“Lesen 2: Plan Ia blong Fasin blong Sevem Man,” Prijim Gospel blong Mi: Wan Gaed long Misinari Seves (2018), 47–59
“Lesen 2,” Prijim Gospel blong Mi, 47–59
Lesen 2
Plan Ia blong Fasin blong Sevem Man
Stamba Tingting blong Yu
Taem yu tij, helpem ol pipol blong rere from baptaes mo Konfemesen. Tingting long ol samting we wan i nidim blong gat blong baptaes we oli tijim insaed long Doktrin mo Ol Kavenan 20:37 mo we i go wetem ol intaviu kwestin blong baptaes. Wetem prea, jusum wanem blong tijim mo wijwan long ol invitesen bae yu talem i go long wan, folem ol nid, intres, o situesen blong hem. Tingting plante long ol kwestin mo level blong andastaning blong olgeta we yu tijim.
Baptaes Intaviu Kwestin
-
?Yu yu biliv se God i Papa blong yumi we I No Save Finis?
-
?Yu yu biliv se Jisas Kraes i Pikinini blong God mo Hem i Sevya mo i Ridima blong wol ia?
-
?Yu glad mo wantem blong kipim Sabat dei i tabu, mo tu, tekpat long sakramen mo givim seves long ol narafala memba?
Ol Invitesen
-
?Bae yu save prea blong save se wanem we mifala i bin tijim i tru?
-
?Bae yu save sakem ol sin blong yu?
-
?Bae yu kam long Jos wetem mifala long Sandei ia?
-
?Bae yu ridim Buk blong Momon mo askem God tru long prea blong save se hem i toktok blong God?
-
?Bae yu save folem eksampol blong Sevya mo kasem baptaes long (deit)?
-
Bae mifala save putum wan taem blong nekis visit blong mifala?
-
Ol komanmen long lesen 4 we yu jusum blong i stap tu.
Helpem Ol Narawan blong Oli Lanem abaot Jisas Kraes
Ol misinari oli mas testifae abaot Jisas Kraes mo invaetem evriwan blong kam long Hem blong oli save sef mo kasem bigfala hapines, kamfot, glad mo pis long laef ia. Blong givim ol stret toksave abaot Sevya i impoten long olgeta we oli save smol nomo o nating abaot Hem. Buk blong Momon: Wan Narafala Testeman blong Jisas Kraes i blong helpem evri pipol blong save se “Jisas Hem i Kraes, … we i soemaot Hemwan long evri kantri” (taetel pej blong Buk blong Momon)” (taetol pej blong Buk blong Momon). Wan long ol gudfala wei blong tijim mo testifae abaot Sevya i blong rid tugeta long Buk blong Momon. Yu save ridim tu ol toktok long ol narafala tabu standet wok blong help.
Tingting hevi long ol tingting we oli stap daon ia Aktiviti ia oli save mekem tu olsem pat blong lesen ia o ol narafala lesen o olsem wan lesen blong hemwan. Taem i help, ripitim aktiviti ia plante taem bifo, mo afta long baptaes mo konfemesen.
|
Taetol mo fas toktok |
Mekem klia stamba tingting blong buk ia. |
|
Lihae mo Nifae i testifae abaot Sevya. | |
|
Nifae i talemaot bakegen ol profesi blong ministri mo Atonmen blong Sevya. | |
|
Lihae i testifae abaot Sevya olsem Ridima. | |
|
Jekob i testifae abaot Atonmen blong Jisas Kraes. | |
|
Nifae i tijim doktrin blong Kraes. | |
|
Inos kasem ol eksperiens blong paoa blong Atonmen blong Sevya. | |
|
King Benjamin i stap tij abaot Kraes. | |
|
Abinadae i givim laef blong hem blong stap testifae abaot Jisas Kraes. | |
|
Alma i testifae abaot Sevya. | |
|
Ol Man blong Leman oli kasem testemoni abaot Jisas Kraes. | |
|
Amulek i testifae abaot Atonmen. | |
|
Alma i kasem ol eksperiens blong paoa blong Atonmen blong Jisas Kraes. | |
|
Alma i testifae abaot Laef Bakegen long Ded mo Atonmen blong Jisas Kraes. | |
|
Nifae mo Lihae tufala i stap olsem ol tul long ol han blong God blong stap olsem ol witnes blong Sevya. | |
|
Sevya i invaetem ol pipol blong kam long Hem. | |
|
Sevya i tijim Ol Man Nifae abaot Papa mo abaot doktrin blong Hem. | |
|
Sevya i stap tij abaot gospel blong Hem. | |
|
Brata blong Jared i luk Sevya. | |
|
Ita mo Moronae i testifae abaot Sevya mo paoa blong Atonmen blong Hem. | |
|
Moronae i tijim bigfala lav blong Kraes mo Atonmen blong Hem. | |
|
Momon i tijim evriwan blong kam long Kraes mo kam stret gud evriwan tru long Hem. | |
|
Ol Profet mo ol aposol oli testifae abaot Sevya. |
Laef bifo laef long wol ia: Stamba tingting mo Plan blong God from Yumi
Plante pipol oli stap askem olgetawan se, “?Yumi kam wea? ?From wanem yumi stap long ples ia? ?Yumi stap go wea?” Plan Ia blong fasin blong sevem man i givim ol ansa long yumi long ol kwestin ia.
God i Papa blong spirit blong yumi. Yumi ol stret pikinini blong Hem, mo Hem i lavem yumi. Yumi bin laef olsem ol spirit pikinini blong Papa blong yumi long Heven bifo yumi bin bon i kam long wol ia. Be, yumi no bin olsem Papa blong yumi long Heven, mo yumi no save kam olsem Hem mo stap glad long ol blesing we Hem i stap gat sapos yumi no go tru long laef long wol ia wetem wan bodi blong mit mo bun.
