« ហូសេ ៖ សេចក្តីស្រឡាញ់ និងសេចក្តីមេត្តាករុណារបស់ព្រះអម្ចាស់ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ហូសេ ៖ សេចក្តីស្រឡាញ់ និងសេចក្តីមេត្តាករុណារបស់ព្រះអម្ចាស់ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ហូសេ ១–៦; ១០–១៤; យ៉ូអែល ៖ មេរៀនទី ១៤៦
ហូសេ
សេចក្តីស្រឡាញ់ និងសេចក្តីមេត្តាករុណារបស់ព្រះអម្ចាស់
នៅក្នុងគម្ពីរហូសេ ព្រះអម្ចាស់បានប្រើអាពាហ៍ពិពាហ៍របស់ហូសេ និងកូមើរធ្វើជានិមិត្តសញ្ញាមួយដើម្បីបង្រៀនអ៊ីស្រាអែលអំពីសេចក្តីស្រឡាញ់នៃសេចក្តីសញ្ញាដ៏ពិតប្រាកដរបស់ទ្រង់ ។ ដូចជាអ៊ីស្រាអែល ពេលខ្លះយើងអាចវង្វេងចេញពីព្រះអម្ចាស់ និងសេចក្តីសន្យារបស់យើងជាមួយទ្រង់ ។ ទោះបីជាយ៉ាងណាក៏ដោយ ព្រះយេស៊ូវគ្រីស្ទនៅតែស្មោះត្រង់ និងស្រឡាញ់យើងជានិច្ច ។ មេរៀននេះអាចជួយសិស្សឲ្យយល់ដឹងអំពីសេចក្ដីស្រឡាញ់ និងសេចក្ដីមេត្តាករុណាដ៏ពិតប្រាកដរបស់ព្រះអម្ចាស់ដែលមានសម្រាប់ពួកគេ ។
ការរៀបចំសិស្ស ៖ សូមអញ្ជើញសិស្សឲ្យគិតអំពីបទពិសោធន៍ដែលធ្លាប់បានជួយពួកគេឲ្យទទួលអារម្មណ៍នូវសេចក្ដីស្រឡាញ់ និងសេចក្ដីមេត្តាករុណារបស់ព្រះអម្ចាស់ ។
សកម្មភាពរៀនសូត្រដែលអាចមាន
ការចងចាំព្រះវរបិតាសួគ៌ និងព្រះយេស៊ូវគ្រីស្ទ
ដើម្បីចាប់ផ្តើមថ្នាក់ សូមរៀបចំសិស្សឲ្យភ្ជាប់តាមរបៀបដែលទាក់ទងជាមួយរឿងរបស់ហូសេ និងកូមើរ ។ របៀបមួយដើម្បីធ្វើវា គឺតាមរយៈសាច់រឿងដូចខាងក្រោម ។
ខាំមៀល និង ហាណា ជាមិត្តល្អនឹងគ្នាអស់រយៈពេលមួយឆ្នាំ ។ ក្នុងពេលនោះ ពួកគេមានភាពជិតស្និទ្ធ និងជួយគ្នាឆ្លងកាត់ពេលវេលាដ៏លំបាកទាំងឡាយ ។ ហាណា បានចែកចាយអ្វីមួយដែលនាងកំពុងពុះពារជាមួយ ។ ខាំមៀល បានសន្យាថាមិនចែកចាយរឿងទាំងនោះជាមួយអ្នកដទៃនោះទេ ។ ទោះជាយ៉ាងណាក៏ដោយ ប៉ុន្មានថ្ងៃមុន ហាណាបានដឹងថា ខាំមៀលបានប្រាប់មិត្តភក្តិរបស់ពួកគេមួយចំនួនអំពីការពុះពាររបស់ហាណា ។
-
ប្រសិនបើអ្នកជាហាណា តើអ្នកអាចមានគំនិត និងអារម្មណ៍យ៉ាងណា ?
-
ហេតុអ្វីបានជាវាពិបាកក្នុងការអភ័យទោសឲ្យខាំមៀល ?
