Gospel blong Jisas Kraes

God i bin sendem Pikinini blong Hem we Hem i lavem tumas, Jisas Kraes, i kam long wol ia mekem se evri pikinini blong God bae oli gat janis blong kasem eksperiens long saed blong glad mo pis long wol ia mo laef we i no gat en long wol we i stap kam wetem ol famli blong olgeta. Blong ademap, tru long Jisas Kraes bae evri pikinini blong God oli laef bakegen taem we bodi mo spirit blong olgeta oli kam wan bakegen long taem blong Laef Bakegen long Ded (luk long Doktrin mo Ol Kavenan 76:40–42).

Olsem wan risal blong foldaon blong Adam mo Iv, ded bae kasem evri pipol. Mo from se evri pipol oli bin mekem ol mistek mo oli sin, bae oli no save gobak laef wetem God from se “samting we i no klin we i save stap” wetem God (1 Nifae 10:21).

Be tru long sore, mo lav mo sore blong Sevya nomo bae yumi save kam klin long sin, blong yumi save laef wetem Papa long Heven. Blong stap kam klin long sin i minim blong kam oraet long saed blong spirit 3 Nifae 9:13; 18:32).

From sakrifaes blong Kraes, we oli singaotem Atonmen blong Kraes, evri pipol bae i kambak stap wetem Lod blong oli jajem olgeta folem ol wok mo ol tingting blong olgeta (luk long 2 Nifae 9:10–16; Hileman 14:15–18; 3 Nifae 27:14–22; Doktrin mo Ol Kavenan 137:9) mo bae oli laef bakegen afta long ded. Bae oli jajem yumi folem ol loa blong jastis mo sore.

Jastis i wan loa we i no save jenis we i mekem se i gat samting i kamaot folem wan aksen—ol blesing folem fasin blong obei long ol komanmen blong God mo panismen from fasin blong no obei. Yumi evriwan i mekem sin. Sin i mekem yumi no klin, mo i no gat wan samting we i no klin i save laef wetem God (luk long 1 Nifae 10:21; 3 Nifae 27:19; Moses 6:57).

Sevya i bin mekem wanem we jastis i wantem blong olgeta we oli sakem ol sin blong olgeta mo oli mekem evri samting blong obei evri komanmen blong Hem taem Hem i stanap long ples blong yumi mo Hem i bin safa from ol sin blong yumi. Hemia oli singaotem Atonmen. From aksen ia we Hem i mekem be i no blong Hemwan nomo, Kraes i save toktok long Papa long bihaf blong yumi. Papa long Heven i save yusum sore, holemtaet panismen long yumi, mo welkamem yumi blong stap wetem Hem. Papa blong yumi long Heven i soem sore taem Hem i fogivim yumi long ol sin blong yumi mo i helpem yumi blong gobak stap wetem Hem.

Be, Jisas i no bin tekemaot wok we i blong yumi wanwan. Hem i fogivim ol sin blong yumi taem yumi akseptem Hem, mo sakem sin, mo obei long ol komanmen blong Hem. Tru long Atonmen mo laef folem gospel, yumi kam klin inaf blong save stap wetem Papa blong yumi long Heven blong oltaem. Yumi mas soem se yumi akseptem Kraes mo yumi gat fet long Hem taem yumi obei ol komanmen blong Hem mo yumi obei long ol fas prinsipol mo odinens blong gospel. Nifae i tokbaot ol prinsipol mo odinens ia olsem “doktrin blong Kraes” (2 Nifae 31:2–32:6).

Buk blong Momon i tekem gospel blong Jisas Kraes we i fulwan (luk long Doktrin mo Ol Kavenan 42:12). Insaed long Buk blong Momon i tokbaot klia gospel blong Jisas Kraes we samtaem oli tokbaot olsem doktrin blong Kraes, we oli stap long eni ples insaed long skripja.