“Ful stamba tingting blong Papa blong yumi long Heven—wok blong Hem mo glori blong Hem—i blong letem wanwan long yumi i kasem evri blesing blong Hem. Hem i bin givim wan stret plan blong mekem stamba tingting blong Hem i kamtru. Yumi bin andastanem mo akseptem plan ia bifo yumi kam long wol ia. Long ol skripja, oli singaotem plan blong God, wan plan blong sore, plan blong stap hapi, plan blong pemaot man, mo plan ia blong fasin blong sevem man.
Jisas Kraes i stamba blong plan blong God. Tru long Atonmen blong Hem, Jisas Kraes i bin mekem stamba tingting blong Papa blong Hem i kamtru, mo i bin mekem i posibol blong wanwan long yumi we i glad blong kasem wan bodi we i nomo save ded mo gat laef we i no save finis. Setan, o devel, i wan enemi blong plan blong God
Fridom blong mekem joes, o fasin blong save jusum samting, i wan long ol bigfala presen we God i givim long ol Pikinini blong Hem. Blong yumi progres long taem we i no save finis i dipen long olsem wanem yumi stap yusum presen ia. Yumi mas jusum blong folem Jisas Kraes o blong folem Setan.
Bodi blong yumi i seperet long God long taem blong laef blong yumi long wol ia, be Hem i wantem blong evriwan blong ol pikinini blong Hem oli mas faenem pis long laef ia mo wan ful glad wetem Hem afta long laef ia. Hem i wantem yumi blong yumi kam olsem Hem.
Stadi long Ol Skripja
Ol Pikinini blong God
-
Ol Wok 17:29
-
Hibrus 12:9
Stamba Tingting blong God
-
Jon 17:3
Laef Bifo Laef long Wol Ia
-
Jeremaea 1:5
-
Topical Guide, “Man, Antemortal Existence of”
Kriesen
Folem ol toktok blong Papa, Jisas Kraes i bin krietem wol ia olsem wan ples blong yumi laef long hem mo kasem eksperiens. Blong save progres mo kam olsem God, wanwan long yumi i mas kasem wan bodi mo stap long wol ia blong wan smoltaem blong probesen. Taem yumi stap long wol ia, yumi stap aot long ples we God i stap long hem. Yumi no tingbaot laef blong yumi bifo laef ia long wol. Yumi mas wokbaot wetem fet be i no wetem ae blong yumi nomo.
Stadi long Ol Skripja
Fridom blong Mekem Joes mo Foldaon blong Adam mo Iv long Sin
Adam mo Iv tufala i fas pikinini blong God blong kam long wol ia. God i bin krietem Adam mo Iv mo i bin putum tufala insaed long Garen blong Iden. Oli bin krietem Adam mo Iv i semmak olsem God, wetem ol bodi blong mit mo bun. Taem Adam mo Iv tufala i bin stap insaed long Garen blong Iden, tufala i bin stap yet wetem God mo tufala i bin save laef long ples ia blong oltaem. Tufala i bin laef long wei we tufala i no save samting, mo God i bin stap lukluk long ol nid blong tufala.
Long Garen blong Iden, God i bin givim fridom blong jus long Adam mo Iv. Hem i bin givim komanmen long tufala blong tufala i no kakae tabu frut, o frut blong tri blong save gud mo nogud. Sapos tufala i obei long komanmen ia i minim se tufala i save stap nomo insaed long Garen blong Iden, be tufala i no save progres from se tufala bae i no save fesem samting we i agensem tufala long wol ia. Bae tufala i no save se wanem ia glad, from se tufala i no bin go tru long hadtaem mo harem nogud.
Setan i bin temtem Adam mo Iv blong tufala i kakae tabu frut ia, mo tufala i bin jusum blong mekem olsem. Hemia i pat blong plan blong God. From joes ia, oli bin sakemaot tufala aotsaed long garen mo aot long ples we God i bin stap long hem. Taem ia, oli singaotem Foldaon long Sin. Taem man i seperet long ples we God i stap long hem, hemia i ded long saed blong spirit. Adam mo Iv tufala i save ded—tufala i gat wan bodi we i save ded, o taem bodi i seperet long spirit. Naoia tufala i save fesem ol sik mo eni kaen safaring. Tufala i bin gat fridom blong mekem joes o tufala i bin save jusum gud o nogud. Hemia i bin mekem i posibol long tufala blong tufala i save lanem samting mo progres. Hem i mekem tu i posibol blong tufala i save mekem ol rong joes mo blong sin. Antap long hemia, tufala i save gat ol pikinini, blong mekem se haf blong ol spirit pikinini blong God i save kam long wol ia, kasem ol bodi blong mit mo bun mo oli go tru long ol tes. Long wei ia nomo, ol pikinini blong God oli save progres mo kam olsem Hem.
Tij abaot Foldaon blong Adam mo Iv long Sin
Long fastaem we bae yu tijim doktrin ia, yu no tijim evri samting we yu save abaot hemia, eksplenem long simpol toktok nomo se God i bin jusum tu pikinini blong Hem, Adam mo Iv, blong kam olsem ol fas papa mo mama blong wol ia. Afta we tufala i no bin folem toktok blong God, tufala tugeta i bin sin mo tufala i save ded. Be wetem paoa blong tufala nomo, tufala i nomo save gobak stap wetem Papa long Heven. Lod i bin toktok long Adam mo i bin tijim hem long saed blong plan ia blong sevem man mo plan blong pemaot man tru long Lod Jisas Kraes. Taem oli folem plan ia, Adam mo famli blong hem i save gat glad long laef ia mo gobak stap laef wetem God (luk long Alma 18:36; 22:12–14).
Stadi long Ol Skripja
Insaed long Garen
-
Jenesis 1:26–31
-
Jenesis 2:15–17
Foldaon blong Adam mo Iv long Sin
-
Jenesis 3
Laef blong Yumi long Wol ia
Laef long wol i wan janis mo wan blesing. Stamba tingting long laef ia i blong gat glad mo stap rere blong gobak stap wetem God Long laef ia, yumi laef long wan wei we yumi save ded long saed blong bodi mo spirit. God i gat wan stret, bodi blong mit mo bun, we i gat glori mo i no save ded. Blong kam olsem God mo gobak stap wetem Hem, yumi tu, yumi mas gat wan stret bodi blong mit mo bun we i no save ded. Be, from se Adam mo Iv i foldaon long sin, evri man long wol ia i gat wan bodi blong wol ia we i no stret evriwan, we bae i ded. Sapos hem i no Sevya Jisas Kraes, ded bae i endem evri hop blong save laef long fiuja wetem Papa long Heven.
