Mataio 14:22–33

“Aua Tou Te Matatau”

Jesus Christ depicted walking on the sea of Galilee toward a small fishing boat. The Apostles are in the fishing boat and are watching Christ walk toward them. There are storm clouds in the sky.

Na savali Iesu Keriso i luga o le vai ma valaauliaina Peteru ia faapena foi ona ia faia. Ua vaaia e Peteru le afā ma peau o le sami, ua afua ai lea ona goto o ia ma alaga atu i le Faaola mo se fesoasoani. E mafai e lenei lesona ona fesoasoani ia te oe e mulimulitaia le faataitaiga a Peteru e liliu atu i le Faaola i taimi o tulaga faamatau ma lofituina.

Tuuina atu o se taimi i tamaiti aoga e tali mai ai. O isi taimi e ono lē vave ona tali mai tamaiti aoga i se fesili aoga tele. Aua e te fefe e tuu atu se taimi i tamaiti aoga e mafaufau ai i le fesili. E i ai taimi, e manaomia ai e tamaiti aoga se avanoa e manatunatu ai i mea ua fesiligia ai i latou ma mafaufau pe faapefea ona latou tali i ai. O lena manatunatuga e mafai ona auala mai ai faatonuga a le Agaga Paia.

Sauniuniga mo tagata aoga: Valaaulia tamaiti aoga e mafaufau loloto i fesili nei mai le Sau, Mulimuli Mai ia te Au: “Mata o le a se mea na musuia Peteru e tuua le saogalemu o lona vaa i le totonugalemu o le Vai o Kalilaia i le taimi o se afā matautia? O le a se mea na taitaiina o ia e talitonu ai afai e mafai e Iesu ona savali i luga o le vai, e mafai foi e ia?” (“Mati 27–Aperila 2. Mataio 14; Mareko 6; Ioane 5–6: ‘Aua Tou Te Matatau,’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2023).

Galuega Faatino e Mafai ona Fai e Aoao Mai Ai

E mafai ona faatoafilemuina i tatou e Iesu i taimi o afa o le olaga

E uunaia tamaiti aoga e lenei lesona ia liliu atu ia Iesu Keriso mo le filemu ma le saogalemu i taimi o puapuaga. I se lesona iloilo o le a fai i se taimi o i luma, o le a valaaulia tamaiti aoga e matauina lo latou sologa i luma i le mauaina lea o le filemu ia Keriso i taimi faapenei. Ia maitau o lo o tele manatu eseese i totonu o le vaega mo “Galuega Faatino Faaopoopo e Aoao Mai Ai” e mafai ona faaaogaina i lenei lesona. Filifili i galuega faatino e sili ona talafeagai mo tamaiti aoga.

Jesus Christ depicted walking on the water of the Sea of Galilee. The Apostle Peter is in the water. Christ is extending His hand to Peter to prevent Peter from sinking.

Mafaufau pe tusi le upusii lenei mai le Mataio 14:30 i luga o le laupapa ma faaali faalautele lenei ata a o felafolafoai tamaiti aoga i le fesili o le a mulimuli mai.

O loo faaalia mai e lenei ata se taimi faamatau tele i le olaga o le Aposetolo o Peteru. O loo faapea mai le Mataio 14:30 “Ua fefe [Peteru]; ona afua ai lea ona goto, ua alaga, ua faapea mai, Le Alii e, ia e faaola mai ia te au.”

O a ni tulaga faaona po nei e mafai ona mafua mai ai ni lagona o tagata talavou e pei o Peteru?

Valaaulia tamaiti aoga e mafaufau loloto filemu i le fesili o le a mulimuli mai.

O i ai se mea i lou olaga o loo mafua ai ona e lagonaina le fefe po o se lagona e peiseai o lo o e magoto?

Mafaufau loloto mo sina taimi po o fea po o ai foi e masani ona e liliu atu i ai mo le fesoasoani ma le filemu i taimi e faapenei ai ou lagona.Ina ua maea ona ia fafagaina faavavega tagata e sili atu le aofaiga ma le lima afe, na talosagaina e Iesu Keriso Ona soo “e o ae i le vaa, e muamua atu ia te ia i le tasi itu” o le Vai o Kalilaia ( Mataio 14:22).