សូមពិចារណាពន្យល់ថា នេះគឺជាឧទាហរណ៍មួយនៃរបៀបដែលយើងអាចមានអារម្មណ៍ថាត្រូវគេក្បត់ ឬឈឺចាប់នៅពេលដែលនរណាម្នាក់បំពានការសន្យា ។ ខណៈដែលយើងអាចឆ្លើយតបទៅនឹងស្ថានភាពទាំងនេះតាមរបៀបដែលមិនមានប្រយោជន៍ នោះព្រះអម្ចាស់ឆ្លើយតបផ្សេងពីនោះ ។
គម្ពីរហូសេបង្រៀនអំពីចំណងអាពាហ៍ពិពាហ៍ ។ នៅក្នុងគម្ពីរនេះ ជាញឹកញាប់ ព្រះអម្ចាស់ប្រើអាពាហ៍ពិពាហ៍ជានិមិត្តរូបសម្រាប់ទំនាក់ទំនងសេចក្ដីសញ្ញារបស់យើងជាមួយនឹងទ្រង់ ។ ប្រធាន រ័សុល អិម ណិលសុន បានបង្រៀនថា សេចក្តីសញ្ញារបស់យើងបង្កើត « គឺជាពាក្យពិសេសមួយដែលពិពណ៌នាអំពីទំនាក់ទំនងនៃសេចក្តីសញ្ញា ដែល[ យើង និងព្រះអម្ចាស់ ]ត្រូវភ្ជាប់គ្នាដើម្បីមានភក្តីភាព និងភាពស្មោះត្រង់ចំពោះគ្នាទៅវិញទៅមក » ( « សេចក្ដីសញ្ញាដ៏នៅអស់កល្បអស់កាលជានិច្ច » លីអាហូណា ខែតុលា ឆ្នាំ២០២២ ទំព័រ ៦ ) ។
ពេលខ្លះ បុត្រាបុត្រីរបស់ព្រះមិនស្មោះត្រង់ចំពោះព្រះអម្ចាស់ទេ ហើយឃ្លាតឆ្ងាយពីសេចក្តីសញ្ញាជាមួយនឹងទ្រង់ថែមទៀតផង ។ នៅពេលអ្នកសិក្សាគម្ពីរហូសេនៅថ្ងៃនេះ សូមរកមើលពីរបៀបដែលព្រះអម្ចាស់មានអារម្មណ៍ ហើយឆ្លើយតបចំពោះរាស្រ្តក្នុងសេចក្តីសញ្ញារបស់ទ្រង់ ទោះបីជានៅពេលពួកគេក្បត់ទ្រង់ក៏ដោយ ។
ហូសេ និងកូមើរ
ដើម្បីជួយសិស្សឲ្យយល់រឿងរបស់ហូសេ និងកូមើរ សូមដាក់បង្ហាញ ឬសង្ខេបកថាខណ្ឌដូចខាងក្រោម ។
សូមមើលផ្នែក ធនធានបន្ថែមទាំងឡាយ នៃមេរៀននេះនៅក្នុងបណ្ណាល័យដំណឹងល្អ សម្រាប់ព័ត៌មានបន្ថែមអំពីបទបញ្ញត្តិរបស់ព្រះសម្រាប់ហូសេ និងកូមើរ ។
ហូសេគឺជាព្យាការីរបស់ព្រះនៅនគរភាគខាងជើងក្នុងស្រុកអ៊ីស្រាអែល ដោយព្យាករនៅពេលដូចគ្នានឹងអេសាយដែរ ។ ព្រះអម្ចាស់បានបញ្ជាហូសេឲ្យរៀបការនឹងកូមើរ ទោះបីនាងជាស្រីផិតក្បត់ និងជាស្រ្តីពេស្យាក៏ដោយ។ ហូសេ និងកូមើរបានមានកូនជាមួយគ្នា ( សូមមើល ហូសេ ១:២–៨ ) ។
អ្នកប្រហែលជាចង់ពន្យល់ថា ហូសេទូលទៅព្រះអម្ចាស់អំពីកូមើរ ដែលជាអ្នកតំណាងឲ្យប្រជាជនអ៊ីស្រាអែល ។ សូមពិចារណាបង្កើតជួរឈរពីរនៅលើក្ដារខៀន ។ ដាក់ស្លាក់មួយ ហូសេ តំណាងឲ្យព្រះអម្ចាស់ និងមួយទៀត កូមើរ តំណាងឲ្យអ៊ីស្រាអែល ។
សូមអាន ហូសេ ២:៥ ដោយរកមើលអ្វីដែលហូសេបាននិយាយថា កូមើរបានធ្វើ ។ « ម្តាយវា » សំដៅទៅលើកូមើរ ។
-
តើទង្វើរបស់កូមើរអាចតំណាងឲ្យប្រជាជនអ៊ីស្រាអែលដោយរបៀបណា ?