Wetem ded blong bodi, sin i wan bigfala samting we i save mekem se yumi no save kam olsem Papa blong yumi long Heven mo yumi nomo save gobak stap wetem Hem. Long taem blong yumi long wol ia, yumi oltaem stap lukluk long ol temtesen, yumi brekem ol komanmen blong God, mo yumi sin. Long taem blong laef blong yumi long wol ia, wanwan long yumi i mekem ol mistek. Nating samtaem yumi tingting se i no olsem, sin oltaem i mekem yumi no stap hapi. Sin i mekem yumi gat ol filing we yumi filim se yumi gat rong, mo yumi sem. From ol sin blong yumi, yumi no save gobak laef wetem Papa long Heven, sapos nomo, yumi kasem fogivnes mo yumi kam klin long ol sin blong yumi fastaem.
Taem yumi stap long wol ia, yumi gat ol eksperiens we i mekem yumi stap hapi. Yumi gat tu ol eksperiens we i mekem yumi stap harem nogud, sam long olgeta i mekem yumi mekem ol rabis sin agensem ol narafala man. Ol eksperiens ia oli givim janis long yumi blong yumi lan mo yumi gro, blong yumi luksave gud long nogud, mo blong mekem ol joes. God i bin lidim yumi blong yumi mekem gud; Setan i stap temtem yumi blong mekem sin. Semmak olsem ded long saed blong bodi, yumi no save winim sin yumiwan. Yumi no gat paoa sapos yumi no gat Atonmen blong Jisas Kraes.
Stadi long Ol Skripja
Probesen o Taem blong Tes
Joes
-
Josua 24:15
-
Blong Ol Yut Oli Kam Strong, “Fridom blong Mekem Joes mo Fasin blong Stap Akaontebol”
Gud mo Nogud
Sin
-
Rom 3:23
-
1 Jon 1:8–10
-
1 Jon 3:4
Hem we I No Klin I No Save Stap wetem God
Atonmen blong Jisas Kraes
Bifo oli bin oganaesem wol ia, Papa long Heven i bin jusum Jisas Kraes blong stap olsem Sevya mo Ridima blong yumi. Sakrifaes blong Jisas Kraes we i pemaot sin, i mekem i posibol blong yumi winim wanem i kamaot afta long Foldaon blong Adam mo Iv. Evri profet we oli stap stat long stat blong wol ia, oli bin testifae abaot Jisas Kraes olsem Ridima blong yumi.
Bae yumi evriwan i safa long ded blong bodi, be Jisas Kraes i bin winim ded blong bodi blong yumi. Taem Hem i bin ded long kros, spirit blong Hem i bin seperet long bodi blong Hem. Long nambatri dei, spirit mo bodi blong hem oli bin kam wan bakegen blong taem we i no save finis, mo bae oli nomo save seperet bakegen. Hem i bin kamaot long plante pipol, mo Hem i bin soemaot long olgeta se Hem i gat wan bodi blong mit mo bun we i no save ded. Taem bodi mo spirit i kam wan bakegen, oli singaotem Laef Bakegen long Ded, we hem i wan presen we oli bin promesem long yumi evriwan. From se Jisas Kraes i bin Laef Bakegen long Ded, yumi evriwan i save tru se nating yumi bin mekem gud o nogud, bae yumi laef bakegen long ded. Bae yumi gat wan stret bodi blong mit mo bun we i no save ded, we bae i neva save bakegen wanem hem i ol sik, ol soa, mo ded. Laef bakegen long ded bae i mekem i posibol blong yumi save laef bakegen wetem Hem, blong kasem jajmen, be hemia i no minim se bae yumi save laef bakegen wetem Hem. Blong kasem ol blesing ia, yumi mas kam klin tu long ol sin.
God i bin sendem Pikinini blong Hem Jisas Kraes we Hem i Lavem Hem Tumas, blong i winim sin antap long hemia blong winim ded blong bodi. Yumi no responsibol long foldaon blong Adam mo Iv, be yumi responsibol long ol sin blong yumiwan. God i no save luk sapos wan sin i smol o i bigwan, mo sin i stap blokem yumi blong save laef wetem Hem. Tru long sore mo lav mo sore blong Sevya nomo bae yumi save kam klin long sin blong yumi blong yumi save laef bakegen wetem God. Hemia i posibol tru long taem we yumi yusum fet blong yumi long Jisas Kraes, yumi sakem sin, yumi kasem baptaes, yumi kasem presen we i Tabu Spirit mo stap stanap strong kasem en.
Blong mekem plan ia blong sevem man i kamtru, Kraes i bin pem praes blong ol sin blong yumi. Hemwan, Hem nomo i save mekem samting ia. Long laef bifo laef long wol ia, oli bin singaotem Hem mo oli bin mekem Hem i rere blong mekem samting ia. Hem i stret Pikinini blong God we i gat mit mo bun. Hem i no bin gat sin mo hem i obei fulwan long Papa blong Hem. Nating Hem i bin fesem temtesen, Hem i neva foldaon long temtesen. Taem Papa i bin askem Pikinini blong Hem we Hem i Lavem Hem tumas blong pemaot praes blong ol sin blong wol, Jisas i bin rere mo i bin glad blong mekem. Atonmen i tekem safaring blong Hem long Garen blong Getsemane mo safaring blong Hem mo ded blong Hem long kros, mo hem i bin en wetem Taem we Hem i bin Laef Bakegen long Ded. Nating we man i no save andastanem olsem wanem Hem i bin safa—we blad i bin kamaot long evri hol blong skin blong Hem, mo Hem i bin askem se sapos safaring we Hem i gat bae i kamaot long Hem—Hem i putum tingting blong Hem blong i folem tingting blong Papa blong Hem, wetem bigfala lav long Papa blong Hem mo long yumi. Taem ia we Jisas Kraes i winim ded blong spirit taem Hem i bin safa mo taem Hem i winim ded blong bodi tru long taem we Hem i Laef Bakegen long Ded, oli singaotem Atonmen.
