Toe Faamanatu 24 o le Atamai i Aoaoga Faavae
Faaaoga Fuaitau o le Atamai i Aoaoga Faavae
O se tasi o faamoemoega o le atamai i aoaoga faavae o le fesoasoani atu lea ia te oe e aoao pe faapefea ona faaaoga fuaitau o le atamai i aoaoga faavae i lou lava olaga. O lenei lesona o le a tuuina atu ai ia te oe ni avanoa e faataitai ai ona faaaoga ni isi o fuaitau o le atamai i aoaoga faavae i ni tulaga eseese o le olaga moni.
Sauniuniga a le tagata aoga: Valaaulia tagata aoga e faaaoga le polokalama o le Atamai i Aoaoga Faavae po o isi metotia e faataitai ai le taulotoina o mau faasino o le atamai i aoaoga faavae o le Feagaiga Fou ma fasifuaitau autu o mau. Fai atu ia i latou e o mai saunia i le vasega e faasoa mai se fuaitau se tasi na latou maua ni aafiaga i le faaaogaina.
Gaoioiga E Ono Mafai Ona Aoao Ai
Faaaoga mataupu faavae o le talalelei
E ono manaomia ona aoaoina se lesona o fuaitau o le atamai i aoaoga faavae e suitulaga i lenei lesona toefaamanatu. Tagai i le faasologa faatulagaina o lesona ua saunia e le faatonu po o le taitai faamaopoopo o le eria po o le risone ina ia mautinoa o lesona o fuaitau o le atamai i aoaoga faavae taitasi o le a aoaoina a o faaauau taualumaga o le seminare.
Sa faamalamalama mai e Peresitene Dieter F. Uchtdorf, i lena taimi a o i ai i le Au Peresitene Sili, le taua o le faaaogaina o mataupu faavae o le talalelei. Matamata le vitio “E Faatatau i le Faamaoni” mai le faailotaimi 11:24 i le 12:02, o loo maua i le ChurchofJesusChrist.org, pe faitau le faamatalaga lenei.
O iinei i le Ekalesia a Iesu Keriso e mafai ona e matua ai faaleagaga ma faalatalata atili atu ai i le Faaola e ala i le faaaogaina o mataupu faavae o le talalelei i lea aso ma lea aso.
Faatasi ai ma le onosai ma le tutumau, e oo lava i ni nai faatinoga iti o le avea ma soo po o sina aloiafi itiiti lava o le talitonu e mafai lava ona avea ma se afi tele e musaesae o se olaga faapaiaina. O le mea moni, o le auala lena e amata ai le tele o afi tetele—na o sina aloiafi lava.
(Dieter F. Uchtdorf, “E Faatatau i le Faamaoni,” Ensign po o le Liahona, Me 2015, 82)
Mafaufau i ni isi o upumoni o le talalelei sa e faaaogaina lata mai nei i lou olaga.
-
Na faapefea e le iloaina o na upumoni ona mamanu ai filifiliga na e faia?
I lenei lesona o le a e maua ai le avanoa e auai ai i gaoioiga ia e mafai ona fesoasoani ia te oe e faaaoga ai mataupu faavae o le talalelei i lea aso ma lea aso.
Toe faamanatu fuaitau o le atamai i aoaoga faavae
O le toe faamanatuina o mau faasino o le atamai i aoaoga faavae ma fasifuaitau autu e tatau ona faaalu ai na o sina vaega itiiti o le vasega. O le vaega lenei o le gaoioiga ua faamoemoe e fesoasoani i tagata aoga e toe manatua ai fuaitau ma faailoa vave mai upumoni ua uma ona latou aoaoina.
Vaavaai puupuu i fuaitau nei o le atamai i aoaoga faavae, ma mafaufau e uiga i mea ua e faia e ola ai.
Faaali atu le siata lenei ina ia mafai ona faasino i ai tagata aoga a o faagasolo le lesona.
Atamai i Aoaoga Faavae mo le Feagaiga Fou: 1 Korinito–Faaaliga
|
1 Korinito 6:19–20 |
“O lo outou tino o le malumalu lea o le Agaga Paia.” |
|
1 Korinito 11:11 |
“E leai se tane pe a le o i ai le fafine, e leai foi se fafine pe a le o i ai le tane, i le Alii.” |
|
1 Korinito 15:20–22 |
“Aua faapei ona oti uma ia Atamu, e faapea foi ona faaolaina uma ia Keriso.” |
|
1 Korinito 15:40–42 |
I le Toetutu, o loo i ai tikeri e tolu o le mamalu. |
|
Efeso 1:10 |
“Ina ia na faaopoopoina ia Keriso i le sauniga i le faaatoaga o tausaga, o i latou uma lava o i le lagi, atoa ma i latou o i le lalolagi.” |
|
Efeso 2:19–20 |
O le Ekalesia o loo ua “atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea.” |
|
2 Tesalonia 2:1-3 |
“O le aso o Keriso … e le oo mai lena aso, seia muai ona taunuu o le tete’a ese.” |
|
2 Timoteo 3:15–17 |
“O Tusi Paia, e mafaia ona faapoto ai ia te oe e iu ai i le ola i le faatuatua.” |
|
Eperu 12:9 |
O lo tatou Tama Faalelagi o “le Tamā o tatou agaga.” |
|
Iakopo 1:5–6 |
“A e afai ua leai se poto i so outou, ina ole atu ia i le Atua.” |
|
Iakopo 2:17–18 |
“O le faatuatua, pe afai e le i ai galuega, e mate lava.” |
|
1 Peteru 4:6 |
“Na folafola atu ai le talalelei i e ua oti.” |
|
Faaaliga 20:12 |
“Ona faamasinoina ai lea o e na oti … e tusa ma a latou amio.” |
Faaaoga upumoni i le olaga
E mafai ona fesoasoani le matamata i auala e faaaoga ai e isi ia upumoni o le talalelei. Afai e mafai, matamata le vitio “Teachings of Thomas S. Monson: Rescuing Those in Need” (0:30 to 5:01), o loo maua i le ChurchofJesusChrist.org. Vaavaai pe na faapefea ona ola tagata i le upumoni “o le faatuatua, pe afai e le i ai galuega, e mate lava” (Iakopo 2:17).