Faitau i le Mataio 14:23–33, ma vaavaai mo upu moni e uiga i le Faaola e mafai ona fesoasoani ia te oe e liliu atu ai ia te Ia i taimi ua e lagonaina ai le fefe po o se lagona e peiseai o e magoto. Ia e amanaia mafaufauga ma lagona mai le Agaga Paia. E mafai ona Ia fesoasoani ia te oe e mataulia pe faapefea ona faaaogaina nei upu moni i mea o loo tutupu ia te oe i lou olaga. Tusi upu moni ua e matauina i totonu o lau api faamaumau suesuega po o i totonu o au tusitusiga paia. (Maitau: “O le leoleoga e fa o le po” sa amata mai i le 3:00 i le vaveao seia oo i le 6:00 i le vaveao)

A ua lava se taimi ua tuuina i tagata aoga e tusitusi ai, valaaulia tagata aoga e tusi upu moni ua latou aoaoina i luga o le laupapa. A manaomia, mafaufau pe fai i ai fesili e pei o nei e fesoasoani ai i tagata aoga e faaauau ona iloilo ma aoao mai lenei faamaumauga.

O a upu moni ua e aoaoina mai lenei faamaumauga?

O fea sa i ai le taulaiga a Peteru a o ia tumau i luga o le vai? O le a le mea na afua ai ona magoto o ia?

O le a se mea ua e aoaoina e uiga ia Iesu Keriso e mafai ona fesoasoani ia te oe e liliu atu ai ia te Ia i taimi ua e lagonaina ai le fefe po o le lofituina?

O le galuega faatino lenei ua faamoemoeina e fesoasoani i tagata aoga ia malamalama ai pe faapefea e le tepa taulai atu ia Iesu Keriso ona fesoasoani i o latou faafitauli. E mafai ona tepa taulai i isi upu moni ese mai le faamaumauga, e fua i luga o manaoga o tagata aoga.

O le gaoioiga o loo i lalo e mafai ona faamaeaina faatasi e le vasega e faaaoga ai fetuunaiga nei:

Faaali se ata o Iesu Keriso i se tasi itu o le potu. Valaaulia tagata aoga e tusi se mea e latou te lagonaina ai le lofituina i luga o se fasi pepa ma tuu i le isi itu o le potu. Ona valaaulia lea o i latou e sui le latou taulaiga mai le tasi itu o le potu i le isi e pei ona fautuaina mai e le galuega faatino o loo i lalo.

Tepa taulai i le Faaola

O loo aoao mai e le faataitaiga a Peteru le mea e tatau ona tatou tepa taulai i ai. Manatua le mea na tupu ia Peteru a o ia tepa taulai ia Iesu Keriso ma le mea na tupu ina ua suia lana taulaiga i le afā sa siomia ai o ia (tagai i fuaiupu 28–31). Tusi i luga o se fasi pepa se mea i totonu o lou olaga po o lou lumanai e mafai ona e lagonaina ai le lofituina. Tuu lenei pepa i lou itu tauagavale. Tuu laia o se ata o Iesu Keriso po o se isi mea e faamanatu ai ia te oe o Ia i lou itu taumatau. Feauauai le faataulaiga o ou mafaufauga ma mata i le tulaga lofituina ma le ata o Iesu Keriso.

E faapefea ona fesoasoani ia te oe le faataulaiga o lou faatuatua ia Iesu Keriso ma Lona mana ma le alofa mo oe i taimi faigata?
O a ni auala e mafai ona tepa taulai atu ai i le Faaola i taimi o luitau?

Atonu e te manao e matamata “Finding Christ during Difficult Times” (4:35), o loo i le ChurchofJesusChrist.org, ma vaavaai mo le mea na fai e le tama talavou o loo i le vitio e liliu atu ai lana taulaiga ia Iesu Keriso i le taimi o ona luitau.

4:35

Mafaufau pe faasoa atu se aafiaga patino o le aapa atu i le Atua e ala i le tatalo ina ia maua mai ai le malosi ma le lagolago mai le Faaola i se taimi faigata. Valaaulia tagata aoga ua loto i ai e faasoa foi o latou aafiaga. A o faasoa tagata aoga, fesili po o a latou mea na fai e aapa atu ai i na taimi.