Kraes i bin promes blong fogivim ol sin blong yumi long wei se yumi akseptem Hem taem yumi yusum fet blong yumi long Hem, yumi sakem sin, yumi kasem baptaes andanit long wota, mo taem oli putum han antap long hed blong yumi blong kasem presen we i Tabu Spirit, mo taem yumi stap traehad wetem fet blong obei ol komanmen blong Hem kasem en blong ol laef blong yumi. Tru long fasin blong sakem sin oltaem, yumi save kasem fogivnes mo kam klin long ol sin blong yumi tru long paoa blong Tabu Spirit. Yumi kam fri long rong mo sem, mo tru long Jisas Kraes, yumi kam klin inaf blong gobak stap long ples we God i stap long hem.
Taem yumi stap dipen long Atonmen blong Jisas Kraes, Hem i save helpem yumi blong stanap strong long taem blong ol hadtaem blong yumi, taem yumi sik mo taem yumi harem nogud. Yumi save gat fulap glad, pis, mo haremgud. Evri samting we i no stret abaot laef i save kam stret tru long Atonmen blong Jisas Kraes.
Taem Hem i bin pemaot ol sin blong yumi, Jisas i no bin tekemaot responsabiliti blong yumi wanwan. Yumi mas soem se yumi akseptem Hem mo bae yumi folem ol komanmen blong Hem. Be tru long presen blong Atonmen nomo yumi save gobak stap laef wetem God.
Stadi long Ol Skripja
Laef Bakegen long Ded
-
Luk 24:1–10, 36–39
-
1 Korin 15:20–23
-
1 Korin 15:41–42
-
Gaed long Ol Skripja, “Laef Bakegen long Ded”
Gaed long Ol Skripja, “Death,” “Resurrection”
Atonmen blong Sevya
-
Jon 3:16–17
-
1 Jon 1:7
-
Bible Dictionary, “Atonement”
Gospel blong Jisas Kraes—Rod Ia
Spirit Wol
Nating Kraes i bin winim ded long saed blong bodi, evri man i mas ded, from se ded i pat blong rod we bae yumi jenis long bodi we i save ded i go long bodi we i no save ded. Long taem yumi ded, ol spirit blong yumi oli go long spirit wol. Ded i no jenisim fasin blong yumi o ol tingting blong yumi blong wantem gud o nogud. Olgeta we oli bin jusum blong obei long God long laef ia, oli laef long wan ples blong stap hapi, pis, mo oli spel long ol trabol mo ol kea. Olgeta we oli jus blong oli no obei long laef ia mo oli no bin sakem sin, oli laef long wan ples we i no gat hapines insaed long hem. Long spirit wol, oli prijim gospel long olgeta we oli no bin obei long gospel o oli gat janis blong harem gospel ia taem oli bin stap long wol ia. Yumi stap insaed long spirit wol kasem taem we yumi laef bakegen long ded.
Stadi long Ol Skripja
Oli Prijim Gospel long Olgeta we Oli Ded
-
1 Pita 3:19–20
-
1 Pita 4:6
Ded mo Spirit Wol
-
Prija 12:7
Laef Bakegen long ded, Fasin Ia blong Sevem Man, mo Fasin blong Kam Olsem Wan God
Taem ol bodi mo spirit blong yumi oli kam wan bakegen tru long laef bakegen long ded, bae yumi kam long ples blong God blong oli jajem yumi. Bae yumi tingbaot gud ol samting we yumi mekem i stret mo olgeta we yumi no mekem i stret. Sapos yumi bin sakem sin, bae yumi kasem sore. Bae yumi kasem praes blong yumi folem ol wok mo ol samting we yumi wantem.
Fasin blong Sevem Man
Tru long Atonmen mo Laef Bakegen long Ded blong Sevya, evri pipol bae bae Lod i sevem olgeta long ded long saed blong bodi. Bae oli laef bakegen long ded mo nomo save ded—i minim se, bae oli laef blong oltaem. Blong nomo save ded, hem i wan fri presen blong evri pipol, nating oli stret mo gud o oli stap mekem rabis fasin.
Bae oli pipol oli sef o kasem fasin blong sevem man, long ded long saed blong spirit blong wanwan man tru long Atonmen Jisas Kraes, i kam tru long fet blong olgeta long Hem, tru fasin blong laef folem fasin blong stap obei long ol loa mo odinens blong gospel blong Hem mo taem oli stap givim seves long hem.
Laef we i no save finis i no semmak long fasin blong nomo save ded.
Presiden Russell M. Nelson i tijim, “Long plan blong God we i no save finis, blong sevem man i wan samting we i blong wanwan man; be, blong kam olsem wan god, i wan famli mata” (“Salvation and Exaltation,” Ensign o Liahona, Mei 2008, 10).
Fasin blong Kam Olsem Wan God
Fasin blong kam olsem God, o selestial glori, i wan hae ples blong stap hapi mo glori long selestial kingdom. Fasin blong kam olsem wan god, i wan presen we i kam wetem kondisen. Presiden Nelson i bin tijim, “Olgeta impoten kondisen ia i tekem tu, fet long Lod, fasin blong sakem sin, kasem Tabu Spirit, mo stap fetful long ol odinens mo kavenan blong tempol” (“Salvation and Exaltation,” 9). Fasin blong kam olsem God i minim blong oltaem, laef wetem God wetem ol famli we i no save finis. Hem i blong save God mo Jisas Kraes mo blong kasem eksperiens long laef we Tufala i stap glad long hem.
Laef Bakegen long Ded mo Laef Bakegen long Wol Ia
Sam pipol oli save miksim doktrin blong laef bakegen long ded wetem tingting ia blong laef bakegen long wol ia. Tingting ia blong laef bakegen long wol ia i minim blong wan i bon bakegen long wol ia olsem wan nara samting, mo hemia i wan giaman doktrin. Doktrin blong laef bakegen long ded i minim blong kasem praes we i no save finis blong wan bodi blong mit mo bun we i nomo save ded. Hemia i wan tru doktrin. Mekemsua se olgeta we yu stap tijim oli andastanem klia doktrin blong laef bakegen long ded.