Folem wanem we i stap insaed long Buk blong Momon abaot gospel blong Jisas Kraes, i tekem tu, faef ki poen: (1) fet long Lod Jisas Kraes; (2) fasin blong sakem sin tru long Atonmen blong Jisas Kraes; (3) baptaes long nem blong Jisas Kraes andanit long wota ; (4) presen ia we i Tabu Spirit; mo (5) stanap strong kasem en (luk long 2 Nifae 31; 3 Nifae 11; 27).

Blong ademap moa, Buk blong Momon i stap tijim yumi wanem yumi mas bilivim abaot Kraes blong save gat fet long Hem (luk long 3 Nifae 27:13–15).

Gospel blong Jisas Kraes i stat wetem fet long Lod Jisas Kraes. Blong gat fet long Kraes i tekem tu blong gat wan strong bilif se Hem i Wan Pikinini ia Nomo blong God mo Hem i Sevya mo Ridima blong wol. Hemia i blong biliv se i no gat “fasin blong sevem man we i kam long eni narafala man: God i no givim nem blong wan narafala man nating long yumi, we hem i stap yusum blong sevem yumi” (Ol Wok 4:12). I gat ol narafala samting we yumi nid blong biliv long hem sapos yumi wantem blong gat fet long Kraes (luk long 3 Nifae 27:13–15).

Yumi luksave se yumi save gobak stap laef wetem Papa long Heven taem yumi dipen nomo long gladhat mo sore blong Pikinini blong Hem. Taem yumi gat fet long Kraes, yumi akseptem mo yusum Atonmen mo ol tijing blong Hem. Yumi trastem Hem mo wanem we Hem i talem. Yumi save se Hem i gat paoa blong kipim ol promes blong Hem. Yumi save developem fet long Kraes tru long fasin blong putum tingting i stap daon mo mekem tingting blong Hem mo obei ol komanmen blong Hem. Papa long Heven i blesem olgeta we oli gat fet blong obei long Pikinini blong Hem.

Fet long Kraes i lidim yumi long aksen. Hem i lidim yumi blong yumi sakem sin long tru fasin mo blong oltaem. Blong gat fet i mekem yumi traehad evriwan blong yumi save lanem abaot Sevya mo blong yumi kam moa olsem Sevya blong yumi “mo wetem wan fet long hem we i strong mo i no seksek, mo stap hang fulwan long ol gud wok blong hem, we i gat olgeta paoa blong sevem man” (2 Nifae 31:19). Yumi wantem blong lanem stamba tingting blong Hem mo obei long ol komanmen blong Hem. Nomata se yumi stap gohed blong mekem ol rong samting, yumi stap soem lav blong yumi we yumi gat long Hem taem yumi stap traehad blong obei ol komanmen blong Hem mo yumi stap longwe long sin.

Yumi biliv long Kraes, mo yumi biliv se Hem i wantem yumi blong obei evri komanmen blong Hem. Yumi soem fet blong yumi taem yumi stap obei long Hem. Yumi prea wetem fet from paoa blong winim temtesen. Taem yumi stap laef folem wan komanmen, yumi stap lanem se hem i tru tru long eksperiens (luk long Jon 7:17). Yumi stap gro tu long fet taem yumi stap harem tok blong God mo taem yumi ridim tok blong God (luk long Rom 10:17; Hileman 15:7–8).

Taem yumi obei long God, Hem i blesem yumi. Hem i givim yumi paoa blong mitim ol jalenj blong laef. Hem i helpem yumi blong jenisim ol tingting blong hat blong yumi. Tru long fet blong yumi long Jisas Kraes, Hem i save hilim yumi, tugeta, long saed blong bodi mo long spirit.

