“Ngaahi Talanoa ʻa e Kāingalotú,” Femanakoʻaki ʻa e Fefine mo e Fefine pe Tangata mo e Tangata: Ngaahi Talanoa ʻa e Kāingalotú (2020)
“Ngaahi Talanoa ʻa e Kāingalotú,” Femanakoʻaki ʻa e Fefine mo e Fefine pe Tangata mo e Tangata: Ngaahi Talanoa ʻa e Kāingalotú
Ngaahi Talanoa ʻa e Kāingalotú
ʻOku fakamatala ʻe he konga ko ʻení ha ngaahi talanoa fakataautaha ʻa ha kāingalotu ʻo e Siasí ʻoku nau foua ʻa e femanakoʻaki ʻa e fefine mo e fefine pe tangata mo e tangatá pe ʻoku nau fakatangata pe fakafāfine pe fakatou manako ʻi he tangatá mo e fefiné. Koeʻuhi ʻoku ʻikai ko ha toko taha pē ʻoku fai ki ai e talanoá, ʻoku toe fakamatala foki ʻa e talanoá ki he ngaahi aʻusia ʻa e ngaahi fāmilí, kaungāmeʻá mo e kau takí.
“ʻOku ʻikai ko ʻemau feingá ke fakamatalaʻi ʻa e tafaʻaki kotoa pē ʻe ala lavá, mo e ngaahi fiemaʻu ʻi he ngaahi ʻātakai kehekehe fekauʻaki mo e femanakoʻaki ʻa e fefine mo e fefine pe tangata mo e tangatá. Ka ko e fakakaukaú ke fakaʻatā kiate kitautolu kotoa ha mahino ʻoku lahi angé. Te mou fanongo ki ha ngaahi talanoa mo e ngaahi aʻusia mei ha kakai mo e ngaahi puipuituʻa mo e ngaahi fakakaukau ʻoku mātuʻaki kehekehe ʻaupito. ʻOku nau fakamātoato. ʻOku nau moʻoni. ʻOku nau falalaʻanga. Pea neongo te ke sio ʻe pehē ʻe ha niʻihi, ‘Naʻe ʻikai ola lelei ʻeni ka naʻe lelei ē,’ pea mo e fakalakalaka ʻi he moʻuí, ka ʻoku mau ongoʻi ʻe lava ke iku ʻeni ki ha ongoʻingofua lahi ange mo ha mahino lelei ange pea ko ʻemau taumuʻá ia.
“Ko e meʻa pē ʻoku mau fakaʻamu ki ai ʻi hono talanoaʻi ʻa e ngaahi palopalema pelepelengesi mo faingataʻa ko ʻení ke tau fakaʻatuʻi mo fakafanongo ki he niʻihi kehé pea feinga ke maʻu ha mahino. Te ke fakatokangaʻi ʻi he ngaahi aʻusia ko ʻení ʻoku fakamatalaʻi ʻe ha kakai ʻe ni‘ihi ʻa e meʻa ʻoku taukaveʻi ʻe he Siasí; ʻoku fenāpasi lelei ia. Pea ko ha niʻihi ʻoku ʻikai pehē ia. Ka ko hono moʻoní, ko e ngaahi meʻa moʻoni kotoa pē ia. Pea ʻi heʻetau fanongo ki he niʻihi kehé pea feinga ke maʻu ha mahinó, ʻe fakaʻau pē ke toe lelei ange” (D. Todd Christofferson, “Taumuʻa ʻo e Uepisaiti Ko ʻEní,” ChurchofJesusChrist.org).