Mataio 13:3–8, 18–23

O Le Faataoto o le Lūlū Saito

Sa aoao atu e Iesu se faataoto e uiga i se tagata o loo lūlū ni fatu. O nei fatu sa pa’uu i ituaiga eleele eseese, ma iu ai i ni taunuuga eseese. Ua faapea foi, o le upu a le Atua e talia i auala eseese e i latou e faalogo iai. O lenei lesona o le a fesoasoani ia te oe e saunia ai lou loto e talia ma faafailele le upu a le Atua.

Faaaogaina o meafaitino ma ata. O meafaitino ma ata e mafai ona fesoasoani i tamaiti o le vasega e fa’aata ai i o latou mafaufau tagata, nofoaga, mea na tutupu, anomea, ma faatusa o loo i tusitusiga paia. Mo se faataitaiga, nai lo le na o le talanoa e uiga i meafaitino o loo i mau, valaaulia tamaiti o le vasega e tusi ni ata o nei meafaitino.

Sauniuniga a le tamaitiiti o le vasega: Valaaulia tamaiti o le vasega e mafaufau i le fesili lenei mai le anotusi o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga: “Pe aisea e iai taimi e faigofie ai i o tatou loto ona talia le mea moni, ao isi taimi e faaosoosoina tatou e tetee atu iai?” (“Mati 20–26. Mataio 13; Luka 8; 13: ‘O Le Ua I Ai Taliga e Faalogo Ai, ina Faalogo Mai ia o Ia,’” Sau, Mulimuli Mai ia te A’u–-Mo Tagata Taitoatasi ma Aiga: Feagaiga Fou 2023).

Gaoioiga e Mafai ona Faaaoga e Aoao Ai

Saunia oe lava e faalogo i le upu a le Atua

Manatu e amata le vasega i le valaauina o ni nai tamaiti o le vasega e faasoa a latou tali i le fesili sa valaauina i latou e mafaufau loloto iai i sauniuniga mo lenei vasega.

Ia faaalu se taimi e iloilo ai pe o le a le tele o lou naunau e taliaina le upu a le Atua. Faaaoga lenei fuafuaga faagasolo faatasi ai ma faamatalaga taitasi nei:

Faia soo —Nisi o taimi—Seāseā

Faaali atu fuaiupu nei pe faitau lemu ina ia lava se taimi mo tamaiti o le vasega e mafaufau ai e uiga i lo latou lava talileleia patino o le upu a le Atua. O tamaiti o le vasega e ao ona mafaufau loloto ma filemu a latou tali, ae aua nei talia ma le leo tele.

Ou te suesue i tusitusiga paia ma le faamoemoe e aoao ma tuputupu ae ai pea.

Ou te taumafai e iloa le aafiaga a le Agaga i lou olaga ma mulimuli i faatonuga ua tuuina mai.

Ou te faalogo atu ma usitaia fautuaga e tuuina mai e le Alii e ala mai i Ana perofeta ma aposetolo.

Ou te saili e faamalosia la’u lava molimau ia Iesu Keriso ma Lana talalelei.

O lenei la ua maea ona e iloiloina lou uiga faaalia e uiga i le upu a le Atua, ua e sauni nei e suesue i le faataoto o le lulu saito. I lenei faataoto, ua faamatala mai e le Alii ni faafitauli e ono taofia ai le tautotogo, maua’a, ma le fua mai o saito. E tusa ai ma Ana faataoto uma, na faaaoga e le Alii mea taatele e aoaoina ai lesona faaleagaga.

Faaaoga mamanu o laasaga nei e fa e suesue ai i le faataoto i le lulu saito. E tusa po o le a lou tali i fesili o i luga, ua tapenaina lenei lesona ma le faamoemoe e sauni ai lou loto mo le taliaina o meaalofa e manao le Alii e tuu atu ia te oe. Ao e suesue, maitau ni auala e maua ai se aafiaga anoa ma le upu a le Atua.

Afai na faailoa atu le mamanu lenei i le lesona muamua, mafaufau e fai atu i tamaiti o le vasega e toe mafaufau i laasaga taitasi, ma tusi i luga o le laupapa.

Saili mo auiliiliga taua.
Fai ni faatusatusaga faaleagaga.
Saili mo lesona taua.
Faamautinoa le faaaogaina mo oe lava ia.

Saili mo auiliiliga taua

Mo lenei gaoioiga, e mafai ona galulue tamaiti o le vasega i paga. O le tasi o tamaitiiti aoga i le paga e faitauina le seti muamua o fuaiupu ao le isi e faailoa maia faamatalaga auiliili taua. A maea e mafai ona la taufai tusia se ata i a la api talaaga o sueusega. Ona fesuiai lea o la matafaioi ae toe fai le faiga mo le isi seti o fuaiupu.

