Rebyo sa Doktrinal nga Kahanas 7

Open scriptures that have been highlighted, on table with ribbon bookmark and yellow pencil. (horiz)

Usa sa mga tumong sa doktrinal nga kahanas mao ang pagtabang kanimo sa pagkat-on unsaon paggamit sa doktrina nga gitudlo sa mga kasulatan sa mga kahimtang nga giatobang nimo o sa mga anaa sa imong palibot. Kini nga leksiyon makahatag nimo og mga kahigayonan aron mabansay sa paggamit sa pipila ka doktrina nga imong natun-an niining tuiga sa imong kinabuhi.

Pagpangandam sa estudyante: Dapita ang mga estudyante sa pagpili og usa ka tudling sa doktrinal nga kahanas nga gibati nila nga lisod gamiton sa ilang kinabuhi ug usa nga gibati nila nga sayon gamiton. Dapita sila nga mangandam sa pagpasabot nganong ilang gipili ang mao nga mga tudling.

Posible nga mga Kalihokan sa Pagkat-on

Ang usa ka tudling sa doktrinal nga kahanas nga leksiyon lagmit nga kinahanglang matudlo isip puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor sa lugar o rehiyon o koordinitor aron masiguro nga matudlo ang kada leksiyon sa tudling sa doktrinal nga kahanas samtang anaa sa sesyon ang seminary.

Sugdi pinaagi sa pagdapit sa mga estudyante sa pagpaambit sa ilang mga hunahuna gikan sa ilang pagpangandam sa estudyante nga preparasyon. Mahimo nila kining buhaton isip usa ka klase o pinaagi sa parespares o gagmay nga mga grupo.

Pagtabang sa uban

Aron matabangan ang mga estudyante sa paggamit sa mga kamatuoran nga gitudlo diha sa usa sa mga tudling sa doktrinal nga kahanas, ikonsiderar ang paggamit sa mosunod nga senaryo o pagdapit sa mga estudyante sa paghunahuna og ilang kaugalingon.

Hunahunaa nga imong gipangalagaran ang usa ka pamilya sa imong ward kansang amahan sa pamilya nawad-an og trabaho. Kining maong amahan nawad-an og kadasig sa hilabihan ug miundang sa pag-adto sa simbahan, sa pag-ampo, ug sa pagbasa sa mga kasulatan. Adunay tulo ka anak niini nga pamilya: usa ka 17-anyos nga batan-ong babaye, usa ka 15-anyos nga batan-ong lalaki, ug usa ka 10-anyos nga batang babaye. Ang 10-anyos ug ang iyang inahan mosimba panagsa. Ang duha ka batan-on kaniadto kanunay nga motambong, apan sa dihang nagpadayon ang pagkawala nay trabaho sa ilang amahan, miundang sila sa pag-adto.

Sa imong pagrebyo sa mosunod nga mga listahan sa mga tudling sa doktrinal nga kahanas, hunahunaa ang mahitungod sa mga emosyon ug mga hagit nga giatubang sa matag sakop niining pamilyaha. Hunahunaa kon unsa nga mga kamatuoran gikan niini nga mga kasulatan ang labing makatabang sa matag tawo ug ngano.

Ipakita ang mosunod nga tsart aron ang mga estudyante maka-refer niini sa kinatibuk-an sa leksiyon. Kon makatabang, pagdugang og lain pang mga tudling sa doktrinal nga kahanas nga mahimong makatabang sa gihatag nga sitwasyon.

Pakisayran sa Kasulatan	Mahinungdanong Hugpong sa mga Pulong sa Kasulatan
Mateo 11:28–30	“Duol kamo kanako, kamong tanan nga gikapuyan ug gibug-atan sa inyong gipas-an ug papahulayon ko kamo.”
Mateo 16:15–19	Si Jesus miingon, “Ihatag ko kanimo ang mga yawe sa gingharian sa langit.”
Mateo 22:36–39	“Higugmaa ang Ginoo nga imong Dios. … Higugmaa ang imong isigkatawo.”
Lucas 22:19–20	Si Jesukristo nagsugo, moambit sa sakramento “aron paghandom kanako.”
Juan 7:17	Ang buot magbuhat sa gisugo sa Dios mahibalo kon ang akong gitudlo gikan ba sa Dios.”

Ikonsiderar ang paghangyo sa mga estudyante nga idrama-drama ang usa ka panagsultihanay tali sa tigpangalagad nga sister o brother ug sa usa ka sakop sa pamilya. Ang estudyante nga naghulagway sa sakop sa pamilya mahimong mopahayag sa mga kabalaka mahitungod sa sitwasyon ug ang estudyante nga naghulagway sa tigpangalagad nga sister o brother pweding mohatag og mga sugyot nga magbase sa mga tudling sa doktrinal nga kahanas.

Unsa ang pipila sa mga emosyon ug mga hagit sa mga indibidwal niini nga pamilya ang tingale masinati?
Nganong makatabang man ang paghunahuna mahitungod niini nga mga emosyon ug mga hagit sa dili pa mohukom kon unsa nga espirituhanong mga kamatuoran ang tingale labing makatabang?

Pagpili og usa ka anak ug usa ka ginikanan gikan sa pamilya sa maong senaryo. Pagpili og usa ka tudling sa doktrinal nga kahanas ug kamatuoran nga gibati nimong labing makatabang sa matag usa kanila.

Kinsa nga mga tawo ang imong gipili? Unsa nga tudling sa doktrinal nga kahanas ug kamatuoran ang imong ipaambit ngadto kanila? Ngano man?

Hunahunaa ang matag indibidwal nga imong gipili.

Kon pangutan-on, unsa nga mga pihong lihok ang imong idapit kanila nga buhaton aron makasunod sa kamatuoran nga gitudlo diha sa mga tudling sa doktrinal nga kahanas?

Samtang ang mga estudyante nagpaambit og mga tubag sa miaging pangutana, ikonsiderar ang paghatag og follow-up nga mga pangutana sama sa mosunod: Kanus-a ikaw o ang uban nga imong kaila adunay mga kasinatian sa paggamit sa kamatuoran sa ingon niini nga paagi? Kanus-a ikaw o ang uban mihimo sa maong mga lihok, ug unsa ang nahitabo isip resulta? Unsa ang imong makat-onan mahitungod sa Langitnong Amahan ug ni Jesukristo gikan niadto nga mga kasinatian?

Sa unsang mga paagi kaha kini nga mga lihok makatabang kanila sa pagkadawat og gahom ug kalig-on gikan sa Langitnong Amahan ug ni Jesukristo?

Dugang pa nga paggamit

Pagpili og usa sa mga tudling sa doktrinal nga kahanas nga wala nimo gamita sa milabay nga kalihokan. Paghunahuna og usa ka sitwasyon diin kini nga tudling makatabang sa usa ka tawo nga makakita og mga tubag sa usa ka pangutana o makapaningkamot sa pagsulbad og usa ka hagit. Irekord ang imong mga hunahuna diha sa imong journal sa pagtuon.

Dasiga ang mga estudyante sa pagpaambit og mga ideya bahin sa ubang mga sitwasyon diin ang usa ka tawo nakabenepisyo gikan sa paggamit sa mga kamatuoran nga gitudlo niining mga tudling sa doktrinal nga kahanas. Ikonsiderar ang pagpamatuod bahin sa katakos sa Manluluwas sa pagtabang kanila nga magamit ang maong mga kamatuoran sa ilang kinabuhi.