Seminare
Mataio 28; Luka 24; Ioane 20

Mataio 28; Luka 24; Ioane 20

O Molimau a le Faaola Toetu

Mary Magdalene encountering the resurrected Christ.

Na faaali atu Iesu Keriso i le toatele o tagata taitoatasi ma vaega ina ua mavae Lona Toetu. E mafai ona fesoasoani lenei lesona e faamalosia ai lau molimau o loo soifua le Faaola a o e suesue i aafiaga o nisi o nei molimau.

Faasoaina atu o molimau ia Iesu Keriso. Vaavaai mo avanoa e faasoa atu ai molimau ia Iesu Keriso, e aofia ai molimau a aposetolo ma perofeta. O le a valaaulia e lenei mea le Agaga Paia e molimau atu i le upumoni.

Sauniuniga a le tamaitiiti aoga: Valaaulia tamaiti aoga e faitau le Eteru 12:5–9 ma mafaufau i le fesili lenei: E mafai faapefea ona e iloa o loo soifua Iesu Keriso e aunoa ma le vaai atu ia te Ia?

Gaoioiga e ono Mafai Ona Aoao Ai

Talitonu e aunoa ma le vaaia

Ia mautinoa e faasao ia lava se taimi mo tamaiti aoga e tuuina atu ai a latou molimau ia Iesu Keriso i le tau faaiuiuga o le lesona.

Vaai i le ata lenei o le Faaola toetu o loo ua tulai a‘e mai le tuugamau. Tusi i lau api faamaumau suesuega mea e te ono faasoa atu i se tasi e masalosalo na tupu lenei mea taua tele. O a tala faatusipaia o le Toetu o le Faaola e mafai ona e faasoa atu ia i latou?

The resurrected Jesus Christ emerging from the Garden Tomb. Christ is portrayed stepping out of the tomb. He is depicted wearing white robes. Flowers are blooming near the entrance to the tomb.

  • Aisea e te manatu ai e taua i le Alii lo tatou mauaina taitoatasi o a tatou lava molimau o loo soifua o Ia?

Toemanatu i lau molimau o loo soifua Iesu Keriso ma le auala o le a faamanuiaina ai oe e ala i le faamalosia o lea molimau. O le suesueina o upu a i latou o e iloa o loo soifua le Faaola e mafai ona faamalosia ai lo tatou faatuatua i Lona soifua moni e tusa lava pe masalosalo isi o siomia i tatou. A o e suesue i le aso, ia mafaufau i uunaiga mai le Agaga Paia e faamautu ai le moni o nei tala i lou loto ma lou mafaufau.

O molimau o le Feagaiga Fou

Suesue ia le itiiti ifo ma le tasi o tala nei o le Feagaiga Fou e uiga i tagata na vaai i le Faaola toetu. Ona tusi lea o au tali i fesili e lua o loo mulimuli mai ma isi manatu ma uunaiga e ono oo mai ia te oe.

Mafaufau e tuu ni ata e faatusaina iai tala nei e fa, faatasi ai ma mau faasino fesootai, i itu eseese o le potu. Valaaulia tamaiti aoga e asiasi i itu taitasi pe taitoatasi po o ni vaega toalaiti ma suesue i tala e faatatau i ai.

I se faiga fesuiai, e fua i manaoga o tamaiti aoga, atonu e faaalu e tamaiti aoga se taimi tele atu e suesue loloto ai se tasi o tala nei nai lo le suesueina otooto o tala uma e fa. O nisi manatu mo le suesueina o nei tala o loo maua i le vaega o “Gaoioiga Faaopoopo e Aoao ai” o le lesona.

  1. Tamaitai faamaoni: Mataio 28:1–10

  2. O soo e toalua i le ala i Emau: Luka 24:13–35

  3. Maria le Makatala: Ioane 20:11–18

  4. Toma: Ioane 20:24–29

  • O le a se mea na e aoaoina e mafai ona faamalosia ai lou faatuatua o loo soifua Iesu Keriso?

