Taulimaina o le Soifua Maloloina Faalemafaufau ma le Faamoemoe ma le Agaalofa

E i ai lava aso tatou te lagona uma ai le faanoanoa, atuatuvale po o le popole. E taua le nofouta i o tatou lagona ma le pogai tatou te oo ai i na lagona ma ia faia le mea sili tatou te mafai e pulea ai nei lagona i ni auala maloloina.

A o femaliuai le Faaola i le nuu atoa o Isaraelu, sa Ia lagonaina moni lava le mamafa o Lana galuega. Sa Ia aoaoina Ana Aposetolo ma sa onosai i o latou vaivaiga. Sa fetaomi atu le motu o tagata ia te Ia e molimauina Ana vavega pe ia faamaloloina. Sa vaavaai pea ona fili mo ni avanoa e tauleagaina ai o Ia i luma o tagata. Sa amusia, tauemuina, teena, ma faalataina o ia. E moni, o Ia “o se tagata faanoanoa, ua masani foi ma le tiga” (Isaia 53:3).

Sa masani ona afio atu Iesu i nofoaga e mafai ai ona tuuatoatasi o Ia ma fagatua ma le Atua (tagai Mataio 14:22–23; Mareko 1:35; 6:31, 46; Luka 5:16). O le mulimuli i Lana faataitaiga e faamalolosia ai o tatou soifua maloloina faalemafaufau, faalelagona, ma faaleagaga. (Manatua: I nisi o tulaga o luitau ogaoga o le soifua maloloina faalemafaufau po o mafaufauga o le pule i le ola, e sili atu le faatasi ma isi nai lo le tuuatoatasi.)

Na fesili Peresitene M. Russell Ballard o le Korama a Aposetolo e Toasefululua i talavou matutua:

E i ai sou taimi filemu patino? …

… A o faasolo ina susulu, leotele, ma pisi tele lo tatou lalolagi, ua i ai so tatou luitau sili atu o le lagonaina o le Agaga i o tatou olaga. Afai e leai se taimi filemu i lou olaga, pe e te amata ea i le po nei e saili mo se taimi? (“Ia Filemu, ma Iloa o Au o le Atua” [Faigalotu a le Ofisa o Aoga a le Ekalesia mo talavou matutua, 4 Me, 2014], broadcasts.ChurchofJesusChrist.org)

Mafaufau Loloto e Sauniuni ai mo le Vasega

Saili se nofoaga filemu e manatunatu ai i lou soifua manuia faalemafaufau, faalelagona, ma faaleagaga e ala i le mafaufau loloto i fesili nei:

1. Pe ou te faaaluina se taimi i aso uma e faaloloto ai la‘u sootaga ma le Atua? Pe o ou vaavaai lelei mo ni auala e atiina ae ai ni sootaga lelei ma aiga ma uo? Pe ou te faamalositino ea e le aunoa, ai meaai paleni, ma lava le moe? Pe o i ai sa‘u galuega anoa ma faaavanoa se taimi mo gaoioiga faafiafia lelei?

2. O le a lo‘u mafaufau i lo’u manuia faalelagona? O mafai ona ou iloa pe a ou lagonaina se auala patino ma pe aisea? Pe o ia te au ni auala lelei e taulima ai lagona le lelei? Pe a ou lagona le atuatuvale po o le popole, pe o i ai ni auala maloloina e fai ai ni malologa faalemafaufau ma toafimalie?

3. E mafai faapefea ona faamanuiaina lo‘u olaga pe a ou faifaimalie ma manatunatu i lo’u manuia faalemafaufau, faalelagona, ma faaleagaga?

Mafaufau e faalogologo i le pese “Slow Down” (6:07), na faatinoina e Sissel ma le Aufaipese a le Tapeneko ma le Aufaili i le Lotoa o le Malumalu.

6:7

I le taimi o le galuega a le Faaola i le lalolagi, sa Ia faamaloloina tagata mai ituaiga uma o puapuaga (tagai Mataio 4:23). Na faaiuina e Peresitene Dallin H. Oaks o le Au Peresitene Sili, “E mautinoa lava o nei faamalologa na aofia ai i latou o o latou ma‘i sa aafia ai lagona, mafaufau, po o le faaleagaga” (“Na te Faamaloloina I Latou e Mafatia i Avega,” Liahona, Nov. 2006, 6).

