Pasko sa Pagkabanhaw: Paglaom ug Kalinaw pinaagi sa Manluluwas ug sa Iyang Pag-ula

Manwal sa Magtutudlo sa Seminary sa Daang Tugon

Mga Sulod
Ulohan nga Pahina
Pasiuna sa Manwal sa Magtutudlo
Daang Tugon nga mga Leksiyon
- Welcome sa Daang Tugon
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko sa Pagkabanhaw
  - Pasko sa Pagkabanhaw: Kinatibuk-ang Pagpasabot
  - Leksiyon sa Pasko sa Pagkabanhaw
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Numeros 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Maghuhukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Mga Cronicas 14–20, 26, 30
- Esdras 1, 3–7; Nehemias 2, 4–6, 8
- Ester
- Job 1–3; 12–14; 19; 21–24; 38–40; 42
- Mga Salmo 1–2; 8; 19–33; 40; 46
- Mga Salmo 49–51; 61–66; 69–72; 77–78; 85–86
- Mga Salmo 102–103; 110; 116–119; 127–128; 135–139; 146–150
- Mga Panultihon 1–4; 15–16; 22; 31; Ecclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3, 7, 16–18, 20
- Jeremias 31–33; 36–38; Mga Pagbangotan 1, 3
- Ezequiel 1–3; 33–34; 36–37; 47
- Daniel 1–7
- Oseas; Joel
- Amos; Abdias; Jonas
- Miqueas; Nahum; Habacuc, Sofonias
- Hageo 1–2; Zacarias 1–4, 7–14
- Malaquias
Mga Leksiyon sa Pagpangandam sa Kinabuhi
- Doktrinal nga Kahanas: Pagpangita og mga Tubag sa Akong mga Pangutana
- Mga Kahanas sa Pagtuon sa Kasulatan
- Giya sa Alang sa Kalig-on sa mga Kabatan-onan
- Pag-ugmad sa Pagbarog pinaagi sa Kinaugalingong Paningkamot
- Pisikal ug Emosyonal nga Kahimsog
- Pagpangandam alang sa Umaabot nga Edukasyon ug Panarbaho
- Magmalamposon sa Pag-eskwela
- Pagpangandam sa Misyonaryo
- Pagpangandam alang sa Templo
- Mga Pagtulun-an sa mga Lider sa Simbahan
Apendiks

“Pasko sa Pagkabanhaw: Paglaom ug Kalinaw pinaagi sa Manluluwas ug sa Iyang Pag-ula,” Manwal sa Magtutudlo sa Seminary sa Daang Tugon (2026)

“Pasko sa Pagkabanhaw: Paglaom ug Kalinaw pinaagi sa Manluluwas ug sa Iyang Pag-ula,” Manwal sa Magtutudlo sa Seminary sa Daang Tugon

Pasko sa Pagkabanhaw

Paglaom ug Kalinaw pinaagi sa Manluluwas ug sa Iyang Pag-ula

Jesus Christ tells the people to bring their little children, they sit around Him during His ministry in the Americas.

Ang Manluluwas nga si Jesukristo nagdala og paglaom ug kalinaw sa paagi nga ang uban nagtuo nga imposible. Siya miayo sa mga buta, mga masakiton, ug mga bakol. Iyang gibuhi og balik ang patay. Sa kataposan, pinaagi sa Iyang pag-antos, pagkamatay, ug Pagkabanhaw, Iyang gibuntog ang sala ug kamatayon sa tanang katawhan. Kita nagsaulog ug naghinumdom sa Manluluwas sa Pasko sa Pagkabanhaw. Kini nga leksiyon makatabang sa mga estudyante nga mamalandong sa kalinaw ug paglaom nga gitanyag ni Jesukristo kanila.

Pagpangandam sa estudyante: Dapita ang mga estudyante nga buhaton ang usa sa upat sa ginumerohan nga mga kalihokan sa kataposan sa leksiyon. Pananglitan, tun-i ang “Ang Buhi nga Kristo” nga dokumento, nga mangita sa mga hugpong sa mga pulong nga nagpamatuod sa kalinaw ug paglaom nga gitanyag sa Manluluwas. Awhaga sila nga motambong nga andam nga mopakigbahin sa ilang paborito nga mga hugpong sa mga pulong.

