“Cov Xib Hwb Pawg Sab Laj tej Kev Sib Ntsib—Rau Leej Niam Leej Txiv thiab cov Xib Hwb uas Tau Hu Lawv Qhia,” Kev Qhia Raws Li tus Cawm Seej txoj Kev: Rau Tag Nrho cov uas Qhia hauv Tsev thiab hauv lub Koom Txoos (2022)

“Cov Xib Hwb Pawg Sab Laj tej Kev Sib Ntsib,” Kev Qhia Raws Li tus Cawm Seej txoj Kev

Cov Xib Hwb Pawg Sab Laj tej Kev Sib Ntsib—Rau Leej Niam Leej Txiv thiab cov Xib Hwb uas Tau Hu Lawv Qhia

Txhua pawg ntseeg yuav tsum ua kev sib ntsib rau cov xib hwb pawg sab laj tej txhua peb hlis, rau cov niam tsev txiv tsev thiab cov xib hwb uas tau hu lawv qhia nyob hauv pawg ntseeg. Hauv tej sib ntsib no, cov niam tsev txiv tsev thiab lwm cov xib hwb sab laj ua ke txog tej ntsiab cai ntawm kev qhia zoo li Yexus Khetos (saib Phau Qhia Kev Coj lub Koom Txoos: Kev Ua Hauj Lwm hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, 13.4, 13.5, 17.4, 17.5, Txoj Moo Zoo cov Ntawv.

Peb ua cov xib hwb pawg sab laj ob hom kev sib ntsib no txhua peb hlis thaum lub sij hawm kawm vaj lug kub ntev li 50 feeb nyob rau Hnub Caiv.

Cov Xib Hwb Pawg Sab Laj tej Kev Sib Ntsib rau Leej Niam Leej Txiv

Leej Twg Coj tej Kev Sib Ntsib No? Feem ntau, ib tug los ntawm Hnub Caiv Kev Kawm Vaj Lug Kub pawg thawj tswj hwm yuav coj cov xib hwb pawg sab laj tej kev sib ntsib rau cov niam tsev txiv tsev. Tiam sis, tej lub sij hawm pawg npisov txib tau lwm tus mej zeej hauv pawg ntseeg kom coj tej kev sib ntsib no.

Pawg ntseeg pawg sab laj, nrog kev pab los ntawm Hnub Caiv Kev Kawm Vaj Lug Kub pawg thawj tswj hwm, saib xyuas pawg sab laj tej kev sib ntsib rau leej niam leej txiv. Lawv sab laj ua ke txog tej yam uas leej niam leej txiv thiab tsev neeg xav tau, thiab lawv ua hauj lwm ua ke kom txiav txim siab seb tej lub ntsiab cai twg ntawm Kev Qhia Raws Li tus Cawm Seej txoj Kev yuav pab lawv.

Leej Twg Yuav Tsum Mus? Pawg ntseeg pawg sab laj yuav txiav txim seb lawv yuav caw leej twg los sis qhib kev sib ntsib ntawd rau txhua tus uas xav kawm ua ke.

Thaum Twg Yuav Tsum Muaj tej Kev Sib Ntsib No? Cov xib hwb pawg sab laj tej kev sib ntsib rau cov niam tsev txiv tsev los ua tau nyob rau Hnub Caiv twg, raws li pawg ntseeg pawg sab laj txiav txim.

Cov Xib Hwb Pawg Sab Laj tej Kev Sib Ntsib rau cov Xib Hwb uas Tau Hu Lawv Qhia

Leej Twg Coj tej Kev Sib Ntsib No? Feem ntau, ib tug los ntawm Hnub Caiv Kev Kawm Vaj Lug Kub pawg thawj tswj hwm yuav coj cov xib hwb pawg sab laj tej kev sib ntsib rau cov xib hwb uas tau hu lawv qhia. Tiam sis, tej lub sij hawm pawg npisov txib tau lwm tus mej zeej hauv pawg ntseeg kom coj tej kev sib ntsib no.

