« ពួកចៅហ្វាយ ៦–៨ ៖ ‹ អញនឹងនៅជាមួយនឹងឯង › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ពួកចៅហ្វាយ ៦–៨ ៖ ‹ អញនឹងនៅជាមួយនឹងឯង › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ពួកចៅហ្វាយ ២–៤; ៦–៨; ១៣–១៦ ៖ មេរៀនទី ៦៦
ពួកចៅហ្វាយ ៦–៨
« អញនឹងនៅជាមួយនឹងឯង »
បន្ទាប់ពីពួកសាសន៏អ៊ីស្រាអែលបានអធិស្ឋានទូលសុំការជួយសង្រ្គោះ ព្រះអម្ចាស់បានហៅគេឌានឲ្យជួយសង្រ្គោះពួកគេពីខ្មាំងសត្រូវ ។ ព្រះអម្ចាស់បានបង្ហាញពីកម្លាំងរបស់ទ្រង់ដោយជួយពួកសាសន៏អ៊ីស្រាអែលឲ្យយកឈ្នះកងទ័ពជាង ១៣៥,០០០ នាក់ ដែលទ័ពរបស់គេឌានមានតែ ៣០០ នាក់ប៉ុណ្ណោះ ។ មេរៀននេះអាចជួយសិស្សឲ្យមានអារម្មណ៍ចង់ពឹងផ្អែកលើព្រះយេស៊ូវគ្រីស្ទកាន់តែខ្លាំងដើម្បីទទួលបានកម្លាំង ។
ការរៀបចំសិស្ស ៖ សូមអញ្ជើញសិស្សឲ្យស្វែងរកបទគម្ពីរមួយដែលបង្ហាញពីកម្លាំងដែលយើងអាចទទួលបានពីព្រះអម្ចាស់ ។ មករៀនដោយរៀបចំខ្លួនដើម្បីចែកចាយ ។
សកម្មភាពរៀនសូត្រដែលអាចមាន
ប្រភេទខុសៗគ្នានៃកម្លាំង
នៅលើក្ដារខៀន សូមពិចារណាគូររូបមនុស្សទ្រទម្ងន់ដោយដៃនីមួយៗ ដូចរូបខាងក្រោម ៖
សូមសួរសំណួរទាំងឡាយខាងក្រោម ។ ប្រសិនបើមានប្រយោជន៍ សូមឲ្យហ្វឺតទៅសិស្សជាច្រើននាក់ ហើយឲ្យពួកគេសរសេរចម្លើយរបស់ពួកគេជុំវិញគំនូរនៅលើក្ដារខៀន ។
-
តើនរណាខ្លះដែលអ្នកនឹងចាត់ទុកថា « ខ្លាំង » ?
-
តើមនុស្សម្នាក់អាចត្រូវបានមើលឃើញថាខ្លាំងខុសគ្នាយ៉ាងណា ?
សូមពន្យល់ថា កម្លាំងមួយប្រភេទនោះគឺជាសមត្ថភាពរបស់មនុស្សម្នាក់ក្នុងការពឹងផ្អែកលើព្រះអម្ចាស់ ។
សូមពិចារណាផ្តល់ឱកាសដល់សិស្សដើម្បីវាយតម្លៃថាតើពួកគេពឹងផ្អែកលើព្រះអម្ចាស់កម្រិតណាក្នុងស្ថានភាពលំបាកដែលពួកគេអាចនឹងប្រឈមមុខ ។ អ្នកអាចនឹងប្រើស្ថានភាពដូចខាងក្រោម ឬគិតអំពីស្ថានភាពរបស់អ្នកផ្សេងដែលកាន់តែទាក់ទងនឹងសិស្សរបស់អ្នក ។
សូមគិតអំពីរបៀបដែលអ្នកទំនងជាពឹងផ្អែកលើកម្លាំងរបស់ព្រះក្នុងស្ថានភាពផ្សេងៗ ។ សម្រាប់ស្ថានភាពនីមួយៗដែលបានរាយខាងក្រោម សូមកំណត់កន្លែងដែលអ្នកនឹងដាក់ខ្លួនអ្នកនៅលើដ្យាក្រាមខាងក្រោម ។
