Mateo 15:1–9

Basaha ang mga mosunod nga sitwasyon.

• Ang pamilya sa usa ka batan-ong babaye adunay tradisyon nga seryosohon gayod ang edukasyon. Siya gilaoman gayod sa pagbuhat sa mga buluhaton ug mga pasulit.

• Sulod sa pipila ka henerasyon, gihimong prayoridad sa pamilya sa usa ka batan-ong lalaki nga mag-ampo kada buntag ug kada gabii.

• Adunay umaabot nga dakong sosyal nga kalihokan diin daghang mga babaye ang magsul-ob og dili ligdong nga bisti. Kinahanglang magdesisyon ang usa ka batan-ong babaye kon unsa ang iyang isul-ob para sa okasyon.

• Sulod sa pipila ka tuig, daghan sa kabatan-onan sa usa ka partikular nga ward ang dili sinserong misalmot sa ilang mga klase sa Sunday School. Lakip niini ang pagka-late, dili maminaw, ug pag-text o pagdula sa ilang mga cellphone sa panahon sa klase.

• Tradisyon sa usa ka eskuwelahan nga daog-daogon sa mga mas tiguwang nga estudyante ang mga mas batang estudyante.

Tubaga ang mosunod nga mga pangutana, nga may kalabotan sa miaging mga sitwasyon.

• Ngano kaha nga importante man ang atong mga tradisyon?

• Sa unsang paagi kaha makaapekto ang atong mga tradisyon sa atong abilidad nga mahimong sama kang Jesukristo?

• Ngano kaha nga lisod man para sa usa ka tawo nga susihon ang ilang mga tradisyon o usbon ang ilang dili angay nga mga tradisyon?

Samtang gitun-an nimo kini nga leksiyon, makat-onan nimo ang pipila sa mga pagtulon-an ni Jesukristo mahitungod sa mga tradisyon. Ang mga tradisyon mao ang “mga tinuohan ug mga nabatasan nga sinunod gikan sa usa ka kaliwatan ngadto sa lain” (Giya ngadto sa mga Kasulatan, “ Tradisyon, Mga ,” ChurchofJesusChrist.org). Sa imong journal sa pagtuon, paglista og pipila ka tradisyon nga nahimong bahin sa imong kinabuhi.

Aron masabtan kon unsa ang gitudlo sa Manluluwas, makatabang kon mahibaloan ang konteksto, o background, sa Mateo 15 .

Tabang sa konteksto para sa Mateo 15: Sa panahon sa Manluluwas, gitudlo sa mga lider sa Judeo ang sinulat nga balaod ni Moises ingon man usab ang sinulti nga balaod nga wala gihatag sa Dios pero nahimo kini nga tradisyonsa mga tawo. Naglakip kini sa mga butang sama sa pag-ihap sa mga lakang sa Adlaw nga Igpapahulay ug sobrang paghugas sa mga kamot sa usa ka tawo sa dili pa mokaon, nga nagrepresentar sa espirituhanong kaputli sa usa ka tawo. Gigamit ang mga bahin sa tradisyonal nga balaod para sa mga hinakog nga rason. Pananglitan, ang pagtahod sa imong amahan ug inahan usa ka sugo sa balaod ni Moises (tan-awa sa Exodo 20:12), pero gigamit sa pipila ka indibidwal ang sinulti nga balaod aron mangatarongan sa pagsupak niini nga sugo pinaagi sa pag-ingon nga ang ilang kuwarta o mga kapanguhaan gihalad isip “gasa” ngadto sa Dios ( Mateo 15:5) ug busa dili kini mahimong gamiton aron sa pagtabang sa pag-atiman sa ilang mga tiguwang nga ginikanan. Kini nga mga kabag-ohan dili kabahin sa orihinal nga tinguha sa balaod ug mga sugo ug dili kini makapahimuot sa Dios.

Basaha ang Mateo 15:1–9 , ug pangitaa kon unsay gitudlo sa Manluluwas mahitungod sa mga tradisyon.

• Unsa kaha ang gitudlo sa Manluluwas niini nga mga bersikulo? Tukia ang usa o duha sa mga kamatuoran nga imong nakita.

Ang pipila ka kamatuoran nga lagmit nga imong gituki mao nga ang dili angay nga mga tradisyon mahimong hinungdan nga balibaran o isalikway sa mga tawo ang pulong sa Dios ug kon gusto nato nga mahiduol sa Dios, kinahanglan natong unahon ang Iyang mga sugo kay sa bisan unsang mga tradisyon nga lagmit nga aduna kita.

• Sa unsang paagi nga ang pagsabot sa tabang sa konteksto makatabang kanimo nga mas masabtan ang mga pagtulon-an sa Manluluwas?

• Ngano kaha nga ang Manluluwas adunay lig-ong pagbati sa pagsakto o pagtangtang niini nga mga tradisyon?

