Ou te Faafetai mo Laau Tetele, Laau Totō, ma Fugalaau

Faamoemoega

Ia fesoasoani ia maua e tamaiti taitoatasi le agaga faafetai a’e i le Tama Faalelagi ma Iesu Keriso mo laau tetele, laau toto, ma fugalaau.

Sauniuniga

Ia suesue ma le agaga tatalo le Kenese 1:11–13.
Tuu se fualaau aina mata (fruit), se fualaau fai sua (vegetable), po o se tamai lālā laau i totonu o se taga pepa iila (plastic).
Sauni ni nai fualaau aina mata, fualaau fai supo, po o se falaoa. Siaki muamua matua o tamaiti ina ia mautinoa e saogalemu nei mea uma mo tamaiti.
O Mea e faaaogaina:
1. O se Tusi Paia.
2. Afai e mafai, aumai ni ata o laau e ola i lo outou nuu, laau toto, ma fugalaau, ma aumai ni nai mea faitino e gaosia i le laau, e pei o se penitala, sipuni, ma se tanoa, mai lo outou aiga.
3. Ata tipi 1-4, fugalaau (o ata e tai tutusa e mafai ona maua i le Seti Nu. 3 o Ata Tipi O Fesoasoani Vaaia A Le Peraimeri).
4. Ata 1-22, Laau O Lo o Fuga Matagofie; ata 1-23, O Se Faamoega Manu o lo o i ai Ni Manu Pepe faatoa fofoa mai.
Ia faia sauniuniga e talafeagai ai mo so o se Gaoioiga E Faamauoa Ai e te manao e faaaoga.

Gaoioiga e Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai:

Pasi faatamilo i le vasega le taga o lo o i ai le fualaau aina mata, fualaau fai sua, po o le lala laau. Ia faamau le taga ina ia aua nei iloa e tamaiti mea o lo o i totonu. Ia tagotago i ai lima o tamaiti i le taga ma mate le mea o lo o i totonu. Faatonu e aua nei mate leotetele seia tofu pa’i uma lava tamaiti i le taga. A soo loa, ona tau atu loa lea e tamaiti o a latou mate. Ave ae i fafo le mea o lo o i totonu o le taga ma talanoa loa e uiga i ona foliga ma lona aoga.

Ua avea le fogaeleele ma nofoaga matagofie i le nofo ona o laau tetele, laau totō, ma fugalaau

Faamanatu i tamaiti o mea uma i le fogaeleele na faia e tusa ma le fuafuaga a le Tama Faalelagi. O le aso lona tolu o le foafoaga, na faia ai e Iesu laau tetele, laau totō, ma fugalaau (vaai le Kenese 1:11–13). Faamatala atu na finagalo le Tama Faalelagi ma Iesu e faamatagofie le fogaeleele i laau tetele, laau totō, ma fugalaau.

Faaali atu ata tipi o fugalaau ma nisi lava ata o laau tetele, laau totō, ma fugalaau.

Tala:

Faamatala atu se tala e mafai ona aoao atu ai tamaiti o laau tetele, laau totō, ma fugalaau ua faamatagofie ai le fogaeleele e nonofo ai. Talanoa i le matagofie o laau e ola i le mea e te nofo ai. Afai e fetaui ma lou eria, atonu e te manao e faaaoga le ata 1-22, Le Laau O Lo o Fuga Matagofie, ma le faamatalaga lea:

O Keli e i ai se laau e fiafia lava e taalo ai i lona paolo. I se tasi taeao, na fafagu ai o ia e lona tina ma fai atu o lo o i ai se mea e sau e vaai o le a matua ofo ai. O le laau lea e fiafia lava i ai Keli ua matua ufitia atoa i fuga papa’e e pei oni popikoni (popcorn). Sa fesili atu o ia pe faapefea ona oo nei popikoni i lona laau, ma sa faamatala atu i ai e lona tina le taua o le fuga mai.

Pese:

Faatutu i luga tamaiti ma usu le pese: “Popikoni “ (Tusi Pese a Tamaiti) ia faaaoga lima e fai ai taga e pei ona ta’ua i upu o le pese. Faamatala i tamaiti o le vaitaimi o le tautotogo, e i ai se laau (apricot) e fuga mai ai fugalaau papa’e e pei ni popikoni.