Posibleng mga Kalihokan sa Pagkat-on

Pagkawala o pag-angkon og paglaom ug kalinaw

Drowinga ang mosunod nga graphic sa pisara.

Pwede nimong hangyoon ang mga estudyante sa paghunahuna nga nagpuyo sila sa Israel ug nakasaksi sa kinabuhi sa Manluluwas. Ipangutana ang mosunod:

Unsa nga mga kasinatian gikan sa kinabuhi sa Manluluwas nga tingali naghatag nimo og dugang nga paglaom?

Human mopakigbahin ang mga estudyante og pipila ka pananglitan, pwede nimo ipataas ang litrato ni Jesukristo diha sa krus, sama sa “The Crucifixion [Ang Paglansang sa Krus],” ug ipasabot nga kini tingali usa ka yugto dihang pipila sa mga disipulo natental nga mawad-an og paglaom. (Ang Manluluwas namatay, ug walay usa nga sukad nabanhaw.)

Dayon papakita og litrato sa Pagkabanhaw sa Manluluwas, sama sa “Christ and Mary at the Tomb [Si Kristo ug si Maria diha sa Lubnganan],” ug pangutana kon sa unsang paagi kini nga panghitabo nakaapekto sa ilang paglaom.

Unsa ang pipila ka rason nga ang mga tawo mahimong matental nga mawad-an og paglaom karon?
Unsa ang pipila ka rason nga ang mga tawo mahimong makaangkon og paglaom pinaagi sa Manluluwas karon?

Ikonsiderar ang pagsulat sa mga tubag sa mga estudyante diha sa pisara sunod sa tukma nga mga arrow. Ipasabot nga makahimo kita og susama nga kalihokan pinaagi sa pag-usab sa pulong nga paglaom ngadto sa kalinaw.

Gahini og panahon sa pagpamalandong kon sa unsang paagi ang Manluluwas nagtabang ninyo nga mobati og paglaom ug kalinaw diha sa inyong kinabuhi. Usab pamalandongi ang mga rason nga tingali inyong gibati nga morag nawad-an kamo og paglaom ug kalinaw. Ikonsiderar kon nganong nagkinahanglan kamo og dugang nga paglaom ug kalinaw sa inyong kinabuhi.

Sa tibuok niini nga leksiyon, tinguhaa ang giya sa Espiritu Santo sa pagtabang ninyo nga mamalandong sa kalinaw ug paglaom nga gitanyag ni Jesukristo kaninyo ug sa tanang katawhan.

Paglaom ug kalinaw diha sa atong kinabuhi

Sa Pasko sa Pagkabanhaw, atong gisaulog ang Pagkabanhaw ni Jesukristo, ang pagkompleto sa Iyang maulaong pagsakripisyo alang kanato. Samtang magbasa kamo sa mosunod nga pamahayag ni Presidente Russell M. Nelson, pangitaa ang paglaom nga gidala sa Manluluwas diha sa atong kinabuhi.

5:12

Sa dihang nag-antos Siya alang sa atong mga sala ug mga kahuyang, namatay didto sa krus, ug nabanhaw pag-usab, ang Manluluwas miusab sa tawhanong istorya. Tungod Kaniya, dili na kita magsagubang sa atong mga kahuyang, mga sala, ug mga kahadlok nga kita ra. Tungod Kaniya, ang kamatayon dili mao ang kataposan. Ang Pagkabanhaw moabot sa tanan nga nabuhi sukad. Tungod Kaniya, ang mga pamilya mahimong mag-uban sa kahangtoran. Tungod ni Jesukristo, nagsaulog kita sa Pasko sa Pagkabanhaw. Ug ang Pasko sa Pagkabanhaw mahitungod tanan sa kalinaw ug paglaom. …

… Niining panahon sa Pasko sa Pagkabanhaw, mosimba ug modayeg kita Kaniya alang sa kalinaw, paglaom, kahayag, ug kamatuoran nga Iyang gidala kanato. (“The Peace and Hope of Easter,” bidyo, ChurchofJesusChrist.org)

Unsaon ninyo pag-summarize ang unsay gitudlo ni Presidente Monson?