-
ធ្វើការសម្រេចចិត្តដ៏សំខាន់
-
ការដោះស្រាយរបួស ឬជំងឺ
-
កែលម្អក្នុងនាមជាបុគ្គល
-
ធ្វើការដោះស្រាយឧបសគ្គជាមួយគ្រួសារ ឬមិត្តភក្តិ
នៅពេលអ្នកសិក្សាអំពីគេឌានថ្ងៃនេះ សូមអធិស្ឋានទូលសូមព្រះវរបិតាសួគ៌ជួយអ្នកឲ្យទទួលអារម្មណ៍យល់ពីសារៈសំខាន់នៃការពឹងផ្អែកលើព្រះអម្ចាស់ដើម្បីសុំកម្លាំងក្នុងជីវិតរបស់អ្នក ។ សូមយកចិត្តទុកដាក់ចំពោះគំនិត ឬអារម្មណ៍ដែលព្រះអាចនឹងបញ្ជូនដល់អ្នកតាមរយៈព្រះវិញ្ញាណបរិសុទ្ធ ។
គេឌាន និងពួកសាសន៏អ៊ីស្រាអែល
ដើម្បីជួយសិស្សឲ្យយល់អំពីបរិបទនៃ ពួកចៅហ្វាយ ៦ អ្នកអាចពិនិត្យមើលក្រាហ្វិកនៃវដ្តសេចក្តីឆ្មើងឆ្មៃពី មេរៀនទី ៦៥ ៖ « ពួកចៅហ្វាយ ២–៤ » ។ អ្នកក៏អាចអាន ឬសង្ខេបកថាខណ្ឌខាងក្រោមនេះផងដែរ ។
ពួកចៅហ្វាយ ៦ រៀបរាប់អំពីករណីមួយទៀត នៅពេលដែលពួកសាសន៏អ៊ីស្រាអែលភ្លេចព្រះអម្ចាស់ ហើយបានបាត់បង់ពរជ័យរបស់ទ្រង់ ។ មនុស្សមួយក្រុមដែលហៅថា ពួកម៉ាឌានបានចាប់ផ្តើមជិះជាន់ពួកសាសន៏អ៊ីស្រាអែល ។ អស់រយៈពេលប្រាំពីរឆ្នាំ ពួកម៉ាឌានបានប្លន់យកគ្រាប់ធញ្ញជាតិ និងសត្វរបស់ពួកសាសន៏អ៊ីស្រាអែល ក្នុងរដូវច្រូតកាត់ ។ ជាលទ្ធផល ពួកសាសន៏អ៊ីស្រាអែលបានរងនូវភាពក្រីក្រ ។ ដោយក្តីអស់សង្ឃឹម ពួកគេបានងាកទៅរកព្រះអម្ចាស់ដើម្បីទទួលបានជំនួយ ។ បន្ទាប់ពីពួកសាសន៏អ៊ីស្រាអែលបាននឹកឃើញព្រះអម្ចាស់ ហើយអំពាវនាវរកព្រះអម្ចាស់ ទ្រង់បានតែងតាំងបុគ្គលសុចរិតម្នាក់ដែលមានឈ្មោះថាគេឌាន ដើម្បីជួយសង្រ្គោះពួកគេពីខ្មាំងសត្រូវ ។
ដើម្បីជួយសិស្សឲ្យមើលពីរបៀបដែលព្រះអម្ចាស់បានប្រទានពរដល់គេឌាន និងកងទ័ពរបស់គាត់ចំពោះការពឹងផ្អែកលើទ្រង់ដើម្បីទទួលបានកម្លាំងរបស់ពួកគេ សូមពិចារណាប្រើសំណៅមេរៀន « ការមើលឃើញកម្លាំងរបស់ព្រះអម្ចាស់នៅក្នុងដំណើររឿងរបស់គេឌាន » ។ អនុញ្ញាតឲ្យសិស្សម្នាក់ៗស្គាល់ពីខ្លឹមសារនៃផ្នែកនីមួយៗនៃសំណៅមេរៀន ។ មានមធ្យោបាយជាច្រើនដែលអ្នកអាចធ្វើការណ៍នេះបាន ។