O le a na ou iloa, i lo’u vaai i fafo?
O sana o lo o pāpā mai i luga o le mago.
O le tautotogo, ou te ofo ai,
O fua o lo o fotu mai i luma o la’u vaai.
Ou te foai atu, ona fua i se uo moni,
Le fua o le popi koni, e manaia lona manogi.
E le se popi koni, ae foliga lava i ai
O sana o pāpā mai i le itu i gatai.

Faamatala o nisi fugalaau e ola i luga o laau, o nisi i luga o faapuloulou ma vao sosolo, a o nisi e oso a’e lava i le eleele. Tuu e talatalanoa tamaiti i fugalaau ua latou vaai i ai.

Pese:

E faapefea ona tatou faaaogaina fugalaau e faamatagofie ai lo tatou lalolagi? (Tatou te totoina ni togalaau, faia ni teufugalaau, fai ai o tatou sei po o le teuteuina ai foi o o tatou ofu.)
Aisea tatou te aveatu ai ni fugalaau i se tagata? (Mo ni sauniga faapitoa ma faafiafia ai tagata.)

E aoga laau totō ma laau tetele mo o tatou ola

Tala:

Faamatala atu e aoga laau tetele ma laau toto tatou te ola ai. Faaali atu le ata 1-22, O Le Laau O Lo o Fuga Matagofie, ma faamatala atu le tala e uiga i le tele o aoga eseese o se laau. Faaaoga manatu ia po o le talanoa foi e uiga i isi auala e faaaoga ai e tagata i lo outou eria laau.

Muamua, e faaaoga e manulele laau mo o latou moega. Latou te faia ma le faaeteete se faamoega, ona tautuufua ai lea o le manulele tina. (Faaali atu le ata 1-23, Se Faamoega ma Ni Manu Pepe.) Ina ua fofoa mai manulele pepe mai fua, e tuuina atu e le laau se aiga lelei mo latou. Na te puipuia mai i latou mai le vevela o le la, mai le timu, mai manu vaefa i le fogaeleele e faaono faatamaia i latou. E maua mai foi i le laau o fualaau mo le aiga o lo o i tafatafa ane. E taaalo ai tamaiti i le paolo o le laau ma nonoa ai se taupega i sona lala lapoa. A mamago ni vaega o le laau, ona tatuu lea i lalo e le aiga ma faaaoga mo fafie ma faamafanafana ai le fale.

Tala:

Aisea e taua ai laau ia te i tatou? (E maua mai ai meaai, fafie, paolo, ma se nofoaga e taaalo ai.)

Faaali atu ni mea mai lou aiga po o le potu aoga e gaosia mai i le laau, ma talanoa atu e uiga i le tele o aoga o le laau.

Tala:

O a nisi mea e te iloa e fai mai i le laau?

Faamatala atu tatou te faaaogaina foi laau totō i le tele o mea. O se tasi o mea aupito taua lava e maua mai i laau totō, o meaai.

Tala:

O a ituaiga laau totō e aina?

Afai o i ai ni ata o laau aina i au ata na aumai, ia faaali atu i le taimi nei.

Gaoioiga:

Talanoa ma tamaiti i fatu laau, fualaau aina mata, ma fualaau fai sua e ola i lo outou nuu. Faamatala atu o fatu laau, o le tele o taimi e fai mai ai le falaoa ma sirio (cereals). Fai i tamaiti taitoatasi e tau mai lana meaai e aupito fiafia lava i ai e fai mai i se laau. Fai i tamaiti e tofo i le fualaau aina mata, fualaau fai sua, po o le falaoa sa e aumaia. Faamatala e uiga i le laau po o le laau totō e sau ai.

Faamatala atu na faatonuina e le Tama Faalelagi Iesu e faia le mau laau totō eseese ma laau ina ia tatou maua meaai lelei.