Mahimong mopakigbahin ang mga estudyante og nagkalain-laing mga panabot. Pasalamati sila sa ilang mga tubag. Usa sa mga baroganan nga atong makat-onan mao nga pinaagi sa pag-antos, pagkamatay, ug Pagkabanhaw sa Manluluwas, kita makabaton og kalinaw ug paglaom sa atong kinabuhi.
Unsa ang pipila ka paagi nga gipakigbahin ni Presidente Nelson nga ang Manluluwas mohatag kanato sa paglaom ug kalinaw?
Ngano kaha nga ang pagkahibalo mahitungod sa pag-antos, pagkamatay, ug Pagkabanhaw sa Manluluwas nakatabang nato nga magtinguha og paglaom ug kalinaw pinaagi Kaniya?

Mga Pagpamatuod bahin sa Manluluwas

Ang mosunod nga kalihokan motabang sa mga estudyante nga mas makasabot kon sa unsang paagi kita makabaton og kalinaw ug paglaom pinaagi ni Jesukristo. Ikonsiderar ang pagpakita sa mosunod nga mga instruksiyon ug mga pakisayran sa kasulatan diha sa pisara. Dapita ang mga estudyante nga tun-an ang pipila niini o ubang mga bersikulo nga magpamatuod sa Manluluwas. O mahimo nimong iasayn ang matag kasulatan sa lainlaing mga estudyante. Mahimo dayong ipakigbahin sa mga estudyante ngadto sa klase ang ilang nadiskobrehan mahitungod kon sa unsang paagi ang Manluluwas magdala og paglaom ug kalinaw diha sa ilang kinabuhi.

Basaha ang pipila sa mosunod nga mga kasulatan sa Daang Tugon, nga mangita sa mga hugpong sa mga pulong nga naghulagway sa unsay mahimo sa Manluluwas alang kanato. Pamalandongi kon sa unsang paagi Siya magdala og paglaom ug kalinaw sa atong kinabuhi.

Job 19:25–26

Mga Salmo 16:8–11

Mga Salmo 30:2–5

Mga Salmo 33:18–22

Isaias 1:18

Isaias 12:2

Isaias 25:8–9

Isaias 40:28–31

Jeremias 17:7–8

Dapita ang mga estudyante sa pagpakigbahin og mga hugpong sa mga pulong nga ilang nakaplagan nga makahuloganon ngadto kanila. Mahimo nimong ipasulat nila kini nga mga hugpong sa mga pulong diha sa pisara sunod sa “Pagbaton og paglaom” nga arrow. Pangutan-a sila kon nganong ang hugpong sa mga pulong mahinungdanon. Mahimo usab nimong awhagon ang mga estudyante sa pagmarka sa mga hugpong sa mga pulong nga gipakigbahin sa uban.

Pamalandongi ang paglaom ug kalinaw nga gitanyag sa Manluluwas

Aron matabangan ang mga estudyante nga pamalandongan ang paglaom ug kalinaw nga moabot pinaagi sa Manluluwas, dapita ang mga estudyante sa paghimo sa usa o duha sa mosunod nga mga kalihokan isip usa ka klase. Pwede kang magpili niadtong para nimo labing magamit o makatabang sa mga estudyante. O mahimo nimong i-summarize ang mga pagpili ug tugotan ang mga estudyante sa pagpili, isip usa ka klase, hain nga mga kalihokan ang ilang gustong buhaton. Pwede usab nimong dapiton ang mga estudyante sa paghimo og ilang kaugalingong mga ideya ug sulayan kini.

