Toeiloiloga o le Atamai i Aoaoga Faavae 6

Malamalama ma Faamatala

A group of teenagers sit in a classroom learning together while a young woman reads from the scriptures, the other youth follow along. The teacher can be seen standing to the side.

O se tasi o faamoemoega o le aoaoga i mataupu faavae o le fesoasoani lea ia te oe ia malamalama i aoaoga a le Faaola o loo i ai i fuaitau o aoaoga i mataupu faavae autu ma mafai ai ona faamatala i au lava upu. O lenei lesona o le a tuuina atu ai ia te oe se avanoa e faalautele ai lou malamalama i le ma faamatala atu upumoni e uiga i se tasi pe sili atu o fuaitau o aoaoga i mataupu faavae autu mai le Feagaiga Fou.

Sauniuniga a le tamaitiiti aoga: Valaaulia tamaiti aoga e faailoa mai se tomai po o se metotia o le suesueina o tusitusiga paia e aoga lelei mo i latou ma mafaufau pe aisea e aoga ai lenei tomai po o le metotia ia i latou.

Gaoioiga e Mafai ona Fai e Aoao Mai Ai

O se lesona o le fuaitau o le atamai i aoaoga faavae atonu e manaomia ona aoao atu e suitulaga i lenei lesona o le iloiloga. Tagai i le faasologa faatulagaina o lesona ua saunia e le faatonu o le eria po o le risone po o le taitai faamaopoopo ina ia mautinoa o lesona o fuaitau o le atamai i aoaoga faavae taitasi o le a aoaoina a o faia vasega seminare.

Malamalama i mau

A o lei amataina le talanoaga, mafaufau e valaaulia tamaiti aoga e faaalu se minute pe lua e taaalo ai i se taaloga faigofie, e pei o le tic-tac-toe po o le maa, pepa, seleulu, faatasi ma le tagata o loo nofo i o latou autafa. A uma le taaloga, fesili atu i tamaiti aoga po o a auala na latou faaaogaina ma pe aisea e taua ai auala fuafuaina pe a taaalo i taaloga. Ona faamatala atu lea o loo i ai foi metotia e mafai ona tatou faaaogaina e fesoasoani tatou te malamalama lelei ai i tusitusiga paia.

Valaaulia tamaiti aoga e faasoa mai ni malamalamaaga mai le gaoioiga fautuaina o le sauniuniga a le tamaitiiti aoga. Mafaufau e lisi a latou tali i luga o le laupapa.

O a nisi o metotia ua e faaaogaina pe e mafai ona e faaaogaina e malamalama atili ai i mau?
Aisea e te manatu e taua ai le faaalu o se taimi e malamalama lelei ai i aoaoga a le Atua o loo maua i tusitusiga paia?

I lenei lesona, o le a e maua se avanoa e faaaoga ai se fuafuaga faigofie e faaloloto ai lou malamalama i se fuaitau se tasi pe sili atu i fuaitau o le atamai i aoaoga faavae mai le Feagaiga Fou. O le a e maua foi avanoa e faamatala atu ai i isi upumoni mai se fuaitau e te filifilia.

O le lisi lenei o fuaitau o aoaoga faavae autu mai le afa muamua o le Feagaiga Fou.

Mau Faasino	Fasifuaitau Autu o le Mau
Luka 2:10–12	“Aua o le aso nei ua fanau ai i le aai o Tavita, lo outou Faaola, o le Alii o Keriso.”
Ioane 3:5	“Afai e le fanau se tasi i le vai ma le Agaga, e le mafai ona sao o ia i le malo o le Atua.”
Ioane 3:16	“Aua ua faapea lava ona alofa mai o le Atua i le lalolagi, ua ia aumai ai lona Atalii e Toatasi.”
Mataio 5:14–16	“Ia faapea ona pupula atu lo outou malamalama i luma o tagata.”
Mataio 11:28-30	“Ia outou o mai ia te au, o outou uma o e tigaina ma mafatia i avega, o a’u foi e malolo ai outou.”
Mataio 16:15–19	Na fetalai Iesu, “Ou te avatu foi ia te oe ki o le malo o le lagi.”
Ioane 7:17	“Ai se tasi e fia fai lona finagalo, e iloa ai e ia le mataupu.”
Mataio 22:36–39	“E te alofa atu i le Alii lou Atua. … E te alofa atu i lē lua te tuaoi.”
Luka 22:19–20	Na poloai mai Iesu Keriso, ia aai ma feinu i le faamanatuga “e fai ma faamanatuga ia te au.”
Ioane 17:3	“O le ola e faavavau foi lenei, ia latou iloa oe le Atua moni e toatasi, ma Iesu Keriso.”
Luka 24:36–39	“Aua o le agaga e leai sona aano ma ni ivi, pei o a’u nei ua outou vaavaai i ai.”

Faaloloto lou malamalama

O le taiala lenei e mafai ona fesoasoani ia te oe e faalolotoina ai lou malamalama i se fuaitau o le atamai i aoaoga faavae.

O le mekasini o le Mo Le Malosi o le Talavou e masani ona aofia ai se galuega faatino mo le suesueina o tusitusiga paia e taua o le “Fuaiupu i luga o lea Fuaiupu,” lea e faamatalaina pe faauigaina ai ni nai upu autu po o fasifuaitau mai se fuaitau o mau. Ina ia vaai i se faataitaiga o se gaoioiga o le “Fuaiupu i luga o lea Fuaiupu”, tagai i le “Aua Le Fefe,” Mo Le Malosi o le Talavou, Fep. 2021, 32.

Fatu sa oe lava itulau o le “Fuaiupu i luga o lea Fuaiupu” mo se tasi o fuaitau ole atamai i aoaoga faavae mai le afa muamua o le Feagaiga Fou. Mafaufau e faaaoga ia sapalai o faatufugaga e fesoasoani ia te oe e fatu ai lenei itulau i se auala e manaia i le vaai. Faaaoga pepa o faatonuga o galuega nei e fesoasoani ia te oe e fatu ai lau itulau:

I luga o se fasi pepa avanoa, tusi ai upu o le mau o tusitusiga paia na e filifilia.
Filifili ia le itiiti ifo ma le lima ni upu po o ni fasifuaitau mai lena fuaitau o le mau e te manao e taulai i ai.
Saili faauigaga, faamalamalamaga, faataitaiga, mau fesootai, po o faamatalaga a taitai o le Ekalesia e mafai ona fesoasoani e faalauteleina ai lou malamalama i upu po o fasifuaitau ua e filifilia. Lisi mea nei i se pepa.
Ia aofia ai ia le itiiti ifo ma le tasi se parakalafa i se mea o lau itulau o loo faamatala ai le mea o loo fesoasoani lenei fuaitau ia te oe e te malamalama ai e uiga ia Iesu Keriso, Lana Ekalesia, po o Lana misiona e laveai i tatou.

Afai e lava le taimi, toe fai lenei gaoioiga faatino i se isi fuaitau o le atamai i aoaoga faavae mai le lisi.

Faasoa atu lau foafoaga

Valaaulia tamaiti aoga e faasoa atu a latou foafoaga ma se paga po o se vaega toalaiti, ma faamatala mai mea na latou aoaoina e uiga i le fuaitau na latou filifilia e taulai atu i ai. O tamaiti aoga o e naunau i ai, e mafai ona faasoa mai a latou foafoaga i le vasega atoa.