Lesona 27 Anomea a le Faiaoga: Faalauiloaina ma le Puipuia o le Aiga o se Iunite Faavae o Malo

“Lesona 27 Anomea a le Faiaoga: Faalauiloaina ma le Puipuia o le Aiga o se Iunite Faavae o Malo,” Anomea a le Faiaoga O Le Aiga e Faavavau (2022)

“Lesona 27 Anomea a le Faiaoga,” Anomea a le Faiaoga O Le Aiga e Faavavau

Lesona 27 Anomea a le Faiaoga

Faalauiloa ma Puipuia le Aiga o se Iunite Faavae o Malo

Ua valaauina i tatou e perofeta ma aposetolo “e faalauiloa atu na fua faatatau ua fuafuaina e faatumauina ma faamalosia ai le aiga o se iunite faavae o malo” (“O Le Aiga: O Se Folafolaga i le Lalolagi,” ChurchofJesusChrist.org). I lenei lesona, o le a faailoa mai ai e tagata aoga ia faatosinaga o loo saofaga i le malepelepe o le aiga. O le a mafaufau foi tagata aoga i mea e mafai ona latou faia e faalauiloa ma puipuia ai le aiga o se iunite faavae o malo.

Fautuaga mo le Aoao Atu

Ua saili le fili e faaumatia le aiga.

Afai e mafai, faaali atu le saunoaga lenei a Peresitene Julie B. Beck, o le sa avea muamua ma Peresitene Aoao o le Aualofa, ma faitau faatasi:

O le a valaauina lenei augatupulaga ia puipuia le mataupu faavae o le aiga nai lo se isi lava taimi muamua. Afai latou te le iloa, e le mafai ona latou puipuia. …

E faaopoopo atu i le malamalama i le talitonuga o le aiga, e tatau ona tatou malamalama uma i mea taufaamatau i le aiga. Afai e leai, e le mafai ona tatou saunia mo le taua. (“Aoaoina Atu le Mataupu Faavae o le Aiga,” Liahona, Mat. 2011, 14, 17)

Aisea e manaomia ai ona puipuia le aoaoga faavae a le Alii i le aiga?

Faaali atu le faamatalaga lenei mai le folafolaga i le aiga: Ua lapatai mai perofeta o aso nei e faapea “o le faamalepeina o le aiga o le a aumai ai i tagata taitoatasi, alaalafaga, ma malo, faafanoga ia na ulua’i ta’u mai e perofeta anamua ma aso nei.

Tusi ni koluma se lua i luga o le laupapa. Tusi le ulutala lenei i luga o le koluma muamua: O faatosinaga e saofaga i le malepelepe o le aiga. Valaaulia tagata aoga e lisi manatu e oo mai i le mafaufau, ma fai i se tagata aoga e tusi tali a tagata o le vasega i luga o le laupapa. (E mafai ona e fautuaina tagata aoga e iloilo le vaega 1 o anomea mo sauniuniga, e aofia ai le suesueina o le 2 Timoteo 3:1–6, 13, pe afai latou te manaomia le fesoasoani.) A o lisi e tagata aoga o latou manatu, fautuaina i latou e faamatala pe faapefea ona saofaga nei faatosinaga i le faamalepeina o le aiga.

Tusi le ulutala lenei i luga o le koluma lona lua i luga o le laupapa: O le aoaoga faavae na tautino mai i le folafolaga i le aiga e mafai ona faafetaiaia ai nei tosinaga. Valaaulia tagata aoga e tagai i le folafolaga i le aiga e lisi ai aoaoga faavae talafeagai i luga o le laupapa.

Na faapefea e le suesueina o le aoaoga faavae a le Alii i le aiga i lenei kosi ona saunia ai oe ia atili lelei ai lou puipuia?

Ua ia i tatou se tiutetauave e puipuia ma faalauiloa le aiga.

Faaali atu le faamatalaga lenei mai le folafolaga o le aiga: Matou te valaau atu i tamalii ma failauga ma taitai o malo i soo se mea ina ia faalauiloa atu na fua faatatau ua fuafuaina ina ia faatumauina ma faamalosia le aiga o se iunite faavae o malo.

Faaleleia o Lo Tatou Aoao Atu ma le Aoaoina Mai

Fesoasoani i tagata o le vasega ia lagona le moni ma le taua o aoaoga faavae ma mataupu faavae. O le a sili atu ona faaaoga e tagata aoga aoaoga faavae ma mataupu faavae pe a latou lagonaina le moni ma le taua e ala i le Agaga ma lagonaina le faanatinati e faaaoga i o latou olaga. O se tasi o auala aoga e fesoasoani ai i tagata o le vasega ia lagonaina le moni ma le taua o aoaoga faavae ma mataupu faavae, o le uunaia o i latou e mafaufau i aafiaga patino.

