“ການປະຊຸມສະພາຄູສອນ—ສຳລັບພໍ່ແມ່ ແລະ ຄູສອນທີ່ໄດ້ຮັບການເອີ້ນ,” ການສິດສອນໃນວິທີຂອງພຣະຜູ້ຊ່ວຍໃຫ້ລອດ: ສຳລັບທຸກຄົນທີ່ສິດສອນຢູ່ໃນບ້ານ ແລະ ໃນສາດສະໜາຈັກ (2022)
“ການປະຊຸມສະພາຄູສອນ,” ການສິດສອນໃນວິທີຂອງພຣະຜູ້ຊ່ວຍໃຫ້ລອດ
ການປະຊຸມສະພາຄູສອນ—ສຳລັບພໍ່ແມ່ ແລະ ຄູສອນທີ່ໄດ້ຮັບການເອີ້ນ
ແຕ່ລະຫວອດຄວນຈັດການປະຊຸມສະພາຄູສອນເປັນໄຕມາດ, ສຳລັບພໍ່ແມ່ ແລະ ຄູສອນທີ່ໄດ້ຮັບການເອີ້ນໃນຫວອດນັ້ນ. ໃນການປະຊຸມເຫລົ່ານີ້, ພໍ່ແມ່ ແລະ ຄຸສອນຄົນອື່ນສາມາດປຶກສາຫາລືນຳກັນກ່ຽວກັບຫລັກທຳຂອງການສິດສອນເໝືອນດັ່ງພຣະຄຣິດ (ເບິ່ງ ຄູ່ມືທົ່ວໄປ: ການຮັບໃຊ້ໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, 13.4, 13.5, 17.4, 17.5, ຫ້ອງສະໝຸດພຣະກິດຕິຄຸນ).
ການປະຊຸມສະພາຄູສອນທັງສອງແບບຖືກຈັດຂຶ້ນທຸກໄຕມາດລະຫວ່າງຫ້ອງຮຽນ 50 ນາທີ ໃນວັນອາທິດ.
ການປະຊຸມສະພາຄູສອນສຳລັບພໍ່ແມ່
ໃຜເປັນຜູ້ນຳພາການປະຊຸມເຫລົ່ານີ້? ຕາມປົກກະຕິແລ້ວ, ສະມາຊິກຄົນໜຶ່ງໃນຝ່າຍປະທານໂຮງຮຽນວັນອາທິດຈະເປັນຜູ້ນຳພາການປະຊຸມສະພາຄູສອນສຳລັບພໍ່ແມ່. ເຖິງຢ່າງໃດກໍຕາມ, ຝ່າຍອະທິການກໍສາມາດມອບໝາຍສະມາຊິກຫວອດຄົນອື່ນໃຫ້ນຳພາການປະຊຸມເປັນບາງຄັ້ງ.
ສະພາຫວອດ, ດ້ວຍຄວາມຊ່ວຍເຫລືອຈາກຝ່າຍປະທານໂຮງຮຽນວັນອາທິດ, ຈະດູແລການປະຊຸມສະພາຄູສອນສຳລັບພໍ່ແມ່. ພວກເພິ່ນປຶກສາຫາລືນຳກັນກ່ຽວກັບຄວາມຕ້ອງການຂອງພໍ່ແມ່ ແລະ ຄອບຄົວ, ແລະ ພວກເພິ່ນເຮັດວຽກຮ່ວມກັນເພື່ອກຳນົດວ່າຫລັກທຳໃດຈາກ ການສິດສອນໃນວິທີຂອງພຣະຜູ້ຊ່ວຍໃຫ້ລອດ ຈະສະໜອງຄວາມຕ້ອງການເຫລົ່ານັ້ນໄດ້ດີທີ່ສຸດ.
ໃຜຄວນໄປຮ່ວມ? ສະພາຫວອດຈະກຳນົດວ່າຈະເຊື້ອເຊີນພໍ່ແມ່ບາງຄົນໂດຍສະເພາະ ຫລື ເປີດການໄປຮ່ວມໃຫ້ແກ່ທຸກຄົນທີ່ຢາກເຂົ້າຮ່ວມ.