Fasin blong Sakem Sin tru long Atonmen blong Jisas Kraes i wan narafala impoten prinsipol blong gospel blong Jisas Kraes. Fet blong yumi long Kraes mo lav we yumi gat long Hem i lidim yumi blong sakem sin, o blong yumi jenisim ol tingting, ol bilif, o fasin we oli no stret wetem tingting blong Hem. Fasin blong sakem sin, hem i minim tu blong lukluk long God, lukluk long yumiwan, mo lukluk long wol long wan niufala wei. Taem yumi sakem sin, yumi filim sore mo luk long God, mo gobak long Hem wetem ful hat. Yumi stop blong mekem ol samting we oli rong mo yumi gohed blong mekem ol samting we oli raet. Blong tekem laef blong yumi i kam stret wetem tingting blong God tru long fasin blong sakem sin mo fet long Jisas Kraes, i wan stamba tingting insaed long laef blong yumi. Yumi save gobak laef wetem God Papa tru long sore nomo mo gladhat blong Kraes, mo yumi stap kasem sore blong Kraes sapos yumi sakem sin.

Blong sakem sin, yumi mas luksave sin blong yumi, mo filim sem from, o harem nogud olsem God i harem nogud from. Yumi talemaot ol sin blong yumi long God. Yumi talemaot tu ol sin blong yumi we oli bigwan long ol Jos lida we oli gat raet blong helpem yumi blong sakem sin wetem wan tru hat. Yumi askem long God tru long prea blong Hem i fogivim yumi. Yumi save mekem evri samting blong stretem ol problem we ol aksen blong yumi oli bin save mekem; yumi singaotem hemia, se blong putumbak o givimbak, o stretem samting. Taem yumi sakem sin, yumi lukluk yumiwan mo wol long defren wei. Taem yumi jenis, yumi luksave se yumi ol pikinini blong God mo yumi nomo nid blong gohed blong mekem ol semfala mistek bakegen mo bakegen. Sapos yumi sakem sin, yumi tanem baksaed long ol sin blong yumi, mo yumi nomo mekem olgeta bakegen. Yumi holemtaet yumi, yumi nomo wantem blong mekem sin. Yumi wantem blong folem God moa, mo tingting ia i kam strong moa mo i bigwan moa.

Tru fasin blong sakem sin i tekem plante risal i kam. Yumi filim fogivnes blong God, mo pis blong Hem insaed long laef blong yumi. Sem blong yumi mo harem nogud blong yumi i lus evriwan. Bae yumi filim paoa blong Tabu Spirit i fulap moa long yumi. Mo taem bae yumi aot long laef ia, bambae yumi rere moa blong laef wetem Papa blong yumi long Heven mo wetem Pikinini blong Hem.

Iven afta we yumi akseptem Kraes mo yumi sakem ol sin blong yumi, bae yumi save foldaon bakegen mo mekem sin bakegen Yumi mas gohed blong stretem ol fasin blong brekem loa, taem yumi tingbaot se yumi “save mekem evri samting long paoa blong Kraes ya we i stap mekem [yumi] strong” (Filipae 4:13). Blong ademap long hemia, yumi mas gohed blong kam antap oltaem—developem ol fasin olsem hemia blong Kraes, blong gro i kam antap long save, mo blong givim seves long fasin we i wok gud moa. Taem yumi stap lanem moa abaot wanem we Sevya i wantem yumi blong mekem, bae yumi wantem blong soem lav blong yumi long Hem taem yumi stap obei long Hem. Nao, taem yumi sakem sin evri dei, bae yumi faenem se ol laef blong yumi i jenis mo bae i kam antap moa. Ol hat blong yumi mo ol fasin blong yumi bae i kam moa olsem hemia blong Kraes. Yumi kam blong filim bigfala glad taem yumi sakem sin evri dei.

Fet long Jisas Kraes mo fasin blong sakem sin i mekem yumi rere blong kasem ol odinens blong baptaes mo konfemesen. Wan odinens i wan tabu seremoni we i soem se yumi mekem wan kavenan wetem God.

Oltaem, God i wantem se bae ol pikinini blong Hem oli mas mekem ol kavenan. Wan kavenan i wan tabu agrimen bitwin God mo man we i fasem tufala. God i promesem blong blesem yumi, mo yumi promes blong obei long Hem. God i putum ol kondisen blong ol kavenan blong gospel, we yumi gat raet blong akseptem o sakemaot. Taem yumi kipim ol kavenan, hem i tekem ol blesing i kam long laef ia mo long taem blong kam olsem God long laef we bae i kam.

