Mateo 13:24–30, 36–43

• Kinsa ang unang tawo sa imong pamilya nga mipasakop sa Simbahan?

• Kinsa ang mitabang sa pagdapit kanila sa Simbahan?

• Sa unsang paagi nakaapekto sa imong kinabuhi ang pagkamiyembro sa Simbahan niini nga sakop sa pamilya?

• Sa unsang paagi kaha makaimpluwensya sa ubang tawo ang imong desisyon sa pagtuman sa imong mga pakigsaad sa Dios?

Sa Mateo 13 , gigamit sa Ginoo ang sambingay sa trigo ug mga sagbot aron magtudlo mahitungod sa pagpundok sa mga katawhan ngadto sa Iyang Simbahan. Samtang nagtuon ka, paghatag og pagtagad sa mga pag-aghat sa Espiritu aron tabangan ka nga masabtan kon nganong pundokon sa Ginoo ang Iyang mga katawhan ug sa unsang paagi ka makasalmot.

Tun-i ang sambingay sa Mateo 13:24–30 . Mahimong makatabang kon mahibaloan nga ang sagbot “usa ka balili o sagbot nga makahilo nga ingon-ingon ang panagway sa usa ka trigo. Kini dili mailhan gikan sa trigo hangtod nga kini mahingpit ang pagtubo” (Giya ngadto sa mga Kasulatan, “ Sagbut, Mga ,” scriptures.ChurchofJesusChrist.org).

Aron matabangan ka sa pagtuon, gamita kining upat ka lakang nga sundanan:

1. Pangitaa ang importante nga mga detalye.

2. Pagbuhat og espirituhanong mga pagkompara.

3. Pagdiskobre og importante nga mga leksiyon.

4. Pagtuki og personal nga paggamit.

• Unsa nga mga detalye niini nga sambingay ang importante para kanimo?

• Unsa nga espirituhanong mga pagkompara ang imong gibuhat?

• Unsa nga mga importante nga leksiyon ang imong naila?

• Unsaon nimo paggamit ang mga leksiyon gikan niini nga sambingay nganha sa imong kinabuhi?

Basaha ang Mateo 13:36–43 , nga mangita kon unsay gitudlo sa Ginoo mahitungod niini nga sambingay.

• Unsa ang gikadugang sa pagpasabot sa Manluluwas sa imong pagsabot sa sambingay?

Sa atong dispensasyon, nagpaambit ang Ginoo og usa ka paagi nga matuman kini nga sambingay. Basaha ang Doktrina ug mga Pakigsaad 101:64–65 , nga mangita kon unsa ang gisaad sa Ginoo nga buhaton sa dili pa ang Ikaduhang Pag-anhi. Mahimong makatabang nga mahibaloan nga ang kamalig usa ka bodega o balay tipiganan diin itago ang lugas.

• Unsay imong nakat-onan mahitungod sa Ginoo gikan niini nga mga bersikulo?

Ang usa ka kamatuoran nga makat-onan nato gikan sa sambingay mahitungod sa trigo ug mga sagbot mao nga sa ulahing adlaw, ang Ginoo mopundok sa Iyang katawhan aron mag-andam para sa Iyang Ikaduhang Pag-anhi.Ikonsiderar ang pagrekord niini nga kamatuoran duol sa Mateo 13:30 .

• Giunsa pagpundok sa Ginoo ang Iyang mga katawhan sa ulahing mga adlaw?

• Unsa ang imong tahas niining importante nga buluhaton?

Nagtudlo si Presidente Nelson mahitungod sa mga paningkamot sa Ginoo nga pundokon ang Iyang katawhan sa ulahing mga adlaw. Tan-awa ang “Ipatigbabaw ang Dios Labaw sa Tanan” gikan sa code sa oras nga 4:07 hangtod sa 5:48, o basaha ang mosunod nga teksto. Mahimo usab nga mangita ka mismo og mga kasulatan o uban pang mga pamahayag aron molawom ang imong pagsabot bahin sa pagpundok sa Israel.

18:51

Ang Ginoo nagpundok niadtong andam nga mopatigbabaw sa Dios labaw sa tanan diha sa ilang mga kinabuhi. Ang Ginoo nagpundok niadtong mopili nga tugutan ang Dios nga maoy labing importante nga impluwensya diha sa ilang mga kinabuhi.

Sulod sa daghang mga siglo, ang mga propeta nanagna niini nga pagpundok, ug nahitabo na kini karon! Isip usa ka gikinahanglang mag-una nga panghitabo sa dili pa ang Ikaduhang Pag-anhi sa Ginoo, kini ang labing importante nga buhat sa kalibotan!

Kini nga pagpundok sa wala pa ang milenyum maoy usa ka indibidwal nga istorya sa nagkalapad nga pagtuo ug espirituhanong kaisog alang sa minilyon ka tawo. Ug isip mga miyembro sa Ang Simbahan ni Jesukristo sa mga Santos sa Ulahing mga Adlaw, o ang “nakigsaad nga Israel sa ulahing mga adlaw,” kita gisangonan sa pagtabang sa Ginoo niining importante kaayo nga buhat.