-
Na faapefea ona faaaoga e tagata lenei upumoni?
Mafaufau pe na faapefea e le iloaina ma le ola ai i upumoni o le talalelei ona fesoasoani ia te oe i taimi ua tuanai, ma fesoasoani ia te oe i le taimi nei, ma mafai ona fesoasoani ia te oe i le lumanai. Faamaea le gaoioiga lenei e fesoasoani ai ia te oe e faataitai ai le faaaogaina o upumoni mai fuaitau o le atamai i aoaoga faavae sa e suesueina.
O se tasi auala e fetuunai ai lenei gaoioiga o le valaaulia lea o tagata aoga taitasi e fai laasaga nei:
-
Filifili se fuaitau se tasi o le atamai i aoaoga faavae, ma tusi le mau faasino ma le fasifuaitau autu i luga o se fasipepa. Ia aofia ai lou igoa i luga o le pepa.
-
Fesuiai pepa ma se isi tagata aoga, ma mulimulitai i faatonuga o loo lisi atu i lalo o le ulutala “Taimi ua Tuanai.”
-
Toe fesuiai pepa, ma faamaea faatonuga mo le “Taimi nei.”
-
Fesuiai pepa mo se taimi mulimuli, ma mulimulitai i faatonuga mo le “Lumanai.”
-
Toe faafoi pepa i le uluai tagata aoga.
A uma le gaoioiga, mafaufau e faasoa mai e le vasega se mea na tusia e se tasi o le vasega latou te fiafia ai pe na faagaeetia ai i latou.
Taimi ua Tuanai
Mafaufau i se taimi na e faalagolago ai i se tasi o upumoni mai se fuaitau o le atamai i aoaoga faavae. Afai e le mafai ona e mafaufau i se taimi patino i lou olaga, mafaufau i se tagata e te iloa po o se tasi mai se tala i tusitusiga paia o lē sa faamanuiaina a o latou faatinoina se upumoni i se fuaitau o le atamai i aoaoga faavae.
Tusifaamaumau faamanuiaga na oo mai i le ola ai i lenei upumoni. Ia mautinoa ua faateleina pe mafai foi ona faateleina lou lotomautinoa i le Tama Faalelagi ma Iesu Keriso.
Taimi Nei
Mafaufau i ou manaoga ma tulaga o i ai nei. Toe faamanatu fuaitau o le atamai i aoaoga faavae, ma filifili se fuaitau e te lagona e mafai ona e mulimuli lelei ai i lou olaga. Tusifaamaumau mea e mafai ona e faia e faatino ai i le faatuatua ma faaaoga le fuaitau.
Lumanai
Filifili se fuaitau o le atamai i aoaoga faavae, ma tusi se ata faataitai e mafai ona tupu ia te oe i le lumanai lea e mafai ai e upumoni o loo aoaoina i le fuaitau ona fesoasoani ia te oe e faatino ai i le faatuatua.
Atonu e fesoasoani le faamanatu atu i tagata aoga o aoaoga a Elder Uchtdorf mai le amataga o le lesona. O le talanoaina o fesili e pei o nei e mafai ona fesoasoani i tagata aoga e toe manatunatu ai i le taua o le faaaogaina o upumoni o le talalelei i o latou olaga.
Mafaufau pe na faapefea e le iloaina ma le faatinoina o le upumoni ona aafia ai lou olaga ma faaiuga.
-
Na faapefea ona fesoasoani le ola ai i le talalelei e faamalosia lou faatuatua ia Keriso?
-
O le a se mea e mafai ona e faia e manatua atili ai upumoni a Keriso a o e faia filifiliga i le lumanai?
Gaoioiga Faaopoopo e Aoao Ai
O le faatinoina
Mafaufau e vaevae le vasega i ni vaega toalaiti ma valaaulia i latou e fatufatu ma faatino ni ata faataitai e mafai ona fesoasoani ai upumoni mai fuaitau o le atamai i aoaoga faavae. Ona mafai lea e tagata aoga o loo matamata i le ata faataitai ona mafaufau e uiga i upumoni mai fuaitau o le atamai i aoaoga faavae e mafai ona fesoasoani i se tasi i le ata faataitai ona faatino i le faatuatua. O se isi faatinoga o lenei gaoioiga o le valaaulia lea o vaega e faatino se ata faataitai, e aofia ai le ala e faatino ai ma le faamaoni i le tulaga ua tuuina atu, i le faaaoga ai o se tasi o fuaitau o le atamai i aoaoga faavae e fai ma o latou taiala.