Ol kavenan i putum yumi anda long wan strong wok we yumi mas mekem blong givim ona long ol komitmen blong yumi long God. Yumi mas wantem blong stap klin inaf blong kasem ol kavenan we God i givim long yumi mo afta, traehad blong kipim olgeta. Ol kavenan blong yumi oli rimaenem yumi blong sakem sin evri dei laef blong yumi, mo stap dipen long Jisas Kraes. Blong stap lavem Lod, stap obei ol komanmen blong Hem, mo stap lavem mo givim seves long ol narafala man yumi kasem mo gohed blong stap klin long ol sin blong yumi tru long “Jisas Kraes ya, hem i lavem yumi tumas, mo long ded blong hem, we blad blong hem i ron, hem i tekemaot ol sin blong yumi” (Revelesen 1:5).

Yumi mekem ol kavenan tru long ol tabu odinens, olsem baptaes. Ol odinens ia oli mekem wetem prishud atoriti tru long nem blong Jisas Kraes. Tru long odinens blong baptaes, olsem wan eksampol, yumi mekem kavenan blong tekem long yumiwan nem blong Jisas Kraes, blong tingbaot Hem oltaem, mo blong obei ol komanmen blong Hem. Taem yumi mekem pat blong yumi blong kavenan ia, God i promesem se bae yumi gat oltaem Tabu Spirit wetem yumi, yumi save kam klin long ol sin blong yumi, mo yumi save bon bakegen.

Tru long ol tabu odinens, olsem baptaes mo konfemesen, yumi stap lanem abaot paoa blong God mo yumi gat eksperiens long hem (luk long Doktrin mo Ol Kavenan 84:20). Jisas i bin tijim se yumi mas baptaes andanit long wota blong kam klin, o blong kasem fogivnes, blong ol sin blong yumi. Baptaes i wan odinens blong sevem man we wan i nid blong kasem. I no gat wan i save go insaed long kingdom blong God sapos hem i no baptaes. Kraes i bin givim eksampol long yumi taem Hem i baptaes.

Baptaes andanit long wota i wan saen blong taem we Sevya i ded, oli berem Hem mo taem we Hem i Laef Bakegen long Ded. Long wan wei we i semmak, baptaes ia i ripresentem en blong olfala laef blong yumi long sin, mo wan komitmen blong laef long wan niu laef olsem wan disaepol blong Kraes. Sevya i bin tijim se baptaes i blong bon bakegen. Taem yumi baptaes, yumi statem rod blong yumi bon bakegen mo yumi kam ol spirit boe mo gel blong Kraes (luk long Mosaea 5:7–8; Rom 8:14–17).

Yumi mas baptaes blong kam ol memba blong Jos ia we i bin kambak, Jos blong Jisas Kraes blong ol Lata-dei Sent, mo afta go insaed long kingdom blong heven. Odinens ia i wan loa blong God mo wan we i gat atoriti blong Hem i mas mekem mo long nem blong Hem (luk long Matiu 28:19–20). Wan bisop o wan misin presiden i mas givim raet long wan we i holem prishud blong mekem wan baptaes o wan konfemesen.

Ol smol pikinini oli no nid blong kasem baptaes mo oli stap sef tru long gladhat blong Jisas Kraes (luk long Moronae 8:4–24). Oli no mas mekem baptaes blong olgeta kasem taem we oli kasem yia we oli save gud mo nogud, we hem i eit yia (luk long Doktrin mo Ol Kavenan 68:27).