Tun-i ang “Ang Buhi nga Kristo,” nga gisulat sa Unang Kapangulohan ug Korum sa Napulog Duha ka Apostoles, nga mangita sa mga hugpong sa mga pulong nga nagpamatuod sa kalinaw ug paglaom nga gitanyag sa Manluluwas. Pwedeng ipakigbahin sa mga estudyante ang ilang nakit-an ug nganong makahuloganon kini ngadto kanila.
Pagpili og mga himno o laing kanta nga nagtudlo sa kalinaw ug paglaom nga gitanyag sa Manluluwas. Kanta ang usa niini. Dayon ipakigbahin ang mga hugpong sa mga pulong gikan niana nga himno nga makahuloganon kaninyo. Pipila ka ehemplo mao ang “Ang Kalinaw Asa Ko Pangitaa?,” Mga Himno, nu. 75; “Buhi ang Akong Manunubos,” Mga Himno, nu. 79; ug “Gibati Ko ang Gugma sa Akong Manluluwas,” Songbook sa mga Bata, 42–43.
Basaha ang mosunod nga pamahayag gikan ni Presidente Russell M. Nelson o tan-awa ang “The Peace and Hope of Easter, President Russell M. Nelson Palm Sunday Invitation” gikan sa time code 3:50 hangtod 5:11. Ipakigbahin kon sa unsang paagi ang pagtambong sa simbahan o pagpaminaw sa kinatibuk-ang komperensiya makatabang nato sa pagpamalandong sa kalinaw ug paglaom nga gitanyag sa Manluluwas.

5:12

Niining Pasko sa Pagkabanhaw, moawhag ako ninyo sa pagtutok diha sa Manluluwas. Kon nangita kamo og dapit sa pagsimba, palihog apil kanamo. Sa [o duol sa] Dominggo sa Pasko sa Pagkabanhaw, ang tibuok kalibotan nga kinatibuk-ang komperensiya sa Ang Simbahan ni Jesukristo sa mga Santos sa Ulahing mga Adlaw mapuno sa mga mensahe ug musika nga nakasentro ngadto ni Kristo. Magpundok kita sa [personal ug] birtuwal nga paagi aron sa pagsimba sa atong Manunubos. Palihog pakig-uban kanamo. Dapita ang inyong mga higala!

Si Jesukristo buhi! Isip atong nabanhaw nga Manluluwas, andam Siya sa pagtabang nato nga molambo gikan sa makapaukyab, wala damha nga mga panghitabo sa atong kinabuhi. Niining panahon sa Pasko sa Pagkabanhaw, mosimba ug modayeg kita Kaniya alang sa kalinaw, paglaom, kahayag, ug kamatuoran nga Iyang gidala kanato. (“The Peace and Hope of Easter, President Russell M. Nelson Palm Sunday Invitation,” video, ChurchofJesusChrist.org)

Ipakigbahin ang mga kasinatian sa dihang kamo o kaila ninyo nga mibati og paglaom ug kalinaw pinaagi sa Manluluwas nga si Jesukristo.

Panapos

I-refer og balik ngadto sa graphic diha sa pisara. Ipasabot nga samtang kitang tanan mahimong matental usahay nga mawad-an og paglaom, pwede kitang mopili nga tinguhaon ang paglaom ug kalinaw pinaagi sa Manluluwas.

Sa inyong journal nga kasulatan isulat kon nganong kinahanglan ninyo ang paglaom ug kalinaw sa Manluluwas diha sa inyong kinabuhi. Dayon pagsulat og pipila ka butang nga gusto ninyong buhaton sa pagtutok sa Manluluwas ug sa Iyang paglaom ug kalinaw. Mahimong maglakip kini sa paghinumdom sa mga kasulatan o mga hugpong sa mga pulong gikan sa “Ang Buhi nga Kristo” nga inyong gitun-an karong adlawa.

Ikonsiderar ang paghatag sa mga estudyante og kahigayonan nga ipakigbahin ang ilang mga hunahuna ug pagpamatuod sa Manluluwas ug sa paglaom ug kalinaw nga Iyang gitanyag.

Dugang nga mga Kalihokan sa Pagkat-on

Ang propeta sa Basahon ni Mormon nagpamatuod sa paglaom nga moabot pinaagi ni Jesukristo.

Kon mapuslanon ang pagtuon sa usa ka kasulatan sa Basahon ni Mormon aron paghatag og dugang nga pagpamatuod sa gipabaga nga kamatuoran niini nga leksiyon, ikonsiderar ang mosunod: Sa Moroni 7, gikutlo ni Moroni ang pagtulun-an nga gikan sa iyang amahan, si Mormon. Dapita ang mga estudyante sa pagbasa sa Moroni 7:40–41 ug i-summarize kon unsay gitudlo ni Mormon ug sa unsang paagi kini makatabang ngadto kanila. Mahimong basahon usab sa mga estudyante ang Moroni 7:42–44 aron makita kon sa unsang paagi ang paglaom diha ni Jesukristo may kalabotan sa hugot nga pagtuo ug gugmang putli.

