansouo eh pahn pwung oh aramas akan ahr pahn onop en pwurehng idawehn Ih, Koht kin ketin pilada emen soukohp tohrohr, kapwurehdo priesthood oh Mwomwohdiso, oh kin ketin kaweid soukohpo en padahk rongamwahuo.

Sang ni ansou en Kapikipiko, sapwellimen Koht serihkan kin kilenglahng ketidohn Sounkomour Sises Krais. Ni duwen me E ketin inouki, Sahm Nanleng ketin poaronehdo Sapwellime Iehros, Sises Krais, ong sampah sounpar 2,000 samwalahro.

Sises Krais sapwellimanki mour unsek, sohte dihp. E ketin kauwada Sapwellime Mwomwohdiso, padahk Sapwellime rongamwahuo, oh kapwaiada manaman tohto. E ketin pilada ohl ehk riemen en wia Sapwellime Wahnpoaron Akan, iangahki Piter, Seims, oh Sohn. E ketin padahkih irail oh ketkihieng irail mweimwei en priesthood pwehn padahk ni Mware oh pwehn kapwaiada tiahk sarawi kan, me rasehng pepdais.

Ni ansou me Sises ketin kauwada Sapwellime Mwomwohdisohu, E ketin alehdi kaweid kan sang Sahm Nanleng. Ih eri ketin kaweidih Sapwellime tohnpadahk kan. Sises ketin padahkih Sapwellime tohnpadahk kan me kaudiahl sang Koht iei paip me E pahn ketin kauwada Sapwellime Mwomwohdiso powe.

Ni imwin Sapwellime mour, Sises Krais ketin lokolok oh pwoula pwehki dipen koaruhsiehn me mourehr de me pahn mour pohn sampah. Tohnmetei wet kahdaniki Tomwo. Sang ni Sapwellime lokolok, mehla, oh Iasada, Sounkomouro elehieng atail kak alehdi mahk. Irail akan me pwoson Ih, koluhla, oh kolokol Sapwellime kosonned akan kin alehdi mahkpen diparail kan oh audaudki popohl oh peren.

Mwurin Sapwellime Iasadaho, Sises Krais ketin kaweidih Sapwellime Wahnpoaron Akan sang ni kaudiahl. Pwuhk Sarawi kilelehdi wiepe tohto me E kin ketin doula pwehn kaweidih Sapwellime Mwomwohdiso (tehk Wiewia Kan 10; Kaudiahl 1:1). Eri Mwomwohdiso en Sises Krais kaweid sang Koht oh kaidehn sang aramas.

Mwurin pwoulahn Sises Krais, aramas suwed kaloke oh kemehla tohto towe kan en Mwomwohdiso. Towe teikan en Mwomwohdiso tepida dohlahsang tepin padahk kan me padahk sang Sises Krais oh Sapwellime Wahnpoaron Akan. Wahnpoaron Akan kamakamala, oh mweimwei en priesthood—iangahki kih kan pwehn kaweid oh alehdi kaudiahl ong Mwomwohdiso—wisiksang pohn sampah. Pwehki Mwomwohdiso eh sohla kaweid sang manaman en priesthood, sapwung kan tepida miehda nan padahk kan en Mwomwohdiso. Aramas mwahu oh mehlel tohto mihmihte, ahpw rongamwahuo ni duwen eh kokouda sang Sises Krais salongala. Mwehi wet kahdaniki Pwupwula Lapo.

Pwupwula wet imwikihla kokoudahn mwomwohdiso tohto me ahniki padahk kan me wekpeseng oh sohte kak dokpene. Erein ansou wet, ohl oh lih tohto rapahki mehlelo, ahpw irail sohte kak diar. Tohto aramas mwahu kamehlele Koht oh Sises Krais oh song en wehwehki oh padahk mehlelo, ahpw irail sohte kolokol rongamwahuo ni unsek de mweimwei en priesthood. Me imwila, ehuehu dih kan sohsohkihla irair en pwupwula ni aramas akan ahr kaweid sang dahme dih kan en mwowe pwilikihdihieng irail, iangahki wekidekla kan ong sapwellimen Krais rongamwahuo.

Ekei aramas kamaraindahkan, me rasehng Martin Luther oh John Calvin, kasawiada me tiahk kan oh tepin padahk kan wekidekla de salongala. Irail song en kapwungala mwomwohdiso kan me re iang towe. Ahpw, ni arail sohte ahniki mweimwei en priesthood, sapwellimen Krais rongamwahuo sohte kak kopwurupwurieng ni uhdahn mwomweo. Mie anahnepen kopwurupwurdo ehu.

Koht ketin mahsanih me e pahn mie pwupwula ehu. Sang soukohp men nan Kadehde Mering, E mahsanih:

“Eri, ahnsou ehu pahn kohdo me I pahn kadaridiong pohn sahpw wet lehk lapalap… ahpw kaidehk duhpek en men kang pilawa … kaidehk duhpek en pihl, pwe re pahn men tungoalehda oh nim ehu mahsen en sang rehn Kaun-o:

“Aramas akan pahn kakahnseli wasa sang Sehden Mehla lel Sehd Mediderenien oh douluhlla pidek paliepeng kilahng palimese. Re pahn rapahki wasa koaros ehu mahsen sang rehn Kaun-o, ahpw re sohte pahn diar.”