Faamanatu i tagata aoga sa valaaulia i latou e fai se fuafuaga faigofie o faatinoga e mafai ona latou faia e faalauiloa ai pe puipuia ai le aiga (tagai i le vaega 2 o anomea mo sauniuniga).

O a nisi o auala e mafai ona tatou siitia ai le aiga o se iunite faavae o malo? (Lisi tali a tagata o le vasega i luga o le laupapa. Ona valaaulia lea o ni nai tagata aoga e faasoa mai ni aafiaga patino e faatatau i manatu o loo i luga o le laupapa.)
Mata o a ni taunuuga pe afai tatou te le tautatala i le faalauiloaina po o le puipuia o o tatou talitonuga e uiga i le faaipoipoga ma le aiga?

E mafai ona e faasoa atu le saunoaga lenei a Peresitene M. Russell Ballard o le Korama a Aposetolo e Toasefululua: “E manaomia ona tatou manatuaina le saunoaga a Edmund Burke: ‘“E na o le pau le mea e moomia e le tiapolo ina ia manumalo ai o le leai lea o se mea e faia e tagata lelei’ [attributed in John Bartlett, comp., Familiar Quotations, 15th ed. (1980), ix]” (“Ia Lagonaina o Tatou Leo,” Liahona, Nov. 2003, 18).

E mafai faapefea ona fesoasoani le Alii ia i tatou e faatoilalo soo se faatuai po o le fefe tatou te maua pe a faalauiloa pe puipuia le faaipoipoga ma le aiga?

Filifili se tasi o filifiliga nei e fesoasoani ai i tagata aoga e faaleleia lo latou tomai e siitia ma puipuia le faaipoipoga ma le aiga:

Filifiliga 2

Faitau faatasi le Moronae 7:3–5 ma le Mataupu Faavae ma Feagaiga 19:30, ma iloilo le lisi o mataupu faavae i le vaega 3 o anomea mo sauniuniga. Valaaulia tagata aoga e faataitai nei mataupu faavae i le gaoioiga lenei:

Valaaulia tagata aoga e galulue ma se paga. Faamalamalama atu o le a e tuuina atu ni tulaga faataitai eseese i le ituaiga o fesili (tagai i lalo). Ona tuuina atu lea e se tasi o paga se tali e tasi le minute e faigofie, manino, ma e le o ni mea faapisinisi, a o faalogologo le isi paga. A uma tali taitasi, tuu atu i paga e talanoa puupuu ma le tasi ma le isi mea na lelei ma mea e mafai ona faaleleia. Valaaulia paga e fesuiai matafaioi mo le isi fesili.

Faaaoga fesili nei po o nisi o au lava fesili e fetaui ma manaoga o tagata aoga:

Aisea e tetee ai lau ekalesia i le faapau pepe? E te le talitonu i le aia tatau a se tamaitai e filifili ai le mea e tupu i lona tino?
Aisea ua uunaia ai tagata ua faaipoipo o la outou ekalesia ina ia maua ni fanau? Pe e te le o popole ea e uiga i le toatele o le faitau aofai o tagata?
Aisea e tetee ai lau ekalesia i le faaipoipoga a le itupa tutusa? E te le manao e maua e tagata uma ia aia tatau lava e tasi ma ia fiafia?
O le a le mea e sese ai le nonofo faatasi ma se tasi ae e te lei faaipoipo? Pe le o tuuina mai ai se “suega faataitai” e manaomia ina ia mautinoa ai e le o afaina oe?

Pe a uma le gaoioiga, valaaulia ni nai tagata aoga e faasoa mai ni mea na latou aoaoina i talanoaga a a latou vaega.

Ina ia faaiuina le lesona, valaaulia tagata aoga e mafaufau i se mea se tasi e mafai ona latou faia e faaleleia atili ai lo latou tomai e faia ai ma isi ni talanoaga faaKeriso e uiga i le faaipoipoga ma le aiga. Fautuaina tagata aoga e mafaufau e sue ni auala e faataitai ai le faaaogaina o mataupu faavae i le vaega 3 o anomea mo sauniuniga e ala i le talanoaina faatasi ma se uo po o se tagata o le aiga ia fesili faigata e uiga i le faaipoipoga ma le aiga.

Mo Le Isi Taimi

Valaaulia tagata aoga e mafaufau po o a upumoni sa latou aoaoina ma talanoaina i le taimi o lenei vasega o le Aiga e Faavavau na fesoasoani ia i latou e lagona ai le faamoemoe ma le fiafia e uiga i o latou aiga o i ai nei po o le lumanai. Fautuaina i latou e suesue i anomea mo sauniuniga mo le lesona e sosoo ai ma ia saunia e faasoa mai se tasi pe sili atu foi o mea e sili ona aoga na latou aoaoina i lenei kosi.