Tatalo mo i latou ma ta’u o latou igoa.

O le tatalo e le aunoa mo au tagata aoga e mafai ona fesoasoani ia te oe e lagona atili ai le alofa o le Atua mo i latou ma faateleina ai lou manao e saunia se nofoaga saogalemu, ma valaaulia lea e mafai ona latou aoao ai. E mafai foi ona faatagaina le Tama Faalelagi e fesoasoani ia te oe ia malamalama atili i o latou tulaga ma manaoga. E ui e le mafai ona tatou faamalosia mataupu faaleagaga po o tali i tatalo, ae o le tatalo mo a tatou tagata aoga e valaaulia ai le taitaiga a le Agaga Paia ma e mafai ona faateleina ai lo tatou gafatia e fesoasoani ai ia i latou. O le faatinoina o musumusuga e te maua e mafai ona fesoasoani ia te oe e faaleleia atili ai aafiaga e aoao ai tagata aoga taitasi. O se tasi o auala e mafai ai e faiaoga ona saili e faateleina le alofa mo a latou tagata aoga o le mafaufau lea i mea ua uma ona latou iloa e uiga i se tagata aoga ona mafaufau loloto lea ma le agaga tatalo ma fesili pe mafai faapefea ona latou faaalia atili le alofa i lena tagata aoga. A o latou tatalo ma mafaufau i nei manatu, ona tatau lea i faiaoga ona saili e faailoa ma faatino ia uunaiga a le Agaga.

O nisi nei o faataitaiga o auala e mafai ona e tatalo ai ma fesili pe faapefea ona fesoasoani i se tagata aoga ma mulimuli i uunaiga a le Agaga Paia:

• Na e matauina sa musu Ioane e auai i le vasega talu ai nei. E te ole atu i le Tama Faalelagi pe mafai faapefea ona sili atu ona e fesoasoani ia te ia. Ua e lagona e tatau ona e talanoa ia te ia a o sau o ia i le vasega. Ua e lagona e tatau ona e fesili atili atu ia te ia e uiga i ona manaoga i le taimi nei nai lo le na o le fesili atu ia te ia pe aisea na lei auai ai talu ai nei. Ua e fuafua e talanoa ia te ia a o lei amataina le vasega taeao.

• Sa faasoa soo atu e Maria ona manatu ma lana molimau i nai vaiaso ua tuanai. A o lei oo i le isi vasega, e te ole atu i le Tama Faalelagi pe faapefea ona e fesoasoani ia te ia ia faaauau pea ona alualu i luma. Ua ia te oe le manatu e faapaga o ia ma ni nai tagata o lana vasega e le masani ona faasoa mai pe o loo tauivi foi e faasoa faalauaitele mai o latou lagona. I le fuafuaga o lau lesona mo taeao, e te faaopoopo ai se avanoa e faasoa atu ai se tasi o le vasega.

Kiliki ii e matamata ai se vitio o lenei faataitaiga.

1:40

Faaaoga se tasi pe sili atu o faatinoga nei e faaleleia ai lou tomai e tatalo ai mo tagata aoga ma faatino ai uunaiga e taunuu i ai:

• Filifili se tagata aoga e te lagona e le tele ni faauoga vavalalata i le vasega. Tatalo e uiga i le auala sili e fesoasoani ai ia te ia. Fai se fuafuaga e galue i uunaiga e te maua.

• Filifili se tagata aoga e tele mea e faasoa mai i le vasega. Tatalo mo ia ma e uiga i le auala e faaauau ai ona faaleleia le aafiaga o le aoaoina o lena tagata aoga. Ia galue i uunaiga e te maua.

• Filifili se tagata aoga e te lei vaai i ai talu ai nei i le vasega. Tatalo mo ia, ma ole atu i le Alii pe faapefea ona aapa atu ma fesoasoani i le tagata aoga ia lagona le alofaina ma le manaomia. Fai se fuafuaga e faavae i uunaiga e te maua, filifili pe mafai ona e faatinoina lena fuafuaga, ma mulimuli i ai.

Mafaufau loloto i mea ua e aoaoina mai lenei aafiaga. Atonu e mafai ona e faamaumauina nisi o nei manatu i se api talaaga mo suesuega. Mafaufau i fesili nei:

• O a ni taumafaiga sa ou faia muamua e tatalo ai mo a’u tagata aoga?

• O le a se mea ua ou aoaoina i lenei faagasologa e mafai ona faaleleia ai lo’u tomai e tatalo ai mo a’u tagata aoga ma fesoasoani ai ia i latou e faaleleia lo latou aafiaga e aoao ai?

• O le a se mea o le a ou faia e faaauau ai ona faaleleia?

Fai se fuafuaga faatino e tatalo ai ma fesili pe mafai faapefea ona e fesoasoani i au tagata aoga ma mulimuli i uunaiga mai le Agaga Paia. E mafai ona e mafaufau i laasaga fautuaina nei a o e faia se fuafuaga faatino:

• Filifili ma taulai atu i se tasi o faatinoga o loo i luga.

• Filima’oti pe o le a faapefea ona e faaaogaina.

• Faatulaga se taimi e faaaoga ai.

• Ole atu i le Tama Faalelagi e fesoasoani ia te oe.

• Neil L. Andersen, “A Classroom of Faith, Hope, and Charity” (o se afiafi ma se Pulega Aoao, Feb. 28, 2014), broadcasts.ChurchofJesusChrist.org

• Chad H. Webb, “Above All Things” (Seminaries and Institutes of Religion annual training broadcast, June 12, 2019), broadcasts.ChurchofJesusChrist.org

• “Alofa Ia I Latou E Te Aoaoina,” Aoao Atu i le Ala a le Faaola (2016), 6