O se tasi o auala e vaaifaalemafaufau ai i faamatalaga taua o le tusia o se ata mo vaega taitasi o le faataoto. Vaevae se laupepa i lou api talaaga o suesuega i ni vaega e fa. Faitau fuaiupu ma tusi se ata faigofie o mea ua faamatalaina ai.

Mataio 13:3–4
Mataio 13:5–6
Mataio 13:7
Mataio 13:8

Drawings of a bird with a seed, the sun shining on a plant, thorns growing around a plant, a wheat plant.

Fai ni faatusatusaga faaleagaga

Faitau le faamalamalamaga a Iesu o le faataoto i fuaiupu nei. Tusi i lalo ni faatusatusaga sa Ia faia i autafa ane o ata ua e tusia.

E mafai e tamaiti aoga ona galulue taitoatasi, i paga, po o vaega toalaiti. Afai e galulue i vaega toalaiti, vaevae fuaiupu i sui taitasi o le vaega ma fai atu i tamaiti aoga e ripoti mea latou te maua i le latou vaega.

Mataio 13:19
Mataio 13:20–21
Mataio 13:22
Mataio 13:23

Saili mo lesona taua

Ina ia iloa lesona taua, e mafai ona aoga le fai o fesili e faataga ai le Agaga Paia e aoao atu ia te oe lava. E faaopoopo atu i fesili nei, mafaufau i isi fesili atonu e te tuuina atu.

O le a se mea e finagalo le Faaola ou te aoaoina mai lenei faataoto?
Aisea o le a manao ai le Faaola ia ou iloa pe faapeī lo’u loto?

E mafai foi ona e mafaufau pe ono faapefea ona faatatau le faataoto i le olaga mo’i. Mo se faataitaiga, taumafai e vaaifaalemafaufau pe faapefea ona eseese gaoioiga a se tagata ua ma’a’a lona loto pe ua pei o le vao tuitui ma gaoioiga a se tagata ua pei lona loto o le eleele lelei. Ao e mafaufau i nei gaoioiga, mafaufau e tusi ni isi o gaoioiga i autafa o au ata taitasi.

E mafai ona fai atu i tagata aoga e aumai ni nai faataitaiga o gaoioiga na latou tusia i lalo. Afai o faigata i le vasega ona mafaufau i ni faataitaiga, e ono aoga faataitaiga o i le vaega o “Gaoioiga Faaopoopo e Aoao Mai Ai”.

O a ni fautuaga e mafai ona e tuuina atu mo se tagata ua malō, ma’a’a, pe vaotutui lona loto?

Filimaoti le faaaogaaga patino

Mafaufau i le tulaga o lou lava loto ma po o le fea o eleele e fa e sili ona faamatalaina ai oe. Afai e le tutusa le tulaga faaleagaga o lou loto ma le mea o loo e manao i le taimi nei ia i ai, ia e iloa e mafai ona e suia.

E faavae i mea ua e aoaoina i le aso, faaalu se minute e mafaufau loloto ai i se mea e mafai ona e faia e faaleleia ai le tulaga o lou loto.

O le a se mea o le a e faia e valaaulia ai le upu a le Atua i lou loto?
O a ni laasaga o le a e faia e faaleleia ai le tulaga o lou loto?
O a ni faafitauli o le a e ole atu i le Alii e fesoasoani atu ia te oe ia faatoilaloinai?

Tuu atu se avanoa mo tamaiti o le vasega e faasoa mai i mea na latou aoaoina i le aso e uiga i le Alii ma Lona finagalo ia tuputupu ae Lana afioga i o tatou loto.

Tala ma Faamatalaga o Talaaga

Sa saunoa Peresitene Dallin H. Oaks o le Au Peresitene Sili i le konafesi aoao e uiga i le faataoto i le lulu saito. O fesili nei ua taliina e faaaoga ai ana faamalamalamaga.

O a fatu ia na “pau … i le auala”? (tagai i le Mataio 13:4, 19)

O fatu sa “pau … i le auala” ( Mareko 4:4) e lei mauaina le eleele moni e ono mafai ona ola ai. Ua pei i latou o aoaoga e pau i luga o se loto ua maaa pe le o saunia.

(Dallin H. Oaks, “O le Faataoto i le Lulu Saito,” Ensign po o le Liahona, Me 2015, 32)

O le a se mea e mafua ai ona pei le loto o se tagata o se “mea papa”? (tagai i le Mataio 13:5, 20–21)

Mo le autalavou, … o se faataitaiga fitoitonu lenei. Afai o loo tufaina atu faatusa o le faamanatuga ae o loo e tesi i isi pe manamananū solo pe taaalo i taaloga vitio pe o faia foi soo se mea e faafitia ai oe lava mai meaai taua faaleagaga, o loo e lamatiaina ou aa faaleagaga ma avatu oe lava i eleele papa.