  • O le a se mea na e aoaoina e uiga i le Faaola mai Ana fegalegaleaiga ma lenei tagata po o nei tagata?

Isi molimau faatusi paia

O lau molimau i le Faaola e mafai ona faamalosia atili e ala i le suesueina o molimau faaopoopo o loo i isi tusitusiga paia. Suesue le tasi po o le sili atu o fuaitau nei o mau. Ona tusi lea o au tali i fesili e lua o loo mulimuli mai ma nisi lava manatu ma uunaiga e ono oo ane ia te oe.

Ia manatua o nei fuaitau taitasi o loo i ai se fuaitau o le atamai i aoaoga faavae. Mafaufau e valaaulia tamaiti aoga e faailoga nei fuaitau i se ala iloga ina ia mafai ona latou mauaina gofie.

  1. O tagata i Amerika anamua a o lei leva ona mavae le Toetu o le Faaola: 3 Nifae 11:8–17

  2. Iosefa Samita ma Sini Rikitone: Mataupu Faavae ma Feagaiga 76:19–24

  • E mafai faapefea e mea na e faitauina ona faamalosia ai lou talitonuga o loo soifua Iesu Keriso?

  • O a ni malamalamaaga faaopoopo e uiga ia Iesu Keriso na e mauaina?

Molimau i ona po nei

O le isi auala taua e faamalosia ai lau molimau o loo soifua Iesu Keriso e ala lea i le suesueina o molimau a “molimau faapitoa o le suafa o Keriso i le lalolagi atoa” ( Mataupu Faavae ma Feagaiga 107:23,), o Aposetolo faauuina i o tatou aso.

Mafaufau e sui se tasi o faamatalaga nei i molimau a nisi o Aposetolo soifua.

Atonu e te manao e matamata le vitio “Come unto Me” (mai le faailotaimi 16:18 i le 16:47) ma le vitio “The Only True God and Jesus Christ Whom He Hath Sent” (2:26), o loo maua uma i le ChurchofJesusChrist.org. Pe faitau foi i saunoaga a Peresitene Eyring ma Elder Holland, o molimau e toalua o onaponei a Iesu Keriso.

17:37

Na molimau mai Peresitene Henry B. Eyring o le Au Peresitene Sili:

Official Portrait of President Henry B. Eyring taken March 2018.

O au o se molimau o le Toetu o le Alii ma e mautinoa e pei lava sa ou i ai iina i le afiafi faatasi ma soo e toalua i le fale i le ala i Emau. Ou te iloa o loo soifua o Ia ma le mautinoa e pei foi o Iosefa Samita ina ua ia vaai i le Tama ma le Alo i le malama o se taeao susulu i le togavao i Palamaira.

O le Ekalesia moni lenei a Iesu Keriso.

(Henry B. Eyring, “O Mai ia te Au,” Ensign po o le Liahona, Me 2013,- 25)

2:26

Na molimau mai Elder Jeffrey R. Holland o le Korama a Aposetolo e Toasefululua:

Official Portrait of Elder Jeffrey R. Holland. Photographed January 2018.

Ou te molimau atu o Iesu Keriso o le Alo moni, soifua o lo tatou Atua moni soifua. Ou te molimau atu sa toetu moni mai o Ia mai le tuugamau ma, ina ua mavae lona afio ae i Lona Tama e faamaea le faagasologa o lena Toetu, sa Ia faaali atu, pea lava pea, i le faitau selau o soo i le Lalolagi Tuai ma i le Lalolagi Fou. Ou te iloa o Ia o le Paia e Toatasi o Isaraelu, o le Mesia o le o le a i ai se aso o le a toe afio mai ai i le mamalu aoao, e nofotupu i le lalolagi o le Alii o alii ma Tupu o tupu.

(Jeffrey R. Holland, “O Le Atua Moni e Toatasi Atoa Ma Le Na Ia Auina Mai o Iesu Keriso Lea,” Ensign po o le Liahona, Nov. 2007, 42)

  • Aisea e te manatu ai ua tuuina mai e le Faaola ia i tatou ni molimau i ona po nei e faaopoopo atu i Ana molimau anamua?