Jajmen mo Ol Kingdom blong Glori
Long taem blong laef blong yumi long wol ia, yumi stap mekem ol joes long saed blong wanem i gud mo nogud. God i givim praes long yumi folem ol wok mo ol samting we yumi wantem. From se God i givim praes long yumi folem ol samting we yumi stap mekem taem yumi gat bodi, i gat ol defren kingdom blong glori we bae yumi go long hem afta long Jajmen.
Selestial Kingdom
Olgeta we oli bin sakem sin blong olgeta mo oli bin kasem ol odinens blong gospel mo oli bin stanap strong long ol kavenan ia, bae oli kam klin tru long Atonmen blong Kraes. Bae oli sef insaed long selestial kingdom (luk long Doktrin mo Ol Kavenan 137:10). Insaed long skripja, oli komperem kingdom ia wetem glori o saen blong san.
Selestial i gat tri heven o digri (luk long Doktrin mo Ol Kavenan 131:1), mo olgeta ia nomo oli kasem mared blong laef we i no save finis, oli sil tru long Tabu Spirit, oli kam insaed long hemia we i hae moa, we hem i fasin blong kam olsem wan god (luk long Doktrin mo Ol Kavenan 131:2). Bae oli laef long ples we God i stap long hem, kam olsem Hem mo kasem glad we i fulwan.
Olgeta we oli stap long selestial kingdom we oli no bin kasem mared we i no save finis, oli save kam insaed long wan narafala “heven” o “digri” insaed long selestial kingdom, be long ples ia oli stap olsem ol enjel blong givhan we “oli stap seperet mo stap singgel blong ful taem we i no save finis, … oli ol enjel blong God, blong oltaem mo oltaem” (Doktrin mo Ol Kavenan 132:17; luk tu long Doktrin mo Ol Kavenan 131:4; Russell M. Nelson, “Celestial Marriage,” Ensign o Liahona, Novemba 2008, 92).
Terestrial Kingdom
Ol pipol we oli no akseptem fulnes blong gospel blong Jisas Kraes long laef ia o long wol we bae i kam be oli laef long ol gudfala laef, bae oli kasem wan ples insaed long terestrial kingdom. Kingdom ia i semmak long glori blong mun Doktrin mo Ol Kavenan 76:71–80).
Telestial Kingdom
Olgeta we oli stap gohed nomo wetem ol sin blong olgeta mo oli no bin sakem sin long laef ia, bae oli kasem praes blong olgeta insaed long kingdom we i daon moa long evriwan, we oli singaotem telestial kingdom. Kingdom ia oli komperem wetem glori blong ol sta (luk long Doktrin mo Ol Kavenan 76:81–86).
Stadi long Ol Skripja
Laef Bakegen long Ded mo Restoresen
Jajmen
Kingdom blong Glori, Ol
-
Matiu 5:48
-
1 Korin 15:41–42
Laef we I No Save Finis
Plan Ia blong Fasin blong Sevem Man
Atonmen blong Jisas Kraes i mekem fasin blong sevem man i save hapen.
Skripja stadi
Skripja stadi, jos atendens mo prea i save helpem ol pipol oli filim lav blong God mo luksave trutok tru long witnes blong Tabu Spirit. Leftemap tingting blong olgeta we yu tijim blong oli praktisim hemia tu taem oli lanem abaot plan ia blong fasin blong sevem man mo Atonmen blong Jisas Kraes. (Luk long “Prea Oltaem” long seksen blong Lesen 4 blong kasem help long olsem wanem yu save helpem wan blong lanem olsem wanem blong prea mo ridim ol skripja.) Taem oli stadi oltaem long ol skripja, speseli long Buk blong Momon; kam long jos evri wik; mo prea wetem fet long God, wetem tru hat, mo wetem tru tingting (wetem wan strong tingting blong tekem aksen folem wanem ansa we yu kasem), God bae i ansarem ol prea blong olgeta, lidim laef blong olgeta mo helpem olgeta blong luksave trutok.
Invitesen blong Kasem Baptaes
Olsem we Spirit bae i lidim, invitesen blong kasem baptaes mo konfemesen long wan fasin we yu mas tok stret: “?Bae yu folem eksampol blong Jisas Kraes mo kasem baptaes long wan we i holem prishud atoriti blong God? Bae yumi gat wan baptaes seves long [deit]. ?Bae yu save mekem yuwan yu rere blong kasem baptaes long deit ia?”
Sam Tingting blong Tij
Seksen ia i gat ol aedia blong yu yusum blong yu stap rere mo blong yu stap tijim lesen ia. Wetem prea, folem Spirit taem yu mekem tingting blong yu blong olsem wanem bae yu yusum ol aedia ia. Ademap ol aedia ia we yu jusum long plan blong lesen blong yu. Kipim i stap long tingting blong yu se ol aedia ia oli ol tingting nomo—oli no ol samting we yu mas yusum—blong helpem yu blong lukluk long ol nid blong olgeta we yu stap tijim.
Sot Plan blong Lesen (3–5 minit)
Plan ia blong sevem man i stap tijim yumi se yumi kam wea, from wanem yumi stap long wol ia, mo wea ples bae yumi go long hem afta long laef ia. Hem i givim map blong rod blong yumi we i no save finis, tru long laef bifo laef long wol ia, laef long wol ia, ded, laef bakegen long ded, mo laef blong yumi long ol ples we i no save finis. Plan ia i talem klia tu wanem nao Papa blong yumi long Heven i mekem blong helpem yumi blong wokbaot gud long rod ia blong mekem se yumi save gobak stap wetem Hem mo kam olsem Hem. Plan ia i lukluk nomo long misin mo Atonmen blong Jisas Kraes blong save winim ol samting we i kamaot afta long Taem we Man i Foldaon long Sin mo mekem se i posibol blong yumi gat laef we i no save finis. Mifala i invaetem yu blong yu ting hevi mo prea abaot mesej ia.