ການປະຊຸມເຫລົ່ານີ້ຄວນຖືກຈັດຂຶ້ນເມື່ອໃດ? ການປະຊຸມສະພາຄູສອນສຳລັບພໍ່ແມ່ສາມາດຈັດຂຶ້ນໃນວັນອາທິດໃດກໍໄດ້, ຕາມທີ່ສະພາຫວອດກຳນົດ.
ການປະຊຸມສະພາຄູສອນສຳລັບຄູສອນທີ່ໄດ້ຮັບການເອີ້ນ
ໃຜເປັນຜູ້ນຳພາການປະຊຸມເຫລົ່ານີ້? ຕາມປົກກະຕິແລ້ວ, ສະມາຊິກຄົນໜຶ່ງໃນຝ່າຍປະທານໂຮງຮຽນວັນອາທິດຈະເປັນຜູ້ນຳພາການປະຊຸມສະພາຄູສອນສຳລັບຄູສອນທີ່ໄດ້ຮັບການເອີ້ນ. ເຖິງຢ່າງໃດກໍຕາມ, ຝ່າຍອະທິການກໍສາມາດມອບໝາຍສະມາຊິກຫວອດຄົນອື່ນໃຫ້ນຳພາການປະຊຸມເປັນບາງຄັ້ງ.
ສະພາຫວອດ, ດ້ວຍຄວາມຊ່ວຍເຫລືອຈາກຝ່າຍປະທານໂຮງຮຽນວັນອາທິດ, ຈະດູແລການປະຊຸມສະພາຄູສອນສຳລັບຄູສອນທີ່ໄດ້ຮັບການເອີ້ນ. ພວກເພິ່ນປຶກສາຫາລືນຳກັນກ່ຽວກັບຄວາມຕ້ອງການຂອງຄູສອນ ແລະ ຜູ້ຮຽນ, ແລະ ພວກເພິ່ນເຮັດວຽກຮ່ວມກັນເພື່ອກຳນົດວ່າຫລັກທຳໃດຈາກ ການສິດສອນໃນວິທີຂອງພຣະຜູ້ຊ່ວຍໃຫ້ລອດ ຈະສະໜອງຄວາມຕ້ອງການເຫລົ່ານັ້ນໄດ້ດີທີ່ສຸດ.
ໃຜຄວນໄປຮ່ວມ? ທຸກຄົນທີ່ສິດສອນກຸ່ມ ຫລື ຫ້ອງຮຽນໃນຫວອດຄວນໄປຮ່ວມການປະຊຸມສະພາຄູສອນ. ສະມາຊິກໃນຝ່າຍປະທານກຸ່ມ ແລະ ອົງການກໍໄດ້ຮັບການເຊື້ອເຊີນນຳອີກ.
ການປະຊຸມເຫລົ່ານີ້ຄວນຖືກຈັດຂຶ້ນເມື່ອໃດ? ຄູສອນຈະໄປຮ່ວມການປະຊຸມສະພາຄູສອນໃນວັນອາທິດທີ່ເຂົາເຈົ້າບໍ່ໄດ້ສິດສອນຫ້ອງຮຽນປົກກະຕິຂອງເຂົາເຈົ້າ.
-
ຄູສອນກຸ່ມຖານະປະໂລຫິດ, ຄູສອນຫ້ອງສະມາຄົມສະຕີສົງເຄາະ, ແລະ ຄູສອນຫ້ອງກຸ່ມຍິງໜຸ່ມ ສາມາດໄປຮ່ວມ ໃນວັນອາທິດທຳອິດ ຫລື ທີສາມ, ຕາມທີ່ຜູ້ນຳໃນທ້ອງຖິ່ນກຳນົດ.
-
ຄູສອນໂຮງຮຽນວັນອາທິດ ສາມາດໄປຮ່ວມໃນວັນອາທິດທີສອງ ຫລື ທີສີ່, ຕາມທີ່ຜູ້ນຳໃນທ້ອງຖິ່ນກຳນົດ.