Si Elder William K. Jackson sa Seventy nagpaambit og pananglitan sa indibidwal nga gipanalanginan pinaagi sa pagsusi sa ilang mga tradisyon ug pag-usab niini aron motukma sa mga pagtulon-an sa Manluluwas. Ikonsiderar ang pag-awhag sa mga estudyante nga basahon ang mga bahin sa pamahayag ni Elder Jackson nga “Ang Kultura ni Kristo” (Liahona, Nob. 2020, 48–50), nga anaa sa ChurchofJesusChrist.org, o tan-awon ang video nga “Ang Kultura ni Kristo,” nga anaa sa ChurchofJesusChrist.org, gikan sa mga code sa oras nga 0:30 hangtod sa 2:16 ug 8:39 hangtod sa 9:55.

10:10

Ang hagit sa pagpili tali sa pagsunod sa kalibotanong tradisyon ug pagsunod sa mga sumbanan sa Dios kanunay nga anaa para sa Iyang mga katawhan (tan-awa sa Levitico 18:30 ; Mga Buhat 16:19–24 ; Mosiah 1:5 ; Doktrina ug mga Pakigsaad 93:39). Pamalandongi ang usa sa mga tradisyon nga imong gihisgotan sa sinugdanan niini nga leksiyon, o paghunahuna og laing tradisyon. Samtang imong tubagan ang mosunod nga pangutana, hunahunaa kon sa unsang paagi nakaapekto kini nga tradisyon sa imong abilidad nga mas mahiduol sa Manluluwas.

• Unsaon man nato pagsulti kon ang usa ka tradisyon makapalayo sa atong mga kasingkasing gikan sa Dios (tan-awa sa Mateo 15:8) o makapaduol sa atong mga kasingkasing ngadto Kaniya?

Hinumdomi ang mga tradisyon nga imong girekord diha sa imong journal sa pagtuon. Ikonsiderar ang pagdugang og bisan unsang dugang pang mga tradisyon nga imong nahunahunaan samtang nagtuon ka karong adlawa. Mahimo usab kang maglakip og mga tradisyon sa lugar o nasod nga imong gipuy-an. Pag-andam sa pagsusi niining mga tradisyon pinaagi sa pagbasa sa mosunod nga pamahayag ni Presidente Cheryl C. Lant, kanhi Kinatibuk-ang Presidente sa Primary. Unya pamalandongi ang nagsunod nga mga pangutana.

8:59

Unsa nga mga matang sa mga tradisyon ang kita aduna? Ang pipila niini tingali nagagikan sa atong mga katigulangan, ug karon ato kining gihatag ngadto sa atong kaugalingong mga anak. Kini ba mao ang unsay buot nato nga kini mahimo? Kini ba pinasikad sa mga buhat sa katarung ug hugot nga pagtuo? Kini ba sa kadaghanan materyal lang o kini ba mahangturon? Kita ba sa tinuyo naghimo og matarung nga mga tradisyon, o mouyon lamang sa unsay mahitabo sa atong kinabuhi? Ang ato bang mga tradisyon gihimo agi og pagtubag sa malanog nga mga mensahe sa kalibutan, o kini ba naimpluwensiyahan pinaagi sa gamay nga hinagawhaw nga tingog sa Espiritu? Ang mga tradisyon ba nga atong gihimo diha sa atong mga pamilya makapahimo nga mas sayon alang sa atong mga anak sa pagsunod sa buhing mga propeta, o kini mohimo hinoon nga lisud alang kanila?

(Cheryl C. Lant, “Matarung nga mga Tradisyon,” Ensign o Liahona, Mayo 2008, 13)

• Unsa nga mga tradisyon ang nakatabang kanimo nga mahimong mas mahisama sa Langitnong Amahan ug ni Jesukristo ug magpokus sa kon unsa ang pinakaimportante?

• Unsa nga mga tradisyon ang lagmit nga makapalayo kanimo kang Jesukristo ug makapugong kanimo sa pagbuhat sa mga butang nga pinakaimportante? Unsa nga mga lakang ang lagmit nga kinahanglan nimong buhaton aron matangtang kini nga mga tradisyon gikan sa imong kinabuhi?

• Sa unsang paagi nga ang ehemplo sa Manluluwas makatabang kanimo sa pag-ila ug pagpokus sa nga tradisyon nga pinakaimportante?

Sa iyang pamahayag nga “Paghinulsol ug Pag-usab” (Liahona, Nob. 2003, 39), si Presidente Dallin H. Oaks sa Unang Kapangulohan naghatag og daghang mga pananglitan sa “mga elemento sa … pamatasan nga [lagmit] nga sukwahi sa mga sugo, mga pakigsaad, ug kultura sa ebanghelyo.” Ang atong pamatasan lagmit nga lahi sa mga tradisyon sa kalibotan kon may kalabotan sa mga butang sama sa kaputli ug pornograpiya, pagsimba, pagkamatinuoron, ug ranggo o estado sa katilingban.

17:20

Sa pamahayag nga “Ang Kultura ni Kristo” (Liahona, Nob. 2020, 48–50), ni Elder William K. Jackson sa Seventy mikompara sa yutan-ong mga kultura ngadto sa kultura ni Kristo. Ikonsiderar ang pagtan-aw o pagbasa sa tanan o mga bahin sa iyang pamahayag, nga anaa sa ChurchofJesusChrist.org.

10:10

Ang mosunod nga video naghatag og usa ka pananglitan sa kon unsaon pagpabilin sa pangkulturang mga tradisyon ug mosunod gihapon sa Manluluwas.

2:27