-
Laef bifo laef long wol ia: Stamba tingting mo Plan blong God from Yumi
-
Kriesen
-
Fridom blong Mekem Joes mo Foldaon blong Adam mo Iv long Sin
-
Laef blong Yumi long Wol ia
-
Atonmen blong Jisas Kraes
-
Spirit Wol
-
Laef Bakegen long ded, Fasin Ia blong Sevem Man, mo Fasin blong Kam Olsem Wan God
-
Jajmen mo Ol Kingdom blong Glori
Ol Invitesen
-
?Bae yu save prea blong save se wanem we mifala i bin tijim i tru?
-
?Bae yu save sakem ol sin blong yu?
-
?Bae yu kam long Jos wetem mifala long Sandei ia?
-
?Bae yu ridim Buk blong Momon mo askem God tru long prea blong save se hem i toktok blong God?
-
?Bae yu save folem eksampol blong Sevya mo kasem baptaes long (deit)?
-
Bae mifala save putum wan taem blong nekis visit blong mifala?
-
Ol komanmen long lesen 4 we yu jusum blong i stap tu.
Haf Plan blong Lesen (10–15 minit)
Mesej blong mifala i blong helpem yu blong yu andastanem stamba tingting blong laef mo huia yumi. Hem i givim hop mo hem i helpem yumi blong yumi faenem pis, glad, mo stap hapi. Hem i talem long yumi se yumi kam wea, from wanem yumi stap long wol ia, mo wea ples bae yumi go long hem afta long laef ia. God i Papa blong yumi, mo Hem i lavem yumi. Yumi ol pikinini blong Hem. Yumi pat blong famli blong Hem, mo yumi bin laef wetem Hem bifo yumi bin bon long wol ia. Hem i gat wan plan blong stap hapi we i mekem i posibol blong yumi save gobak stap wetem Hem afta long laef ia. Progres blong yumi i dipen long olsem wanem bae yumi yusum fridom blong yumi blong mekem joes we God i givim long yumi, o olsem wanem bae yumi yusum fasin ia we yumi gat blong save mekem joes. Olsem pat blong plan ia, Taem Adam i Foldaon long Sin, i bin mekem i posibol blong yumi save kam long wol ia, blong kasem wan bodi, mo gat eksperiens, mo gat ol famli blong yumiwan. Be Foldaon blong Adam mo Iv i mekem tu se bodi blong yumi i save ded, we hem i taem spirit i seperet long bodi, mo yumi save ded tu long spirit, we hem i taem yumi stap longwe long God.
Jisas Kraes i stamba blong plan blong God. Sakrifaes we i pemaot sin blong yumi we Jisas Kraes i mekem i winim tufala tugeta, ded blong bodi mo long saed blong spirit. Bae yumi evriwan i laef bakegen long ded mo bae yumi laef blong oltaem wetem ol bodi we oli fri long harem nogud mo sik. Kraes i bin mekem hemia i posibol blong yumi winim ded long saed blong Spirit. Taem yumi laef folem gospel, bae Hem i gat sore long yumi mo bae Hem i fogivim ol sin blong yumi. Bae Hem i hilim yumi mo bae i putum pis mo hapines i tekem ples blong rong mo sem, hemia long laef ia.
Olsem pat blong plan blong God we i gat sore long hem, bae yumi safa long ded blong bodi. Ol spirit blong yumi bae i seperet long ol bodi blong yumi mo bae yumi laef blong sam taem insaed long spirit wol. Afta bae yumi laef bakegen long ded wetem wan bodi we i nomo save ded, wan taem we bodi mo spirit i kam wan bakegen blong taem we i no save finis. Bae oli jajem yumi folem ol wok mo ol tingting blong yumi. Olgeta we oli bin laef folem gospel bae oli kasem presen blong Papa long Heven we i moa hae bitim ol narawan, presen blong laef we i no save finis—blong laef tugeta olsem wan famli long ples we Hem i stap long hem.
Papa blong yumi long Heven i bin kamaot long yumi bakegen wetem lav blong talemaot plan blong Hem blong stap hapi. Yumi lanem abaot bigfala plan ia insaed long Buk blong Momon, we yu save ridim, ting hevi, mo prea from. Mifala i invaetem yu blong yu kam long jos mo wosip wetem mifala.
Ol Invitesen
-
?Bae yu save prea blong save se wanem we mifala i bin tijim i tru?
-
?Bae yu save sakem ol sin blong yu?
-
?Bae yu kam long Jos wetem mifala long Sandei ia?
-
?Bae yu ridim Buk blong Momon mo askem God tru long prea blong save se hem i toktok blong God?
-
?Bae yu save folem eksampol blong Sevya mo kasem baptaes long (deit)?
-
Bae mifala save putum wan taem blong nekis visit blong mifala?
-
Ol komanmen long lesen 4 we yu jusum blong i stap tu.
Ful Plan blong Lesen (30–45 minit)
-
Laef bifo laef long wol ia: Stamba tingting mo Plan blong God from Yumi
-
God i Papa blong yumi long Heven, mo yumi ol pikinini blong Hem (luk long Ol Wok 17:16–34; Hibrus 12:9).
-
God i gat wan plan blong yumi stap hapi. Jisas Kraes i stamba blong plan ia blong God.
-
Plan blong God blong stap hapi i mekem i posibol blong yumi save gobak stap wetem Hem (luk long Moses 1:39).
-
Olsem wanem bae yumi progres long taem we i no save finis i dipen long olsem wanem bae yumi yusum fridom blong yumi blong mekem joes (luk long 2 Nifae 2:27–29).
-
-
Kriesen
-
Folem toktok blong Papa, Jisas Kraes i bin krietem wol ia (luk long Hibrus 1:1–3).
-
-
Fridom blong Mekem Joes mo Foldaon blong Adam mo Iv long Sin
-
God i bin krietem Adam mo Iv folem pikja blong Hem (luk long Jenesis 1:26–27).