អ្នកអាចពន្យល់ថា ភាពមិនស្មោះត្រង់របស់កូមើរ នៅក្នុងអាពាហ៍ពិពាហ៍នៃសេចក្តីសញ្ញារបស់នាងជាមួយហូសេ តំណាងឲ្យភាពមិនស្មោះត្រង់ខាងវិញ្ញាណរបស់សាសន៍អ៊ីស្រាអែលនៅក្នុងទំនាក់ទំនងនៃសេចក្តីសញ្ញារបស់ពួកគេជាមួយព្រះ ។ ប្រសិនបើមានប្រយោជន៍ សិស្សអាចអាន ពង្សាវតារក្សត្រ ទី២ ១៧:១៤–១៦ ដោយរកមើលពីរបៀបដែលអ៊ីស្រាអែលបានបំពានសេចក្តីសញ្ញាជាមួយព្រះអម្ចាស់ ។
ដើម្បីជួយសិស្សឲ្យប្រដូចបទគម្ពីរទៅនឹងខ្លួនពួកគេ នោះអ្នកអាចសួរសិស្សនូវសំណួរមួយដូចជាខាងក្រោម ៖ រាយបញ្ជីចម្លើយរបស់សិស្សនៅលើក្ដារខៀនខាងក្រោម កូមើរតំណាងឲ្យអ៊ីស្រាអែល ។
-
តើមនុស្សនៅសម័យរបស់យើងពេលខ្លះវង្វេងចេញពីព្រះអម្ចាស់ និងសេចក្ដីសញ្ញារបស់ពួកគេជាមួយនឹងទ្រង់យ៉ាងដូចម្ដេច ?
សិស្សអាចចែកចាយរឿងដូចជា រវល់ពេកសម្រាប់ព្រះអម្ចាស់ ប្រើបច្ចេកវិទ្យាមិនសមរម្យ ប្រព្រឹត្តមិនល្អដាក់អ្នកដទៃ ការជ្រើសរើសកិច្ចការផ្សេងទៀតជាជាងជ្រើសរើសព្រះអម្ចាស់ ឬអំពើបាបធ្ងន់ធ្ងរជាងនេះ ។ សិស្សអាចគិតពិចារណាអំពីបញ្ជីនេះ ឬអ្វីផ្សេងទៀត នៅពេលពួកគេជញ្ជឹងគិតពីការបំផុសគំនិតខាងក្រោម ។
សូមគិតពិចារណាពីរបៀបដែលអ្នកអាចនឹងត្រូវបានល្បួងឲ្យបំពានលើសេចក្ដីសញ្ញារបស់អ្នក ឬរបៀបដែលអ្នកអាចនឹងវង្វេងចេញពីសេចក្ដីសញ្ញារបស់អ្នកជាមួយនឹងព្រះអម្ចាស់ ។
ដើម្បីជួយសិស្សឲ្យយល់អំពីសេចក្តីស្រឡាញ់ និងសេចក្តីមេត្តាករុណារបស់ព្រះអម្ចាស់ចំពោះពួកគេ នោះអ្នកអាចប្រើសំណៅមេរៀន « ការយល់ដឹងពីសេចក្តីស្រឡាញ់ និងសេចក្តីមេត្តាករុណារបស់ព្រះអម្ចាស់ » ។ សិស្សអាចធ្វើការដោយខ្លួនឯងដើម្បីលើកទឹកចិត្តឲ្យមានការជញ្ជឹងគិតដោយស្ងៀមស្ងាត់ ប្រកបដោយការអធិស្ឋាន ឬពួកគេអាចធ្វើការជាក្រុមជាមួយនឹងអ្នកដឹកនាំក្រុម ដែលត្រូវបានចាត់តាំងដើម្បីដឹកនាំការពិភាក្សារបស់ពួកគេ ។ នៅពេលសិស្សធ្វើការ សូមដើរចុះឡើងនៅក្នុងបន្ទប់ ហើយជួយពួកគេតាមតម្រូវការ ។
ការរៀនសូត្រអំពីព្រះអម្ចាស់
សូមអញ្ជើញសិស្សឲ្យចែកចាយសេចក្ដីថ្លែងការណ៍អំពីសេចក្ដីពិត ដែលពួកគេបានសរសេរនៅលើសំណៅមេរៀនរបស់ពួកគេ ។ ពួកគេអាចចែកចាយឲ្យឮៗ ឬសរសេរសេចក្តីថ្លែងការណ៍របស់ពួកគេនៅលើក្ដារខៀនខាងក្រោម ហូសេ តំណាងឲ្យព្រះអម្ចាស់ ។ ពួកគេអាចសរសេរសេចក្តីពិតដូចតទៅនេះ ៖
-
ព្រះយេស៊ូវគ្រីស្ទគឺពោរពេញដោយសេចក្តីស្រឡាញ់ និងសេចក្តីមេត្តាករុណា សូម្បីតែនៅពេលខ្ញុំវង្វេងចេញពីទ្រង់ក្តី ។
