“Daniel 2: ‘Usa ka Gingharian nga Dili Gayod Malumpag,’” Manwal sa Magtutudlo sa Seminary sa Daang Tugon (2026)
“Daniel 2: ‘Usa ka Gingharian nga Dili Gayod Malumpag,’” Manwal sa Magtutudlo sa Seminary sa Daang Tugon
Daniel 1–7: Leksiyon 143
Daniel 2
“Usa ka Gingharian nga Dili Gayod Malumpag”
Gipakita sa Ginoo ngadto ni Daniel ang usa ka panan-awon sa ulahing mga adlaw, dihang tukoron sa Ginoo ang Iyang gingharian sa ibabaw sa yuta. Ang gingharian sa Ginoo, Ang Simbahan ni Jesukristo sa mga Santos sa Ulahing mga Adlaw, molukop sa yuta ug mobarog hangtod sa kahangtoran. Kini nga leksiyon makatabang nga mapalig-on sa mga estudyante ang ilang pagpamatuod sa balaanong Pagpahiuli sa Ang Simbahan ni Jesukristo sa mga Santos sa Ulahing nga Adlaw.
Pagpangandam sa estudyante: Dapita ang mga estudyante sa pagpili og usa sa mosunod nga mga ideya aron mangandam niini nga leksiyon:
Posibleng mga Kalihokan sa Pagkat-on
Pagpamatuod sa Pagpahiuli
Ikonsiderar ang pagdapit sa mga estudyante sa pagpakigbahin sa bisan unsa nga nahinumdoman nilang gipangutana panahon sa interbiyo sa rekomend sa templo. Kon makatabang, pwede nimong ipasabot ang mga pangutana sa rekomend sa templo diha sa apendiks sa Alang sa Kalig-on sa mga Kabatan-onan: Usa ka Giya sa Paghimo og mga Pagpili. Human mapakigbahin sa mga estudyante ang pipila ka pangutana nga ilang nahinumdoman, pwede nimong isulat ang mosunod nga pangutana diha sa pisara.
Hunahunaa kon unsaon nimo pagtubag ang mosunod nga mga pangutana sa rekomend sa templo:
-
Naa ba kay pagpamatuod sa Pagpahiuli sa ebanghelyo ni Jesukristo?
Kon gikinahanglan, ipasabot nga ang Pagpahiuli mao ang “pagtukod pag-usab sa mga kamatuoran sa Dios ug sa mga ordinansa sa Iyang ebanghelyo diha sa mga tawo sa yuta” (Giya ngadto sa mga Kasulatan, “Pagpahiuli sa Ebanghelyo,” Librarya sa Ebanghelyo).
Ikonsiderar ang pagsulat og Ngano o nganong dili? human sa pangutana diha sa pisara. Dapita ang mga estudyante sa pagpamalandong sa ilang mga tubag sa duha ka pangutana.
Samtang imong tun-an ang Daniel 2 karon, dapita ang Espiritu Santo nga tabangan kang mailhan ang mga kamatuoran nga makapalig-on sa imong pagpamatuod nga gipahiuli sa Langitnong Amahan ug ni Jesukristo Ang Simbahan ni Jesukristo sa mga Santos sa Ulahing mga Adlaw.
Ang damgo ni Hari Nabucodonozor
Aron tabangan ang mga estudyante nga masabtan ang konteksto sa Daniel 2, pwedeng basahon o i-summarize sa usa ka estudyante ang mosunod nga impormasyon. Sa laing paagi, pwede ninyong tan-awon ang “God Gave Them Knowledge,” nga anaa sa ChurchofJesusChrist.org, gikan sa time code 6:17 hangtod 13:00.
Si Hari Nabucodonosor sa Babilonia adunay damgo nga nakahasol kaniya. Walay bisan usa sa iyang maalamong mga tawo ang makasulti kon unsay iyang damgo o kon unsay kahulogan niini. Isip resulta, gisugo sa hari nga patyon ang tanang maalamon nga tawo, apil si Daniel. Sa dili pa kana mahitabo, gipadayag sa Dios kang Daniel kon unsa ang damgo ug ang kahulogan niini (tan-awa sa Daniel 2:1–26).