Bifo baptaes, yumi soem se yumi wantem mekem kavenan blong obei evri komanmen kasem en blong ol laef blong yumi. Afta long baptaes, yumi soem fet blong yumi taem yumi stap kipim kavenan blong yumi. Yumi stap riniu tu evri wik kavenan we yumi mekem taem yumi tekem sakramen. Blong tekem sakramen evri wik, hem i wan komanmen. Hem i helpem yumi blong stap klin inaf blong gat Spirit i stap wetem yumi oltaem. Hem i wan samting we i stap mekem yumi tingbaot evri kavenan blong yumi evri wik. Jisas Kraes i givim odinens ia long Ol Aposol blong Hem stret bifo long Atonmen blong Hem. Hem i bin putumbak tru long Profet Josef Smit. Sevya i bin givim komanmen se ol man we oli holem prishud oli mas givimaot sakramen blong tingbaot bodi mo blad blong Hem, we i bin ron from yumi. Taem yumi klin inaf mo yumi tekem sakramen, yumi promes blong tingbaot sakrifaes blong Hem oltaem, blong yumi riniu ol promes blong yumi, mo blong yumi kasem bakegen promes ia olsem we bae i niu, se bae Spirit i stap wetem yumi oltaem.

Jisas i bin tijim se yumi mas baptaes long wota mo tu long Spirit. Afta long baptaes blong wota i mas gat baptaes blong Spirit, sapos no, baptaes i no komplit (luk long 2 Nifae 31:13–14). Taem nomo yumi kasem baptaes mo presen we i Tabu Spirit, yumi save kam klin long ol sin blong yumi mo bon bakegen fulwan long spirit. Afta, yumi statem wan niufala laef long saed blong spirit olsem ol disaepol blong Kraes.

Tabu Spirit i gat paoa blong mekem yumi kam tabu mo kam klin. Tru long presin ia mo paoa blong Tabu Spirit, yumi save kasem mo gohed blong stap klin tru fet long Kraes, sakem sin, mo folem tingting blong God mo obei long ol komanmen blong Hem.

Olgeta we oli kasem presen ia we i Tabu Spirit mo oli stap gohed blong stap klin oli save gohed blong stap glad long Tabu Spirit truaot long ol laef blong olgeta. Tabu Spirit i save mekem yumi kam klin evriwan. Tabu Spirit i testifae abaot Kraes mo i stap helpem yumi blong yumi luksave trutok. Hem i givim paoa blong spirit mo Hem i helpem yumi blong mekem wanem we hem i stret. Hem i mekem yumi haremgud long taem blong hadtaem o taem yumi harem nogud. Hem i givim woning long yumi long ol denja long saed blong spirit mo long saed blong bodi. Presen ia we i Tabu Spirit i givim paoa we yumi nidim blong tij mo lan. Presen we i Tabu Spirit i wan long ol presen we i moa hae we i kam long Papa long Heven. Tru long paoa blong Tabu Spirit, yumi save filim lav blong God mo wei we Hem i lidim yumi. Presen ia talem finis glad we i no gat en mo wan promes blong laef we i no save finis mo fasin blong kam olsem wan god.

Afta we wan i baptaes long wota, wan o moa long wan man we i holem prishud i putum han antap long hed blong hem, mo konfemem hem i kam wan memba blong Jos blong Jisas Kraes blong ol Lata-dei Sent. Afta oli givim presen we i Tabu Spirit.

Prishud atoriti we yumi nidim blong mekem odinens ia, mo we i bin lus plante senturi we i bin pas finis tru long apostasi, i bin kambak tru long Profet Josef Smit. . Atoriti ia i mekem Jos i defren long ol narafala relijin long wol. Folem tok blong Lod, hem i wan tru Jos nomo we i laef long fes blong ful wol. Taem wan i kam memba insaed long Jos Ia blong Jisas Kraes blong Ol Lata-dei Sent nomo, hem i save kasem presen ia we i Tabu Spirit, kasem raet blong gat Tabu Spirit i stastap oltaem. Atoriti ia i mekem Jos Ia blong Jisas Kraes blong Ol Lata-dei Sent i defren long ol narafala relijin long wol. Folem tok blong Lod, “hem i wan tru Jos nomo we i laef long fes blong ful wol.” (Doktrin mo Ol Kavenan 1:30).