(Dallin H. Oaks, “O le Faataoto i le Lulu Saito,” Ensign po o le Liahona, Me 2015, 33)

Pe ono faapefea ona tatou iloaina “vao tuitui” i le olaga? (tagai i le Mataio 13:7, 22)

Tatou te lolo atu i “mea faafiafia o le olaga nei” [ Luka 8:14 ] (1) pe a fai ma a tatou vaisu, lea e faaleagaina ai le meaalofa taua a le Atua o le faitalia; (2) pe a faaseseina i tatou e mea faatosina lē aoga, ia e tosoeseina i tatou mai mea e i ai le taua e faavavau; ma le (3) pe a tatou mafaufau e i ai lo tatou aia i ni taunuuga lelei, lea e faaleagaina ai le tuputupu ae o le tagata lava ia e agavaa ai mo lo tatou taunuuga e faavavau.

E faatoilaloina i tatou e “popolega … o lenei olaga” [ Luka 8:14 ] pe a faapipiliina i tatou e le fefe i le lumanai, lea e faatuai ai lo tatou agai i luma i le faatuatua, ma faalagolago i le Atua ma Ana folafolaga.

Dallin H. Oaks, “O Le Faataoto i le Lulu Saito,” Ensign po o le Liahona, Me 2015, 34–35)

O le a le mea e manaomia ina ia maua le fua lelei mai le “elelele lelei”? (tagai i le Mataio 13:8, 23)

Ua ia i tatou le fatu o le upu o le talalelei. Ae e pule lava i tatou taitoatasi i le faatulagaina o mea faamuamua ma ia faia mea ia lelei ai lo tatou eleele ma fua tele ai la tatou seleselega. E tatau ona tatou saili atu ia mauaa mausali atili ma liua i le talalelei a Iesu Keriso (tagai i le Kolose 2:6–7). Tatou te ausia lenei liua e ala i le tatalo, e ala i le faitauina o tusitusiga paia, e ala i le auauna atu, ma e ala i le taumafa ma inu e le aunoa i le faamanatuga ina ia maua pea Lona Agaga e faatasi ma i tatou.

(Dallin H. Oaks, “O le Faataoto i le Lulu Saito,” Ensign po o le Liahona, Me 2015, 35)

Gaoioiga Faaopoopo e Aoao Mai Ai

Iloilo lelei le eleele ae lei totoina

Vaevae le vasega i vaega toalaiti, ma tufa atu i vaega taitasi se fagu laititi ua faatumu i se ituaiga eleele na faamatala mai i le faataoto i le lulu saito. Valaaulia tamaiti o le vasega e iloilo lelei le eleele ma talatalanoa i mea o le a latou faia ina ia lelei e toto ai se fatu. E mafai ona fai atu i tagata aoga e suesue le faataoto ma vaavaai po o le a le ituaiga eleele e faatusa i le faaleagaga ma talanoa ma le latou vaega i mea e mafai ona latou aoao mai ai.

O le faataoto i le olaga moi

Mafaufau e faaaoga ata faataitai nei e fesoasoani i tamaiti o le vasega e maitauina ituaiga eleele, po o tulaga o le loto. E mafai ona tuu atu fautuaga a tagata aoga e fesoasoani ai i tagata i ata faataitai taitasi ia faalatalata atili ai i le Faaola ma faataga le upu a le Atua ia ola i o latou lotoo.

O Sitoki sa faailoa atu i le talalelei toefuataiina e ana uo ma sa lei leva ae papatisoina o ia. Ae peitai, i nai masina talu ona mavae lona auai i le Ekalesia, sa anata ona faatauemu isi ia te ia ona o ona talitonuga fou. Sa lei lagona e Sitoki e mafai ona ia taulimaina faaupuga le lelei mai isi.

O Tia e lelei i le aoga, e i ai i se tala faatino, a e fiafia i lana galuega. Ona o lana aoga ma matafaioi i le galuega, na filifili ai Tia e faamisi gaoioiga a le Ekalesia ma e lei lesitala i le seminare i lenei tausaga. E matuai manao lava o ia e taulai atu i ana aoaoga ma le matamata i le lumanai.

Fai ni faatusatusaga e faaaoga ai le Tusi a Mamona

Valaaulia tamaiti o le vasega e faitau i faatusatusaga a Alema i le upu a le Atua ma se fatu (tagai i le Alema 32:26–43). E mafai foi ona latou suesue i le miti a Liae i le laau o le ola ma faatusatusa vaega taitasi na faamatala mai i le faaaliga vaaia ma ituaiga eleele o le faataoto i le lulu saito (tagai i le 1 Nifae 8:19–34). E mafai ona faasoa mai tagata aoga i le ala e faaopoopo atu ai nei tala o le Tusi a Mamona i o latou malamalamaaga i aoaoga a le Faaola i le faataoto i le lulu saito.