Kon maghisgot kita sa pagpundok sa Israel sa duha ka habig sa tabil, naghisgot kita, siyempre, sa buhat sa misyonaryo, templo, ug family history. Naghisgot usab kita sa paglig-on sa pagtuo ug pagpamatuod diha sa mga kasingkasing niadtong kauban nato sa pagpuyo, pagtrabaho, ug pagserbisyo. Bisan kanus-a nga mobuhat kita og bisan unsa sa pagtabang ni bisan kinsa—sa matag habig sa tabil—sa paghimo ug pagtuman sa ilang mga pakigsaad sa Dios, nagtabang kita sa pagpundok sa Israel.

(Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 92–93)

• Unsa ang imong nasabtan mahitungod sa pagpundok sa Israel?

• Unsa nga mga pangutana ang aduna ka mahitungod niini?

• Unsa ang natabang kanimo sa sambingay mahitungod sa trigo ug mga sagbot nga masabtan ang importansiya sa pagpundok sa Israel?

Basaha ang mosunod nga pamahayag gikan ni Presidente Russell M. Nelson, nga mangita kon unsa ang kalambigitan kanimo sa pagpundok sa Israel:

1:46

Akong minahal nga talagsaong kabatan-onan, gipadala kamo sa yuta niining tukma nga panahon, ang labing importanting panahon sa kasaysayan sa kalibotan, aron motabang sa pagpundok sa Israel. Walay laing panghitabo dinhi sa kalibotan karon nga mas importante kay sa niana. Walay lain nga dunay mas dakong sangputanan. Walay lain gayud.

Kini nga pagpundok kinahanglang importante kaayo kaninyo. Kini mao ang misyon diin gipadala kamo dinhi sa yuta.

Busa ang akong pangutana ninyo mao nga “Andam ba kamong moapil sa grupo sa kabatan-onan sa Ginoo aron motabang sa pagpundok sa Israel?”

(Russell M. Nelson ug Wendy Nelson, “Paglaum sa Israel” [tibuok kalibotan nga debosyonal sa kabatan-onan, Hunyo 3, 2018], dugang ngadto sa New Era ug Ensign,, 12, ChurchofJesusChrist.org)

Pagsulat og usa ka parapo o mas daghan pa bahin sa imong mga hunahuna ug mga impresyon mahitungod sa pagpundok sa Israel ug sa sambingay mahitungod sa trigo ug mga sagbot. Dapita ang Espiritu Santo aron dasigon ang imong mga hunahuna ug mga pagbati samtang nagsulat ka. Matabangan ka sa mosunod nga mga pangutana sa pagdesisyon kon unsa ang isulat pero giya lamang kini.

• Unsa nga mga pangutana ang aduna ka mahitungod sa pagpundok sa Israel nga matubagan na nimo karon?

• Unsa ang gitudlo kanimo sa pagpundok sa Israel mahitungod sa pagsalig sa Manluluwas nganha kanimo ug sa Iyang gugma para sa tanang katawhan?

• Sa unsang paagi ka makatabang sa imong kaugalingon ug sa ubang tawo sa pagpundok sa katawhan sa Ginoo?

Si Elder David A. Bednar sa Korum sa Napulog Duha ka Apostoles mitudlo:

Ang Ginoo nagpundok sa Iyang katawhan sa panahon nga sila modawat Kaniya ug mosunod sa Iyang mga sugo. …

… Ang Ginoo nagpundok sa Iyang mga katawhan aron sa pagsimba, sa pagtukod sa Simbahan, alang sa panalipod, ug sa pagdawat og tambag ug pagtudlo. …

Si Propeta Joseph Smith mipadayag nga sa tanang panahon ang balaan nga katuyoan sa pagpundok mao ang pagtukod og mga templo aron ang mga anak sa Ginoo makadawat sa labing taas nga mga ordinansa ug pinaagi niana makabaton og kinabuhing dayon.

(David A. Bednar, “The Spirit and Purposes of Gathering” [Brigham Young University–Idaho nga debosyonal, Okt. 31, 2006], byui.edu)

Si Elder David A. Bednar sa Korum sa Napulog Duha ka Apostoles mitudlo:

[Ang] mahinungdanong kalambigitan tali sa baroganan sa pagpundok ug sa pagtukod og mga templo gipasabut og maayo diha sa Basahon ni Mormon:

“Tan-awa, ang umahan hinog na, ug bulahan kamo, kay kamo miduso sa galab, ug miani uban sa inyong kusog, oo, sa tibuok adlaw kamo naghago; ug tan-awa ang gidaghanon sa inyong mga bugkos! Ug sila pagapundokon ngadto sa mga kamalig, nga sila dili mausik” ( Alma 26:5).

Ang mga bugkos dinhi niining pasumbingay nagrepresentar sa bag-ong nabunyagan nga mga miyembro sa Simbahan. Ang mga kamalig mao ang balaang mga templo.

(David A. Bednar, “Madungganon nga Paghupot og usa ka Ngalan ug Katungdanan,” Liahona, Mayo 2009, 97)

Si Presidente Russell M. Nelson mitudlo:

Ang Basahon ni Mormon maoy sentro niini nga buhat. Nagpadayag kini sa doktrina sa pagpundok. Nakapahimo kini sa mga tawo nga magkat-on kabahin ni Jesukristo, nga motuo sa Iyang ebanghelyo, ug mopasakop sa Iyang Simbahan. Gani, kon wala ang Basahon ni Mormon, ang gisaad nga pagpundok sa Israel dili mahitabo.

(Russell M. Nelson, “Ang Pagpundok sa Nagkatibulaag nga Israel,” Liahona, Nob. 2006, 80)