Sa wala pa gipakigbahin ang unsay gipadayag sa Dios bahin sa damgo, gitudloan ni Daniel ang hari nga naggikan sa Dios ang interpretasyon. Gipadayag usab ni Daniel nga ang damgo maoy bahin sa “mahitabo sa umaabot nga mga adlaw” (Daniel 2:28).
Ikonsiderar ang pagbutang sa mga estudyante sa gagmayng mga grupo. Hatagi ang mga grupo og kopya sa handout nga nag-ulohang“Ang Damgo ni Hari Nabucodonozor.” Dayon i-display ang mga instruksiyon sa ubos nga hatagag panahon ang mga estudyante nga humanon ang unang lakang ayha ipakita ang ikaduhang lakang.
-
Basaha ang Daniel 2:31–43 ug butangig label ang mga elemento sa damgo ni Hari Nabucodonosor diha sa handout uban ang mga nadiskobrehan nimong hubad. Ilakip ang mga bersikulo diin nimo nakita ang hubad.
Tabangi ang mga estudyante nga mailhan nga ang Babilonyanhong gingharian ni Hari Nabucodonosor ang ulo nga bulawan (bersikulo 38). Ang ubang parte sa imahe (o estatuwa) nagrepresentar sa mga gingharian nga motungha sunod sa Babilonia.
Ang Daniel 2:44–45 maoy usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra nila kining makita.
-
Basaha ang Daniel 2:44–45, nga pangitaon ang mga pulong o hugpong sa mga pulong nga naghulagway sa bato. Isulat kini nga mga pulong palibot sa bato nga naa sa imong handout.
Samtang basahon sa mga estudyante ang mosunod nga pahayag, dapita sila sa pagsulat kon unsay girepresentahan sa bato diha sa sulod sa bato nga naa sa ilang handout.
Si Elder D. Todd Christofferson sa Korum sa Napulog Duha ka Apostoles mipasabot kon unsay girepresentahan sa bato:
Ang Simbahan [ni Jesukristo sa mga Santos sa Ulahing mga Adlaw] ang gipanagna nga gingharian sa ulahing mga adlaw nga wala gilalang og tawo apan gitukod sa Dios sa langit ug mikaylap sama sa bato nga “gisapsap nga walay kamot gikan sa bukid” nga mopuno sa yuta [Daniel 2:45; tan-awa usab ang bersikulo 35]. (“Nganong Anaa ang Simbahan,” Liahona, Nob. 2015, 111)
-
Unsay atong makat-onan bahin sa gipahiuli nga Simbahan sa Dios gikan niini nga pahayag ug gikan sa gipadayag sa Ginoo kang Daniel?
Gamit ang mga pulong sa mga estudyante, tabangi sila nga mailhan nga gitukod sa Dios Ang Simbahan ni Jesukristo sa mga Santos sa Ulahing mga Adlaw, nga mopuno sa tibuok yuta ug mobarog hangtod sa kahangtoran.
Ikonsiderar ang pagpakigbahin nga gipahayag sa Ginoo Mismo nga ang Iyang ebanghelyo molukop sa tibuok yuta (tan-awa sa Doktrina ug mga Pakigsaad 65:2). Pwedeng i-cross reference o i-link sa mga estudyante ang Doktrina ug mga Pakigsaad 65:2 ngadto sa Daniel 2:35. Pwede nimong ipasabot nga ang “milukop kini sa tibuok kalibotan” (Daniel 2:35) wala magpasabot nga moanib sa Simbahan sa Ginoo ang tanang tawo, kondili masangyaw kini sa tibuok kalibotan (tan-awa sa 1 Nephi 14:12–14).
-
Sa unsang paagi makatabang kanato ang hugpong sa mga pulong sa Daniel 2:44–45 aron masabtan kini nga kamatuoran?