-
Long Garen blong Iden, tufala (Adam mo Iv) i bin laef wetem God.
-
From se tufala i bin tekem tabu frut, God i bin sakemaot tufala aot long garen blong Iden (luk long Moses 4:19–31). Taem ia oli singaotem se Foldaon blong Adam mo Iv.
-
Tufala i kam man blong wol ia, tufala i save gat pikinini, mo tufala i save sin mo tufala i save ded (luk long 2 Nifae 2:22–25; Moses 5:11).
-
-
Laef blong Yumi long Wol ia
-
Stamba tingting blong laef blong yumi i blong yumi faenem pis, glad mo stap hapi olsem famli we i no save gat en blong hem, mo tu blong stap rere blong gobak laef wetem God.
-
Yumi kam long wol ia blong oli testem yumi (luk long Ebraham 3:24–25).
-
Yumi kasem wan bodi blong mit mo bun, be bodi blong yumi i save ded.
-
God i givim ol komanmen. Sapos yumi obei, yumi kasem ol blesing. Sapos yumi no obei, yumi stap sin mo yumi fesem wanem we i kamaot afta.
-
Evri sin i gat praes blong hem, mo yumiwan mo Kraes bae i pemaot (luk long Doktrin mo Ol Kavenan 19:15–20).
-
Yumi mekem ol joes, mo yumi evriwan i mekem sin (luk long Rom 3:23).
-
Yumi gat ol eksperiens we i mekem yumi stap hapi mo tu, olgeta we i mekem yumi stap harem nogud.
-
Yumi no save winim ded blong bodi o blong spirit sapos i no gat Kraes.
-
-
Atonmen blong Jisas Kraes
-
From se Jisas Kraes i winim ded blong bodi, bae yumi evriwan i save laef bakegen long ded (luk long Alma 11:41–43).
-
Tru long Atonmen blong Kraes, bae yumi save kam klin long ol sin blong yumi save gobak stap laef wetem God (luk long 2 Nifae 9:8–9).
-
Kraes bae i fogivim ol sin blong yumi sapos yumi gat fet long Hem, yumi sakem sin, kasem baptaes mo presen we i Tabu Spirit, mo yumi stap strong kasem en.
-
-
Spirit Wol
-
Evri pipol i mas ded.
-
Long taem yumi ded, ol spirit blong yumi i go long spirit wol.
-
Yumi laef long wan ples we i nogud o wan ples we i gat pis mo yumi spel, hemia i dipen long olsem wanem yumi bin stap laef long wol ia.
-
-
Laef Bakegen long Ded, Fasin Ia blong Sevem Man, mo Fasin blong Kam Olsem Wan God
-
Ol spirit mo ol bodi blong yumi bae oli kam wan bakegen tru long laef bakegen long ded (luk long Alma 11:42–45; 40:23).
-
Laef we i no save finis i wan presen we i kam long God we Hem i givim long olgeta we oli obei fulwan long gospel blong Jisas Kraes (luk long Doktrin mo Ol Kavenan 14:7; 132:17).
-
-
Jajmen mo Ol Kingdom blong Glori (luk long Doktrin mo Ol Kavenan 76; 137; 1 Korin 15:40–42)
-
Bae yumi gobak long ples we God i stap long hem blong oli jajem yumi folem ol wok mo ol samting we yumi wantem.
-
Sapos yumi bin sakem sin, bae yumi kasem sore blong Hem.
-
Yumi kasem ol riwod folem ol wok blong yumi mo wanem yumi wantem (luk long Doktrin mo Ol Kavenan 137:9).
-
Olgeta we oli risivim gospel mo oli bin laef gud folem truaot long ol laef blong olgeta, bae oli kasem selestial kingdom (luk long Doktrin mo Ol Kavenan 76:50–70).
-
Ol gudfala pipol we oli “blaen wetem ol rabis fasin blong ol man” mo huia “oli no strong long testemoni blong Jisas [Kraes]” oli kasem terestrial kingdom (luk long Doktrin mo Ol Kavenan 76:75, 79).
-
Olgeta we oli sin mo oli no sakem sin blong olgeta oli kasem telestial glori afta we oli safa mo oli pem praes blong sin blong olgeta.
-
Ol Invitesen
-
?Bae yu save prea blong save se wanem we mifala i bin tijim i tru?
-
?Bae yu save sakem ol sin blong yu?
-
?Bae yu kam long Jos wetem mifala long Sandei ia?
-
?Bae yu ridim Buk blong Momon mo askem God tru long prea blong save se hem i toktok blong God?
-
?Bae yu save folem eksampol blong Sevya mo kasem baptaes long (deit)?
-
Bae mifala save putum wan taem blong nekis visit blong mifala?
-
Ol komanmen long lesen 4 we yu jusum blong i stap tu.
Ol Kwestin blong Askem afta we Yu Tij
-
?Wanem kwestin yu gat abaot wanem we mifala i tijim long yu?
-
?Wanem we yu andastanem abaot plan we God i gat blong yu mo famli blong yu?
-
?Folem wanem we mifala i bin tijim yu, wanem nao yu stap andastan abaot wok blong Jisas Kraes? ?Hemia i minim wanem long yu?
Ol Ki Mining blong Ol Toktok
Ol toktok ia oli ol toktok we plante taem oli no andastanem gud. Mekemsua se yu eksplenem gud olgeta mo faenemaot sapos olgeta we yu stap tijim oli andastanem gud.
-
Atonmen blong Jisas Kraes: Olsem we oli yusum insaed long ol skripja, blong aton i blong safa blong panismen blong wan sin, mo tekemaot wanem i kamaot long sin long man we i mekem sin mo hem i sakem sin mo hemia tu i letem olgeta blong oli kam gud bakegen long fored blong God. Jisas Kraes i bin safa long Getsemane mo long kros. Hem i wan Man ia nomo we i bin save mekem wan stret Atonmen blong evri man. Hem i bin safa from panismen blong ol sin blong yumi, long Getsemane mo i bin ded long kros. Hem i bin tekem long Hemwan ol soa, ol sik, ol temtesen, ol harem nogud, mo ol samting we i no stret long bodi blong yumi, hemia blong yumi evriwan (luk long Alma 7:11–12).