E pei ona ta‘ua muamua, e tofu uma lava i tatou ma taimi po o aso tatou te lagona ai le lofituina, faanoanoa, po o le popole. Afai tatou te tauivi ma nei lagona po o lagona faapena mo se vaitaimi faaumiumi, pe amata ona faalavelave nei lagona i o tatou olaga i aso taitasi, e taua le sailia o le fesoasoani (tagai “E mafai faapefea ona ou iloa pe o ou i ai i se taimi faigata i le taimi nei pe o loo ou tauivi ma se luitau o le soifua maloloina faalemafaufau?,” ChurchofJesusChrist.org).

E ui o amioga agasala e mafai ona mafua ai mafatiaga faalemafaufau, faalelagona, ma faaleagaga, e taua lo tatou le tuuaia faapea o na luitau uma e afua i le agasala po o le leai o se faatuatua. O nisi o fanau sili ona faamaoni a le Alii e oo i luitau o le soifua maloloina faalemafaufau, e pei o le popole po o le atuatuvale matuia. E ui tatou te le iloa mea uma e uiga i gasegase faalemafaufau, ae tatou te iloa e faigata. O gasegase faalemafaufau e mafai ona fesootai atu i kemikolo le paleni i le faiai, tulaga tau kenera ma le siosiomaga, mea matautia na tutupu, manuaga o le faiai, po o [faaaoga] faatautala o vailaau. I o tatou aso, “o le tasi i le fa tagata o le a aafia i gasegase faalemafaufau pe faalelagona i nisi taimi i o latou olaga” (Bonnie L. Oscarson, “5 Resources to Help Youth Facing Emotional and Mental Illness,” Nov. 21, 2017, ChurchofJesusChrist.org).

Afai e te oo i se gasegase faalemafaufau, o le anapogi ma le tatalo mo se toomaga, sailia o faamanuiaga faaleperisitua, ma le auai atu i le malumalu e masani ona aumaia ai le malosi ma le faamalologa. I nisi taimi, e mafai ona tumau pea le ma‘i. Afai e tupu lenei mea, ia iloa e le o iuvale au taumafaiga (tagai 2 Korinito 12:7–10). O loo leoleoina oe e le Alii ma e mafai ona faapaiaina lenei aafiaga mo lou lelei (tagai Mataupu Faavae ma Feagaiga 122:7).

Mafaufau pe mafai faapefea e mataupu faavae nei ona lagolagoina oe i au taumafaiga e faatumauina pe faaleleia lou soifua maloloina faalemafaufau:

• Ia taulai atu i le Tama Faalelagi ma Iesu Keriso. Ae maise lava pe a luitauina le lagonaina o a Laua faatosinaga, filifili e faaali atu le faatuatua ia i Laua. Mafaufau i taimi na e lagonaina ai a Laua uunaiga. Manatua e mafai e le Faaola ona fesoasoani i taimi uma ona sa Ia “afio ifo i lalo o mea uma” (Mataupu Faavae ma Feagaiga 88:6). E malamalama atoatoa o Ia i le faanoanoa ma le le fiafia o i latou o e oo i gasegase faalemafaufau. Na molimau mai le perofeta o Alema e faapea ua silafia e Iesu Keriso “e tusa ma la le tino le ala e fesoasoani ai i ona tagata e tusa ma o latou vaivaiga” (Alema 7:12).

• Faasoa atu mea na e oo i ai ma e pele ia te oe. O le tausia faalilolilo o gasegase faalemafaufau e mafai ona faateleina ai lagona o le faaesea ma taofia ai oe mai le mauaina o mea e manaomia, e oo lava i fesoasoaniga mo le faasaoina o le ola. O le fesoasoani i isi ia malamalama i mea e te oo i ai o le a faateleina ai lo latou tomai e lagolago ai oe.

• Saili le fesoasoani mai fomai atamamai faapolofesa. Na fautua mai Elder Jeffrey R. Holland o le Korama a Aposetolo e Toasefululua:

Afai e faaauau pea ona faalotovaivaia oe e ni mea, saili se fautuaga a ni tagata tomai o i ai ni aoaoga faamaoniaina, tomai faalematata, ma ni tulaga faatauaina lelei. Ia faamaoni ia i latou e uiga i lou talafaasolopito ma ou luitau. (“Peiseai o se Ipu ua Nutililii,” Liahona, Nov. 2013, 41)

Afai e i ai ni tagata o lou aiga pe iloa isi o e ua oo i gasegase faalemafaufau, mafaufau pe mafai faapefea e le malamalama i nei mataupu faavae ona fesoasoani ia te oe e lagolago ai i latou.

