Mataio 7:1–5

Na Aoao e le Faaola Ona Soo ina ia Faamasino ma le Amiotonu

O Iesu Keriso o lo o nofo i luga o se papa i luga o le matafaga o le sami o Kalilaia. E toatele tagata o lo o potopoto faataamilo ia te Ia. O lo o faalogologo tagata ia Keriso o aoao atu. (Mareko 4:1) (Luka 5:1)

I Lana Lauga i luga o le Mauga, na aoao ai e Iesu Keriso Ona soo ia faamasino ma le amiotonu. I lenei lesona, o le a e maua ai le avanoa e aoao ai e uiga i le faia o faamasinoga amiotonu.

Sauniuniga a le tagata o le vasega: Valaaulia tagata o le vasega e manatunatu loloto i mea latou te iloa e uiga i faamasinoga e tatau ona latou faia ma faamasinoga e tatau ona latou faaeteete e aua nei faia. Uunai i latou e mafaufau i ni a latou fesili o i ai e uiga i le faamasino atu.

Gaoioiga e Ono Mafai Ona Aoao Ai

E ao ina tatou faamasino ma le amiotonu

Faitau i tulaga faataitai nei o se vasega, ma valaaulia tagata o le vasega e mafaufau e uiga i ituaiga faamasinoga e ono faia e se isi i tulaga taitasi. Mafaufau pe sui tulaga faataitai ina ia talafeagai atili mo tagata o le vasega.

Ua valaaulia oe e se isi e te auai i se pati o loo faaaogaina ai e le toatele o le tupulaga mea e faasaina i le Upu o le Poto.
Ua manao se isi e ese ona tulaga faatauaina mai ia te oe e avea ma au uo mamae.
O se tasi tagata o lau uarota e faia ni gaoioiga i le Sapati e ese nai lo gaoioiga e faia e lou aiga.
Ua e iloaina sau uo o loo fai ma masani le matamata i ponokalafi.

I le faagasologa o lenei lesona, o le a e aoao ai e uiga i le faamasino ma le amiotonu. O le a e maua se avanoa e toe asiasi ai i ou mafaufauga e uiga i nei tulaga faataitai ma faaaoga ai mea ua e aoaoina.

O a ni au fesili o iai e uiga i le faamasino atu?

A o e suesue i le lesona o le asō, mafaufau po o a ni ou lagona e uiga i le faamasino atu, ma faalogo i musumusuga a le Agaga Paia. Faamau lagona e faateleina ai lou malamalama e uiga i aoaoga a le Faaola i le faia o faamasinoga. Faitau le Mataio 7:1 . O lenei fuaiupu e tele ina faauiga sese faapea na aoao mai e le Faaola ia aua lava nei o tatou faamasino atu. Faitau loa i le Faaliliuga a Iosefa Samita o lenei fuaiupu (i le Mataio 7:1, vaefaamatalaga a).

E faapefea e le Faaliliuga a Iosefa Samita ona faateleina lou malamalamaga i aoaoga a le Faaola e uiga i le faamasino atu?
O le a sou manatu i le uiga o le faamasino ma le amiotonu?

Faitau le faamatalaga lenei:

Mafaufau e faaali atu le faamatalaga o lo o i lalo ina ia mafai ona mulimulitai e tagata o le vasega a o faitau leotele e se isi.

O le faamasino o se faaaogaaga taua lea o lo tatou faitalia ma e manaomia ai se faaeteetega tele, aemaise pe a tatou faia ni faamasinoga e uiga i isi tagata. O a tatou faamasinoga uma lava e tatau ona taialaina i tulaga faatauaina o le amiotonu. E na o le Atua, e silafia loto o tagata taitoatasi, e mafai ona faia faamasinoga mulimuli o tagata taitoatasi.

O nisi taimi e manatu ai tagata e sese le faamasino atu o isi i soo se mea lava. E ui e moni e lē tatau ona tatou tausalaina isi pe faamasinoina foi i latou ma le lē amiotonu, ae o le a manaomia ona tatou faamasinoina manatu, tulaga, ma tagata i le gasologa o o tatou olaga. …

… I le tele tatou te mafai ai, e tatau ona tatou faamasino i tulaga o tagata ae lē o le faamasinoina o tagata lava latou. Soo se taimi e mafai ai, e tatau ona tatou aloese mai le faia o faamasinoga sei vagana ua lava se silafia i mea moni. Ma e tatau ona tatou gauai e le aunoa i le Agaga Paia, o lē e mafai ona taialaina a tatou faaiuga.

(Autu o le Talalelei, “Faamasinoina o Isi,” topics.ChurchofJesusChrist.org)

O a upu po o fasifuaitau i lenei faamatalaga ua fesoasoani atu e te malamalama ai i faamasinoga amiotonu?