-
Fasin blong kam olsem wan god: Blong kam olsem Papa blong yumi long Heven mo stap wetem Hem olsem ol memba blong famli blong Hem. Presiden Nelson i bin tijim, “Blong mekem yumi kam olsem God—o blong kam olsem God—i stap tokbaot wan hae ples blong stap hapi mo glori long selestial ” (“Salvation and Exaltation,” 8). Fasin blong olsem god, i kam tru long Atonmen blong Kraes mo tru fasin blong obei long evri loa mo ol odinens blong gospel.
-
Foldaon (blong Adam mo Iv): Taem Adam mo Iv i kakae tabu frut, tufala i kam man blong wol ia—hemia i minim se tufala i save sin mo tufala i save ded. Adam i kam olsem “fas man blong kasem mit mo bun” long wol ia (Moses 3:7). Revelesen blong lata-dei i mekem i klia se Taem Man i bin Foldaon, hemia i wan blesing mo Adam mo Iv i mas gat ona blong stap olsem ol fas papa mo mama blong ol man blong wol ia.
-
Fasin blong Nomo Save Ded: Hem i taem wan i laef blong oltaem long wan ples we hem i bin laef bakegen long ded, mo hem i nomo save ded bakegen.
-
Jajmen: God, tru long Jisas Kraes, bae i jajem yumi wanwan blong faenemaot wan glori we i no save finis bae yumi kasem. Jajmen ia bae i stanap long fasin we yumi bin obei long ol komanmen blong God, hemia tu i tekem fasin we yumi akseptem sakrifaes blong Jisas Kraes we i bin pemaot yumi. Bae yumi kasem praes we i no save finis blong yumi folem ol wok mo tingting blong yumi i bin gud o nogud.
-
Fasin blong Save Ded: Taem we wan i bon i kam long wol ia kasem taem we ded long saed blong bodi.
-
Ded long Saed blong Bodi: Taem bodi blong yumi i seperet long spirit blong yumi, mo spirit blong yumi i laef blong oltaem mo i no save ded.
-
Laef Bifo Laef ia Long Wol: Olsem ol spirit pikinini blong Papa blong yumi long Heven, yumi bin laef wetem Hem bifo yumi bin bon long wol ia. Long laef bifo laef ia long wol, yumi no bin gat ol bodi blong mit mo bun.
-
Fasin blong Pemaot Man: Blong sevem, blong pemaot, o blong pem praes, olsem blong mekem wan man i fri long kalabus taem wan i pem wan mane. Fasin blong Pemaot Man i stap tokbaot Atonmen blong Jisas Kraes mo taem yumi kam fri long sin. Atonmen blong Jisas i pemaot evri man long ded long saed blong bodi. Tru long Atonmen blong Hem, olgeta we oli gat fet long Hem mo oli sakem sin, Hem i pemaot olgeta tu long ded long saed blong Spirit.
-
Laef Bakegen long Ded: Hem i taem spirit bodi mo bodi blong mit mo bun i kam wan bakegen afta long ded. Afta long laef bakegen long ded, spirit mo bodi oli nomo save seperet bakegen, mo man ia i nomo save ded bakegen. Evriwan we i bin bon i kam long wol ia bae i laef bakegen long ded from se Jisas Kraes i bin winim ded.
-
Fasin blong Sevem Man: Blong stap sef long saed blong ded blong bodi mo spirit. “Mifala i biliv we ol man bae oli kasem panis from ol sin blong olgetawan nomo, be i no from wanem we Adam i bin foldaon long hem.; … we tru long Atonmen blong Kraes, bae Kraes i sevem evri man taem oli stap obei long ol loa mo olgeta odinens blong Gospel” (Ol Toktok blong Bilif 1:2–3). Evri pipol bae Hem i sevem olgeta long ded blong bodi o laef bakegen long ded, tru long gladhat blong God, tru long ded mo laef bakegen blong Jisas Kraes. Hemia i wan fri presen we i kam long Sevya we i go long evriwan i no mata long wanem joes we oli mekem long laef ia. Plan ia blong sevem man long ded long saed blong Spirit (sin) i kam wetem kondisen. Presiden Russell M. Nelson i tijim, “Ol pipol oli save sef long ded long saed blong Spirit blong wanwan man tru long Atonmen blong Jisas Kraes, i kam tru long fet blong olgeta long Hem, tru fasin blong laef folem fasin blong stap obei long ol loa mo odinens blong gospel blong Hem mo taem oli stap givim seves long hem” (“Salvation and Exaltation,” 8).
-
Ded long saed blong Spirit: Taem yumi seperet long God mo ol toktok blong Hem; blong stap ded long saed blong ol samting we oli stret mo gud. Ded blong spirit i bin kam long wol ia taem blong Foldaon blong Adam mo Iv long sin (luk long Alma 42:6–7). Ol man blong wol ia wetem ol rabis tingting, toktok, mo wok, oli ded long saed blong spirit be oli laef yet long saed blong bodi, long wol ia (luk long 2 Nifae 9:39). Tru long Atonmen blong Jisas Kraes mo tru long fasin blong obei long ol prinsipol mo odinens blong gospel (luk long, ol man mo ol woman oli save kam klin long ol sin mo oli save winim ded long saed blong spirit Ol Toktok blong Bilif 1:2–3).
Ol Narafala Toktok we I Save Gat Nid blong Eksplenem long Olgeta we Yu Tijim
-
Baptaes andanit long wota
-
Selestial
-
Kam klin [long sin]
-
Kriesen
-
Progres blong Taem we i No Save Finis
-
Fet
-
Tabu frut
-
Kasem fogivnes [long sin]
-
Garen blong Eden
-
Kingdom blong Glori
-
Fasin blong Agens
-
Plan Ia blong Fasin blong Sevem Man
-
Probesen
-
Sakem Sin
-
Sin
-
Spirit Wol
-
Telestial
-
Terestrial
-
Tri blong save abaot wanem i gud mo nogud