Gaoioiga:

E faapefea ona tatou faafetai atu i le Tama Faalelagi mo a tatou meaai? (Ia tatou manatua e faafetai atu ia te Ia pe a faamanuia meaai ae tatou te le i aai.)

Molimau:

Tuuina atu lau molimau i le alofa o le Tama Faalelagi ma Iesu mo i tatou uma taitoatasi. Faamanatu i tamaiti ina ia latou manatua lena alofa i aso uma pe a latou vaai i laau mananaia, laau totō, ma fugalaau matagofie.

O Isi Gaoioiga e Faamauoa Ai

Filifili nisi o nei gaoioiga e faaaoga i le taimi o le lesona.

Aumai ni fatu (e pei o fatu o fugalaau, pi, po o saito) ma se ipu ua faatumu i palapala mo tamaiti taitoatasi e ave i le fale. Faasino i tamaiti le totoina o a latou fatu laau, ma faamanatu i ai e moomia lo latou faasusuina ma ia maua foi le malamalama o le la e ola ai a latou fatu laau.
Ia faataitai ia te oe tamaiti i le faiga o upu o le pese “O Tamai Fatu Laiti O Lo o Momoe Gapēpē” (Tusi Pese a Tamaiti). Ona faatonu loa lea o tamaiti e faapea o latou o tama’i fatu ia ua ala mai ma falōlō a o e usuina pe toe tauloto foi upu.
Oti ni petale (petals), lau, ma au mai ni pepa lanu ma faapipii e nisi tamaiti i luga o se isi pepa ini foliga o fugalaau. Tusi ai le igoa: “Ou te matua faafetai mo fugalaau matagofie.”
Aumai se fualaau aina mata po o se fualaau fai sua e i ai ni fatu i totonu. Fai i tamaiti o lo o i ai se mea e ofo ai i totonu. Tipi lua le fualaau ina ia vaai tamaiti i fatu. Faamatala atu a faapea e toto fatu laau ma maua le vai ma le malamalama o le la, o le a ola ma toe maua mai ai isi mau fualaau aina.
Ave tamaiti e savavali i fafo ma vaavaai i ituaiga laau eseese. Afai e leaga le tau, atonu e mafai ona autilo tamaiti i fafo i faamalama ma auauai e faamatala mai po o a laau sa latou vaaia. Afai e talafeagai, faamatala le aafiaga o laau pe a sui le vaitau.

Gaoioiga Faaopoopo mo Tamaiti Laiti

Faaali atu le ata 1-22, Laau O Lo o Fuga Matagofie. Faamatala i tamaiti sa poloaiina e le Tama Faalelagi Iesu Keriso ia faia laau totō ma laau tetele (vaai Kenese 1:11–13). Faamatala o laau e aumai ai fafie ma fualaau aina. O laau totō e aumai ai fualaau aina ma fualaau fai sua.
Aumai se laau totō po o se vaega e pei o se fugalaau po o ni lau mo tamaiti e vaai i ai, tagotago i ai, pe sogisogi foi i ai. Ia maua e tamaiti taitoatasi se avanoa e pa’i pe uu ai le laau. Faailoa i tamaiti lona lanu, manogi, po o lona matagofie. Faaali atu foi lou agaga faafetai mo laau totō, fugalaau, ma laau.
Faitau faatauloto le fuaiupu lea ma fai faataitai taga. Ona fai faatasi ai lea ma tamaiti taga a o e toe taulotoina upu.

Ou te sua

Ou te sua ma sua ma sua (fai taga eli),

Ona ou totō ai lea o ni fatu se lua (punou i lalo foliga o toto ni fatu),

Ou te lako ma lako ma lako (fai taga lafo i luma ma salu mai agai i tua)

Ona ou vele lea o vao ma tuu i lalo(faatu i lalo ma fai taga o le veleina o le vao)

Manaia le mafanafana ma le susulu mai o le la (faia se lio i lima)

Ua toulu mai foi le timu, ma (aumai i lalo lima ma faatetetete tamatamai lima)

I o’u lava mata ua ou vaai atu,

Ua amata ona tuputupu ae la’u fatu laau (faaoso mai tamatamai lima o le lima agavale i le va o tamatamai lima o le lima taumatau).