-
ព្រះយេស៊ូវគ្រីស្ទអញ្ជើញរាស្រ្តនៃសេចក្តីសញ្ញារបស់ទ្រង់ឲ្យប្រែចិត្ត ហើយរក្សាសេចក្តីសញ្ញារបស់ពួកគេ ។
នៅពេលសិស្សចែកចាយ អ្នកអាចសួរសំណួរតាមដាន ដើម្បីជួយសិស្សបង្កើតទំនាក់ទំនងច្បាស់លាស់ជាមួយនឹងព្រះគម្ពីរ ៖ « តើផ្នែកណានៃរឿងនេះដែលបានជួយអ្នករៀនអំពីទ្រង់ ? ឬ « តើអ្នកបានឃើញសេចក្ដីពិតនោះអំពីទ្រង់ដែលបានបង្ហាញតាមរយៈហូសេដោយរបៀបណា ? »
មុនពេលសួរសំណួរខាងក្រោម អ្នកអាចយោងសិស្សទៅកាន់បញ្ជីនៅលើក្ដារខៀនពីរបៀបដែលជួនកាលយើងវង្វេងចេញពីព្រះអម្ចាស់ និងសេចក្ដីសញ្ញារបស់យើងជាមួយទ្រង់ ។
-
តើអ្វីដែលអ្នកកំពុងរៀនអំពីព្រះអម្ចាស់អាចជួយយុវវ័យដែលបាក់ទឹកចិត្ត ឬអៀនខ្មាសដោយសារពួកគេបានវង្វេងចេញពីព្រះអម្ចាស់ដោយរបៀបណា ?
មុននឹងសួរសំណួរបន្ទាប់ វាអាចជាការឈ្លាសវៃដោយប្រឹក្សាសិស្សកុំឲ្យចែកចាយអ្វីដែលមានលក្ខណៈផ្ទាល់ខ្លួនពេក ដូចជាអំពើបាបពីមុនៗ ។ អ្នកក៏អាចចែកចាយបទពិសោធន៍ចេញពីជីវិតផ្ទាល់ខ្លួនអ្នកផងដែរ ។
-
តើតាមរបៀបណាដែលអ្នកបានឃើញព្រះអម្ចាស់បង្ហាញសេចក្តីស្រឡាញ់ និងសេចក្តីមេត្តាករុណារបស់ទ្រង់នៅក្នុងជីវិតរបស់អ្នក ឬជីវិតរបស់នរណាម្នាក់ដែលអ្នកស្គាល់ ?
បង្ហាញការយល់ដឹង
នៅពេលសិស្សមានឱកាសពន្យល់ ឬគិតពិចារណាពីអ្វីដែលពួកគេបានរៀន នោះវាអាចយាងអញ្ជើញព្រះវិញ្ញាណបរិសុទ្ធឲ្យបង្រៀនពួកគេបន្ថែមទៀត ។ របៀបមួយសម្រាប់ពួកគេក្នុងការធ្វើការណ៍នេះ គឺសកម្មភាពសរសេរខ្លីៗខាងក្រោម ។
សូមជ្រើសរើសសំណេរមួយដូចខាងក្រោម ។
-
សរសេរសារ សូមគិតអំពីនរណាម្នាក់ ( វាអាចជាខ្លួនអ្នក ) ដែលអាចនឹងមានអារម្មណ៍ថាពួកគេបានវង្វេងឆ្ងាយពេកពីព្រះអម្ចាស់ដើម្បីទទួលបានការអភ័យទោស ។ សូមសរសេរសារលើកទឹកចិត្តមួយទៅកាន់បុគ្គលរូបនេះ ហើយចែកចាយអ្វីដែលអ្នកបានរៀនអំពីព្រះវរបិតាសួគ៌ និងព្រះយេស៊ូវគ្រីស្ទ ដែលអ្នកគិតថាអាចជួយពួកគេបាន ។
-
សរសេរការពិពណ៌នា តើអ្នកនឹងពិពណ៌នាអំពីបុគ្គលិកលក្ខណៈរបស់ព្រះវរបិតាសួគ៌ និងព្រះយេស៊ូវគ្រីស្ទ ដោយផ្អែកលើអ្វីដែលអ្នកបានរៀន ឬមានអារម្មណ៍នៅថ្ងៃនេះ ?
អ្នកអាចនឹងចែកចាយជាមួយសិស្សថា យើងដូចជាកូមើរអាចជ្រើសរើសទទួលយកការអញ្ជើញដោយក្ដីស្រឡាញ់របស់ព្រះអម្ចាស់ដើម្បីប្រែចិត្ត ហើយត្រឡប់ទៅកាន់ទ្រង់វិញ នៅពេលយើងបានវង្វេង ។ សូមពិចារណាបញ្ចប់ដោយទីបន្ទាល់របស់អ្នកអំពីព្រះអម្ចាស់ ។