Mo le faamaeaina o lenei lesona, faamaumau manatu ua e mauaina. O le a se mea ua e aoaoina e uiga ia Iesu Keriso ma pe aisea e tatau ona tatou liliu atu ai ia te Ia i taimi pe a tatou magoto? O le a se mea ua e fuafua e fai e aapa atu ai ia te Ia?

Manatu ma Faamatalaga o Talaaga

E faapefea ona suia o tatou olaga pe a tatou tepa taulai ia Iesu Keriso?

Na aoao mai Peresitene Howard W. Hunter (1907–95):

O lo’u talitonuga mausali e faapea, i le avea ai ma tagata taitoatasi, po o aiga, nuu, ma malo, e mafai e i tatou, e pei o Peteru ona taulai atu o tatou mata ia Iesu, tatou te mafaia foi ona savavali manumalo i “galu fafati o le le talitonu” ma tumau le “le fefefe i matagi tō faata’uta’u o le masalosalo.” Ae afai tatou te liliu ese o tatou mata mai ia te ia o le e tatau ona tatou talitonu i ai, lea e matuai faigofie ona fai, faapei ona faigofie i le lalolagi ona faaosooso e fai, afai tatou te vaavaai atu i le malosi ma le matamataita o na elemene matautia ma le faatafuna o loo siomia ai i tatou ae le o ia o le e mafai ona fesoasoani e faasao i tatou, o lona uiga o le a tatou gotouga ifo lava i se sami o feeseeseaiga ma le faanoanoa ma le faavauvau.

(Howard W. Hunter, “The Beacon in the Harbor of Peace,” Ensign, Nov. 1992, 19)

Mataio 14:27 . E faapefea ona tatou “loto tetele” i taimi o loo tatou aafia ai i faigata?

Na faamatalaina e Elder Ronald A. Rasband o le Korama a Aposetolo e Toasefululua:

E lē mafai ona tatou maua le “fiafia” [ Mataupu Faavae ma Feagaiga 68:6 ] ae lofituina i le fefe. O le lua lea—fiafia ma le fefe—e lē mafai ona tuufaatasia. …

O le mauaina o le fiafia, o le faatuatuaina lea o [Iesu Keriso] pe a lē sologa lelei ni mea e pei ona tatou fuafuaina. O lona uiga ia tumau pea pe a ave i tatou e ni faafitauli i se itu sa le’i faamoemoeina, pe a lafotuina e faalavelave ma faigata a tatou miti. Ae ua faamanatu mai e le Alii ia i tatou, “E lē atoatoa lo outou olioli i le lalolagi lenei, ae o aʼu e atoatoa ai lo outou olioli” [ Mataupu Faavae ma Feagaiga 101:36 ].

(Ronald A. Rasband, “O Iesu Keriso le Tali” [afiafi faatasi ma se Pulega Aoao, Fepuari. 8, 2019], 1–2)

E faapefea e le fefe ona mafua ai ona tatou lē mauaina faamanuiaga o loo ofoina mai e le Faaola?

Na faasoa mai e Elder Jeffrey R. Holland o le Korama a Aposetolo e Toasefululua, le faamatalaga lenei:

O lenei faamaumauga i tusitusiga paia ua faamanatu mai ai ia i tatou o le uluai laasaga i le o mai ia Keriso—po o lona sau foi ia i tatou—e ono faatumuina ai i tatou i se mea e pei o se atuatuvale naua. E le tatau, ae o nisi taimi e tupu. O se tasi o mea uigalua maoae o le talalelei e faapea, o le punavai tonu lava o le fesoasoani ma le saogalemu lea ua ofo mai ia i tatou, o le mea lea atonu o loo tatou sosola ese mai ai ona o le puupuu o la tatou vaai faaleolaga nei. Pe ona o le a lava le mafuaaga, ua ou vaai i tagata sailiili o sosola mai papatisoga, ua ou vaai i toeaina o sosola mai se valaauga faamisiona, ua ou vaai i manamea o sosola mai le faaipoipoga, ma ua ou vaai foi i ulugalii talavou o sosola ese mai le fefefe i aiga ma le lumanai. Ua tele naua taimi ua toatele naua ai i tatou e sosola mai mea tonu lava e faamanuiaina ai i tatou ma laveaiina ai i tatou ma faamafanafana ai i tatou. Ua tele naua taimi tatou te vaai ai i tautinoga o le talalelei ma poloaiga e peiseai o se mea e fefefe ai ma tuulafoaiina.