O lau molimau

Faitau le Ioane 20:29, ma vaavaai mo upumoni na aoao atu e Iesu Keriso ia Toma e uiga i le mauaina o se molimau.

  • O le a se mea ua aoao mai e lenei fuaiupu ia te oe e uiga i le fausiaina o lau molimau ia Iesu Keriso?

O se tasi o upumoni e mafai ona tatou aoao mai i aoaoga a le Faaola i lenei fuaiupu e faapea, ua faamanuiaina i tatou i le filifili ai e talitonu o loo soifua Iesu Keriso tusa lava pe tatou te lei vaai ia te Ia.

Faaaoga le taimi o totoe o le lesona e tuu atu ai i tamaiti aoga le avanoa e molimau ai i le Faaola soifua. Filifili mai fesili fautuaina nei, pe faaaoga nisi metotia e fesoasoani ai i tamaiti aoga e mafaufau loloto ma faasoa mai a latou molimau.

Mafaufau e valaaulia tamaiti aoga e tusi a latou molimau ia latou api faamaumau suesuega pe usu faatasi o se vasega se viiga a o lei faasoaina leotele ane a latou molimau.

Faaopoopo atu lau molimau patino e uiga i le Faaola i molimau sa e suesueina i le aso. O se tasi o auala o le faia o lenei mea, mafaufau e tusi faamaumau tali i fesili e pei o nei i lau api faamaumau suesuega.

  • O a faamaoniga ua e vaaia i lou olaga ma i olaga o isi e faapea o loo soifua Iesu Keriso?

  • O le a se taimi na e lagona ai le molimau mai o le Agaga Paia ia te oe e uiga i le moni o Iesu Keriso?

  • O le a se fautuaga e te tuuina atu i se tasi e lei mautinoa lelei pe latou te talitonu o loo soifua le Faaola?

Tala ma Faamatalaga o Talaaga

Aisea na i ai manu‘a mai le Faasatauroga i le tino toetu o Iesu?

Na tusia e Elder Jeffrey R. Holland o le Korama a Aposetolo e Toasefululua:

Official Portrait of Elder Jeffrey R. Holland. Photographed January 2018.

“E ui ina mafai e le mana o le Toetu ona---ma e aunoa ma se masalosalo e i ai se aso o le a---toefaaleleia ai atoatoa ma faafouina manu’a mai le faasatauroga, ae na filifili ia Keriso e faatumauina pea na manu’a mo se faamoemoega, e aofia ai lona afio mai i aso gataaga i le taimi o le a ia faaali mai na faailoga ma faailoa mai ai na manu’a o ia “i le fale o [ana] uo” [ Sakaria 13:6 ; Mataupu Faavae ma Feagaiga 45:52 ].

O manu’a i ona lima, vae, ma le itu o faailoga, e faapea, i le olaga faitino, e tutupu mea tiga e oo lava i e mama ma atoatoa, o faailoga e faapea o mafatiaga e le o se faamaoniga e faapea e le alofa le Atua ia i tatou. O se mea taua iloga ma le tumu i le faamoemoe e faapea, o le Keriso faamanu’alia lē e afio mai mo lo tatou laveaiga.

(Jeffrey R. Holland, Christ and the New Covenant [1997],258–59

Ioane 20:17 . O le a le uiga o le fetalaiga a le Faaola ina ua ia fetalai atu ia Maria le Makatala e “aua e te tago [atu] ia te [Ia]”?

Sa faamalamalama mai e Elder Bruce R. McConkie (1915–85) o le Korama a Aposetolo e Toasefululua:

Head and shoulders portrait of Elder Bruce R. McConkie.