របៀបមួយគឺត្រូវរៀបចំសិស្សជាក្រុមដែលមានគ្នាបីនាក់ ហើយចាត់សំណៅមេរៀនមួយទៅឲ្យសមាជិកម្នាក់ៗ ។ សិស្សអាចបញ្ចប់ផ្នែករបស់ពួកគេ ហើយបន្ទាប់មកបង្រៀនសមាជិកក្រុមផ្សេងទៀតពីអ្វីដែលពួកគេបានរៀន ។ ពួកគេអាចធ្វើតាមលំដាប់លំដោយនៃផ្នែកនៅលើសំណៅមេរៀន ។
របៀបមួយទៀតគឺដើម្បីអញ្ជើញសិស្សឲ្យធ្វើការនៅផ្នែកទីមួយនៃសំណៅមេរៀនជាមួយដៃគូ ។ បន្ទាប់ពីទុកពេលគ្រប់គ្រាន់ហើយ សិស្សអាចប្តូរដៃគូ ហើយធ្វើការនៅផ្នែកទីពីរ ហើយបន្ទាប់មកទៀតជាមួយនឹងផ្នែកទីបី ។
ការពឹងផ្អែកលើព្រះអម្ចាស់
បន្ទាប់ពីសិស្សបានបញ្ចប់សំណៅមេរៀនហើយ សូមអញ្ជើញពួកគេឲ្យចែកចាយសេចក្ដីសង្ខេបនៃអ្វីដែលពួកគេបានរៀនពីដំណើររឿងរបស់គេឌាន ។
សូមឲ្យសិស្សពីរបីនាក់ចែកចាយសេចក្ដីពិតដែលពួកគេបានសរសេរសម្រាប់សកម្មភាពសិក្សាទី ៣ ។ ខាងក្រោមនេះគឺជាឧទាហរណ៍មួយ ៖ ប្រសិនបើយើងពឹងផ្អែកលើព្រះអម្ចាស់ ទ្រង់នឹងប្រទានពរយើងដោយកម្លាំងរបស់ទ្រង់ ។
-
តើរបៀបផ្សេងៗអ្វីខ្លះដែលព្រះអម្ចាស់អាចពង្រឹងយើងបាន ?
-
តើយើងអាចពឹងផ្អែកលើព្រះអម្ចាស់នៅថ្ងៃនេះយ៉ាងដូចម្ដេច ?
ដើម្បីយល់កាន់តែច្បាស់អំពីសេចក្តីពិតនេះ សូមអញ្ជើញសិស្សឲ្យស្រមៃថា មិត្តភក្តិរបស់ពួកគេបានផ្ញើសារទៅពួកគេ ។ មិត្តភក្តិនេះស្ថិតនៅក្នុងស្ថានភាពមួយដែលពួកគេមានអារម្មណ៍ថា កម្លាំងរបស់ពួកគេមិនគ្រប់គ្រាន់ទេ ។ សូមឲ្យសិស្សចែកចាយគំរូមួយចំនួនអំពីរបៀបដែលស្ថានភាពនេះអាចដោះស្រាយបាន ។ សូមឲ្យសិស្សក្នុងថ្នាក់ជ្រើសរើសស្ថានភាពមួយដែលពួកគេគិតថាមានអត្ថន័យបំផុតក្នុងការដោះស្រាយនៅថ្ងៃនេះ ។
រៀបចំចម្លើយដែលអ្នកអាចផ្ញើសារមកវិញ ។ សូមសរសេរចម្លើយនៅក្នុងសៀវភៅកំណត់ហេតុការសិក្សារបស់អ្នក ។ ប្រសិនបើអ្នកចង់ សូមគូររូបទូរសព្ទដោយមានសញ្ញាពពុះអក្សរ ហើយសរសេរចម្លើយរបស់អ្នកនៅខាងក្នុង ។ ចម្លើយរបស់អ្នកគួរតែរួមបញ្ចូលយ៉ាងហោចណាស់ចំណុចពីរដូចខាងក្រោម ៖
១. របៀបដែលគំរូរបស់គេឌានអាចជួយបាន ។