Dugang nga mga kalihokan alang sa kataposan sa leksiyon:

Kon mapuslanon, ang mosunod nga mga kalihokan mahimong ihatag sa kataposan sa leksiyon:

Dapita ang mga estudyante sa paghimo og kard o poster sa usa ka hugpong sa mga pulong sa kasulatan nga nagdala kanila og paglaom ni Jesukristo. Pwede nilang ibutang kini bisan asa nga kanunay nila kining makita. Sa laing paagi, pwede silang magtakda og bersikulo isip wallpaper sa ilang selpon.
Maghimo og sulat o text ngadto sa usa ka tawo nga imong kaila aron molambo ang ilang paglaom sa Manluluwas. Mahimo nimong ilakip ang usa ka paborito nga kasulatan o kinutlo gikan sa leksiyon, pagpamatuod, o binsa unsa nga giaghat sa Espiritu Santo kanimo aron ipakigbahin.

Mga propeta sa karaan ug sa karon nagpamatuod sa maulaong sakripisyo sa Manluluwas.

Kon mapuslanon alang sa mga estudyante ang pagtuon kon sa unsang paagi ang mga propeta sa Daang Tugon nanagna sa Pag-ula ni Jesukristo ug sa unsang paagi kini nga mga panagna matuman, ikonsiderar ang pagsulat sa pulong nga panagna diha sa pisara. Pangutan-a ang mga estudyante sama sa mosunod nga mga pangutana:

Unsa ang panagna?
Unsa ang mga ehemplo sa mga panghitabo o mga kamatuoran nga importante kaayo alang sa Ginoo sa pagpanagna niini kanato pinaagi sa Iyang mga propeta?

Mahimong gibuhat sa mga estudyante ang kalihokan sa Dali, Sunod Kanako—Alang sa mga Indibidwal ug mga Pamilya: Daang Tugon 2026 ubos sa ulohan nga, “Ang mga propeta sa karaan ug sa modernong panahon nagpamatuod sa maulaong sakripisyo sa Manluluwas.” Ikonsiderar ang pagsulat niana nga ulohan, nga mao usab ang kamatuoran, diha sa pisara ingon man sa tsart nga dunay mga bersikulo sa kasulatan. Kon ang mga estudyante mihimo niini nga kalihokan sa balay, dapita sila sa pagrebyo og pipila ka tudling aron mahinumdoman ang ilang nakat-onan. Kon wala, dapita sila nga basahon ang pipila ka tudling nga mangita sa unsay ilang nakat-onan mahitungod sa Manluluwas. Kon mapuslanon, pwede nimong iasayn ang lainlaing mga bersikulo ngadto sa lainlaing mga estudyante o mga grupo sa mga estudyante.

Human mopakigbahin ang mga estudyante sa unsay labing importante kanila, ikonsiderar ang pagpakita nila og pagpamatuod sa usa ka propeta sa modernong panahon mahitungod ni Jesukristo. Nagkalain-laing mga bidyo anaa sa Easter nga pahina sa ChurchofJesusChrist.org. Ang mosunod mao ang pipila ka mga ehemplo:

“Because of Jesus Christ We Can Navigate Life’s Challenges,” (Presidente Russell M. Nelson)

“Finding Strength in Jesus Christ,” (Presidente Dallin H. Oaks)

O pwede nimong dapiton ang mga estudyante nga tun-an ang “Ang Buhi nga Kristo,” nga gisulat sa Unang Kapangulohan ug sa Korum sa Napulog Duha ka Apostoles.

Dapita ang mga estudyante sa pagrekord sa ilang kaugalingong pagpamatuod bahin sa Manluluwas. Mahimo nilang iapil ang ilang mga hunahuna ug mga pagbati mahitungod sa Pag-ula sa Manluluwas. Pwede nilang ilakip usab ang mga pakisayran sa kasulatan nga nagpamatuod sa sama nga mga kamatuoran. Mahimo dayong ipakigbahin sa mga estudyante ang ilang mga hunahuna ug pagpamatuod ngadto sa klase o sa gagmayng grupo.