A faasoa atu e se tasi se luitau o le soifua maloloina faalemafaufau ia te oe, faalogo ma le alofa ma aloese mai le faamasino. E pei ona sa aoao mai Sister Reyna I. Aburto o le Au Peresitene Aoao a le Aualofa:

O le faalogo atu ma le alofa o se tasi lea o meaalofa silisili e mafai ona tatou ofoina atu, ma atonu o le a mafai ona tatou fesoasoani e tauave pe aveesea ai ao mamafa ia e taotaomia ai ē pele ia i tatou ma uo [tagai Roma 2:19; 13:12] ina ia mafai, e ala i lo tatou alolofa, ona latou toe lagona ai le Agaga Paia ma vaaia ai le malamalama e sau mai ia Iesu Keriso. (“I Mala i Manū, Iesu, Afio Mai!,” Liahona, Nov. 2019, 58)

Mafaufau Loloto e Sauniuni ai mo le Vasega

Mafaufau pe mafai faapefea e le saili ia malamalama atili i luitau o le soifua maloloina faalemafaufau ona faateleina ai lou onosai ma le agaalofa mo i latou o e aafia ai. Mafaufau e matamata le vitio “Like a Broken Vessel” (11:36), lea e maua ai tala patino o tagata taitoatasi o e sa ola i gasegase faalemafaufau, faapea foi ma fautuaga mai ia Elder Holland.

11:36

O luitau ogaoga o le soifua maloloina faalemafaufau o nisi ia o tulaga lamatia mo le pule i le ola. “O le toatele o tagata e taumafai e pule i le ola e le fia oti; latou te moomia se mapusaga mai tiga faaletino, faalemafaufau, faalelagona, po o le faaleagaga o feagai ma i latou” (“Preventing Suicide and Responding after a Loss,” ChurchofJesusChrist.org).

Afai o oe po o se tasi e te iloa o loo i ai ni mafaufauga o le pule i le ola, saili vave se fesoasoani. E mafai ona aofia ai le alu i se potu mo faalavelave faafuasei i le falemai pe valaau atu i se laina fesoasoani e leai se totogi. (Saili sootaga e fesoasoani ai i laina i le salafa o le lalolagi i le “In Crisis? Talk Now,” ChurchofJesusChrist.org.)

Suesue e Sauniuni ai mo le Vasega

Faitau le Mosaea 18:8–9, ma mafaufau pe mafai faapefea e lenei fuaitau ona taialaina oe i le fesoasoani atu ia i latou o loo tauivi ma luitau o le soifua maloloina faalemafaufau po o mafaufauga o le pule i le ola. (A uma ona faitauina lenei fuaitau, atonu e te iloa e fesoasoani le faitauina o le tusiga “How to Help Someone in Crisis” i luga o le ChurchofJesusChrist.org.)

A maliu se tasi, e mafai ona tatou lagonaina le faavauvau lē mafaamafanafanaina. Sa ta‘ua e Elder Dale G. Renlund o le Korama a Aposetolo e Toasefululua e faapea, e mafai ona umi se taimi e faamalolo ai pe a mavae le maliu o se tasi i le pule i le ola. Ona ia tuuina mai lea o le fautuaga lenei:

Taumafai ia tau lava ina tatou au atu i le isi aso e sosoo ai, ona sosoo ai lea ma le isi aso, ma le isi aso. … O le a fesoasoani le Alii ia i tatou i lena mea. … E i ai o Ia iina i aso uma. (“Grieving after a Suicide” [vitio], ChurchofJesusChrist.org)

2:6

E i ai ia Iesu Keriso le malamalama atoatoa, agaalofa, ma le alofa. E mafai ma e tatau ona tatou tuua faamasinoga uma i Ona aao. Na aoao mai Peresitene Ballard:

O le mea moni, tatou te le iloa tulaga uma e mafua ai ona pule i le ola. E na o le Alii e silafia itu uma, ma o ia lava foi lea o le a faamasinoina a tatou amioga iinei i le lalolagi.

Pe a ia faamasinoina i tatou, ou te lagona o le a Ia aumaia mea uma lava e iloilo: o uiga o le tino e fananau mai ma i tatou, o tulaga o o tatou mafaufau, lo tatou gafatia faaleatamai, aoaoga tatou te maua, o uputuu a o tatou tama, lo tatou ola maloloina, ma isi mea faapena. (“Pule i le Ola: O Nisi Mea Tatou te Iloa, ma O Nisi Tatou te Le iloa,” Liahona, Mati. 1987, 8)

Mafaufau Loloto e Sauniuni ai mo le Vasega

Mafaufau i mea e mafai ona e faia e taofia ai le pule i le ola. Mo ni manatu, mafaufau i le fautuaga na tuuina mai e Sister Carol F. McConkie, fesoasoani talu ai i le Au Peresitene Aoao o Tamaitai Talavou, i le vitio “Preventing Suicide” (1:43).

1:43