(Jeffrey R. Holland, “Come unto Me” [faigalotu a le Iunivesite o le Brigham Young, Mati. 2, 1997], 8, speeches.byu.edu)

Galuega Faatino Faaopoopo e Aoao Mai Ai

O se mea e tutusa ma le ata o le faaolataga

O aafiaga o Peteru i le tuua o le vaa, le manaomia o se fesoasoani, ma le toe aumaia saogalemu o ia e le Faaola e mafai ona aoao mai ia i tatou e uiga i a tatou lava malaga faaleolaga nei ma le ata o le faaolataga. Fai i tagata aoga fesili nei: O a ni mea tutusa ua e vaaia i le va o lenei tala ma le ata o le faaolataga? O le a se mea ua e aoaoina e uiga i le misiona a Iesu Keriso pe a e autilotilo i le faamaumauga mai lenei itu?

Mataio 14:27 . “O a’u lava; aua tou te matatau”

Valaaulia tagata aoga e lisi mai fesoasoani e ofoina mai e le Tama Faalelagi ma Iesu Keriso ae e alo ese mai ai tagata i isi taimi ona o le fefe. E mafai ona aofia ai mea e pei o le tatalo, faatalanoaga ma se epikopo, auaunaga i se misiona, taliaina o se valaauga, po o le faaipoipo. Fesoasoani i tagata aoga e tepa taulai i le mea moni lava, o loo ofoina atu e le Tama Faalelagi ma Iesu Keriso lenei fesoasoani ia i latou. E leai se mea e tatau ona fefefe ai fua e o mai ia i Laua pe e talia mea ua Laua ofoina mai ia i tatou. Mafaufau pe e faaali atu le faamatalaga mai ia Elder Jeffrey R. Holland i lana saunoaga “Come unto Me,” o loo mauaina i le vaega o “Manatu ma Faamatalaga o Talaaga” o lenei lesona, e fesoasoani ai i lenei felafolafoaiga.

O auiliiliga faaopoopo i totonu o Mareko ma Ioane

E tele ina faasoa mai tusitala eseese o le Talalelei i auiliiliga tulaga ese e uiga i le tala e tasi. O lea la, o le faitauina o manatu eseese e tele o le Talalelei e mafai ona fesoasoani ai ia i tatou e aoao atili e uiga ia Iesu Keriso, a o tatou suesue i le Feagaiga Fou. Mo se faataitaiga, o se auiliiliga e tatou te aoaoina mai le Ioane 6:16–19 e faapea, a o lei afio mai le Faaola i le au soo, o le matagi na mafua ai ona latou taualo na o ni nai setatio pe 25 i le 30 i luga o le latou vaa (e tusa ma le 3.1 i le 3.8 maila, pe 5 i le 6 kilomita), e tusa ma le 70 pasene o le latou malaga, e ui lava ina sa tigaina e taualo i le tele o le po (tagai i le Mareko 6:48).

Tusi le Mareko 6:47–51 ma le Ioane 6:19–21 i luga o le laupapa, ma valaaulia tagata aoga e suesue i nei fuaitau mo auiliiliga e le o i totonu o le tala a Mataio ma faasoa i mea ua latou aoaoina e uiga i le Faaola mai nei auiliiliga faaopoopo.

Mataio 14:27 . “Ia outou loto tetele”

Faatepa atu tagata aoga e vaavaai pe faapefea ona valaauliaina e le Faaola Ona soo “ia latou loto tetele” ( Mataio 14:27) e ui ina sa latou i ai i se tulaga faigata. Valaaulia tagata aoga e saili mo nisi fuaitau o tusitusiga paia o loo valaauliaina ai e le Faaola i tatou “ia loto tetele.” Felafolafoai i ni auala e mafai ai ona tatou loto tetele, e oo lava i taimi a o feagai ai ma tulaga faigata.