E le tatau ona tatou taulai atu i sese o isi

O le lima o lo o uuina le fua o le sinapi.

O se utupoto laau ua leva po o le tuu i luga o se ata e paepae lona talatua ua faatusao .

Faitau i le Mataio 7:2–5, ma saili mo nisi aoaoga e uiga i le faamasino atu. I le fuaiupu e 3, o lo o faasino le Faaola i se fasilaau itiiti e fai ma fasilaau (tagai i le vaefaamataga e) ma se fasi laupapa tele e fai ma utupoto (tagai i le vaefaamatalaga i).

Mafaufau pe faaali i tagata aoga ata ua aofia ai se fasi laau ma se utupoto.

I se isi faiga, aumai se fasi laau (po o se isi meafaitino laitiiti) ma se fasi laupapa tele (po o se isi meafaitino tele). Valaaulia ni tagata aoga se toalua e faapupula lenei faataoto i le tofu ma se tasi o nei meafaitino e uu i luma o o la mata.

Aisea e ono faigata ai e se isi o loo i ai se utupoto i lona mata ona eu ese se fasi laau mai le mata o se isi?
O le a se mea o e manatu o lo o aoao mai e le Faaola e ala i le tala faatusa o le utupoto ma le fasi laau?

E ono faailoa mai e tagata aoga nisi o mataupu faavae nei:

O le ala tatou te faamasino atu ai isi e aafia ai le ala o le a faamasinoina ai i tatou e le Faaola.

Afai tatou te taulai atu i le vaai ma salamo mai a tatou lava agasala ma vaivaiga, ona tatou ono lē faamasino atu lea o isi ma le amioletonu.

A uma ona tatou salamo i a tatou lava agasala, ua mafai ona sili atu le lelei o lo tatou fesoasoani i isi.

A o ta’ua e tagata aoga nei mataupu faavae po o isi mataupu faavae, ia tusi i luga o le laupapa e faaaoga ai a latou lava upu.

Aisea e taua ai ona tatou manatua nei aoaoga?
O a mea e mafai ona tatou aoaoina e uiga ia Iesu Keriso mai nei aoaoga?

Ina ia vaai i se isi faapupulaga o upumoni na aoao mai e le Faaola, matamata le “Looking through Windows” (2:19), e maua i le ChurchofJesusChrist.org.

Aisea e faigata ai i nisi taimi ona ola e tusa ai ma aoaoga a Keriso e uiga i le faamasino atu?
E mafai faapefea ona e valaaulia le fesoasoani mai lou Tama o i le Lagi, e ala ia Iesu Keriso, e fesoasoani ia te oe e faaaoga nei mataupu faavae i lou olaga?

Faataitai le faaaogaina o mataupu faavae o le faamasinoga amiotonu

Filifili se tasi o ata faataitai mai le amataga o le lesona, pe mafaufau i se ata faataitai e tali tutusa.

Mafaufau pe vaevae tagata aoga ia taitoalua pe o ni vaega toalaiti mo lenei gaoioiga. Asiasi puupuu i vaega taitasi, ma auai i a latou talanoaga pe a talafeagai.

O le a le ata faataitai na e filifilia?
O a ni faamasinoga amiotonu e tatau ona e faia e uiga i lenei tulaga?
O a ni faamasinoga e tatau ona e faaeteete e aua nei faia?
I le mulimulitai ai i aoaoga a le Faaola, e mafai faapefea ona e le faaituau ma alofa mutimutivale i faamasinoga e te faia?
E faapefea ona fesoasoani le manatuaina o au lava agasala ma vaivaiga i ituaiga tulaga faapenei?

Valaaulia ni volenitia e faasoa mai o latou manatu. Faalogo ma le totoa i tali a tagata aoga e iloilo ai pe o le a le lelei o lo latou aoaoina ai.

O nisi taimi, e faapea tagata o le uiga o aoaoga a le Faaola i le Mataio 7:1–5 e faapea e lē tatau lava ona tatou faia ni faamasinoga. Na faamanino mai e Peresitene Dallin H. Oaks o le Au Peresitene Sili, e iai nisi ituaiga faamasinoga o lo o uunaia i tatou e fai:

E lua ituaiga faamasinoga: faamasinoga mulimuli, lea o lo o tapu ona tatou faia, ma faamasinoga e faia i le ogatotonu, lea ua faatonuina i tatou e fai, ae ia faia i luga o mataupu faavae amiotonu. …

… Sei tatou mafaufau i nisi mataupu faavae po o vaega o loo taialaina ai se “faamasinoga amiotonu.”