O loo sii mai e leKing James Version le fetalaiga a Iesu “Aua e te tago mai ia te au.” O le Faaliliuga a Iosefa Samita o loo faitauina “Aua e te taofi mai ia te au.” O faaliliuga eseese mai le gagana Eleni ua aumaia ai le fuaitau faapea “Aua e te pipii mai ia te au” po o le “Aua e te taofia au.” O nisi ua aumaia ai le faauigaga “Aua lava e te toe pipii mai ia te au,” po o le “Aua lava e te toe opo mai ia te au.” Ua ta’ua e nisi le tuu le taofi o ia po o le pipii atu ia te ia, ua tuua ai le taumatega faapea sapipii atu Maria ia te ia. E i ai mafuaaga taua e faapea ai o le manatu na avatu ia Maria e le Alii Toetu o le: “E le mafai ona e taofi au iinei, aua o le a ou alu ae i lo’u Tama.”

(Bruce R. McConkie, The Mortal Messiah: From Bethlehem to Calvary [1981], 4:264)

O a vitio o loo maua e fesoasoani ia te au e vaai faalemafaufau ai i tala o le faaali mai o le Faaola toetu?

Atonu e te manao e matamata i vitio nei (o loo maua i ChurchofJesusChrist.org):“Jesus Is Resurrected” (4:05)

4:1

“Christ Appears on the Road to Emmaus” (3:32)

3:34

“Blessed Are They That Have Not Seen, and Yet Have Believed” (2:29)

4:1

Gaoioiga Faaopoopo e Aoao Ai

O se isi filifiliga mo le amataga o le lesona

I le amataina ai o le lesona, mafaufau e fai atu i se tamaiti aoga e faasoa mai le igoa o se tagata latou te iloa lelei ae e lei feiloai lava i ai le vasega ma le faiaoga. Ona faafoliga lea i se uiga faaataata e te masalomia le i ai moni o lea tagata. Fai atu i tamaiti aoga ni fesili e pei o nisi nei: E mafai e se isi i lenei vasega ona faamautu mai o loo i ai lenei tagata? Afai e lava nisi o i matou e tetee i mea na e ta‘u mai ia i matou, mata e ono amata ona e masalomia o loo i ai lenei tagata?

Ona valaaulia lea o tamaiti aoga e mafaufau pe faapefea ona latou tali atu i se tasi e masalosalo i le i ai o Iesu Keriso.

Auala i Emau

Afai o le faaaluina o se taimi faasili i le tala i le Luka 24:13–35 o le a manuia ai tamai aoga, mafaufau e fai atu fesili nei:

  • Aisea o le a faaaoga ai e le Faaola tusitusiga paia e fesoasoani ai i le au soo ia malamalama atili i Lana misiona?

  • O a mau e ono mafai ona e faaaogaina e fesoasoani ai i se uo ia malamalama atili i le misiona a le Faaola?

  • Na faapefea ona faamatala e le au soo o latou lagona, e pei ona tusia i le fuaiupu 32 ? O le a le mea na taitai atu ai le au soo e lagona mea sa latou faia? E faapefea ona e faamatalaina uunaiga ua e maua mai le Agaga Paia?

  • Aisea e taua ai le aloaia e le au soo o le Faaola “i le tofitofiina o le areto”? ( fuaiupu 35). E faapefea ona faatatau lenei mea i o tatou olaga?

Filifili e talitonu

Valaaulia tamaiti aoga e faitau le Ioane 20:1–8, ma vaavaai mo mea na faia e Ioane ina ua uma ona faalogo e uiga i le aafiaga o Maria le Makatala. (Manatua o Ioane e taua o ia lava “o le isi soo” i lenei fuaitau atoa.)

Valaaulia le vasega e faatusatusa le tali a Ioane o loo tusia i le Ioane 20:8 i le faamatalaga a Toma o loo tusia i le Ioane 20:24–25 . Ona fai atu lea o fesili nei:

  • O a nisi o mea e te talitonu i ai e aunoa ma le manaomia o se faamaoniga faitino?

  • O a ni auala ua faamanuiaina ai oe mo le filifili e talitonu e aunoa ma se faamaoniga faitino? (Tagai Ioane 20:29 .)

  • E mafai faapefea ona e faamalosia lou faatuatua i mea moni e le mafai ona e vaaia? (Tagai Alema 32:16–21 ; Eteru 12:6 .)