Iakoba ’e tōna ’utuāfare

’Ua fa’aru’e Iakoba i tōna fare nō te horo ’ē i tōna taea’e ’o Esau tei ’iriā. ’Ua ha’amaita’i te metua tāne o Iakoba iāna nō te ’ite mai ’e nō te fa’aipoipo i te hō’ē vahine tei here i te Fatu ’e ’o ha’apa’o i tāna mau fa’auera’a.

Genese 27:42–46 ; 28:1–5

’A rātere ai Iakoba, ’ua fārerei te Fatu iāna i roto i te hō’ē ’ōrama. ’Ua fafau ’oia e vai noa ’oia i pihai iho ia Iakoba. ’Ua fafau Iakoba e hōro’a i te Fatu ra i te ’ahurura’a o te mau mea ato’a tāna i fāri’i.

Genese 28:10–16, 20–22

’Ua fafau te Fatu ia Iakoba ē, e fāri’i ’oia e rave rahi mau tamari’i. Nā roto i te mau tamari’i a Iakoba, e ha’amaita’ihia ai te mau ’utuāfare o te fenua nei ’ia ’ite mai i te Fa’aora. ’Ua pi’ihia te ’utuāfare o Iakoba i te mau mahana hope’a nei, te ’utuāfare ’o ’Īserā’ela.

Genese 28:3–4, 14 ; 1 Nephi 10:14

’Ua tere atu Iakoba i te hō’ē fenua tei parauhia ’o Harana. I reira, ’ua fa’ahina’aro ’oia i te hō’ē vahine parauti’a ’o Rahera te i’oa.

Genese 27:43 ; 29:9–20

’Ua fāri’i Iakoba e rave i te ’ohipa e hitu matahiti nō te metua tāne ’o Rahera, ’o Labana, mai te mea e fa’ati’a ’oia ’ia fa’aipoipo Iakoba ia Rahera. ’Ua fāri’i Labana. ’Ua rave Iakoba i te ’ohipa e hitu matahiti.

Genese 29:21–27

’Ua hina’aro rā Labana ia Lea, tāna tamāhine matahiapo, ’ia fa’aipoipohia nā mua. I te taime o te fa’aipoipora’a, ’ua ha’avare Labana ia Iakoba ’e ’ua fa’aha’aipoipo Labana ia Iakoba ia Lea. Terā rā, ’ua here Iakoba ia Rahera. ’Ua fafau ’oia e rave e hitu matahiti fa’ahou, mai te mea e nehenehe ato’a ’oia e fa’aipoipo ia Rahera. ’Ua fāri’i Labana, ’e ’ua ha’amata te ’utūafare o Iakoba i te tupu i te rahi.

Genese 29:28–35 ; 30:3–13, 17–24 ; Iakoba 2:27–30

’Aita Labana i ’aufau tano maita’i ia Iakoba. ’Ua ha’amaita’i rā te Fatu ia Iakoba ma te mau ’ānimara e rave rahi ’e ’ua parau ia Iakoba e ho’i i te fare.

Genese 30:31, 43 ; 31:1–7, 17–18

I ni’a i te ’ē’a ho’ira’a i te fare, ’ua ha’api’i mai Iakoba ē, tē haere mai ra tōna taea’e ’o Esau ’e 400 ta’ata nō te fārerei iāna.

Genese 32:3–6

’Ua mana’o Iakoba ē, tē riri noa ra Esau iāna. ’Ua mata’u Iakoba nō te vai pārurura’a o tōna ’utuāfare, nō reira ’ua ’āfa’i atu ’oia ia rātou i te hō’ē vāhi pāpū ’e ’ua pure ’oia.

Genese 32:7–24.

’Ua pure Iakoba i te pō tā’āto’a ’e tae roa i te po’ipo’i. ’Ua haere mai te Fatu e fārerei ia Iakoba ’e ’ua ha’amaita’i atu iāna. ’Ua parau te Fatu ia Iakoba ē, e riro ’oia ’ei ta’ata fa’atere rahi nō te mau ta’ata e rave rahi. ’Ua taui te Fatu i te i’oa o Iakoba ’o ’Īserā’ela.

Genese 32:24–30

’Aita i maoro roa, ’ua ’itehia mai ia Esau ’e tōna mau ta’ata ia Iakoba ’e tōna ’utuāfare. ’Aita ’o Esau i riri fa’ahou ia Iakoba. ’Ua horo atu ’oia e fārerei ia Iakoba ’e ’ua tauahi iāna. ’Ua ’oa’oa roa ’oia i te ’itera’a iāna ’e i te fārereira’a i tōna ’utuāfare. ’Ua ’oa’oa ato’a ’o Iakoba i te ’ite-fa’ahou-ra’a ia Esau.

Genese 33:1–7

’Ua ha’apa’o te Fatu i tāna mau fafaura’a ia Iakoba i te roara’a o tōna orara’a. ’Ua tāpae Iakoba i te fare ’e tōna ’utuāfare ’e ’ua pūhapa atu i reira. Mai reira mai, ’ua pi’ihia ’o Iakoba, ’o ’Īserā’ela, ’e ’ua pi’ihia tōna ’utuāfare te ’āti ’Īserā’ela. ’Ua tāmau noa ’oia i te ha’apao i te mau fa’auera’a ’e i te ha’amori i te Fatu.

Genese 33:17–20