២. របៀបដែលព្រះគម្ពីរផ្សេងទៀតអាចជួយមិត្តរបស់អ្នកពឹង ផ្អែកលើព្រះអម្ចាស់ ។ ( ឧទាហរណ៍មួយចំនួនគឺ សុភាសិត ៣:៥–៦; ភីលីព ៤:១៣; អាល់ម៉ា ២៦:១២; អេធើរ ១២:២៧ ។ អ្នកក៏អាចរកមើល « Strength » នៅក្នុង Topical Guide ឬ « ទុកចិត្ត » នៅក្នុងសេចក្តីណែនាំដល់បទគម្ពីរទាំងឡាយផងដែរ ) ។
៣. អ្វីដែលអ្នកដឹងអំពីព្រះអម្ចាស់ដែលជួយអ្នកឲ្យពឹងផ្អែកលើទ្រង់ ។
៤. បទពិសោធន៍ដែលអ្នកមាន នៅពេលទទួលអារម្មណ៍ថាព្រះអម្ចាស់ពង្រឹងអ្នកឲ្យលើសពីសមត្ថភាពរបស់អ្នកផ្ទាល់ ។
សូមអញ្ជើញសិស្សមួយចំនួនឲ្យ ចែកចាយចម្លើយរបស់ពួកគេ ។ រកមើលរបៀបដើម្បីអរគុណពួកគេសម្រាប់ការចូលរួមរបស់ពួកគេ និងដើម្បីចង្អុលបង្ហាញថា តើការឆ្លើយតបរបស់ពួកគេមានន័យយ៉ាងណាចំពោះអ្នក និងមិត្តរួមថ្នាក់របស់ពួកគេ ។
វាអាចមានប្រយោជន៍ក្នុង ការចែកចាយបទពិសោធន៍ផ្ទាល់ខ្លួនអំពីរបៀបដែលអ្នកត្រូវបានពង្រឹងដោយការពឹងផ្អែក លើព្រះអម្ចាស់ ។ អ្នកក៏អាចបង្ហាញវីដេអូ « គ្រាន់តែបន្តទៅមុខ—ដោយសេចក្ដីជំនឿ » ( ChurchofJesusChrist.org ) ចាប់ពីនាទីទី ៦:០៨ ដល់ ៩:៤៧ ។ អែលឌើរ ខល ប៊ី ឃុក នៃគណៈប្រធាននៃពួកចិតសិបនាក់ បានចែកចាយបទពិសោធន៍មួយនៅពេលដែលគាត់ធ្វើជាពួកចិតសិបនាក់ប្រចាំតំបន់ថ្មី ។ គាត់ត្រូវបានចាត់តាំងឲ្យចូលរួមសន្និសីទស្តេកជាមួយប្រធាន ប៊យ ឃេ. ផាកកឺ ។ នៅពេលអែលឌើរ ឃុក បានសួរប្រធាន ផាកកឺ ពីរបៀបដែលលោកចង់រៀបចំការប្រជុំនោះ ប្រធាន ផាកកឺ បានមានប្រសាសន៍ ថា លោកចង់ធ្វើតាមព្រះវិញ្ញាណ ។
សេចក្ដីបញ្ចប់
សូមអញ្ជើញសិស្សស្វែងរកការណែនាំពីព្រះវរបិតាសួគ៌ នៅពេលពួកគេឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់ពួកគេ ។
-
តើចំណុចមួយណាក្នុងជីវិតរបស់អ្នកដែលអ្នកមានអារម្មណ៍ថាកម្លាំងខ្លួនឯងមិនគ្រប់គ្រាន់ ?
-
តើអ្នកដឹងអ្វី ឬអ្នកបានរៀនអ្វីខ្លះអំពីព្រះអម្ចាស់ ដែលនឹងជួយអ្នកពឹងផ្អែកលើទ្រង់ ?
-
តើអ្នកមានអារម្មណ៍យ៉ាងណាចំពោះព្រះអម្ចាស់ និងជំនួយរបស់ទ្រង់ ?