-
ຄູສອນຊັ້ນປະຖົມໄວສາມາດໄປຮ່ວມໃນວັນອາທິດໃດກໍໄດ້, ຕາມທີ່ຝ່າຍປະທານຊັ້ນປະຖົມໄວ ແລະ ຝ່າຍປະທານໂຮງຮຽນວັນອາທິດຂອງຫວອດກຳນົດ. ຖ້າປາດຖະໜາ, ບັນດາຄູສອນຊັ້ນປະຖົມໄວສາມາດຊຸມນຸມກັນຕ່າງຫາກ ຈາກຄູສອນຄົນອື່ນໆ ເພື່ອປຶກສາຫາລືກັນ ກ່ຽວກັບແງ່ມຸມສະເພາະເລື່ອງການສິດສອນເດັກນ້ອຍ. ສິ່ງນີ້ສາມາດເກີດຂຶ້ນລະຫວ່າງຊ່ວງເວລາຮ້ອງເພງ 20 ນາທີ, ກ່ອນ ຫລື ຫລັງຈາກການປະຊຸມວັນອາທິດຕາມປົກກະຕິ, ຫລື ໃນວັນອື່ນຂອງອາທິດ. ການປະຊຸມສະພາຄູສອນສາມາດຈັດຂຶ້ນຫລາຍກວ່າໜຶ່ງເທື່ອໃນແຕ່ລະໄຕມາດສຳລັບຄູສອນຊັ້ນປະຖົມໄວ ເພື່ອວ່າເຂົາເຈົ້າທຸກຄົນຈະບໍ່ໄດ້ປະຫ້ອງຮຽນໄປ ໃນອາທິດດຽວກັນ. (ໝາຍເຫດ: ຕາມຄວາມຕ້ອງການ, ຝ່າຍປະທານຊັ້ນປະຖົມໄວຈະມອບໝາຍຄູສອນແທນ, ສົມທົບຫ້ອງຮຽນ, ຫລື ຈັດການໃນແບບອື່ນ ເພື່ອໃຫ້ຄູສອນຊັ້ນປະຖົມໄວໄດ້ໄປຮ່ວມການປະຊຸມສະພາຄູສອນ.)
ຮູບແບບຂອງການປະຊຸມ
ການປະຊຸມສະພາຄູສອນ—ທັງສຳລັບພໍ່ແມ່ ແລະ ຄູສອນທີ່ໄດ້ຮັບການເອີ້ນ—ຈະຕິດຕາມຮູບແບບນີ້:
-
ແບ່ງປັນ ແລະ ປຶກສາຫາລືນຳກັນ (ປະມານ 20 ນາທີ). ເຊື້ອເຊີນພໍ່ແມ່ ຫລື ຄູສອນໃຫ້ແບ່ງປັນສິ່ງທີ່ດຳເນີນໄປດ້ວຍດີຂະນະທີ່ເຂົາເຈົ້າສິດສອນພຣະກິດຕິຄຸນຢູ່ທີ່ບ້ານ ຫລື ໃນຫ້ອງຮຽນຂອງເຂົາເຈົ້າ. ເຂົາເຈົ້າຍັງສາມາດແບ່ງປັນຄວາມທ້າທາຍທີ່ເຂົາເຈົ້າປະເຊີນ ຫລື ສິ່ງທີ່ເຂົາເຈົ້າຢາກຈະປັບປຸງນຳອີກ.
-
ຮຽນຮູ້ນຳກັນ (ປະມານ 15 ນາທີ). ສົນທະນາກັບພໍ່ແມ່ ຫລື ຄູສອນຫລັກໜຶ່ງຂໍ້ໃນ ການສິດສອນໃນວິທີຂອງພຣະຜູ້ຊ່ວຍໃຫ້ລອດ. ຈົ່ງຕາມເຮົາມາ ຍັງສາມາດຖືກໃຊ້ເປັນແຫລ່ງຊ່ວຍເຫລືອສຳລັບການສົນທະນາເຫລົ່ານີ້ໄດ້.
-
ວາງແຜນ ແລະ ເຊື້ອເຊີນ (ປະມານ 10 ນາທີ). ເຊື້ອເຊີນພໍ່ແມ່ ຫລື ຄູສອນໃຫ້ແບ່ງປັນສິ່ງທີ່ເຂົາເຈົ້າໄດ້ຮຽນຮູ້ລະຫວ່າງການປະຊຸມ ແລະ ວ່າເຂົາເຈົ້າວາງແຜນຈະນຳໃຊ້ມັນແນວໃດ.