Pagrebyo sa Doktrinal nga Kahanas 3
Sabta ug Ipasabot
Importante sa pag-angkon og doktrinal nga kahanas ang pagsabot sa mga piho nga mga tudling sa kasulatan ug ang pagpasabot sa mga kamatuoran nga gitudlo niini. Tinguha niini nga leksiyon nga tabangan ka nga mas makasabot ug magpraktis sa pagpasabot sa doktrina nga gitudlo sa mosunod nga mga tudling sa doktrinal nga kahanas: Mateo 5:14–16; Lucas 2:10–12; Juan 3:5; Juan 3:16.
Paggamit og nagkalain-lain nga mga pamaagi ug paagi. Ang paggamit og lain-laing pamaagi sa pagtudlo makatabang usab sa pagdapit sa mga estudyante kinsa nagkat-on sa lahi nga mga paagi.
Pag-andam sa estudyante: Pagpili og usa ka makahuloganong tudling sa doktrinal nga kahanas gikan sa Bag-ong Tugon. Pag-andam nga ipaambit sa klase kon nganong makahuluganon kanimo kini nga tudling.
Mga Posible nga Kalihokan sa Pagkat-on
Lagmit nga kinahanglang magtudlo og leksiyon sa usa ka tudling sa doktrinal nga kahanas isip puli niini nga leksiyon sa pagrebyo. Tan-awa ang iskedyul sa gipaspason nga gihatag sa direktor sa lugar o rehiyon o koordinitor aron masiguro nga matudlo ang matag leksiyon sa tudling sa doktrinal nga kahanas samtang anaa sa sesyon ang seminary.
Sa unsang paagi ka pinakamaayo nga makakat-on?
Adunay daghang paagi sa pagkat-on, ug lahi ang atong paagi sa pagkat-on ug paghinumdom sa impormasyon.
Ikonsiderar ang pagpakita sa mosunod nga listahan. Dapita ang mga estudyante nga basahon kining mga estilo sa pagkakat-on ug iranggo kini sa ilang mga journal sa pagtuon gikan sa 1 hangtud sa 4, nga ang 1 mao ang labing gigamit nila ug ang 4 mao ang pinaka-dili nila gamiton.
-
Paghulagway diha sa imong hunahuna: Makakat-on ako pinaagi sa pagtan-aw ug paghunahuna. Ang pagdrowing, pagkolor, mga tsart, mga graph, ug visual media makatabang kanako nga makakat-on ug mahinumdoman ang impormasyon.
-
Pagpaambit sa ubang tawo: Ang pagsulat ug pagsulti sa ubang tawo makatabang kanako nga mas maayo nga makaproseso ug makakat-on.
-
Independiyenteng pagtuon: Mas gusto nakong magtuon nga mag-inusara, ug kumpiyansa ako sa pagtuki sa mga butang sa independiyente nga paagi.
-
Aktibo nga pagkat-on: Pinakamaayo akong makakat-on pinaagi sa paggamit sa akong mga lanin-laing bahin sa lawas, sama sa paghikap, pagsimhot, pagdungog, ug paglihok sa akong lawas.
Hunahunaa kon giunsa pagtukma sa Manluluwas ang Iyang pagtudlo aron matubag ang mga panginahanglan niadtong Iyang gitudloan.
-
Ngano kaha nga migamit ang Manluluwas og lain-laing mga estilo sa pagtudlo sa ubang tawo? Unsa ang gitudlo niini kanimo mahitungod Kaniya?
IIpahiangay ang mosunod nga pagpraktis nga magdepende sa kon pila ug unsa nga mga tudling ang makahatag og benepisyo sa mga estudyante sa pagrebyo.
Paggamit sa imong estilo sa pagkat-on sa doktrinal nga kahanas
Pagtagana og panahon aron basahon ang mosunod nga mga pakisayran sa doktrinal nga kahanas sa Bag-ong Tugon. Tan-awa kon mahinumdoman nimo ang nalambigit nga importanteng hugpong sa mga pulong sa kasulatan.
-
Mateo 5:14–16
-
Lucas 2:10–12
-
Juan 3:5
-
Juan 3:16
Kung nakompleto sa mga estudyante ang pagandam sa estudyante para niini nga leksiyon, ikonsiderar ang pag-awhag kanila nga ipaambit kon unsang mga tudling ang makahuloganon kanila ug ngano.
-
Unsa niini nga mga tudling ang gibati nimo nga nasabtan nimo pag-ayo? Unsa ang gusto nimong mas masabtan?
Kompletoha ang kalihokan A, B, C, o D gamit ang isa sa mga miaging tudling sa doktrinal nga kahanas (o laing tudling sa doktrinal nga kahanas gikan sa Bag-ong Tugon) nga gusto nimong mas masabtan. Kon adunay panahon, pagkompleto og daghang mga kalihokan gamit ang lain-laing mga tudling sa doktrinal nga kahanas.
A: Paghulagway diha sa imong hunahuna
Paghimo og drowing, collage [gitapot nga mga hulagway], meme, pulong nga sining, word cloud [pundok sa mga pulong nga gihan-ay sa lain-laing hut-ong], o uban pang visual nga representasyon nga nagpakita kon unsa ang gitudlo sa imong tudling. Pindota kini nga mga link alang sa pipila ka mga pananglitan:
B: Pagpakigbahin sa ubang tawo
Paghimo og plano aron itudlo ang imong tudling. Paghuna-huna og mga pangutana nga imong isukna aron tabangan kadtong imong gitudloan nga makasabot sa tudling, maghimo og video nga nagpasabot sa kahulogan sa mga importanteng pulong ug hugpong sa pulong, o mogamit og musika aron tudloan ang ubang tawo.
C: Pagtuon sa independiyente nga paagi
Pagpili og mga importanteng pulong gikan sa tudling nga tun-an. Irekord ang mga kahulogan, mga cross-reference, o mga pamahayag gikan sa mga lider sa Simbahan nga nagpalawom sa imong pagsabot.
D: Aktibo nga pagkakat-on
Paghimo o pag-ila og mga mahikap nga butang o mga sundanan nga mahimong magrepresenta sa tudling o mga partikular nga pulong o hugpong sa pulong gikan sa tudling. Pananglitan, alang sa Mateo 5:14–16 , mahimo kang mogamit og lain-laing mga gigikanan sa kahayag aron ipakita ang “pasigaa ang inyong kahayag.”
Ikonsiderar ang pagdapit sa mga estudyante nga ipaambit ang ilang nakat-onan diha sa magkapares o gagmay nga grupo. Unya ipakita ang mosunod nga sukdanan ug mga pangutana aron pamalandongan sa mga estudyante ang ilang kasinatian sa pagkat-on.
(A) Miuyon (B) Medyo miuyon (C) Wala miuyon dili usab supak (D) Wala miuyon
-
Mas nasabtan nako ang (mga) tudling nga akong gipili.
-
Gibati nako karon nga mas kompiyansa sa akong abilidad nga ipasabot ang (mga) tudling nga akong gipili sa laing tawo kon kinahanglanon nako.
-
Nagtuo ako nga mapuslanon kanako ang paggamit og parehong paagi alang sa pagkat-on ug pagsusi sa uban pang mga tudling sa doktrinal nga kahanas.
Dapita ang mga estudyante sa paghisgot sa ilang mga tubag sa mosunod nga mga pangutana. Tabangi sila nga masabtan nga ang ilang pag-usab naggikan kang Jesukristo ug sa Iyang balaang tabang. Awhaga ang mga estudyante nga mangayo sa Langitnong Amahan alang sa skaugalingon nga tabang sa tanan nilang pagtuon.