Pawg ntseeg pawg sab laj, nrog kev pab los ntawm Hnub Caiv Kev Kawm Vaj Lug Kub pawg thawj tswj hwm, saib xyuas pawg sab laj tej kev sib ntsib rau cov xib hwb uas tau hu lawv qhia. Lawv sab laj ua ke txog tej yam uas cov xib hwb thiab cov kawm xav tau, thiab lawv ua hauj lwm ua ke kom txiav txim siab seb tej lub ntsiab cai twg ntawm Kev Qhia Raws Li tus Cawm Seej txoj Kev pab tau cov uas xav tau kev pab.

Leej Twg Yuav Tsum Mus? Txhua tus uas qhia ib pawg los yog ib chav kawm nyob hauv pawg ntseeg yuav tau rau mus cov xib hwb pawg sab laj tej kev sib ntsib. Kuj caw pawg pov thawj hwj thiab tej lub koom haum tej pawg thawj tswj hwm tuaj koom.

Thaum Twg Yuav Tsum Muaj tej Kev Sib Ntsib No? Cov xib hwb mus koom cov xib hwb pawg sab laj tej kev sib ntsib thaum ib Hnub Caiv thaum lawv tsis qhia lawv chav.

Cov xib hwb hauv tej pawg pov thawj hwj, Koom Haum Niam Tsev, thiab Koom Haum Ntxhais Hluas yuav koom ua ke nyob rau Hnub Caiv thib ib los sis thib peb, raws li cov thawj coj hauv pawg ntseeg txiav txim.
Cov xib hwb hauv Hnub Caiv Kev Kawm Vaj Lug Kub yuav koom ua ke nyob rau Hnub Caiv thib ob los sis thib plaub, raws li cov thawj coj hauv pawg ntseeg txiav txim.
Cov xib hwb hauv lub Koom Haum Me Nyuam Yaus mus tau Hnub Caiv twg los tau, raws li pawg ntseeg lub Koom Haum Me Nyuam Yaus thiab Kev Kawm Vaj Lug Kub ob pawg thawj tswj hwm txiav txim. Yog tias xav ua, cov xib hwb hauv lub Koom Haum Me Nyuam Yaus yuav sib ntsib cais lwm cov xib hwb lawv thiaj li yuav muaj cib fim sib sab laj txog kev qhia cov me nyuam yaus. Ua tau li no thaum lub sij hawm hu nkauj uas ntev li 20 feeb, ua ntej los sis tom qab Hnub Caiv tej kev sib ntsib, los sis lwm hnub hauv lub lim tiam. Ua tau ob peb txoj kev sib ntsib rau cov xib hwb pawg sab laj txhua peb hlis rau cov xib hwb hauv lub Koom Haum Me Nyuam Yaus thiaj li yuav tsis muaj tag nrho cov xib hwb tsis khoom qhia lawv tej chav kawm nyob rau tib lub lim tiam. (Lus Cim: Raws li xav tau, lub Koom Haum Me Nyuam Yaus pawg thawj tswj hwm txib cov xib hwb sib hloov, muab tej chav kawm koom ua ke, los sis ua lwm yam kom cia cov xib hwb hauv lub Koom Haum Me Nyuam Yaus mus rau cov xib hwb pawg sab laj tej kev sib ntsib.)

Ua Li Cas hauv tej Kev Sib Ntsib

Cov Xib Hwb Pawg Sab Laj tej Kev Sib Ntsib—rau leej niam leej txiv thiab cov xib hwb uas tau hu lawv qhia—ua raws li no:

Sib qhia thiab sib sab laj ua ke (ntev li 20 feeb). Caw cov niam tsev txiv tsev los sis cov xib hwb qhia txog tej yam uas pab zoo thaum lawv qhia txoj moo zoo tom tsev los sis hauv lawv chav kawm. Lawv kuj qhia txog tej teeb meem lawv raug los sis tej yam lawv xav ua zoo dua los tau.
Kawm ua ke (ntev li 15 feeb). Sib tham nrog cov niam tsev txiv tsev los sis cov xib hwb txog ib lub ntsiab cai hauv Kev Qhia Raws Li tus Cawm Seej txoj Kev. Kuj siv tau Los, Nrog Kuv Mus thaum sib tham txog tej yam no.
Npaj thiab caw (ntev li 10 feeb). Caw cov niam tsev txiv tsev los sis xib hwb qhia txog tej yam lawv kawm hauv kev sib ntsib ntawd thiab lawv npaj yuav ua li cas kom siv tej yam uas lawv kawm.

6:15