Eimwos 8:11–12

Nan 1820, ni duwen me E ketin wia nan erein ansou kohkohdo, Sahm Nanleng pwurehng ketin pilada soukohp men en kapwurehdo rongamwahuo oh priesthood ong sampah. Eden soukohpo iei Joseph Smith. Ni duwen mwahnakapw men, Joseph pingkihda wekpeseng kan nanpwungen tohtohn mwomwohdiso kan nan ah wasa oh men ese mehnia mwomwohdiso me pwung. Ni eh ese me e sohte ahniki eripit, e idawehn kaweid me dierek nan Pwuhk Sarawi, “Ma emen rehmwail anahne erpit, a en kapakap oh peki rehn Koht, oh Koht ahpw pahn ketikihong, pwe Koht me kupwursapan oh kalahngan ong aramas koaruhsie” (Seims 1:5).

Joseph Smith koasoanehdi en peki rehn Koht dahme e konehng wia. Ni ansou me Joseph kapakap pwehn ese mehlelo, Sahm Nanleng oh Sises Krais ketin pwarohng ih. Sises mahsanihieng Joseph en dehr towehla sohte lipilipil mwomwohdiso, pwe “irail koaros sapwung” oh “irail kin kerenkidohngie kilin ewerail kan, ahpw mohngiongirail kan dohsang ie, irail kin padahngki padahk kan oh kosonned akan en aramas, ahniki mwohmw en duwe koht, ahpw irail soikala uhdahn manamano” (Joseph Smith—History 1:19).

Ni duwen me Koht wiahiong Adam, Noha, Eipraam, Moses, oh soukohp teikan, E ketin malipe Joseph Smith en wia soukohp sang me rongamwahuo ni unsek pahn kopwurupwurdo.

Ni eh wia kisehn Kopwurupwurdohn rongamwahuo, Koht ketin kapwarehda Pwuken Mormon: Pil Ehu Kadehde en Sises Krais. Sang manaman en Koht, Joseph Smith kawehwehdi pwuhk wet sang ni rekohd ehu en kawao me ntingdi pohn pileit kohl. Pwuken Mormon iei “rekohd ehu en Sapwellimen Koht wiewia kan ong towe kan en America en kawao oh audaudki unsekpen rongamwahu poatoapoato” (kapehse en Pwuken Mormon).

Pwuken Mormon iei kadehde kehlail en Sises Krais. E kin seweseikitail wehwehki Sapwellime padahk kan, iangahki mwohkan nan Pwuhk Sarawi.

Pwuken Mormon iei lipw sansal en Kopwurupwurdo en rongamwahuo sang Joseph Smith. Komw kak ese ong pein komwi me Pwuken Mormon mehlel. Pwehn esehla met, komw anahne wadek, medewe audepe mahsen kan, oh inangih en ese ma e mehlel. Komw uhdahn anahne peki rehn Sahm Nanleng en kamehlel me iei Sapwellime mahsen. Ni omw pahn wia met, E pahn ketin kapwarehieng komwi sang Ngehn Sarawi me e mehlel.

Ni omw esehla me Pwuken Mormon mehlel, komw pahn pil esehla me sang Ngehn Sarawi me Joseph Smith iei soukohp en Koht, me rongamwahu en Sises Krais kopwurupwurdo sang ih, oh me Mwomwohdiso en Sises Krais en Souleng en Imwin Rahn Akan kaweid sang soukohp oh wahnpoaron kan rahn wet.

Komw kak ese me mahsen wet mehlel. Ma komw peki rehn Semomw Nanleng ni kapakap, komw kak alehdi pasapeng ehu sang Ih sang rehn Ngehn Sarawi. Ngehn Sarawi pil kin kahdaniki Ngehn en Koht, oh ehu Sapwellime pwukoa iei en kadehde, de en kadehdehki, duwen mehlel.

Wehwehki met kak wia mehkot kapwuriamwei oh kin wekidala mour, ahpw e kin kalapw kohdo ni kemwekid pepehm me meleilei, ni sohte kasansal, kapwuriamwei kan en manaman en Koht. Ngehn Sarawi kin ketin kamehlel duwen mehlel kan sang ni pepehm kan, madamadau kan, oh kapehm kan. Ni duwen me padahk nan Pwuhk Sarawi, “Iet akan wahn Ngehno: limpoak, peren, popohl, kanengamah, kadek, loalopwoat, opampap, oh liksang me suwed” (Kalesia 5:22–23). Pepehm pwukat sang Ngehn Sarawi iei ahn pein emenemen kaudiahl me rongamwahu en Sises Krais ni duwen eh kopwurupwurdo sang Joseph Smith mehlel. Komw eri pahn anahne pilada ma komw pahn momour ni pahrekohng eripit wet me komw alehdihier.