Muamua, o se faamasinoga amiotonu e tatau, i le faauigaga, ona faia i le ogatotonu. O le a aloese mai le folafolaina atu e faapea o se tagata ua faamautinoa i ai le faaeaga po o le faailogaina o se tagata faapea ua saisaitia e faavavau i le afi o seoli. …

Lona lua, o se faamasinoga amiotonu e taiala e le Agaga o le Alii, e lē faia i le ita, tauimasui, loto palapala, po o le mea e manao i ai le tagata. …

Lona tolu, ina ia amiotonu, o se faamasinoga i le ogatotonu e tatau ona aofia i totonu o lo tatou tulaga faatausimea. E lē tatau ona tatou manatu e faaaoga ma faatino ia faamasinoga i fafo atu o o tatou tiute tauave patino. …

Lona fa, afai e mafai, e ao ina tatou aloese mai le faamasino atu seia lava lo tatou malamalama i mea moni. …

O se mataupu faavae lona lima o se faamasinoga amiotonu i le ogatotonu e faapea o se taimi e mafai ai, o le a tatou aloese mai le faamasinoina o tagata ae tau lava o le faamasinoina o tulaga aafia.

(Dallin H. Oaks, “Judge Not’ and Judging,” Ensign, Aok. 1999, 7, 9-11)

Valaaulia tagata aoga e manatunatu loloto i a latou tali i le fesili muamua. O isi fesili o mulimuli mai e mafai ona talanoaina faatasi o se vasega atoa pe mafai ona tali e tagata aoga nei fesili i totonu o a latou api talaaga mo suesuega.

O a faamasinoga e tatau ona ou faia, ma o a faamasinoga e tatau ona ou faaeteete e aua nei faia?

O le a se mea ua e aoao iai i lenei lesona e uiga i le faamasinoga amiotonu? E mafai faapefea ona fesoasoani mea ua e aoao iai ia e vaai ai i isi ma ia te oe lava e pei o le silasila a le Faaola?
Ua faapefea ona tali au fesili e uiga i le faamasino atu? Afai o lo o iai ni au fesili e lē i talia, toaga e faaauau pea lau suesuega ma saili tali mai le Agaga Paia.
O le a se mea e mafai ona fesoasoani atu ia faaitiitia ai lou faamasinosino o isi i lou olaga?

Mafaufau e molimau atu i le faamasino ai ma le amiotonu.

Manatu ma Talaaga o Faamatalaga

E faapefea ona silasila le Atua i Ana fanau?

Na aoao mai e Peresitene Russell M. Nelson, e tutusa uma i tatou i le silafaga a lo tatou Tama Faalelagi:

E tofu i tatou ma se gafatiaga paia ona o tagata taitoatasi o se atalii po o se afafine o le Atua. E tutusa tagata taitoatasi i Lana silafaga. O faatatauga o lenei upumoni e loloto. Uso e ma tuafafine, faamolemole faalogo ma le toto’a i le mea o le a ou fai atu ai. E le sili le alofa o le Atua i le tasi ituaiga [tagata] nai lo le isi. Ua manino Lana aoaoga faavae i lenei mataupu. Ua Ia valaaulia tagata uma e o mai ia te Ia, “uliuli ma le paʼepaʼe, pologa ma le saoloto, tane ma le fafine” [ 2 Nifae 26:33 ].

(Russell M. Nelson, “Ia Faamuamua le Atua,” Ensign po o le Liahona, Nov. 2020, 94)

E mafai faapefea e le atinaeina o uiga faaKeriso ona aafia ai le ala e te faamasino atu ai?

Na aoao mai e Elder Dale G. Renlund o le Korama a Aposetolo e Toasefululua e uiga i le faapei o Keriso, e mafai ona fesoasoani mai ia i tatou e faamasino ai ma le amiotonu.

Ina ia avea e faapei o Keriso, e naunau se tagata i le alofa mutimutivale. O tagata e naunau i le alofa mutimutivale e le faamasinosino; latou te faailoa atu le agaalofa i isi, aemaise ia i latou o e le taualoa, e tauagafau, e agalelei, ma aga faatamalii. O nei tagata latou te taulimaina ma le alofa ma le malamalama tagata uma, e tusa lava po o a o latou tulaga e pei o lanu, itupa, sootaga faalelotu, faiā faalefeusuaiga, tulaga faaletamaoaiga, ma ituaiga, itu’au, po o eseesega faaleatunuu. E fuaao e le alofa faaKeriso nei mea uma.

(Dale G. Renlund, “Ia Fai le Amiotonu, Ia Naunau i le Alofa, ma Ia Feoai ma Lou Atua ma le Lotofaamaulalo,” Ensign po o le Liahona, Nov. 2020, 111)