Амьдралд бэлтгэх хичээлийн сургалт

Есүс Христ дээр төвлөр: Суралцах үйл явцыг Есүс Христ дээр төвлөрүүлэхэд туслах энэхүү хичээлийн жишээнүүдээс авч үзье. Уг жишээнүүдэд суралцагчид хэрхэн Аврагчийн тусламжийг эрэлхийлэн, Түүний үлгэр жишээ, сургаалаас суралцахыг хүсэж байгааг анзаарна уу.

• Та суралцагчдадаа буруу эсвэл эрүүл бус бодлыг засахдаа Аврагчаас тусламж хүсэх дадлага хийнэ гэдгийг хэлж болох юм.

• Санаа бодолдоо Аврагч руу харна гэдэг нь юу гэсэн утгатай гэж та бодож байна вэ? (Зарим жишээнд дараах зүйлс орж болно. Үүнд: Бидэнд тулгарсан нөхцөл байдалд Аврагч хэрхэх байсныг тунгаан бодох, Түүний сургаал тухайн нөхцөл байдалд хэрхэн тусгалаа олох байсныг олж мэдэх мөн Түүний хайрыг дурсан санах.)

Сургаалыг заа: Суралцагчдад сургаалыг судруудаас болон бошиглогчдын үгсээс суралцахад туслах энэхүү хичээлийн жишээнүүдээс авч үзье. Суралцагчдад судруудыг судлах боломжийг олгосон бөгөөд ерөнхийлөгч Рассэлл М.Нэлсоны үг тэдэнд тухайн судрыг ойлгоход тусална гэдгийг анзаарна уу.

• Сургаал ба Гэрээнүүд 6:36-г уншаад, Их Эзэн биднийг юу хийхэд урьж байгааг олж мэд.

• Энэ судрын талаар ярьж байхдаа ерөнхийлөгч Нэлсон: “Бидний анхаарал Аврагчид болон Түүний сайн мэдээнд бат бэхлэгдсэн байх ёстой. Санаа бодол бүрдээ Түүн рүү харахын тулд оюун санаагаараа нэлээн хичээл зүтгэл гаргах ёстой байдаг. Гэхдээ ийнхүү үйлдсэн үед эргэлзээ, айдас маань арилдаг юм” хэмээн заасан (Рассэлл М.Нэлсон, “Есүс Христийн хүчийг амьдралдаа татан авах нь,” 2017 оны 4-р сарын Ерөнхий чуулган, 25).

Хичээнгүй суралцахыг урь: Суралцагчдад суралцах үүргээ биелүүлэхэд нь туслах энэхүү хичээлийн зарим жишээг авч үзье. Суралцах үйл явцад идэвхтэй оролцоход урамшуулахын тулд суралцагчдыг хэрэгцээгээ олж харахад нь урьж байгааг анзаарна уу. Мөн суралцагчдыг өөрсдийн өвөрмөц бодол, санааг хуваалцахыг урьсан байгаа.

• Суралцагчдыг өөрсдийн бодох хандлагадаа хэр их анхаарал хандуулдгаа мөн тэдгээр хандлага нь тус болдог эсвэл зөв байдаг талаар тунгаан бодоход урь.

• Ерөнхийлөгч Нэлсоны мэдэгдлээс танд юу нь онцгой сэтгэгдэл төрүүлсэн бэ?

Сүнсээр заа: Суралцах үйл явц дахь Ариун Сүнсний үүрэг, оролцоог хангахын тулд багш нарт Түүнийг урихад энэхүү хичээл хэрхэн тусалж болох талаарх зарим жишээг авч үзье. Багш нарыг зорилготойгоор Ариун Сүнснээс удирдамж эрэлхийлэхэд суралцагчдыг урихыг урамшуулдаг. Энэ төрлийн урилга нь суралцагчдад суралцах үйл явцдаа Ариун Сүнсний өдөөлтийг хүлээн авахад тусалдаг.

• Ялангуяа хүнд хэцүү нөхцөл байдалд ороход ямар бодол төрдөг хандлагаа илүү сайн ойлгохын тулд Ариун Сүнсээр дамжуулан удирдамж заавар хүлээн авахыг эрэлхийлэхэд суралцагчдыг урь.

Есүс Христэд төвлөр: Суралцах үйл явцыг Есүс Христ дээр төвлөрүүлэхэд туслах энэхүү хичээлийн зарим жишээг авч үзье. Энэ хичээл дэх тодруулсан үнэнүүд хэрхэн Аврагчтай холбогдож, Түүнд хандан тусламж хүсэхэд суралцагчдыг урьж байгааг анзаарна уу. Түүнчлэн суралцагчдад бурханлаг мөн чанарыг нь болон тэдэнд байгаа давуу тал, ур чадвар нь Бурханы хайр, нигүүлслийн илрэл гэдгийг сануулдаг.

• Суралцагчид дараахтай төстэй үнэнүүдийг онцолж болох юм: Их Эзэн хүний гаднах төрхийг хардаггүй, зүрхийг нь хардаг (1 Самуел 16:7-г үзнэ үү). Биднийг хүчирхэгжүүлж чадах Есүс Христээр бид бүгдийг хийж чадна (Филиппой 4:13; Алма 26:12-ыг үзнэ үү). Бодгалийн үнэ цэн Бурханы мэлмийд агуу (Сургаал ба Гэрээнүүд 18:10-ыг үзнэ үү).

