“Mga Teacher Council Meeting—Para sa mga Ginikanan kag Gin-call nga mga Titser,” Pagtudlo sa Paagi sang Manluluwas: Para sa Tanan nga Nagatudlo sa Balay kag sa Simbahan (2022)

“Mga Teacher Council Meeting,” Pagtudlo sa Paagi sang Manluluwas

Mga Teacher Council Meeting—Para sa mga Ginikanan kag Gin-call nga mga Titser

Ang tagsa ka ward dapat maghiwat sang mga teacher council meeting kada-tatlo-ka-bulan, para sa mga ginikanan kag sa gin-call nga mga titser sa ward. Sa sining mga miting, ang mga ginikanan kag iban pa nga mga titser makakonsultahanay parte sa mga prinsipyo sang Cristohanon nga pagtudlo (tan-awa sa Libro sang Pangkabilogan nga Pagsulundan: Pagserbisyo sa Ang Simbahan ni Jesucristo sang mga Santos sa Ulihing mga Adlaw, 13.4, 13.5, 17.4, 17.5, Librarya sang Ebanghelyo).

Ining duha ka klase sang mga teacher council meeting ginahiwat kaisa kada tatlo ka bulan sa tion sang 50-minutos nga klase kon Domingo.

Mga Teacher Council Meeting para sa mga Ginikanan

Sin-o ang Nagapanguna sa Sining mga Miting? Masami, ang miyembro sang Sunday School presidency ang nagapamuno sang mga teacher council meeting para sa mga ginikanan. Pero, pwede man nga i-asayn sang bishopric sa iban nga miyembro sang ward ang pagpanguna sa mga miting kon kaisa.

Ang ward council, sa bulig sang Sunday School presidency, ang nagadumala sang mga teacher council meeting para sa mga ginikanan. Nagakonsultahanay sila parte sa mga panginahanglan sang mga ginikanan kag mga pamilya, kag nagabuligay sila sa paghibalo kon ano nga mga prinsipyo sa Pagtudlo sa Paagi sang Manluluwas ang makasabat gid sinang mga panginahanglan.

Sin-o ang Dapat Magkadto? Ang ward council ang nagadesisyon kon bala imbitahon ang partikular nga mga ginikanan ukon himuon ang pagtambong nga bukas sa tanan nga gusto magpartisipar.

San-o Dapat Hiwaton Ining Mga Miting? Ang mga teacher council meeting para sa mga ginikanan pwede nga hiwaton sa bisan ano nga Domingo, suno sa napili sang ward council.

Mga Teacher Council Meeting para sa Gin-call nga mga Titser

Sin-o ang Nagapanguna sa Sining mga Miting? Masami, miyembro sang Sunday School presidency ang nagadumala sang mga teacher council meeting para sa gin-call nga mga titser. Pero, pwede man nga i-asayn sang bishopric sa iban nga miyembro sang ward ang pagpanguna sa mga miting kon kaisa.

Ang ward council, sa bulig sang Sunday School presidency, ang nagadumala sang mga council meeting para sa gin-tawag nga mga titser. Nagakonsultahanay sila parte sa mga panginahanglan sang mga titser kag mga estudyante, kag nagabuligay sila sa paghibalo kon ano nga mga prinsipyo sa Pagtudlo sa Paagi sang Manluluwas ang makasabat gid sinang mga panginahanglan.

Sin-o ang Dapat Magkadto? Ang tanan nga nagatudlo sang korum ukon klase sa ward dapat magkadto sa mga teacher council meeting. Ang mga miyembro sang korum kag presidency sang organisasyon imbitado man.

San-o Dapat Hiwaton Ining Mga Miting? Ang mga titser nagakadto sa mga teacher council meeting sa Domingo nga wala sila nagatudlo sang ila regular nga klase.

Ang mga titser sa korum sang priesthood, Relief Society, kag Young Women makatambong sa una ukon ikatatlo nga Domingo, suno sa mapili sang lokal nga mga lider.
Ang mga titser sang Sunday School makatambong sa ikaduha ukon ikaapat nga Domingo, suno sa mapili sang lokal nga mga lider.
Ang mga titser sang Primary mahimo magkadto sa bisan ano nga Domingo, suno sa mapili sang Primary kag Sunday School nga mga presidency. Kon gusto, ang mga titser sang Primary mahimo nga magtililipon nga separado sa iban nga mga titser para hambalan ang pinasahi nga aspeto sang pagtudlo sa kabataan. Pwede ini matabo sa tion sang 20-minuto nga oras sang pagkinanta, antes ukon pagkatapos sang regular nga mga miting kon Domingo, ukon sa bisan ano nga adlaw sang semana. Sobra sa isa ka teacher council meeting ang pwede hiwaton kada-tatlo ka bulan para sa mga titser sa Primary para indi sila dulungan nga madula sa mga klase sang Primary sa pareho nga semana. (Tanda: Kon kinahanglan, ang Primary presidency magabutang sang bulos nga mga titser, magatingob sang mga klase, ukon maghimo sang iban pa nga mga paagi para tugotan ang mga titser sang Primary nga makakadto sa mga teacher council meeting.)

Format sang mga Miting

Ang mga teacher council meeting—para sa mga ginikanan kag sa gin-call nga mga titser sa ward—nagasunod sini nga format:

Makigbahin kag maghinambalanay sing ululupod (mga 20 minutos). Imbitara ang mga ginikanan ukon mga titser nga iistorya kon ano ang maayo nga nagakatabo samtang ginatudlo nila ang ebanghelyo sa balay ukon sa ila mga klase. Pwede man nila iistorya ang mga kabudlayan nga ila ginaatubang ukon mga butang nga gusto nila panamion.
Ululupod nga magtuon (mga 15 minutos). Hambali upod sa mga ginikanan ukon mga titser ang isa sa mga prinsipyo sa Pagtudlo sa Paagi sang Manluluwas. Ang Dali, Magsunod sa Akon pwede man gamiton nga bulig sa sining mga diskusyon.
Magplano kag mag-imbitar (mga 10 minutos). Imbitara ang mga ginikanan ukon mga titser nga iistorya kon ano ang ila natun-an sa miting kag kon paano nila ini ginaplano nga iaplikar.

6:15