Punaoa

Filifili tofiga ma faatino vaega nei.

NAOMI: Talofa, Maria. O a mai le pisinisi? Pe o ola ea?

MARIA: O loo lelei a, ae ua ou le lava lava. Ou te galue malosi lava, ae le lava ni au tupe e maua.

NAOMI: E foliga mai e te manaomia ni aseta e sili atu le aoga.

MARIA: O a aseta e aoga?

NAOMI: O mea e fesoasoani i lau pisinisi ia maua ni tupe e sili atu.

MARIA: Oi, manaia lena. Ou te manao i ni aseta e sili atu le aoga … ae faatali; ou te manatu e leo ia te au nei.

NAOMI: E mautinoa o loo i ai. O au moa o ni aseta aoga. Pe o le a e maua ea ni tupe e sili atu pe a tele atu ni au moa?

MARIA: Ioe, o le a ou mauaina. E tatau ona ou mauaina nisi moa.

NAOMI: O le a se isi mea e faigofie atu ai mo oe ona fai se pisinisi?

MARIA: O le a matuai manaia lava le maua o se uila vilivae e tiliva ai fuamoa ma lau ai meaai a moa. Ua tiga lava ou vae i le savali.

NAOMI: Ia, masalo e tatau ona e faatau se uila vilivae. Pe o le a e mauaina ni tupe e sili atu pe a i ai sau uila vilivae?

MARIA: Ioe, afai e i ai sau uila vilivae, o le a vave atu ona ou faia tiliva. O le a tele atu le taimi e faatau ai. Ae pe tatau ona ou faatauina se uila vilivae po o nisi moa?

NAOMI: O le a le mea e sili ona faamuamua mo lau pisinisi i le taimi nei? Se uila vilivae po o nisi moa?

MARIA: Ou te le iloa. E mafai faapefea ona ou filifili?

Toe foi i itulau 94

Filifili tofiga ma faatino le vaega lenei:

MARIA: Naomi, ou te manatu o aseta aoga o le a faia ia sili atu tupe maua a lau pisinisi. Ae ou te popole i tau.

NAOMI: Lelei, Maria, e tatau ona e taumafai lava e faaitiitia tau.

MARIA: O le a faapefea ona ou iloa au tau o le a i ai? E suia soo tele lava!

NAOMI: Muamua, e te manaomia le vaevae o au tau tumau ma tau fetuunai.

MARIA: Oi, ou te le iloa le uiga o lena mea.

NAOMI: Sei ou faamatalaina atu i le ala lenei. Pe e te iloa Daniel?

MARIA: Le alii faatau meafale?

NAOMI: Ioe. A fau e Daniel se nofoa e faatau atu, pe e te manatu na te totogi se faioloa mo laupapa na te faaaoga e fau ai?

MARIA: Ioe.

NAOMI: E sa’o. E manao Daniel e faatali seia maua e ia se oka faatoa faatau ai ni laupapa.

Afai e faatau atu e Daniel se nofoa e tasi i lenei masina, e totogi atu e ia na o laupapa mo le nofoa e tasi. Afai na te faatau atu ni nofoa e sefulu i le isi masina, o le a ia totogi faasefulu le tele o le laupapa.

MARIA: Ae e le afaina lena mea, aua ua ia faatau atu faasefulu le tele o nofoa!

NAOMI: Lena tonu a. O le tau a Daniel mo le laupapa o se tau fetuunai. E alu i luga ma lalo e fuafua lava i le tele na te faatau atu.

Ia, e totogi e Daniel le lisi mo lana faleoloa. Sei faapea la o lana lisi e 1000 i le masina. E fia le lisi pe a ia faatau atu nofoa e sefulu?

MARIA: E 1000, ae a.

NAOMI: E fia na te totogi pe a ia faatau atu na o se nofoa se tasi?

MARIA: E 1000 a. E le suia.

NAOMI: E sa’o. O le lisi a Daniel o se tau tumau. E le taua le tele po o le laitiiti na te faatau atu. E tatau lava ona ia totogia.

MARIA: Oi, ou te le fiafia i tau tumau.

NAOMI: E tatau lava ona tatou faaeteete i tau tumau. E mafai ona latou fesoasoani pe afai e mo ni aseta aoga.

MARIA: Ma lava mea tatou te faatau atu e totogi ai!

NAOMI: E sa’o lelei!

MARIA: Naomi, pe mafai ona e fesoasoani ia te au ia iloa po o fea au tau tumau ao fea e fetuunai?

Toe foi i itulau 98