Gospel blong Jisas Kraes i tekem tu fasin blong kasem mo kam antap long fet blong yumi long Jisas Kraes, sakem sin blong yumi tru long Atonmen blong Jisas Kraes, kasem baptaes andanit long wota tru long wan wokman we i gat atoriti blong Lod long nem blong Jisas Kraes, kasem baptaes long faea mo Tabu Spirit tru long fasin blong putum han antap long hed, mo stanap strong kasem en.

Blong stanap strong kasem en, i no minim blong holem kasem taem yumi ded. Blong stanap strong kasem en i tekem tu fasin blong kasem ol fasin olsem hemia blong Kraes tru long Atonmen blong Sevya. Blong stanap strong kasem en i tekem tu fasin blong folem tingting blong papa mo fasin blong obei long ol komanmen blong Hem, fasin blong livim kaekae, prea, skripja stadi, kipim Sabat dei i tabu, sakem sin, mo mekem mo kipim ol tabu kavenan blong tempol.

Taem yumi wokbaot long smol mo stret rod wetem fet blong yumi long Jisas Kraes, fasin blong sakem sin, mo ol odinens blong baptaes mo konfemesen, yumi mas mekem evri samting blong stanap long rod ia. Yumi mekem olsem taem yumi gohed blong stap yusum fet blong yumi long Jisas Kraes, stap sakem sin, stap mekem ol komitmen, mo stap folem Spirit.

Taem yumi kasem fogivnes blong ol sin blong yumi, yumi mas traem evri dei blong stap fri long ol sin blong yumi blong yumi save oltaem gat Tabu Spirit i stap wetem yumi. Long kavenan blong baptaes, yumi promes long Papa blong yumi long Heven se bae yumi obei long ol komanmen blong Hem long ful laef blong yumi. Sapos yumi foldaon, yumi mas sakem sin blong mekem se yumi holemtaet ol blesing blong kavenan ia. Yumi promes blong mekem ol gudfala wok, sevem ol narawan, mo folem eksampol blong Sevya. Long skripja, komitmen ia blong mekem long ful laef, oli singaotem “blong stap strong kasem en.”

Taem yumi folem rod blong gospel, yumi kam kolosap moa long God, yumi faet agensem temtesen mo sin, mo yumi stap glad moa long presen we i Tabu Spirit. Taem yumi stap folem rod ia wetem fasin blong gat longfala tingting, wetem fet, mo stanap strong oltaem long hem truaot long ol laef blong yumi, bae yumi save kasem laef we i no save finis (luk long pej 53 blong kasem moa infomesen abaot wanem i defren bitwin fasin blong sevem man mo fasin blong kam olsem wan god).

Fet long Kraes: fasin blong sakem sin, stap mekem, riniu, mo kipim ol kavenan; mo kam klin tru long Spirit i kam olsem wan paten blong laef. Ol aksen blong yumi long evri dei laef oli folem ol prinsipol ia. Pis mo glad i kam long wei ia, mo yumi stap gro sloslo long ol fasin blong Kraes. Nao, afta, taem yumi stap folem rod ia mo “wokbaot fored wetem strong bilif long Kraes … mo stap strong kasem en,” yumi kasem promes ia se “Bae yufala i kasem laef we i no save finis” mo fasin blong kam olsem wan god (2 Nifae 31:20; luk tu long Doktrin mo Ol Kavenan 132:17).

Seksen ia i gat ol aedia blong yu yusum blong yu stap rere mo blong yu stap tijim lesen ia. Wetem prea, folem Spirit taem yu stap mekem tingting blong yu blong olsem wanem bae yu yusum ol aedia ia. Ademap ol aedia ia we yu jusum long plan blong lesen blong yu. Oltaem gat long tingting blong yu se ol aedia ia oli ol tingting nomo—oli no ol samting we yu mas yusum evriwan—blong help blong lukluk long ol nid blong olgeta we yu stap tijim.