• Өөрийнх нь дүр төрхөөр бүтээгдсэн Бурханы хүүхдүүдийн хувьд бидний хүн нэг бүр өөр өөрийн гэсэн давуу тал, ур чадвараар адислагдсан гэдгийг суралцагчдад сануулна уу. Бурханы адисалсан давуу тал, чадавхыг ойлгож, таньж мэдэхэд бэрхшээлтэй байгаа суралцагчид байж болно.

Сургаалыг заа: Суралцагчдад судруудаас болон бошиглогчдын үгсээс суралцахад туслах энэхүү хичээлийн зарим жишээг авч үзье. Суралцагчдын судлах судрууд нь тусламж хүсэн Есүс Христэд хандахад тэднийг чиглүүлэх зорилгоор зориуд сонгож авсан байгааг анзаарна уу. Ингэснээр суралцагчдад Бурханы өгсөн зарим бэлгээ хэрхэн олж нээх талаар өгсөн нэгэн төлөөлөгчийн зөвлөгөөнөөс суралцах боломж олдоно.

• Дараах хэд хэдэн судрын хэсгийг судлаад, Есүс Христээр дамжуулан өөрсдийн чадвар чадамжийг олж нээх ур чадвараа таньж мэдэхэд бидэнд туслах мөнхийн үнэнийг хайж ол. 1 Самуел 16:7; Филиппой 4:13; Иаков 4:7; Алма 26:12; Сургаал ба Гэрээнүүд 18:10.

• Арван хоёр төлөөлөгчийн чуулгын ахлагч Роналд А.Расбанд Тэнгэрлэг Эцэгийн маань биднийг адислан өгсөн авьяас, давуу тал, ур чадваруудаа олж харж болох зарим арга замыг ийн хуваалцсан. “Эхлээд бидний сонирхдог зүйлсээс Бурханы бидэнд өгсөн авьяас чадвар илэрдэг. Хэрэв та би ямар авьяас чадвартай юм бэ гэж бодож байвал хийх дуртай зүйлсийнхээ жагсаалтыг гарга. Үүндээ сүнслэг, хөгжмийн, тайзны урлагийн, эрдэм шинжилгээний, спортын гэх мэт амьдралын олон талаас нь тунгааж хийх дуртай бүх зүйлийг багтаа. Ойлголт, сүнслэг өдөөлт авахын тулд патриархын адислалаа судалж, тунгаан бод. Гэр бүлийн гишүүд, итгэдэг найз нөхөд, багш нар, удирдагчидтайгаа зөвлөлд. Бидний өөрсдөөсөө олж хардаггүй зүйлсийг хүмүүс ихэнхдээ олоод харчихсан байдаг” (Роналд А.Расбанд, “Parables of Jesus: The Parable of the Talents,” Ensign, Aug. 2003, 34).

Хичээнгүй суралцахыг урь: Суралцагчдад суралцах үүргээ биелүүлэхэд нь туслах энэхүү хичээлийн зарим жишээг авч үзье. Эдгээр үйл ажиллагаа нь хэрхэн суралцагчдад өөрсдийн туршлага, нөхцөл байдлын талаар бодоход тусалдгийг анзаарна уу. Эдгээр нь одоогийн хэрэгцээгээ шийдвэрлэхэд чиглэсэн суралцах үйл явцад зүрх сэтгэл, оюун бодлоо хандуулах сэдлийг суралцагчдад төрүүлэхэд туслах зорилготой. Суралцагчид бас тулгарч буй бодит саад бэрхшээлийн талаар мөн судар дахь үнэнүүд хэрхэн тэдэнд тусалж болох талаар бодох боломжтой.

• Ирээдүйд хүлээх үүрэг хариуцлага, сонирхож буй ажил мэргэжлийнхээ тухай бод. Түүнчлэн ирээдүйд илүү сайн бэлтгэгдэхэд танд туслах, хөгжүүлэх хэрэгтэй ур чадвараа олж тодорхойлохыг хичээ.

• Биднийг ур чадвартаа сэтгэл дундуур байх үед эдгээр үнэн бидэнд хэрхэн туслах вэ?

Сүнсээр заа: Энэхүү хичээл нь багш нарт суралцах үйл явцын үеэр Ариун Сүнсийг үүргээ гүйцэтгэхэд нь урихад тусалж болох арга замын талаарх зарим жишээг авч үзье. Одоогийн хэрэгцээгээ болон амьдралд илүү сайн бэлтгэгдэхэд шаардагдах дараагийн алхмуудаа илүү сайн олж харахын тулд Ариун Сүнснээс сүнслэг өдөөлт эрэлхийлэхэд суралцагчдыг урьж байгааг анзаарна уу.

• Өнөөдөр судалж байхдаа тэдгээр үүрэг хариуцлагад тань таныг бэлтгэж болох аль хэдийн байгаа давуу тал, ур чадвараа тодорхойлоход туслах Тэнгэрлэг Эцэгийн удирдамжийг Ариун Сүнсээр дамжуулан эрэлхийл.