Faasoaina Atu o Upumoni o le Talalelei i le Faigofie ma le Manino

Faamalamalama atu o le aoao atu o le upumoni i le faigofie ma le manino o se auala mamana lea e tali ai fesili ma talanoaina ai popolega. Faaali ma faitau faatasi le saunoaga lenei mai ia Peresitene M. Russell Ballard:

O le talosaga e sili ona taatele tatou te faalogo i ai e faigofie lava e faapenei: “Ta’u mai sina mea itiiti e uiga i lau Ekalesia.” O le upu autu iinei o le “itiiti.” Latou te le o fai mai, “Ta‘u mai mea uma e te iloa ona auina mai lea o isi e ta’u mai isi mea uma ia te au.” …

… O loo i ai se manaoga tele mo ni faamatalaga manino, faigofie e tuuina atu ai ia i latou o e fia iloa mea faavae e uiga i le Ekalesia e pei ona i ai i aso nei. (M. Russell Ballard, “Faith, Family, Facts, and Fruits,” Liahona, Nov. 2007, 25)

E mafai ona e faasoa atu se tasi pe sili atu foi o faataitaiga nei o fuaitau faigofie ma manino o upumoni o le talalelei pe faaaoga nisi o au lava faataitaiga e faataitai ai lenei tomai.

O le a le perisitua? “O le perisitua o le pule ma le mana a le Atua. Na i ai lava e le aunoa ma o le a faaauau pea ona i ai e aunoa ma se iuga (tagai i le Alema 13:7–8; Mataupu Faavae ma Feagaiga 84:17–18). E ala i le perisitua, ua faataunuuina ai e le Tama Faalelagi Lana galuega ina ‘ia aumaia le tino ola pea ma le ola faavavau o le tagata’ (Mose 1:39). Ua tuuina mai e le Atua le pule ma le mana i Ona atalii ma afafine i le lalolagi e fesoasoani ai e faatino lenei galuega” (Tusitaulima Aoao: Auauna Atu i O Le Ekalesia a Iesu Keriso o le Au Paia o Aso e Gata Ai, 3.0, ChurchofJesusChrist.org).

O le a le molimau? “[O se] molimau o se meatotino sili ona faapelepele, e masani ona i ai faatasi ma lagona loloto faaleagaga. O nei lagona e masani ona fesootai filemu mai ma e faamatalaina o se ‘leo itiiti filemu’ [1 Tupu 19:12]. O lou talitonuga po o le malamalama o le upumoni ua tuuina mai o se molimau faaleagaga e ala i le uunaiga a le Agaga Paia” (Gary E. Stevenson, “Faafaileleina ma Le Tuuina Atu o Lau Molimau,” Liahona, Nov. 2022, 112).

E mafai faapefea ona ou iloa ua faamagaloina A’u e le Atua? “Ua folafola mai e le Atua o le a Ia faamagaloina i latou o e salamo. Pe a e lagonaina le mafanafana mai le Agaga, e mafai ona e iloa o loo galue le mana togiola a le Faaola i lou olaga” (Mo le Malosi o le Autalavou: O Se Taiala mo le Faia o Filifiliga [2022], 8).

E mafai foi ona e matamata i le vitio “What Happens after We Die?” (1:40) ma vaavaai mo mea e avea ai lenei vitio ma se tali faigofie ma manino i lena fesili. E mafai ona e valaauliaina tagata aoga e faasoa mai mea na latou maitauina a o latou matamata i le vitio.

E mafai ona e fatuina se fesili mai se autu po o se aoaoga mai le faitauga o tusitusiga paia o lenei vaiaso. Pe e mafai foi ona e filifili mai fesili o loo tuuina atu i lalo. Valaaulia tagata aoga e faataitai ma se paga ma feauaua’i i le taliina o fesili i le manino ma le faigofie. Fautuaina tagata aoga e tali fesili taitasi i totonu o le 30–60 sekone.

• E talitonu le Au Paia o Aso e Gata Ai ia Iesu?

• Aisea ou te manaomia ai le Tusi a Mamona pe afai o ia te au le Tusi Paia?

• Pe o fai ea e tagata o la outou ekalesia ia autaunonofo?

• Aisea ou te manaomia ai se ekalesia faatulagaina lelei?

• O le a le Togiola a Iesu Keriso?

E mafai ona e valaaulia se tagata aoga se toatasi pe toalua e faasoa mai mea na latou aoaoina e ala i lenei aafiaga.

I vaiaso a sau, valaaulia tagata aoga e faataitai ona faasoa atu le upumoni i le faigofie ma le manino. Manatua e tulitatao ma tuu atu se taimi pe a tou toe feiloai mo tagata aoga e talanoa ai e uiga i soo se aafiaga na latou maua i le faasoaina atu o upumoni o le talalelei i le faigofie ma le manino. E mafai foi ona e valaaulia i latou e faasoa mai soo se luitau na latou oo i ai.