Ang bato mokaylap
Human hubara ang damgo ni Hari Nabucodonosor, gipakigbahin ni Daniel ang iyang pagpamatuod nga mao ang “husto gayod nga hubad niini” (Daniel 2:45). Samtang atong palamboon ang atong personal nga mga pagpamatuod, mahimong segurado ug husto alang kanato ang mga kamatuoran sa gipahiuli nga Simbahan sa Manluluwas pinaagi sa gahom sa Espiritu Santo.
Gipakigbahin ni Presidente Russell M. Nelson ang atong gikinahanglang buhaton aron makapalambo og seguradong mga pagpamatuod para sa atong kaugalingon:
Karon, isip Presidente sa Iyang Simbahan, hangyoon ko kamo. … Buhata ang espirituhanong mga buhat aron mahibaloan ninyo mismo [nga napahiuli na ang Simbahan sa Manluluwas], ug palihug buhata kini karon. Nagkamubo na ang panahon. (“Dali, Sunod Kanako,” Liahona, Mayo 2019, 91)
Ang mosunod nga kalihokan makatabang sa mga estudyante nga ikonsiderar kon unsang espirituwal nga buhat ang kinahanglan nilang himoon aron mapalig-on ang ilang pagpamatuod sa balaanong Pagpahiuli sa Ang Simbahan ni Jesukristo sa mga Santo sa Ulahing mga Adlaw. Ikonsiderar ang pagbutang sa mga estudyante sa gagmayng mga grupo aron himoon ang kalihokan.
Tabangi ang mga estudyante sa pagpangita sa Pagpahiuli nga pamahayag. Makita kini sa Librarya sa Ebanghelyo ug sa pipila ka journal sa pagtuon. Pwede nimong hatagan og papel nga mga kopya ang mga estudyante nga dili makaakses niini. Isip alternatibo sa pamahayag, pwede nimong ipasalida ang “Hear Him,” nga anaa sa ChurchofJesusChrist.org, gikan sa time code 17:05 hangtod 22:55.
-
Basaha ang “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan.” Pangitaa ang mga kamatuoran nga gipadayag sa Manluluwas ug ang mga panghitabo nga Iyang gipahinabo sa pagpahiuli sa Iyang Simbahan.
-
Hisgoti kon nganong kini nga mga kamatuoran ug mga panghitabo importante sa Pagpahiuli sa Simbahan sa Manluluwas.
-
Hisgoti ang espirituwal nga buhat nga mahimo sa usa ka tawo aron mapalig-on ang ilang pagpamatuod nga gipahiuli ni Jesukristo ang Iyang Simbahan.
Human ang igong panahon, hangyoa ang kada grupo nga ipakigbahin ang usa ka kamatuoran o panghitabo nga mipatigbabaw nila. Dapita sila nga ipakigbahin kon nganong importante ang pagbaton og pagpamatuod niini nga kamatuoran o panghitabo ug ang espirituwal nga buhat nga pwedeng himoon sa usa ka tawo aron makabaton o mapalig-on ang ilang pagpamatuod niini.
Human makapakigbahin na ang kada grupo, dapita ang mga estudyante nga tubagon ang mosunod nga mga pangutana diha sa ilang mga journal sa pagtuon.
-
Unsang mga kamatuoran o panghitabo diha sa gipahiuli nga Simbahan sa Manluluwas ang gusto nimong mopalig-on sa imong pagpamatuod?
-
Unsang espirituwal nga buhat ang imong mahimo aron mapalig-on ang imong pagpamatuod sa balaanong Pagpahiuli sa Manluluwas sa Iyang Simbahan?
Pagsag-ulo
Pwede nimong tabangan ang mga estudyante sa pagsag-ulo sa pakisayran sa doktrinal nga kahanas ug sa mahinungdanong hugpong sa mga pulong sa kasulatan atol niini nga leksiyon ug rebyohon kini sa umaabot nga mga leksiyon. Ang mahinungdanong hugpong sa mga pulong sa kasulatan para sa Daniel 2:44–45 mao ang “Ang Dios ‘magatukod og usa ka gingharian, nga dili gayod malumpag.’” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”